གཉིས་པ་དགེ་ཚུལ་གྱི་སྡོམ་པའི་ཆོ་ག་བསྟན་པ་ལ་དགེ་ཚུལ་ཉེ་བར་བསྒྲུབ་ཚུལ།

གཉིས་པ་དགེ་ཚུལ་གྱི་སྡོམ་པའི་ཆོ་ག་བསྟན་པ་ལ་དགེ་ཚུལ་ཉེ་བར་བསྒྲུབ་ཚུལ་དང༌།

ཐུན་མོང་བ་བླ་མ་རྣམས་ཀྱི་རྣམ་བཞག་བཤད་པ་དང་གཉིས། དང་པོ་ནི། རྩ་བར། དག་ན་ཉེ་བར་བསྒྲུབ་པར་བྱ། ཞེས་སོ། །འདིའི་དོན་ལ་ལྔ་ལས། དང་པོ་དགོས་པའི་དོན་ནི་དགེ་ཚུལ་གྱི་སྡོམ་པ་འཐོབ་པ་དང༌། བསྙེན་རྫོགས་ཀྱི་སྣོད་དུ་རུང་བ་དང༌། ཚིགས་ལས་འདས་པའི་ཉེས་བྱས་ཁེགས་པའོ། ། གཉིས་པ་ཡུལ་གང་ལ་བླང་བ་ནི། མཁན་སློབ་དང་ཞུ་བའི་ཡུལ་དགེ་འདུན་དང་བཅས་པ་ལས་བླང་སྟེ། དེ་ཡང་མཁན་པོ་དང་སློབ་དཔོན་གྱི་མཚན་ཉིད་ནི་སྐབས་འོག་ཏུ་འཆད་དོ། །དགེ་འདུན་ནི། དགེ་སློང་ཚུལ་ཁྲིམས་དག་ཅིང་མཚན་མཐུན་ལྟ་བ་མཐུན། །ཐ་སྙད་གསུམ་དང་ལྡན་ཞིང་ཐ་མལ་ལུས་སུ་གནས། །ས་གཞན་གནས་མིན་དེ་དག་འདུག་པའི་སྤྱོད་ལམ་མཐུན། །བཞིར་ལོངས་དགེ་འདུན་ཚོགས་པ་གཅིག་ཏུ་འདུས་པར་གྱུར་པའོ། །དེ་ཡང་རབ་ཏུ་འབྱུང་བའི་ཞུ་བ་བྱེད་པའི་དུས་ན། ཞུ་བའི་ཡུལ་དགེ་འདུན་དགེ་སློང་བཞིར་ལོངས་དང༌། ཞུ་བ་པོ་དགེ་སློང་གཅིག་སྟེ། དགེ་སློང་ལྔ་ཡན་ཆད་དོ། །དངོས་གཞིའི་དུས་ན་དགེ་འདུན་ལ་སྐྱབས་སུ་འགྲོ་བའི་རྟེན་དགེ་སློང་བཞི་ཡན་ཆད་དོ། །དེ་ཡང་མཁན་པོ་དང་དགེ་འདུན་ཕུན་སུམ་ཚོགས་པའི་རྒྱུ་ཡིན་གྱི། དེ་དག་མེད་ཀྱང་རྒྱུ་གཞན་ཚང་ན་དགེ་ཚུལ་གྱི་སྡོམ་པ་སྐྱེའོ། །སློབ་དཔོན་མེད་ན་ནི་མི་སྐྱེ་སྟེ། ཊཱི་ཀ་ལས། དགེ་ཚུལ་གྱི་སྡོམ་པ་ནི་མཁན་པོ་ལས་གཞན་སློབ་དཔོན་ལས་འཐོབ་པ་ཁོ་ན་ཡིན་ནོ། །ཞེས་གསུངས་པས་སོ། །