གསུམ་པ་སྒྲུབ་པའི་སྦྱོར་བ་ངེས་འབྱེད་ཡན་ལག་བཤད་པ།
གསུམ་པ་སྒྲུབ་པའི་སྦྱོར་བ་ངེས་འབྱེད་ཡན་ལག་བཤད་པ་ལ།
རྩ་བར།། ངེས་འབྱེད་ཡན་ལག་རྣམ་བཞི་དང༌། །ཞེས་གསུངས་སོ། །དེའི་དོན་བཤད་པ་ལ་རྟེན་དང་བརྟེན་པ་གཉིས། དང་པོ་ལ་སྤྱི་དོན་དང་མཐའ་རགས་ཙམ་དཔྱད་པ་གཉིས།དང་པོ་ལ་གཉིས་ལས་ལུས་རྟེན་ནི། གླིང་གསུམ་གྱི་མི་ལ་སྐྱེ་བ་ཡོད། སྐྱེས་ཟིན་གནས་པ་འདོད་ལྷ་ལའང་ཡོད་པར་གསུངས་ལ། ཆོས་མཆོག་འདོད་པའི་ལྷ་མི་གཉིས་ཀ་ལ་དང་པོ་སྐྱེར་རུང་ངོ༌། །ཐེག་ཆེན་ལུགས་ལ་སྦྱོར་ལམ་དང་པོ་གསུམ་སེམས་བསྐྱེད་སྐྱེ་བའི་ལུས་རྟེན་འགྲོ་བ་རིགས་དྲུག་ཡོད་དོ། །ཆོས་མཆོག་དང་མཐོང་ལམ་གླིང་གསུམ་དང་འདོད་ལྷ་ལ་སྐྱེ་བ་ཡོད་དོ། །སེམས་རྟེན་ནི། བསམ་གཏན་ས་དྲུག་ལ་བརྟེན་ཅིང་འདོད་སེམས་དང་གཟུགས་མེད་དངོས་གཞི་ལ་བརྟེན་པ་མེད་གསུངས་མོད། སྦྱོར་ལམ་གྱི་ངོ་བོར་གྱུར་པའི་ཐོས་བསམ་གྱི་བློ་ལ་འདོད་སེམས་ཡོད་ལ། སྦྱོར་ལམ་པའི་རྒྱུད་ཀྱི་གཟུགས་མེད་དངོས་གཞི་ལ་ལམ་ཡོད་པར་སྣང་བས་དེ་དག་གི་སེམས་རྟེན་ལ་འདོད་སེམས་དང་གཟུགས་མེད་ཀྱི་དངོས་གཞི་ཡོད་པར་སྣང་ངོ༌། །གཉིས་པ་མཐའ་རགས་ཙམ་དཔྱད་པ་ལ། ཉ་ཊཱིཀ་ལས། ལུས་རྟེན་ནི། ཉན་ཐོས་ལྟར་ན། སྦྱོར་ལམ་དང་པོ་གསུམ་གླིང་གསུམ་གྱི་མི་ཁོ་ན་ལ་སྐྱེ། སྐྱེས་ཟིན་འདོད་ལྷ་ལའང་ཡོད་དོ། །ཆོས་མཆོག་འདོད་པའི་ལྷ་མི་གཉིས་ཀ་ལ་དང་པོ་སྐྱེར་རུང་ངོ༌། །ཐེག་ཆེན་ལྟར་ན། སྦྱོར་ལམ་དང་པོ་གསུམ་སེམས་བསྐྱེད་སྐྱེ་བའི་རྟེན་ལ་རུང་ཞིང༌། ཆོས་མཆོག་མཐོང་ལམ་སྔར་དང་འདྲ་བར་འདོད་དོ། །ཞེས་གསུངས་པ་ལ་གཟུགས་ཁམས་ལ་ཆོས་མཆོག་དང་མཐོང་ལམ་སྐྱེ་བ་ཡོད་མེད་སོགས་ལ་དཔྱད། ཡང་ཉ་ཊཱིཀ་ལས། སེམས་རྟེན་ནི། བསམ་གཏན་ས་དྲུག་ལ་བརྟེན་ཅིང་འདོད་སེམས་རྣམ་གཡེང་ཆེ་བས་དང་གཟུགས་མེད་ལྷག་མཐོང་ཆུང་བས་མི་བརྟེན་པར་མཛོད་དུ་བཤད་ཅིང་ཐེག་ཆེན་པ་ཡང་དེ་ལྟར་དུ་གསལ་ལོ། །ཞེས་གསུངས་པ་མི་འཐད་པར་ཐལ། འདོད་པའི་རྒྱུད་ཀྱི་སྦྱོར་ལམ་གྱི་ངོ་བོར་གྱུར་པའི་ཐོས་བསམ་དང༌། གཟུགས་མེད་ཀྱི་དངོས་གཞི་རིམ་བཞིན་འདོད་སེམས་དང་གཟུགས་མེད་དངོས་གཞིའི་སེམས་རྟེན་ཅན་ཡིན་པའི་ཕྱིར་ཟེར་ན་དཔྱད་དོ། །