གཞི་མེད་རྩ་བྲལ་དུ་འདོད་པ་དགག་པ།

བཞི་པ་གཞི་མེད་རྩ་བྲལ་དུ་འདོད་པ་དགག་པ་ནི། ཐམས་ཅད་གཞི་མེད་རྩ་བྲལ་ཡིན་ནོ་ཞེས། །བཞེད་པ་རྣམས་ནའང་བདག་ནི་མ་ཕོད་པས། །ཐལ་མོ་སྦྱར་ནས་སྐད་གཏོང་གྲོས་འདེབས་ཏེ། །ཀུན་གཞི་ཡེ་ཤེས་དེ་བཞིན་ཉིད་ཀྱི་དབྱིངས། །ཆོས་རྣམས་ཀུན་གྱི་གཞི་དང་གནས་དང་རྟེན། །ཆ་མེད་ཀུན་འགྲོ་ཀུན་ཁྱབ་ཡིན་པར་ནི། །རྫོགས་ལྡན་ཆོས་ལས་གསུངས་པའང་དགོངས་སུ་གསོལ། །རྩ་བར། ཐམས་ཅད་གཞི་མེད་རྩ་བྲལ་ཡིན་ནོ་ཞེས། །ཞེས་པ་ནས། དགོངས་སུ་གསོལ། །ཞེས་པའི་བར་ཤོ་ལོ་ཀ་གཅིག་དང་རྐང་བ་གསུམ་བྱུང༌། དེའི་ཚིག་དོན་ནི། ཆོས་དང་ཆོས་ཉིད་ཐམ༵ས་ཅ༵ད་གཞི༵་མེ༵ད་རྩ༵་བྲ༵ལ་ཡི༵ན་ནོ༵་ཞེ༵ས་བཞེ༵ད་པ༵་རྣམ༵ས་ན༵འ༵ང༌། ཆོས་རྗེ་ཀུན་མཁྱེན་བད༵ག་ནི༵་མ༵་ཕོ༵ད་པ་ཡིན་པས༵་ཐ༵ལ་མོ༵་སྦྱ༵ར་ན༵ས་སྐ༵ད་གཏོ༵ང་གྲོ༵ས་འདེབ༵ས་ཏེ༵། དེ་ཡང་ཀུ༵ན་ག༵ཞི་ཡེ༵་ཤེ༵ས་དང་དེ༵་བཞི༵ན་ཉི༵ད་ཀྱི༵་དབྱི༵ངས་ནི་ཆོ༵ས་རྣམ༵ས་ཀུ༵ན་གྱི༵་གཞི༵་དང༵་གན༵ས་དང༵་རྟེན༵་དང་ཆ༵་མེད༵་ཀུ༵ན་འགྲོ༵་ཀུ༵ན་ཁྱ༵བ་ཡི༵ན་པ༵ར་ནི༵་རྫོག༵ས་ལྡ༵ན་ཆོ༵ས་ལ༵ས་གསུ༵ངས་པའང༵་ཡིན་ཏེ། ཆོས་མངོན་པའི་མདོ་ལས། ཐོག་མ་མེད་དུས་ཅན་གྱི་དབྱིངས། །ཆོས་རྣམས་ཀུན་གྱི་གནས་ཡིན་ཏེ། །དེ་ཡོད་པས་ན་འགྲོ་ཀུན་འང༌། །མྱ་ངན་འདས་པ་ཐོབ་པ་ཡིན། །ཞེས་དང༌། འཕགས་པ་དཀོན་མཆོག་ཐེར་ཟུག་གི་མདོ་ལས། བཅོམ་ལྡན་འདས་དེའི་སླད་དུ་དེ་བཞིན་གཤེགས་པའི་སྙིང་པོ་ནི། འབྲེལ་བ་རྣམ་པར་དབྱེ་བ་མེད་པ། བྲལ་མི་ཤེས་པ་འདུས་མ་བྱས་ཀྱི་ཆོས་རྣམས་ཀྱི་གནས་དང་གཞི་དང་རྟེན་ལགས་ལ་བཅོམ་ལྡན་འདས་དེ་བཞིན་གཤེགས་པའི་སྙིང་པོ་ནི་མ་བྲལ་བར་རྣམ་པར་དབྱེ་བ་དང་བཅས་པའི་ཆོས་བྲལ་ཤེས་པ་འདུས་བྱས་ཀྱི་ཆོས་རྣམས་ཀྱི་ཡང་གཞི་དང་གནས་དང་རྟེན་ལགས་སོ། །ཞེས་དང༌། འཕགས་པ་ཀླུ་སྒྲུབ་ཀྱི་ཞལ་སྔ་ནས། ས་བོན་གྱུར་བ་དབྱིངས་དེ་ཉིད། །ཆོས་རྣམས་ཀུན་ཀྱི་རྟེན་དུ་འདོད། །རིམ་གྱིས་སྦྱངས་པར་གྱུར་པ་ལས། །སངས་རྒྱས་བྱང་ཆུབ་ཐོབ་པར་འགྱུར། །ཞེས་གསུངས་པའི་ཕྱིར་རོ། །དེ་ལྟར་གསུངས་པ་རྣམས་ལེགས་པར་དགོ༵ངས་སུ༵་གསོ༵ལ་ནས་ཐམས་ཅད་གཞི་མེད་རྩ་བྲལ་དུ་མ་སྨྲ་ཤིག་ཅེས་བརྩེ་བས་གདམས་པ་ཡིན་ནོ། །