དལ་འབྱོར་རྙེད་དཀའ་བཤད་པ།
དལ་འབྱོར་རྙེད་དཀའ་བཤད་པ།
ཨོཾ་སྭ་སྟི། །རྒྱལ་བ་སྟོན་པ་བཅོམ་ལྡན་རྫོགས་སངས་རྒྱས། །སྡུག་བསྔལ་མ་ལུས་སེལ་བའི་དམ་པའི་ཆོས། །ཚོགས་མཆོག་དམ་པ་དགེ་འདུན་རིན་ཆེན་ལ། །འགྲོ་རྣམས་སྡུག་བསྔལ་བསྒྲལ་ཕྱིར་སྐྱབས་སུ་བསྟེན། །བློ་ལྡོག་རྣམ་བཞི་ཐོས་བསམ་སྒོམ་པ་ཡིས། །སྡུག་ཀུན་འཁོར་བའི་ཆོས་ལ་ཞེན་ལྡོག་ནས། །ངེས་འབྱུང་ཐར་བའི་ལམ་ལ་འབད་པའི་ཆེད། །བློ་ལྡོག་རྣམ་བཞིའི་རྣམ་བཞག་བཤད་པར་བྱ། །དེ་ལ་འདིར་ཚེ་འདི་ཕྱིའི་འཁོར་བ་ལ་ཞེན་པ་ལྡོག་པའི་ཆེད་དུ་བློ་ལྡོག་རྣམ་པ་བཞི་བཤད་པ་ལ་བཞི་ལས། དང་པོ་དལ་འབྱོར་རྙེད་དཀའ་བཤད་པ་ནི། བླང་དོར་རབ་གསལ་ལས། དེ་ཡང་དལ་འབྱོར་མི་ལུས་རིན་པོ་ཆེ། །འཁོར་བའི་རྒྱ་མཚོ་ཆེ་ལས་སྒྲོལ་བའི་གྲུ། །ཐར་བའི་གླིང་དུ་འདྲེན་པའི་དེད་དཔོན་མཆོག །ཐོབ་པའི་དུས་འདིར་བརྩོན་པས་འབད་འཚལ་ལོ། །ཞེས་གསུངས་པ་ལྟར་རང་གི་ལུས་དང་གནས་དང་ལོངས་སྤྱོད་དང་ཡུལ་ཕྱོགས་སོགས་ཐམས་ཅད་ལ་གཞིག་འགྲེལ་ཞིག་བཏང་སྟེ། བདག་གིས་ད་རེས་ཐོབ་པའི་མི་ལུས་འདི་འདྲ་བ་ལར་ནས་ཤིན་ཏུ་རྙེད་པར་དཀའ། འདི་དོན་མེད་དུ་མི་གཏོང༌། ཆོས་ལ་འཁོལ་བ་ཅིག་བྱེད་དགོས་སྙམ་དུ་བསམ་ལ། དེ་ཡང་དལ་འབྱོར་རྙེད་དཀའ་སྒོམ་པ་ལ་བཞི་ལས། དང་པོ་ངོ་བོའི་སྒོ་ནས་དལ་འབྱོར་རྙེད་དཀའ་སྒོམ་པ་ནི། དཔལ་མགོན་འཕགས་པ་ཀླུ་སྒྲུབ་ཀྱི་ཞལ་སྔ་ནས། དམྱལ་བ་ཡི་དྭགས་དུད་འགྲོ་དང༌། །ཀླ་ཀློ་ཚེ་རིང་ལྷ་དང་ནི། །ལོག་ལྟ་ཅན་དང་སངས་རྒྱས་སྟོངས། །ལྐུགས་པ་འདི་དག་མི་ཁོམ་བརྒྱད། །ཅེས་པ་ལྟར་ལས། ༡ དམྱལ་བ་ན་ཚ་གྲང་གི་སྡུག་བསྔལ་ཤུགས་དྲག་པ་དང༌། ༢ཡི་དྭགས་ན་བཀྲེས་སྐོམ་གྱི་སྡུག་བསྔལ་བཟོད་བླག་མེད་པས་མནར་བས་ཆོས་སྒྲུབ་པའི་ལོངས་སྐབས་སྐད་ཅིག་ཀྱང་མེད། དུད་འགྲོ་ནི་བཀོལ་སྤྱོད་དང་ཕན་ཚུན་འཚེ་བ་དང་བླུན་རྨོངས་པའི་སྡུག་བསྔལ་ལ་སྤྱོད་པས་ཆོས་བྱེད་མི་ཁོམས། ༤ ལྷ་ཚེ་རིང་པོ་ནི་འདུ་ཤེས་མེད་པའི་ངང་དུ་ཚེ་རྫོགས་ནས་ཆོས་བྱེད་དུ་མི་ཁོམས། ༥ མིར་སྐྱེས་ཀྱང་ཆོས་མེད་ས་ཆ་ཡུལ་ཕྱོགས་མཐའ་འཁོབ་ཀླ་ཀློར་སྐྱེས་པའམ། ༦ སངས་རྒྱས་མ་བྱོན་པའི་འཇིག་རྟེན་ཁམས་སུ་སྐྱེས་པའམ། སངས་རྒྱས་བྱོན་པའི་ཞིང་ཁམས་སུ་ཡང་ཆོས་དར་བའི་ས་ཆ་ནི་རྒྱ་ཆུང༌། ༧ ཆོས་དར་བའི་ཡུལ་ཕྱོགས་སུ་སྐྱེས་ཀྱང་ལོག་ལྟ་ཅན་ཆོས་ལ་སྡང་བའམ། ༨ གླེན་ལྐུགས་སུ་གྱུར་ནས་བླང་དོར་གྱི་གནས་གང་ཡང་མི་གོ་བར་སོང་ན་ཆོས་བྱེད་པའི་སྐལ་བ་མི་འདུག་པ་ལས། བདག་གིས་ད་རེས་མི་ཁོམ་པ་བརྒྱད་ལས་ལོག་ནས་ཆོས་བྱེད་ནུས་སུ་རུང་བའི་ལུས་ཞིག་ཐོབ་འདུག་སྙམ་དུ་དལ་བ་བརྒྱད་སྒོམ་མོ། །དེ་ནས་འབྱོར་བ་བཅུ་སྒོམ་པ་ནི། དཔལ་མགོན་འཕགས་པ་ཀླུ་སྒྲུབ་ཀྱི་ཞལ་སྔ་ནས། མི་ཉིད་དབུས་སྐྱེས་དབང་བོ་ཚང༌། །ལས་མཐའ་མ་ལོག་གནས་ལ་དད། །སངས་རྒྱས་བྱོན་དང་དེས་ཆོས་གསུངས། །བསྟན་པ་གནས་དང་དེའི་རྗེས་འཇུག །གཞན་ཕྱིར་སྙིང་ནི་བརྩེ་བའོ། །ཞེས་པ་ལྟར་ཏེ། ༡ མི་ལུས་མ་ཐོབ་ན་ཆོས་དང་མི་མཇལ་བས་བདག་སྤྱིར་མི་ལུས་ཐོབ། ཆོས་མེད་ཡུལ་མཐའ་འཁོབ་ཏུ་སྐྱེས་ན་ཆོས་སྒྲུབ་པའི་སྐལ་བ་མེད་པས་དགོས་སུ་ཡུལ་དབུས་ཆོས་དར་བར་སྐྱེས། ༣ དབང་པོ་མ་ཚང་ན་ཆོས་སྒྲུབ་པའི་གེགས་གྱུར་བ་ཡིན་པས་ཡང་དགོས་སུ་དབང་བོ་སྒོ་ལྔ་ཚང་བས་སྤང་བླང་ཤེས་སུ་རུང༌། ༤ ལས་མཐའ་ལོག་ན་མི་དགེ་བ་ལ་སྤྱོད་ཅིང་ཆོས་ལ་རྒྱབ་ཀྱིས་ཕྱོགས་པ་ལས་ཞེ་དགོས་སུ་ལྟ་བ་ལོག་པ་དང་མ་ཕྲད་ཙམ། མཚམས་མེད་ལྟ་བུ་ལོག་པར་ལྟ་བའི་ལས་ཀྱང་མ་བྱས་ཙམ། ༥དད་པའི་གནས་སངས་རྒྱས་ཀྱི་བསྟན་པ་ལ་མ་དད་ན་ཆོས་ལ་ཡིད་མི་ཕྱོགས་པས། གནས་དམ་པའི་ཆོས་འདུལ་བ་ལ་དད་པ་སྐྱེར་རུང་བ་ཙམ་དུ་འདུག་པས་རང་གི་འབྱོར་བ་ལྔ་ཚང་འདུག ༦འཇིག་རྟེན་དུ་སངས་རྒྱས་ཀྱང་བྱོན་ཟིན།༧ དམ་པའི་ཆོས་ཀྱང་གསུངས་ཟིན། ༨ བསྟན་པ་ཡང་མ་ནུབ་པར་གནས། ༩ ཆོས་ལ་གསར་དུ་འཇུག་པ་ཡང་མང་བའི་སྐབས་སུ་ཡོད། ༡༠ ཆོས་བྱེད་རྣམས་ལ་གཞན་དགེ་བའི་བཤེས་གཉེན་གྱིས་སྙིང་བརྩེ་བའི་སྒོ་ནས་ཆོས་བསྟན་པ་དང༌། སྦྱིན་བདག་གིས་དད་པའི་སྒོ་ནས་ཟས་གོས་ཡོ་བྱད་སོགས་ཀྱང་སྟེར་བ་པོ་མང་པོ་ཡོད་པས་ཆོས་མཐུན་གྱི་འཚོ་བ་འབྱོར་དུ་རུང་བའི་སྐབས་སུ་འདུག་པས་གཞན་འབྱོར་ལྔ་བོ་ཡང་བདག་ལ་ཚང་དེ་ལྟར་ན་མི་ཁོམ་པ་བརྒྱད་ལས་ལོག འབྱོར་བ་བཅུ་ཚང་བའི་ལུས་འདི་ལྟ་བུ་ཤིན་ཏུ་རྙེད་དཀའ། སྐབས་འདིར་ཆོས་ལ་འབད་དགོས། གལ་ཏེ་ཆོས་སྒྲུབ་པའི་མཐུན་རྐྱེན་འདི་འདྲ་ཚང་བ་རྙེད་པར་དཀའ་ལ། འདི་ལས་ལྷག་པ་རྙེད་མི་སྲིད་པས་ཚེ་འདི་ལ་དམ་ཆོས་ཡང་དག་པ་ཞིག་སྒྲུབ་མ་ཐུབ་ན་ད་སྐྱེ་བ་ནས་ཚེ་རབས་ཐམས་ཅད་དུ་སྒྲུབ་མི་ནུས་པས་ངན་སོང་སོགས་སུ་རྒྱུན་སྡོད་བཅས་ཏེ་གནས་དགོས་པ་ལས་མ་འདས་པར་འདུག་སྙམ་པ་རྒྱུ་མཚན་དྲན་པའི་སྒོ་ནས་ཡང་ཡང་བསམ་མོ། །