གཉིས་པ་རང་ལུགས་བཤད་པ།
གཉིས་པ་རང་ལུགས་བཤད་པ་ལ།
མཚན་ཉིད། དབྱེ་བ་གཉིས། དང་པོ་རྗེས་དཔག་གི་མཚན་ཉིད། རང་གི་རྟེན་ཚུལ་གསུམ་པའི་རྟགས་ཡང་དག་ལ་དངོས་སུ་བརྟེན་ནས་རང་གི་གཞལ་བྱ་ལྐོག་གྱུར་ལ་མི་བསླུ་བའི་ཤེས་པ། མཚན་གཞི་ནི་བྱས་པའི་རྟགས་ལ་དངོས་སུ་བརྟེན་ནས་སྡུག་བདེན་མི་རྟག་པ་གསར་དུ་རྟོགས་པའི་བློ་ལྟ་བུའོ། །རྗེས་དཔག་དང་རྗེས་དཔག་གི་ཚད་མ་དོན་གཅིག རྗེས་དཔག་ནི་རྟགས་ལྟར་སྣང་བཀོད་པ་ལས་སྐྱེས་པ་མ་ཡིན་པར་རྟགས་ཡང་དག་ལ་བརྟེན་ཞིང༌། རང་གི་ཡུལ་དེ་རང་ལ་མངོན་དུ་མ་གྱུར་བར་ལྐོག་ཏུ་གྱུར་བ་དང༌། མི་བསླུ་བ་ནི་རང་གི་འཛིན་སྟངས་ལ་མི་བསླུ་བ་སྟེ་རང་གིས་ཡུལ་གཞལ་བ་དེ་གཞལ་བ་ལྟར་གྲུབ་པའི་ཤེས་པའོ། །