གཉིས་པ་ཚད་མའི་དྲིས་ལན་ལ་ཉེར་བཞི་ཡོད་པ་ལས།
གཉིས་པ་ཚད་མའི་དྲིས་ལན་ལ་ཉེར་བཞི་ཡོད་པ་ལས།
དང་པོ་ལ་དྲི་བ་དང་ལན་གཉིས་ལས། དང་པོ་དྲི་བ་ནི། ཚད་མ་རྣམ་འགྲེལ་གྱི་མཆོད་བརྗོད་ཀྱིས་སྐུ་གསུམ་འཕྲིན་ལས་དང་བཅས་པ་ལ་བསྟོད་ཚུལ་དང་ཕུན་སུམ་ཚོགས་པ་བཞི་ལ་བསྟོད་ཚུལ་ཇི་ལྟར་ཡིན་ཞེས་པའོ། །གཉིས་པ་ལན་ནི། ཚད་མ་རྣམ་འགྲེལ་ལས། རྟོག་པའི་དྲྭ་བ་རྣམ་བསལ་ཞིང༌། །ཟབ་ཅིང་རྒྱ་ཆེའི་སྐུ་མངའ་བ། །ཀུན་ཏུ་བཟང་པོའི་འོད་ཟེར་དག ། ཀུན་ནས་འཕྲོ་ལ་ཕྱག་འཚལ་ལོ། །ཞེས་པའི་སྐུ་གསུམ་འཕྲིན་ལས་དང་བཅས་པ་ལ་བསྟོད་པ་དང༌། ཕུན་སུམ་ཚོགས་པ་བཞི་ལ་བསྟོད་ཚུལ་གཉིས་ལས། དང་པོ་ནི། རྐང་བ་དང་པོ་གཉིས་ཀྱིས་རང་དོན་ཕུན་ཚོགས་དང༌། ཀུན་ཏུ་བཟང་པོ་ཞེས་པའི་གཞན་དོན་ཕུན་ཚོགས་དང༌། འོད་ཟེར་དག ། ཀུན་ནས་འཕྲོ་ཞེས་པས་དེ་སྒྲུབ་པའི་ཐབས་ཕུན་ཚོགས་དང་གསུམ་གྱི་སྒོ་ནས་བསྟོད་པའི་ཕྱིར། མཆོད་བརྗོད་ཀྱི་དངོས་བསྟན་གྱི་ཀུན་བཟང་ལ་བཅོམ་ལྡན་འདས་འཇོག་པའི་ཕྱིར་ཏེ། ཤཱཀྱ་བློའི་འགྲེལ་བཤད་ལས། བསྟོད་པ་ལ་ཡང་རང་གི་དོན་ཕུན་སུམ་ཚོགས་པ་དང༌། གཞན་གྱི་དོན་ཕུན་སུམ་ཚོགས་པ་དང༌། གཞན་གྱི་དོན་ཕུན་སུམ་ཚོགས་པའི་ཐབས་དང་རྣམ་པ་གསུམ་མོ། །ཞེས་དང༌། གང་གི་ཚེ་ཀུན་ཏུ་བཟང་པོ་ཞེས་པའི་སྒྲར་གྲགས་པས་བྱང་ཆུབ་སེམས་དཔའ་ཡིན་པར་མི་བཟུང་བ་དེའི་ཚེ་ནི་འདི་སངས་རྒྱས་བཅོམ་ལྡན་འདས་ལ་མཆོད་པ་ཡིན་ནོ། །ཞེས་སོགས་སོ། །རང་དོན་ཕུན་ཚོགས་ལ་སྤངས་པའི་དང་ཟབ་པའི་དང་རྒྱ་ཆེ་བའི་ཁྱད་པར་གསུམ་གྱི་སྒོ་ནས་རིམ་བཞིན་ངོ་བོ་ཉིད་སྐུ་དང་ལོངས་སྐུ་དང་སྤྲུལ་སྐུ་ལ་བསྟོད་པ་ཡིན་ཏེ། རྟོག་པའི་དྲ་བ་རྣམ་བསལ་ཞེས་པས་ངོ་བོ་ཉིད་སྐུ་བསྟན་པ་དང༌། ཟབ་ཅིང་སྐུ་མངའ་ཞེས་པས་ལོངས་སྐུ་བསྟན་པ་དང༌། རྒྱ་ཆེའི་སྐུ་མངའ་ཞེས་པས་སྤྲུལ་སྐུ་བསྟན་པ་ཡིན་ཏེ། ཤཱཀྱ་བློའི་རྣམ་འགྲེལ་འགྲེལ་བཤད་ལས། དང་པོར་ཕྱེད་གོང་མས་རང་གི་དོན་ཕུན་སུམ་ཚོགས་པ་སྐུ་གསུམ་གྱི་མཚན་ཉིད་ཀྱང་སྒྲིབ་པ་སྤངས་པའི་ཁྱད་པར་དང་ཟབ་པའི་ཁྱད་པར་དང་རྒྱ་ཆེ་བའི་ཁྱད་པར་དང་ཁྱད་པར་རྣམ་པ་གསུམ་གྱིས་འཕགས་པ་བསྟན་ཏེ། ཞེས་པ་ནས།སྐུ་གསུམ་པོ་ངོ་བོ་ཉིད་དང་ལོངས་སྤྱོད་རྫོགས་པ་དང་སྤྲུལ་པ་ཞེས་བྱ་བ་ཡོད་པ་དེ་ནི། རྟོག་པའི་དྲ་བ་རྣམ་བསལ་ཞིང༌། །ཟབ་ཅིང་རྒྱ་ཆེའི་སྐུ་མངའ་བ། །ཡིན་ནོ། །ཞེས་གསུངས་པའི་ཕྱིར། རྟོག་པའི་དྲ་བ་བསལ་བ་དང༌། ཟབ་པ་དང་རྒྱ་ཆེ་ཚུལ་གསུམ་ཡོད་དེ། གང་ཟག་དང་ཆོས་ཀྱི་བདག་འཛིན་གཉིས་ཀྱི་རྟོག་པ་དང༌། དེ་ཉིད་ཀྱི་འཆང་བས་ན་དྲ་བ་ཡིན་ལ། དེ་དང་བག་ཆགས་དང་བཅས་པ་སྤངས་པ་ནི་རྣམ་པར་བསལ་བའི་དོན་དང༌། ལོངས་སྐུ་ཉན་རང་སོགས་ཀྱིས་མངོན་སུམ་གྱི་སྤྱོད་ཡུལ་མ་ཡིན་པས་ན་ཟབ་པ་ཡིན་ལ། སྤྲུལ་སྐུས་སེམས་ཅན་གྱི་དོན་མཐའ་དག་དང་ཤེས་བྱ་ཐམས་ཅད་ལ་ཁྱབ་པས་ན་རྒྱ་ཆེ་བར་བཤད་པའི་ཕྱིར་ཏེ། ཤཱ་ཀྱ་བློའི་འགྲེལ་བཤད་ལས། རྟོག་པ་ནི་སེམས་དང་སེམས་ལས་བྱུང་བ་ཁམས་གསུམ་པ་བདག་དང་བདག་གི་བ་ལ་སོགས་པའི་རྣམ་པར་ཞུགས་པ་དང༌། བཟུང་བ་དང་འཛིན་པའི་རྣམ་པར་ཞུགས་པ་རྣམས་སོ། སྐུ་གང་ལ་དེ་རྣམ་པར་བསལ་ཞིང༌། བག་ཆགས་དང་བཅས་ཏེ་ཡང་མི་སྐྱེ་བའི་ཆོས་ཉིད་དུ་བྱས་པ་ཡོད་པ་དེ་དག་ལ་དེ་སྐད་ཅེས་བྱའོ། །འདིས་ནི་སྒྲིབ་པ་སྤངས་པའི་ཁྱད་པར་བཤད་དོ། །ཟབ་པ་དང་རྒྱ་ཆེ་བའི་ཁྱད་པར་དག་ནི་ཟབ་ཅིང་རྒྱ་ཆེ་བའི་ཚིག་གཉིས་ཀྱིས་བསྟན་ཏོ། །བཅོམ་ལྡན་འདས་གང་ལ་རྟོག་པའི་དྲ་བ་རྣམ་པར་བསལ་བ་དང༌། ཉན་ཐོས་དང་རང་སངས་རྒྱས་ལ་སོགས་པའི་སྤྱོད་ཡུལ་མ་ཡིན་པའི་ཕྱིར་ཟབ་པ་དང༌། ཤེས་བྱ་མཐའ་དག་དང་སེམས་ཅན་གྱི་དོན་མཐའ་དག་ལ་ཁྱབ་པའི་ཕྱིར། རྒྱ་ཆེ་བའི་སྐུ་གསུམ་པོ་ངོ་བོ་ཉིད་སྐུ་དང༌། ལོངས་སྤྱོད་རྫོགས་པ་དང༌། སྤྲུལ་པ་ཞེས་བྱ་བ་ཡོད་པ་དེ་ནི་རྟོག་པའི་དྲ་བ་རྣམས་བསལ་ཞིང་ཟབ་ཅིང་རྒྱ་ཆེས་སྐུ་མངའ་བ་ཡིན་ནོ། །བཟང་པོ་ནི་དགེ་ལེགས་ཏེ་མངོན་པར་མཐོ་བ་དང་ངེས་པར་ལེགས་པའི་མཚན་ཉིད་དོ། །གང་ལས་དེ་དོན་དུ་གཉེར་བ་རྣམས་ལ་དེ་ཀུན་ཏུ་སྟེ་མ་ལུས་པར་སྐལ་བ་ཇི་ལྟ་བ་བཞིན་དུ་འབྱུང་བ་དེ་ནི་ཀུན་ཏུ་བཟང་པོའོ། །ཞེས་གསུངས་པའི་ཕྱིར། ཡང་ཤཱཀྱ་བློའི་འགྲེལ་བཤད་ལྟར་ན་བྱང་སེམས་ཀུན་བཟང་ལ་སྦྱར་ཚུལ་ཡང་ཡོད་དེ། སྐུ་གསུམ་བཏགས་པ་བ་རྟོག་པའི་དྲ་བ་བྱང་སེམས་ཀྱི་སའི་སྒྲིབ་པ་བདག་འཛིན་གཉིས་ཅི་རིགས་དང་བྲལ་བ་དང༌། ཉན་རང་སོགས་ཀྱི་མངོན་སུམ་གྱི་སྤྱོད་ཡུལ་མ་ཡིན་པའི་ས་བརྒྱད་པ་ཡན་ཆད་ཀྱི་རྡོ་རྗེའི་སྐུ་དང༌། ཕྱིན་དྲུག་སོགས་བྱང་སེམས་ཀྱི་རྒྱ་ཆེ་བའི་ཁྱད་པར་ལ་བྱེད་པ་ཡིན་པའི་ཕྱིར་ཏེ། ཤཱཀྱ་བློའི་འགྲེལ་བཤད་ལས། ཀུན་ཏུ་བཟང་པོ་ཞེས་བྱ་བའི་སྒྲ་འདི་ནི་ཐེག་པ་ཆེན་པོ་ལས་བྱང་ཆུབ་སེམས་དཔའི་ཁྱད་པར་ཞིག་ལ་གྲགས་པས་འདི་བྱང་ཆུབ་སེམས་དཔའ་ལ་མཆོད་པ་ཡིན་ཏེ། ཚིག་ནི་སྔ་མ་བཞིན་དུ་སྦྱར་བར་བྱའོ། ཁྱད་པར་ཡོད་དེ། ཞེས་པ་ནས། རྒྱ་ཆེ་བ་བྱང་སེམས་ཀྱི་ཆེ་བ་ནི་བདག་ཉིད་ལས་སོ། །བྱང་ཆུབ་དཔའ་སེམས་དཔའ་རྣམས་ལ་རྗེས་སུ་མཐུན་པའི་སྐུ་གསུམ་ནི་ཡོད་པ་ཁོ་ན་སྟེ། ཞེས་སོགས་དང༌། རྣམ་འགྲེལ་གྱི་འགྲེལ་བཤད་རིན་ཆེན་ཕྲེང་བ་ལས།རང་དོན་དང་གཞན་དོན་ཕུན་ཚོགས་ཀྱིས་བསྟོད་པ་སྟེ། རང་དོན་ནི་བདག་དང་བདག་གིར་ལྟ་བ་སོགས་རྟོག་པའི་དྲ་བ་བག་ཆགས་དང་བཅས་པ་རྣམ་པར་བསལ་བ་ངོ་བོ་ཉིད་ཀྱི་སྐུ་དང༌། ཉན་རང་སོགས་ཀྱིས་སྤྱོད་ཡུལ་མིན་པས་ཟབ་པ་ལོངས་སྤྱོད་རྫོགས་པའི་སྐུ་དང༌། མཁྱེན་བརྩེས་ཀུན་ལ་ཁྱབ་པས་རྒྱ་ཆེ་བ་སྤྲུལ་བའི་སྐུ་མངའ་བས་སོ། །ཞེས་དང༌། རྫོགས་པའི་སངས་རྒྱས་ལ་ཆོས་ཅན། རང་དོན་ཕུན་ཚོགས་མངའ་སྟེ། མཐར་ཕྱིན་པའི་སྐུ་གསུམ་མཉེས་པས་སོ། །ཆོས་ཅན། གཞན་དོན་ཕུན་ཚོགས་མངའ་སྟེ། མངོན་མཐོ་ངེས་ལེགས་སོགས་དགེ་ལེགས་བཟང་པོ་ཀུན་ཏུ་སྟེ་མ་ལུས་པར་གདུལ་བྱའི་སྐལ་བ་དང་མཐུན་པར་འབྱུང་བའི་ཐབས་དམ་པའི་ཆོས་སྟོན་པའི་འོད་ཟེར་དག་ཀུན་ནས་འཕྲོ་བ་མཐར་ཐུག་པ་ཡིན་པས་སོ། །ཞེས་གསུངས་པའི་ཕྱིར་རོ། །གཉིས་པ་ཕུན་སུམ་ཚོགས་པ་བཞི་ལ་བསྟོད་ཚུལ་ནི། ཀུན་ཏུ་བཟང་པོའི་མཚན་ཅན་བཅོམ་ལྡན་འདས་ལ་ཕུན་སུམ་ཚོགས་པ་བཞིའི་སྒོ་ནས་བསྟོད་ཚུལ་ཡོད་དེ། རྟོག་པས་དྲ་བ་རྣམ་བསལ་ཞེས་པས་སྤངས་པ་ཕུན་ཚོགས་བསྟན། ཟབ་ཅིང་ཞེས་པས་ཇི་ལྟ་བ་རྟོགས་པའི་ཡེ་ཤེས་ཡུལ་གྱི་སྒོ་ནས་བཤད་ལ།རྒྱ་ཆེ་ཞེས་པས་ཇི་སྙེད་པ་རྣམས་མངོན་སུམ་དུ་གཟིགས་པའི་ཡེ་ཤེས་མཐར་ཐུག་བཤད་པས་རྟོགས་པ་ཕུན་ཚོགས་བསྟན། ཀུན་ཏུ་བཟང་པོ་ཞེས་པས་གཞན་དོན་ཕུན་ཚོགས་གཟུགས་སྐུ་གཉིས་བསྟན། འོད་ཟེར་དག་ཀུན་ནས་འཕྲོ་ཞེས་པས་གཞན་དོན་སྒྲུབ་པའི་ཐབས་འཕྲིན་ལས་ཕུན་ཚོགས་བཤད་པ་ཡིན་པར་བྲམ་ཟེས་གསུངས་སོ། །