ལྔ་བ་ལས་དབྱེ་བའི་གཞི་འཆད་པ།
ལྔ་བ་ལས་དབྱེ་བའི་གཞི་འཆད་པ་ལ།
རྩ་བར། དགེ་འདུན་ཐ་དད་པ་ཉིད་དུ་ནུས་པལ་མི་འདོད་པར་གླེང་བ་དང་གླེང་བར་བྱེད་པ་ན་ལོག་པར་མི་བྱའོ། །ཞེས་སོགས་བྱུང༌། འདིའིདོན་ནི། སྡེ་སྣོད་འཛིན་པ་ལྟ་བུ་དགེ་འདུན་ཐ་དད་པ་ཉིད་དུ་དབྱེ་བར་ནུས་པ་ལ་མི་འདོད་པརཏེ། མི་འདོད་བཞིན་དུ་ལྟུང་བ་གླེང་བར་མི་བྱའོ། །དེས་ཚུར་ལ་ལྟུང་བ་གླེང་བར་བྱེད་པ་ནི་ལོགཔར་ཏེ་ཐ་དད་དུ་དབྱེ་བར་མི་བྱའོ། །གནས་གང་དུ་དུས་འདའ་བར་བྱ་བ་ངལ་བསོ་བའི་གནསབསྟི་གནས་ལྟ་བུ་དབེན་པ་གང་ན་མི་མཐུན་པ་དགྲ་ཡོད་པ་དེ་དང་ལྷན་ཅིག་ཏུ་འཁོད་པར་མི་བྱའོ། །གཞན་དུ་ནི་ཞེས་པ་ངལ་བསོ་བའི་གནས་བསྟི་གནས་ལྟ་བུ་གནས་དབེན་པ་དེ་ལསགཞན་དུ་སྟེ་མི་དབེན་པའི་གནས་སུ་ཞེས་པའོ། །ཆོས་དང་འདུལ་བ་ཞེས་པ་ནི་སྡེ་སྣོད་གཞན་གཉིས་པོས་བརྗོད་པའི་ཆོས་ཏེ་ཚུལ་ཁྲིམས་ལས་གཞན་པའི་ཤེས་བྱ་གཏན་ལ་འབེབས་པའི་ཆོས་དང་ཚུལ་ཁྲིམས་གཏན་ལ་འབེབས་པའི་འདུལ་བ་ལའོ། །དེ་དག་དེའི་ཞེས་པ་ནི་མཉན་ཡོད་ན་གནས་པ་རྣམས་ལ་གསུངས་པའོ། །ཆོས་མ་ཡིན་ལ་ཞེན་ནས་ཆོས་ཕྱོགས་དང་འཐབ་པར་བྱེད་པ་དེ་དག་ལ། ཆོས་འདི་པ་དག་གིས་ཕྱག་མི་བྱ་ཞེས་པ་དགེ་སློང་ཕ་མ་གཉིས་དང༌། དགེ་ཚུལ་ཕ་མ་གཉིས་དང༌། དགེ་སློབ་མ་དང་དགེ་བསྙེན་ཕ་མ་གཉིས་ཏེ་བདུན་པོ་དེ་དགགང་གིས་ཕྱག་མི་བྱ་བའོ། །དེ་དག་ལ་དགེ་སློང་མས་ཕྱག་མི་བྱ་ཞེས་ལུང་ལས་གསུངས་ལ་སྟནལས་ལྡང་བ་ནི་གཞན་གྱི་ལུགས་ལས་དབྲི་བར་མི་བྱ་སྟེ་ལྡང་བར་བྱའོ། །འགྲེལ་ཆུང་ལས། དགེ་སློང་མས་ཕྱག་མི་བྱ་བར་སྟན་ལས་ལྡང་ངོ། །ཞེས་སོ། །བཟོད་པ་བྱས་པ་ཞེས་པ་ལ་སོགསཔའི་སྐབས་འདིར་འཐབ་ཀྲོལ་བྱེད་པ་གནས་ནས་ཕྱུང་བ་ཆོས་མ་ཡིན་པ་ལ་ཞེན་པ་དེ་དག་ལ་ནི་ལས་རྣམ་པ་བཞི་རིམ་གྱིས་བྱ་སྟེ། བཟོད་པར་བྱ་བ་གསོལ་བཞིའི་ལས་དང༌། དེའི་འོགཏུ་མཐུན་པ་སྦྱིན་པ་གསོལ་བཞིའི་ལས་དང༌། དེའི་འོག་ཏུ་མཐུན་པའི་གསོ་སྦྱོང་བྱིན་པ་གསོལབཞིའི་ལས་དང༌། དེའི་འོག་ཏུ་མཐུན་པའི་གསོ་སྦྱོང་དངོས་དེ་བྱའོ་ཞེས་གཞུང་འདི་དག་གིས་བསྟན་ཏོ། །མཐུན་པའི་གསོ་སྦྱོང་སྦྱིན་པ་གསོལ་བཞིའི་ལས་བྱས་ནས་དེའི་རྗེས་ལ་མཐུན་པའིགསོ་སྦྱོང་དངོས་དེ་བྱའོ་ཞེས་སྟོན་པ་ནི། དེ་བྱིན་ནས་བྱའོ་ཞེས་གསུངས་ཏེ། མཐུན་པའི་གསོསྦྱོང་དེ་གསོལ་བཞིའི་ལས་ཀྱིས་བྱིན་ནས་དེའི་རྗེས་ལ་མཐུན་པའི་གསོ་སྦྱོང་དངོས་བྱའོ་ཞེས་བསྟན་ཏོ། །མཐུན་པའི་གསོ་སྦྱོང་དངོས་དེ་ནི་ཕྱོགས་གཉིས་པོ་ལྷན་ཅིག་ཏུ་འདུས་ཏེ་གསོ་སྦྱོངབྱ་བ་སྟེ། སྔར་ཆོས་མིན་ཕྱོགས་སུ་སོང་བ་དེ་རྣམས་དང༌། ཆོས་ཕྱོགས་པ་དེ་རྣམས་ལྷན་ཅིགཏུ་འདུས་ཏེ། སོ་སོ་ཐར་པའི་མདོ་འདོན་པའི་གསོ་སྦྱོང་བྱ་བའོ། །ལས་བྱེ་བའི་ངོ་བོ་བསྟན་པ་ནི། རྩ་བར། ཆོས་མ་ཡིན་པ་སྨྲ་བ་དག་གིས་དབྱེ་བའི་སེམས་ཀྱིས་མཚམས་ཀྱི་ནང་དུ་ལས་ཐདད་པར་བྱས་ན་དེ་བྱེ་བ་ཡིན་ནོ། །ཞེས་སོགས་བྱུང༌།