བདུན་པ་རྗེས་དཔག་བཤད་པ།
བདུན་པ་རྗེས་དཔག་བཤད་པ་ལ།
ཚད་མ་མདོ་ལས། རང་དོན་ནི།ཚུལ་གསུམ་རྟགས་ལས་དོན་མཐོང་ཡིན། །ཞེས་དང༌། རིགས་ཐིགས་ལས། དེ་ལ་རང་གི་དོན་ནི་རྗེས་སུ་དཔག་པར་བྱ་བ་ཚུལ་གསུམ་པའི་རྟགས་གསུམ་ལས་ཤེས་པ་གང་ཡིན་པའོ། །ཞེས་པའི་གཞུང་འདི་དག་བྱུང༌། དེ་ལ་རྗེས་དཔག་བཤད་པ་ལ་དགག་བཞག་གཉིས་ལས། དང་པོ་ནི། ཁ་ཅིག་ན་རེ། རྗེས་དཔག་སྐད་ཅིག་གཉིས་པ་རྗེས་དཔག་ཡིན་ཟེར་ན། དེ་མི་འཐད་པར་ཐལ། རྗེས་དཔག་ནི་རྟགས་བཀོད་པ་ལས་སྐྱེས་པའི་དྲན་པ་ལས་དངོས་སུ་སྐྱེས་པ་ཞིག་དགོས་པའི་ཕྱིར། དེར་ཐལ། ཚུལ་གསུམ་པའི་རྟགས་བཀོད་པའི་དྲན་པ་ལས་རང་དོན་རྗེས་དཔག་དངོས་སུ་སྐྱེས། སྒྲུབ་ངག་བཀོད་པ་ལས་ཚུལ་གསུམ་དྲན་པ་དངོས་སུ་སྐྱེས་པའི་ཕྱིར་ཏེ། རྣམ་ངེས་ལས། མ་ཡིན་ཏེ། འཇུག་པ་ཐ་དད་པའི་ཕྱིར་རོ། །ཞེས་དང༌། དེའི་འཐད་ལྡན་ལས། བརྒྱུད་པའི་ཁྱད་པར་མེད་པ་ཡིན་ཡང་དངོས་ཀྱི་འདི་དག་གི་བྱ་བ་ནི་ཐ་དད་པ་ཡོད་པ་ཡིན་ནོ། །ཞེས་གསུངས་པའི་ཕྱིར་རོ། །