བཞི་པ་དངོས་པོ་གང་བླང་བ།
བཞི་པ་དངོས་པོ་གང་བླང་བ་ནི།
དགེ་ཚུལ་གྱི་སྡོམ་པ་སྟེ་སྐབས་ཀྱིས་གྲུབ་བོ། ། ལྔ་པ་ཆོ་ག་ཇི་ལྟ་བུས་བླང་བ་ནི། སྦྱོར་དངོས་མཇུག་གསུམ་སྟེ། ཀརྨ་ཤ་ཏཾ་སོགས་ལས་ཤེས་པར་བྱའོ། ། གཉིས་པ་ཐུན་མོང་བ་བླ་མ་རྣམས་ཀྱི་རྣམ་པར་བཞག་པ་ནི། རྩ་བར། དེ་ནི་སློབ་དཔོན་ཡིན་ནོ། །གསང་སྟེ་སྟོན་པ་དང་ལས་བྱེད་པ་དང་གནས་སྦྱིན་པ་དང་ཀློག་པ་པོ་ཡང་ངོ༌། །དོན་གྲུབ་ན་གྱུར་པ་ཉིད་དོ། །ཞེས་པ་ལ་སོགས་པས་བསྟན་ཏོ། །འདིའི་དོན་ལ་དགུ་ལས།དང་པོ་དགོས་པའི་དོན་ནི། བླ་མ་འདི་རྣམས་ལ་བརྟེན་ནས་དངོས་སམ་བརྒྱུད་པས་བརྗོད་བྱ་བསླབ་པ་གསུམ་རྫོགས་པར་འགྱུར་བ་དང༌། རྗོད་བྱེད་སྡེ་སྣོད་གསུམ་དང་ལྡན་པར་འགྱུར་བའོ། །