འདིའི་དོན་འཆད་པ་ལ་གཞི་བསམ་པ་སྦྱོར་བ་མཐར་ཐུག

འདིའི་དོན་འཆད་པ་ལ་གཞི་བསམ་པ་སྦྱོར་བ་མཐར་ཐུག་བཞི་ལས།

དང་པོ་ལས་བྱེབའི་གཞིའི་ཡན་ལག་ལ། གང་དུ་དབྱེ་བའི་གནས་དང༌། གང་དག་དབྱེ་བའི་ཡུལ་དང༌། གངགིས་ལས་ཐ་དད་པར་བྱེད་པ་པོ་དང་གསུམ། དང་པོ་ལ་གཉིས་ལས། གླིང་གསུམ་པོ་གངཡང་རུང་བ་ཡིན་ཏེ། མཛོད་ལས། ལས་ཀྱི་དབྱེན་ནི་གླིང་གསུམ་ན། །ཞེས་དང༌། བྱང་གི་སྒྲམི་སྙན་ན་སངས་རྒྱས་ཀྱི་བསྟན་པ་མེད་པའི་ཕྱིར་རོ། །དེ་ལ་གནས་བརྟན་བཅུ་དྲུག་གི་བ་ཀུལ་ཡོད་པས་དཔྱད་ཅེས་མཚོ་མཆན་ལས་སོ། །མཚམས་གཅིག་གི་ནང་ཡིན་པ་སྟེ། མཚམསཀྱི་ནང་དུ་ཞེས་པ་དང༌། མཚམས་ཐ་དད་ན་གནས་པ་རྣམས་གསོ་སྦྱོང་ལ་སོགས་པའི་ལསསོ་སོར་བྱེད་པ་ལ་མི་རིགས་པ་མེད་པའི་ཕྱིར་རོ། །གཉིས་པ་གང་དག་དབྱེ་བའི་ཡུལ་ལ་གསུམལས། བརྒྱད་ཡན་ཆད་ཀྱི་གྲངས་ཚང་བ་སྟེ། མཛོད་ལས། དེ་ནི་བརྒྱད་དག་ཡན་ཆད་ཀྱིས། །ཞེས་པ་དང༌། ལས་དེ་དགེ་སློང་གཅིག་གིས་ཉུང་ན་ཡང༌། ཕྱོགས་གཉིས་གང་རུང་གཅིག་དགེའདུན་དུ་མ་ལོངས་པས་དགེ་འདུན་གྱི་ལས་ཀྱི་དབྱེན་མི་འཆགས་པའི་ཕྱིར་རོ། །ལས་ཀྱི་ཁ་སྐོང་བར་འོས་པ་དགོས་ཏེ། དབྱེན་ལ་ཡང་འོས་པ་མ་ཡིན་པས་ཚུལ་ཤིང་དག་འབྲིམ་པ་མིའཆགས་སོ་ཞེས་པའི་གནད་ཀྱིས་འདིར་སྦྱར་རོ། །སོ་སོའི་སྐྱེ་བོའི་དགེ་འདུན་ཡིན་པ་དགོས་ཏེ། ལུང་གཞི་ལས། དོན་དམ་པའི་དགེ་འདུན་གྱིས་ནི་ཆོས་མ་ཡིན་པའི་ལས་བྱེད་པ་མི་འཐོབབོ། །ཞེས་གསུངས་པས་ཤེས་སོ། །གསུམ་པ་གང་གིས་ལས་ཐ་དད་པར་བྱེད་པ་པོ་ནི། ཆོསམ་ཡིན་པ་སྨྲ་བ་དག་གིས་ཏེ། ལུང་དགེ་སློང་བྲམ་ཟེའི་བུ་མོས་ཞུས་པ་ལས། དགེ་སློང་གངགིས་ཀོའུ་ཤམ་བྷིའི་དགེ་སློང་བྱེ། ཆོས་བཞིན་མ་ཡིན་པ་སྨྲ་བ་དག་གིས་ཏེ། མཚམས་ཀྱི་ནངདུ་གསོ་སྦྱོང་ཐ་དད་དུ་བྱས་པས་སོ། །ཞེས་གསུངས་སོ། །

གཉིས་པ་བསམ་པའི་ཡན་ལག་ལ་གཉིས་ལས།

འདུ་ཤེས་མ་འཁྲུལ་བ་སྟེ། འཁྲུལན་དབྱེན་མི་རྫོགས་པའི་ཕྱིར་རོ། །ཀུན་སློང་ནི་ཆོས་དང་འདུལ་བ་ལ་མི་མཐུན་པ་དེ་དང་ལྡན་པར་ཤེས་ནས་ཆོས་མ་ཡིན་པ་ལ་མངོན་པར་ཞེན་ཏེ་ལས་ཐ་དད་དུ་བྱེད་པར་འདོད་པ་རྒྱུན་མཆད་པའོ། །

གསུམ་པ་སྦྱོར་བ་ནི་ལས་ཐ་དད་དུ་བྱེད་པའོ། །བཞི་བ་མཐར་ཐུག་ནི། ལས་གངཡང་རུང་བ་ཕལ་ཆེར་བྱས་པ་ཉིད་ན་བྱས་པ་སྟེ། ལས་ཀྱི་དབྱེན་འདི་ནི་སྤྱོད་པའི་དབྱེན་དུགཏོགས་པ་ཡིན་ལ། ལྟུང་བ་ནི་སྦོམ་པོར་འགྱུར་རོ། །ཊཱི་ཀ་ལས། ཆོས་སྨྲ་བ་དག་གིས་མཚམསཀྱི་ནང་དུ་ཆོས་མ་ཡིན་པར་སྨྲ་བ་ལས་ཐ་དད་པར་ལས་བྱས་པས་ནི་ལས་བྱེ་བར་མི་འགྱུར་ཏེ། ལས་དེ་ཆོས་ལས་མ་གཡོས་པ་ཁོ་ནར་བྱས་པའི་ཕྱིར། ཞེས་གསུངས་སོ། །གཟུ་བོ་ལས་ཉམསཔ་དེ་མི་བྱའོ། །ལས་བྱེ་བའི་གཞི་འདི་ལ་ལུང་ལས་ཀོའུ་ཤམ་བྷི་བའི་གཞི་ཞེས་གསུངས་ཏེ་ཀོའུཤམ་བྷིར་ལས་ཀྱི་དབྱེན་བྱུང་བ་དང་འབྲེལ་བས་ལུང་ལས་ཀོའུ་ཤམ་བྷིའི་གཞི་ཞེས་ཡུལ་ལ་མཚན་དུ་གསོལ་བ་དང༌། མདོ་རྩ་བར་ལས་བྱེ་བའི་གཞི་ཞེས་དོན་ལ་མཚན་དུ་གསོལ་བའོ། །

ལས་བྱེ་བའི་གཞིའི་རྣམ་པར་བཤད་པ་རྫོགས་སོ།། །།