གཉིས་པ་བརྟེན་པ་སྦྱོར་ལམ་བཤད་པ།
གཉིས་པ་བརྟེན་པ་སྦྱོར་ལམ་བཤད་པ་ལ།
མཚན་མཚོན་གཞི་གསུམ་དང༌། ཐེག་ཆེན་གྱི་སྦྱོར་ལམ་དེ་ཐེག་དམན་གྱི་སྦྱོར་ལམ་ལས་ཁྱད་པར་འཕགས་ཚུལ་བཤད་པ་དང་གཉིས། དང་པོ་ལ་སྤྱི་དོན་དང༌། མཐའ་རགས་ཙམ་དཔྱད་པ་གཉིས། དང་པོ་ལ་མཚན་ཉིད། མཚོན་བྱའི་སྒྲ་བཤད། མཚན་གཞིའི་དབྱེ་བ་བཤད་པ་དང་གསུམ། དང་པོ་མཚན་ཉིད་ནི། དོན་མངོན་རྟོགས། གོ་ཐོབ་ཀྱི་དབང་དུ་བྱས་ན། ཐར་ཆའི་རྟོགས་པ་སྔོན་དུ་སོང་བའི་བདེན་པ་མངོན་རྟོགས་ལ་སྦྱོར་བའི་མོས་སྤྱོད་ཀྱི་ལམ་དེ་ཡིན་པར་སྣང་སྟེ། ཉ་ཊཱིཀ་ལས། མཚན་ཉིད་ནི། ཐར་ཆའི་རྗེས་ཀྱི་ཐར་ལམ་གང་ཞིག བདེན་པ་མངོན་རྟོགས་ལ་སྦྱོར་བའི་སོ་སྐྱེའི་ལམ། ཐེག་ཆེན་གྱི་དེའི་མཚན་ཉིད། ཐེག་ཆེན་གྱི་ཞེས་བསྣན་ནོ། །ཉན་རང་གི་ལ་ཡང་ངོ༌། །ཞེས་དང༌། མདོ་སྡེ་རྒྱན་ས་འགྲེལ་ལས། མཚན་ཉིད་ནི། ཚོགས་ལམ་རྫོགས་ནས་མཐོང་ལམ་མ་ཐོབ་བར་གྱི་དགེ་བ་གང་ཞིག་མྱ་ངན་ལས་འདས་པར་ཕྱིན་པར་བྱེད་པའི་ཐབས་སུ་གྱུར་པའོ། །ཞེས་དང༌། ཀུན་བཏུས་ས་འགྲེལ་ལས། མཚན་ཉིད་ནི། མྱ་ངན་ལས་འདས་པར་བགྲོད་པའི་གཞི་གང་ཞིག་དོན་མངོན་པར་རྟོགས་པའི་གནས་སྐབས་ཀྱིས་བསྡུས་པའོ། །ཞེས་གསུངས་སོ། ། གཉིས་པ་མཚོན་བྱའི་སྒྲ་བཤད་ནི། བདེན་པ་མངོན་རྟོགས་ལ་སྦྱོར་བས་ན་སྦྱོར། བྱང་ཆུབ་ཏུ་ཕྱིན་པར་བྱེད་པས་ན་ལམ་མོ། །སྤྱིར་ཚོགས་སྦྱོར་བ་གཉིས་ཀ་མོས་སྤྱོད་པ་ཡིན་ཏེ། ཀུན་བཏུས་འགྲེལ་བར། མོས་པས་སྤྱོད་པ་ཅན་གྱི་བྱང་ཆུབ་སེམས་དཔའ་ནི་རིགས་ལ་གནས་པ་ཐོག་མར་སྨོན་ལམ་ཆེན་པོ་བཏབ་པ་ནས་བཟུང་ནས་རབ་ཏུ་དགའ་བའི་ས་ལ་མ་ཞུགས་ཀྱི་བར་དུ་སྟེ་སོ་སོ་རང་གི་འཇིག་རྟེན་ལས་འདས་པ་ཐོབ་པ་མེད་པའི་ཕྱིར་རོ། །ཞེས་གསུངས་སོ། །