གསུམ་པ་བཀའ་སྒྲུབ་པ།
གསུམ་པ་བཀའ་སྒྲུབ་པ་ནི།
བློ་གྲོས་ཆེན་པོ་དགའ་སེམས་ཀྱིས། །བླ་མའི་བཀའ་ནི་འབད་དེ་མཉན། །རིགས་པ་ཡིས་ནི་མི་ནུས་པ། །མི་ནུས་དེ་ལ་ཚིག་གིས་སྦྱང༌། །བླ་མ་ལས་ནི་དངོས་གྲུབ་དང༌། །མཐོ་རིས་དང་ནི་བདེ་བ་འཐོབ། །དེ་བས་འབད་པ་ཐམས་ཅད་ཀྱིས། །བླ་མའི་བཀའ་ལས་འདའ་མི་བྱ། །ཞེས་ཆོས་རྣམ་འབྱེད་ཀྱི་བློ༷་གྲོ༷ས་ཆེ༷ན་པོ༷་དང་ལྡན་པ་རྣམས་ཀྱི་དག༷འ་བའི་སེ༷མས་ཀྱི༷ས་དཔལ་ལྡན་བླ༷་མ༷འི་བཀ༷འ་ནི༷་ཚུལ་བཞིན་དུ་འབ༷ད་དེ༷་ལེགས་པར་མཉ༷ན་པར་བྱའོ། །གུས་པ་དང་བཅས་པའི་སེམས་ཀྱིས་ཉན་ཞིང༌། དོན་དེ་ཡང་མྱུར་དུ་བསྒྲུབ་པར་བྱ་དགོས་ལ། གལ་ཏེ་བླ་མས་ཡང་ཆོས་དང་མི་མཐུན་པ་ཞིག་གསུང་སྲིད་ན། དེ་དག་རི༷གས་ཤིང་ཚུལ་དང་མཐུན་པ༷་ཡི༷ས་ནི༷་སྒྲུབ་པར་མི༷་ནུ༷ས་པ༷་དང༌། རང་ངོས་ནས་མི་བཅོགས་ན་མི་ནུས་བཞིན་དུ་མཐའ་མ་གསལ་ན་ཉེས་པ་སྐྱེད་པས་དེ་ལ་རང་གི་ཚིག་སྦྱངས་ཀྱི་མི་མཉེས་པར་མི་འགྱུར་བ་བྱས་ཏེ་བཀའ་ཁྲོལ་བར་བྱེད་དགོས་ཏེ་དཔེར་ན། བླ་མས་དགོན་པ་ལྟ་བུ་ཞིག་ལ་གནོད་པ་བགྱི་གསུང་བ་ལ་རང་གཞན་ལ་གནོད་པར་འགྱུར་ཚུལ་རྣམས་ཞིབ་པར་ཚི༷ག་གི༷་བཤད་སྦྱ༷ང་ཞུས་ནས་བྱ་མི་དགོས་པ་ཅིག་བཀའ་མ་ཁྲོལ་གྱི་བར་དུ་ཞུ་དགོས་ཞེས་བྱ་བྲལ་བ་བློ་གྲོས་རྒྱལ་མཚན་གྱིས་བླ་མ་ལྔ་བཅུ་པའི་འགྲེལ་བར་གསུངས་སོ། །བསླབ་བྱ་འདི་དག་སོ་སོ་སྐྱེ་བོས་སློབ་དཔོན་བསྟེན་པའི་དབང་དུ་བྱས་པ་ཡིན་ལ། མངོན་ཤེས་དང་རྫུ་འཕྲུལ་ཐོབ་པའི་གྲུབ་པ་མཆོག་རྣམས་ལ་ནི། འཕྲལ་དུ་དགེ་མི་དགེ་ཇི་ལྟར་གནང་ཡང་ཐེ་ཚོམ་མེད་པར་བསྒྲུབ་ན་ཡོན་ཏན་ཁྱད་པར་ཅན་སྐྱེ་བའི་རྒྱུར་འགྱུར་ཞིང༌། ཐེ་ཚོམ་སྐྱེས་ན་དངོས་གྲུབ་ཀྱི་གེགས་སུ་འགྱུར་བ་ཡང་ཡོད་ཅིང༌། འདིར་ནཱ་རོ་པས་གྲུབ་ཆེན་ཏེ་ལོ་པའི་བཀའ་སྒྲུབ་ཕྱིར་ཨོ་ཏན་ཏ་པཱུ་རིའི་གཙུག་ལག་ཁང་གི་རྩེ་མོ་ནས་མཆོང་བ་སོགས་དཀའ་བ་ཆེན་པོ་རྣམས་དང༌། ཉ་གསོན་པོར་བསྲེགས་ནས་ཟ་བ་ལ་མ་དད་པ་མ་བྱས་པར་གསུང་བཞིན་དུ་བསྒྲུབས་པས་གྲུབ་པ་ཐོབ་པའི་རྣམ་ཐར་གསུངས་སོ། །ཚུལ་དེ་བཞིན་དུ་བླ༷་མ༷་ལ་གུས་པས་བསྙེན་བཀུར་དང༌། དཀའ་ཞིང་སྒྲུབ་པ་ལས། དེའི་འབྲས་བུ་ནི་འཇིག་རྟེན་པའི་དངོས་གྲུབ། རལ་གྲི། མིག་སྨན། རིལ་བུ། ས་འོག་མཁའ་སྤྱོད་ལ་སོགས་པའི་གྲུབ་ཆེན་བརྒྱད། འཇིག་རྟེན་ལ༷ས་འདས་པའི་ལམ་གྱི་ཡོན་ཏན་ཁྱད་པར་ཅན་མཐོང་ལམ་སྐྱེ་བ་སོགས་མཆོག་གི་དངོ༷ས་གྲུ༷བ་མྱུར་དུ་ཐོབ་པ་ད༷ང༌། སྐྱེ་བ་ཕྱི་མ་མཐོ༷་རི༷ས་ཀྱི་རྟེན་ལྷ་ད༷ང་ནི༷་མིའི་ནང་དུ་སྐྱེས་ཏེ། དེ་དག་གི་ལོངས་སྤྱོད་དཔག་ཏུ་མེད་པ་ལ་སྤྱོད་ཅིང༌། དེར་ཡང་མི་འདོད་པའི་གནོད་པ་ཐམས་ཅད་མི་འབྱུང་བའི་བདེ༷་བ༷་ཕུན་སུམ་ཚོགས་པ་འཐོ༷བ་པ་ཡིན་པས། དེ༷་བ༷ས་ན་བཏང་སྙོམས་སུ་མི་བཞག་པར་འབ༷ད་པ༷་ཆེན་པོ་བྱས་ཏེ། ཇི་ལྟར་མཉེས་པའི་ཐབས་ཐ༷མས་ཅ༷ད་ཀྱི༷ས་བླ་མ་དམ་པ་མཉེས་པ་གསུམ་གྱི་ཡོངས་སུ་མཉེས་པར་བྱས་ནས་བླ༷་མ༷འི་བཀ༷༷འ་ལས་འད༷འ་བར་མི༷་བྱ༷་བ་ནི་ཅི་ནས་ཀྱང་འབད་པར་བྱའོ། །བླ་མ་མཉེས་པ་གསུམ་གྱིས་མཉེས་པར་བྱེད་དགོས་ཏེ། རྫ་དཔལ་སྤྲུལ་རིན་པོ་ཆེའི་ཀུན་བཟང་བླ་མའི་ཞལ་ལུང་ལས། ཞབས་ཏོག་རྣམ་པ་གསུམ་གྱི་སྒོ་ནས་མཉེས་པར་བྱ་བ་དང༌། རབ་སྒྲུབ་པའི་མཆོད་པ་ཞེས་བྱ་བ་སྟེ། བླ་མས་ཇི་ལྟར་བསྟན་པའི་ཆོས་ཐམས་ཅད་དཀའ་སྤྱད་དང་སྙིང་རུས་ཀྱི་སྒོ་ནས་ཉམས་སུ་ལེན་པ་ཡིན། འབྲིང་ལུས་ངག་གི་ཞབས་ཏོག་ཡིན་ཏེ། རང་གི་ལུས་ངག་ཡིད་གསུམ་བླ་མའི་བྲན་དུ་བཀོལ་ནས་ཞབས་ཕྱི་བྱེད་པ་ཡིན། ཐ་མ་ཟང་ཟིང་གི་འབུལ་བ་རྒྱུ་རྫས་ལོངས་སྤྱོད་ལ་སོགས་པའི་གཏོང་ཕོད་ཀྱི་སྒོ་ནས་བླ་མ་མཉེས་པར་བྱེད་པ་སྟེ། ཞེས་གསུངས་པས་སོ། །