རང་དབང་གི་ཁོར་ཡུག་བསྐྲུན་དགོས།
རང་དབང་གི་ཁོར་ཡུག་བསྐྲུན་དགོས།
བྱ་བ་གང་ཞིག་ལ་བརྩོན་ན་སྤོབས་པ་དང་ལྷག་བསམ། དྲང་བདེན་དང་གནས་ལུགས་གཙིགས་སུ་བཟུང་སྟེ་རྣམ་དཔྱོད་ལ་བརྟེན་ནས་བསྒྲུབ་དགོས། འཛེམ་དོགས་ཀྱི་འཆང་རྒྱའི་སྦུབས་སུ་གནས་ན་གཞན་གྱིས་བཟང་ངན་ཇི་ལྟར་གླེང་ཡང་དོན་ལ་བྱ་བ་གང་ཡང་སྒྲུབ་མི་ནུས་པ་མ་ནིང་དང་མཚུངས་སོ། །གལ་ཏེ་བྱ་བ་ཁྱད་འཕགས་སམ་གཟི་བརྗིད་ཅན་ཞིག་བྱུང་ན་ཕྲག་དོག་ཅན་གྱིས་མིག་ནང་གི་ཚེར་མ་གྱུར་སྲིད་མོད། དེ་གཞན་སྐྱོན་དུ་ངེས་པ་མ་ཟད་དེ་གཞན་གྱི་ཉོན་མོངས་ཕྲག་དོག་མ་ལྡོག་བར་དུ་སངས་རྒྱས་ཀྱིས་ཀྱང་བྱ་ཐབས་མེད། དེས་ན་རང་ངོས་ནས་སེམས་གཙང་བས་གཞན་ཕན་གྱི་བྱ་བ་བསྒྲུབ་དགོས་པ་གལ་ཆེ། ལྷག་པར་དུ་རྗེས་ལུས་ཀྱི་ཁོར་ཡུག་ཡར་རྒྱས་འགྲོ་བ་ལ། སྲོལ་རྒྱུན་ངན་པ་དག་དོར་དགོས་ན་དཀའ་ངལ་དང་ཉོག་གྲ་སྣ་མང་ཡོད་ཀྱང་ལྷག་བསམ་རྣམ་དག་གིས་བསམ་ཕོད་པ། བཤད་ཕོད་པ། སྒྲུབ་ཕོད་པ་བྱས་ནས་མདུན་བསྐྱོད་དགོས། དེ་ལྟར་མ་བྱས་ན་སྒེར་གཅོད་མཁྲེགས་འཛིན། རང་འདོད་ཁོ་ནའི་ཁོར་ཡུག་ལས་དུས་ནམ་ཡང་བརྒལ་བའི་ཡར་རྒྱས་མེད། བཟང་ངན་གང་ཡང་མེད་པར་ཤི་ཐུབ་པ་རྩྭ་ཟན་གྱིས་འགྲུབ་ཐུབ་པ་རེད། དེས་ན་གཞན་གྱིས་ཚོད་འཛིན་གྱིས་དབང་དུ་མི་འགྲོ་བར་ཁྲིམས་མཐུན་གྱི་ཁེ་དབང༌། རང་དབང་གི་བདེ་སྐྱིད། རང་དབང་གི་འཚོ་བ། རང་དབང་གི་ཁོར་ཡུག་བསྐྲུན་དགོས། ལས་འབྲས་ལ་ཡིད་ཆེས་དང་ལྷག་བསམ་ཅན་ལ་ཤེས་ཡོན་གྱི་རྒྱབ་ལྗོངས་ཅན་མང་དུ་འཚར་ལོངས་བྱུང་ན་ཡར་རྒྱས་ཡོད་དོ། །ངལ་གསོ་ལ་དངོས་གྲུབ་དཔལ་གྱིས།