གསུམ་པ་རྟེན་གང་གིས་བླང་བ།
གསུམ་པ་རྟེན་གང་གིས་བླང་བ་ལ་བཞི་ལས།
དང་པོ་ལུས་ཕུན་སུམ་ཚོགས་པ་ནི།དངོས་པོའམ་བསམ་པའི་སྒོ་ནས་ནར་སོན་པ་དང༌། ལུས་ལ་བརྟེན་པའི་བར་ཆད་མཐའ་དག་དང་བྲལ་བའོ། །དེ་ལ་དངོས་པོའི་སྒོ་ནས་ནར་སོན་པ་ནི། མངལ་དང་བཤོལ་གྱི་ཟླ་བ་དང་བཅས་ཏེ་ལོ་བདུན་ལོན་ཅིང་བྱ་རོག་སྐྲོད་ནུས་པའོ། །འོ་ན་ལོ་བདུན་མ་ལོན་པ་ལ་དགེ་ཚུལ་གྱི་སྡོམ་པ་སྐྱེའམ་མི་སྐྱེ་ཞེ་ན། ཁ་ཅིག་ན་རེ་དེ་ལ་དགེ་ཚུལ་གྱི་སྡོམ་པ་སྐྱེ་བ་ཡིན་ཏེ། ཊཱི་ཀ་ལས། དེ་ནི་སྐྱེ་བའི་ཆོས་ཉིད་ཀྱིས་རབ་ཏུ་དབྱུང་བར་མི་འོས་པ་དག་གི་མཚན་ཉིད་བསྟན་པའི་ཕྱིར། ཞེས་མཚམས་སྦྱར་ནས། རྒན་ཆེས་པ་དང་གཞོན་ཆེས་པ་དང༌། ཞེས་བཤད་པས་ཤེས་སོ་ཞེས་ཟེར་རོ། །དེ་ནི་མི་འཐད་དེ་ལོ་བདུན་མ་ལོན་པ་ལ་མ་ལོན་པར་འདུ་ཤེས་པས་དགེ་ཚུལ་གྱི་སྡོམ་པ་ལེན་པ་ཆོས་ཅན། སྡོམ་པ་མི་སྐྱེ་བར་ཐལ། ལོ་ཉི་ཤུ་མ་ལོན་པ་ལ་ནི་དགེ་སློང་གི་སྡོམ་པ་མི་སྐྱེ་བར་དངོས་སུ་གསུངས་ལ། དེ་དང་རང་སའི་ངེས་གཟུང་གི་ལོ་གྲངས་མ་ལོན་པའི་སྒོ་ནས་རྒྱུ་མཚན་མཚུངས་པའི་ཕྱིར་རོ། །ཊཱི་ཀ་ལས། དེ་ནི་སྐྱེ་བའི་ཆོས་ཉིད་ཀྱིས་ཞེས་བཤད་པ་དེ་ནི་ལག་རྡུམ་ལ་སོགས་པ་ཕལ་ཆེ་བ་རྣམས་ལ་སྡོམ་པ་སྐྱེ་བ་ལ་དགོངས་ནས་དེ་སྐད་གསུངས་པའོ། །བསམ་པའི་སྒོ་ནས་ནར་སོན་པ་ནི་ལོ་བདུན་ལོན་པ་ཉིད་དུ་འདུ་ཤེས་པའོ། །