དུག་འདོན་ལུང་དང་རིག་པའི་མདའ་མོ་ཞེས་བྱ་བ་བཞུགས་སོ། །ཞབས་དཀར་ཚོགས་དྲུག་རང་གྲོལ།

༄༅། །དུག་འདོན་ལུང་དང་རིག་པའི་མདའ་མོ་ཞེས་བྱ་བ་བཞུགས་སོ། །ན་མོ་གུ་རུ། དྲི་མེད་ནམ་མཁའ་ལྟ་བུར་རྣམ་དག་ཅིང་། །སྐུ་དང་ཡེ་ཤེས་འདུ་འབྲལ་མེད་པའི་ལྷ། །ཐོག་མའི་སངས་རྒྱས་སྲིད་ཞི་ཡོངས་ཀྱི་དཔལ། །ཆོས་སྐུ་ཀུན་ཏུ་བཟང་པོར་གསོལ་བ་འདེབས། །དུག་གིས་མྱོས་པའི་སྐྱེ་བོ་ཕོ་མོ་ཡི། །བློ་ཁ་དམ་པའི་ཆོས་ལ་ཕྱོགས་པར་ཤོག །ཟབ་གསལ་ཐུགས་ཀྱི་ཀློང་ནི་མཁའ་ལྟར་ཡང་། །འཁོར་འདས་ཆོས་རྣམས་གཅིག་ཀྱང་མ་ལུས་པ། །སོ་སོར་མ་འདྲེས་ས་ལེར་གཟིགས་པ་ཡང་། །དྲུག་པ་རྡོ་རྗེ་འཆང་ལ་གསོལ་བ་འདེབས། །དུག་གིས་མྱོས་པའི་སྐྱེ་བོ་ཕོ་མོ་ཡི། །བློ་ཁ་དམ་པའི་ཆོས་ལ་ཕྱོགས་པར་ཤོག །འཁོར་འདས་ཆོས་ཀུན་ལག་མཐིལ་སྐྱུར་རུ་ར། །རློན་པ་བཞག་ནས་བལྟས་ལྟར་ས་ལེར་མཁྱེན། །ཞལ་ནས་ནམ་ཡང་རྫུན་གྱི་ཚིག་མི་གསུང་། །སངས་རྒྱས་ཐུགས་རྗེ་ཅན་ལ་གསོལ་བ་འདེབས། །དུག་གིས་མྱོས་པའི་སྐྱེ་བོ་ཕོ་མོ་ཡི། །བློ་ཁ་དམ་པའི་ཆོས་ལ་ཕྱོགས་པར་ཤོག །དུས་གསུམ་སངས་རྒྱས་ཐམས་ཅད་བསྐྱེད་པའི་ཡུམ། །ཆོས་སྐུ་ཡུམ་ཆེན་མོ་ལ་གསོལ་བ་འདེབས། །དུག་གིས་མྱོས་པའི་སྐྱེ་བོ་ཕོ་མོ་ཡི། །བློ་ཁ་དམ་པའི་ཆོས་ལ་ཕྱོགས་པར་ཤོག །ཕྱོགས་བཅུའི་ཞིང་ཁམས་རབ་འབྱམས་མཐའ་ཡས་ན། །བཞུགས་པའི་སངས་རྒྱས་ཡོངས་ལ་གསོལ་བ་འདེབས། །དུག་གིས་མྱོས་པའི་སྐྱེ་བོ་ཕོ་མོ་ཡི། །བློ་ཁ་དམ་པའི་ཆོས་ལ་ཕྱོགས་པར་ཤོག །མཁའ་ལྟར་ཡངས་ཤིང་ཉི་ལྟར་གསལ་བའི་ཐུགས། །རྗེ་བཙུན་གསང་བའི་བདག་པོ་གསོལ་བ་འདེབས། །དུག་གིས་མྱོས་པའི་སྐྱེ་བོ་ཕོ་མོ་ཡི། །བློ་ཁ་དམ་པའི་ཆོས་ལ་ཕྱོགས་པར་ཤོག །ཐུགས་དགོངས་ཆོས་ཀྱི་དབྱིངས་ལས་རབས་ཡངས་པའི། །ཀུན་མཁྱེན་འཇམ་པའི་དབྱངས་ལ་གསོལ་བ་འདེབས། །དུག་གིས་མྱོས་པའི་སྐྱེ་བོ་ཕོ་མོ་ཡི། །བློ་ཁ་དམ་པའི་ཆོས་ལ་ཕྱོགས་པར་ཤོག །ཕུལ་བྱུང་སྟོང་ཉིད་སྙིང་རྗེའི་གཏེར་ཆེན་པོ། །འཕགས་པ་སྤྱན་རས་གཟིགས་ལ་གསོལ་བ་འདེབས། །དུག་གིས་མྱོས་པའི་སྐྱེ་བོ་ཕོ་མོ་ཡི། །བློ་ཁ་དམ་པའི་ཆོས་ལ་ཕྱོགས་པར་ཤོག །དུས་གསུམ་སངས་རྒྱས་ཐུགས་ལས་རབ་སྤྲུལ་པའི། རིག་འཛིན་པད་འབྱུང་ཞབས་ལ་གསོལ་བ་འདེབས། །དུག་གིས་མྱོས་པའི་སྐྱེ་བོ་ཕོ་མོ་ཡི། །བློ་ཁ་དམ་པའི་ཆོས་ལ་ཕྱོགས་པར་ཤོག །རྟོག་པ་ནམ་མཁའི་ཁྱོན་ལྟར་རབ་ཡངས་པའི། །བཀའ་བརྒྱུད་བླ་མ་རྣམས་ལ་གསོལ་བ་འདེབས། །དུག་གིས་མྱོས་པའི་སྐྱེ་བོ་ཕོ་མོ་ཡི། །བློ་ཁ་དམ་པའི་ཆོས་ལ་ཕྱོགས་པར་ཤོག །ཕྱོགས་བཅུའི་རྒྱལ་བའི་ཐུགས་བཅུད་ཟབ་རྒྱས་ཆོས། །སྩོལ་མཛད་རྩ་བའི་བླ་མ་ཐམས་ཅད་ལ། གསོལ་བ་འདེབས་སོ་སྐྱེ་བོ་ཕོ་མོ་ཡི། །བློ་ཁ་དམ་པའི་ཆོས་ལ་ཕྱོགས་པར་ཤོག །རིག་པ་གུད་ཡངས་ཡན་པ་བློ་བདེ་ངས། །ཆོས་དབྱིངས་བདེ་བ་ཆེན་པོའི་ཀློང་ཡངས་སུ། །ཆོས་ཀྱི་དབྱིངས་དང་མཉམ་པའི་སངས་རྒྱས་ཀྱིས། །ཆོས་དང་ཆོས་མིན་ཇི་ལྟར་དབྱེ་ཚུལ་འཆད། །འོ་འདི་ན་གནས་པའི་སྐྱེ་བོ་ཕོ་མོ་རྣམས། ལོག་རྟོག་གི་མུན་པ་དེ་རྒྱང་རིང་བོར་ཐོང་ལ་དར་ཅིག་སྙན་གྱི་དབང་པོ་དེས་ཅུང་ཟད་གསན་པར་ཞུ། དེང་སང་ཨ་ལ་ལ། གདུགས་ཞབས་ཀྱི་བླ་མ། ཁྲི་ཐོག་གི་རྒྱལ་པོ། རི་སུལ་གྱི་སྒོམ་ཆེན། རྒྱལ་ཁམས་ཀྱི་སྤྲང་པོ། གྲོང་མཐའི་རྒན་མོ་ཡན་ཆད་ཀྱིས་ཁ་ཟས་ཀྱི་མཆོག་ཏུ་གྱུར་བ་ཟས་ངན་དུ་རུ་ཥ་ལ་བྱེད་པ་འདི་ཧ་ཅང་བཟང་པོ་ནི་མ་ལེགས་སོ། །འདི་ཡི་རྒྱུ་མཚན་ཅུང་ཟད་ཅིག་བསྙད་ན། སྔོན་དུས་སུ་རི་བོ་མ་ལ་ཡ་ཡི་གནས་ནས་དཔལ་གསང་བའི་བདག་པོ་ཕྱག་ན་རྡོ་རྗེའི་འཁོར་རིགས་ཅན་དྲ་མ་ལྔ་ལ་གསང་སྔགས་ཀྱི་དེ་ཁོ་ན་ཉིད་ཀྱི་ཆོས་སྟོན་པའི་ཚེ་ན། མ་འོངས་པ་ན་གངས་ཅན་བོད་ཀྱི་རྒྱལ་ཁམས་སུ། ཆོས་འདི་ཡི་བསྟན་པ་དར་བའི་ཚེ་ན། ལྷ་ཡི་རྟགས་དང་བདུད་ཀྱི་རྟགས་གཉིས་ཡོད་པས་འདི་ཤིན་ཏུ་མ་བརྟགས་ན་ཅི་བྱ་གཏོལ་མེད་ལ་འགྲོ་བའི་ཉེན་ཡོད་པས་བརྟགས་པ་གཅེས། བདུད་རྟགས་བྱུང་ན་ཆོས་ཀྱི་སྒྲ་ཙམ་བརྟན་པར་བྱ་བ་མིན། དེས་ན་བླ་མས་སློབ་མ་མ་བརྟགས་བདུད་ཀྱི་ལས། སློབ་མས་བླ་མ་མ་བརྟགས་བདུད་ཀྱི་ལས་ཡིན། དེ་ནས་ལྷ་ཡི་རྟག་ནི་ཤིན་ཏུ་བརྟགས་དཀའ། བདུད་རྟགས་ཅུང་ཟད་སླ་བ་ཡིན་ཏེ། བླ་མ་ནི་སེམས་ཅན་སྟོང་གི་སྐེ་གཅོད་པ། ཆོས་ཟོབ་ཀྱི་མི་མགོ་བསྐོར་བ། བཙུན་མོ་རོལ་དུ་ཁྲིད་ནའང་། བདུད་ཀྱི་སྤྲུལ་བ་ཨི་ཡིན་མི་ཤེས། སློབ་མ་ཡང་གདོལ་བ་སྨན་འཚོང་ཉ་བ་རྔོན་པ་བཀའ་འདས་དམ་ལོག་ཅི་ལྟ་བུ་ཞིག་ཡིན་ཀྱང་དེ་བདུད་ཀྱི་སྤྲུལ་བ་ཨི་ཡིན་མི་ཤེས་པས་ན་བརྟག་དཀའ། དེ་རྣམས་ཀྱི་ནང་ནའང་སངས་རྒྱས་དང་བྱང་ཆུབ་སེམས་དཔའི་སྤྲུལ་བ་མང་པོའི་འགྲོ་བའི་དོན་གང་ལ་གང་འདུལ་དུ་མཛད་པའི་སྙིགས་དུས་ཀྱི་གང་ཟག་རྣམས་ཀྱིས་བརྟག་དཀའ་སྟེ། བདུད་ཀྱི་རྟགས་ནི། དམ་སྲི་སྤུན་དགུའི་མངལ་གྱི་རཀྟ་ལས་བསྐྱེད་པའི་ཟས་ངན་དུ་རུ་ཥ་བརྟེན་པའི་གང་ཟག་དེ་ནི། སྣང་སེམས་དུ་མ་རོ་གཅིག་གི་ངང་ནས། ནམ་མཁའ་ལ་མཁའ་ལྡིང་བཞིན་འགྲོ་བ་དང་། ཆུ་ལ་ཉ་ལྟ་བུ་དང་། རི་བྲག་ལ་ཟང་ཐལ་དུ་འགྲོ་བ། མངོན་ཤེས་ཀྱིས་སྣང་སྲིད་ཐམས་ཅད་མཁྱེན་ན་ཡང་། དེ་ནི་བདུད་ཀྱི་སྤྲུལ་བ་ཡིན་པར་ཆུད་མི་ཟ་བ་ཡིན། དེའི་རྒྱུ་མཚན་ཁར་སང་ཟླ་བ་སྔ་མ་ན་རྡོ་རྗེ་གདན་གྱི་ནང་དུ། མ་འོངས་པ་ན་ཆོས་འདི་ཡི་ཁ་ནོན་ལ། བདུད་ཀྱི་རྒྱལ་པོ་དགའ་རབ་དབང་ཕྱུག་འཁོར་དང་བཅས་པ་བཀའ་བགྲོས་མཛད་ནས། དམ་སྲི་སྤུན་དགུའི་མངལ་ཁྲག་གིས་ས་བོན་བྱས་པའི་དུག་གི་ལོ་མ་མིན་པ་གཞན་གང་གིས་ཀྱང་བཤིག་མི་ཐུབ་པ་ཁོ་ནས་སྨོན་ལམ་ལོག་པ་དང་བཅས་པས་བྱུང་བ་ཡིན་པས། ཁྱད་པར་དུ་གཤིན་པོའི་འདྲེན་མཆོག་ཏུ་རེ་བའི་བླ་མ་རྣམས་ཀྱིས་བརྟེན་ན། བསམ་བཞིན་དུ་གཤིན་པོ་དམྱལ་བར་ཁྲིད་པའི་ལམ་མཁན་སྒེར་དུ་བསྒྲུབ་པ་ཡིན་པས་བརྟགས་པ་གལ་ཆེ། དེ་མིན་གསང་སྔགས་འབྲས་བུའི་ཆོས་འཆད་ཉན་བྱེད་པའི་སྐབས་དང་། ཚོམ་བུ་ཚོགས་སྒྲུབ་ཀྱི་སྐབས་རྣམས་སུ་ཟས་ངན་དེ་བཟའ་བ་སྨོས་ཅི་དགོས། ས་ཕྱོགས་དེ་ན་རྒྱ་ཤུག་གི་ཚིག་ཙམ་ཅིག་གནས་ན། ལྷ་བསྒོམ་པ་དང་། སྔགས་བཟླས་པ་དང་། ཏིང་ངེ་འཛིན་བསྒོམ་པ་དེ་དག་ཆུ་བཤིག་པ་ལ་མར་འདོད་པ་ལྟ་བུ་ལས་འབྲས་བུ་སྐྲ་རྩེ་བརྒྱར་གཤེགས་པའི་ཆ་ཙམ་ཡང་མི་འབྱུང་། མ་འོངས་པ་ན་འདི་སངས་རྒྱས་ཀྱི་བསྟན་པ་རྨིང་ནས་བཤིགས་པའི་རུ་དྲ་གཅིག་ཡིན་པས་ཤེས་པར་གྱིས་ཤིག །གསང་བདག་ཕྱག་ན་རྡོ་རྗེའི་རྟོགས་རྗོད་ཆེན་མོ་ན་གསལ་ཡོད་ཡང་མུ་ཅོར་སྨྲ་བ་ཁ་ཅིག་གིས་དུག་གི་ལོ་མ་སྤྱད་ན་ཉེས་པ་ཅི་ཡོད། དེས་ན་ཇ་དང་རྩམ་པ་གཉིས་བརྟེན་མི་རུང་གི་ཟེར་བཞད་གད་ཐག་ཐག་བྱེད་པའི་རང་མཐོང་གི་ང་རྒྱལ་གྱི་རྒྱག་པ་ཁོ་རེ་ཚོ་དེ་གཉིས་ཀ་ནི་མི་འདྲ། ཧེ་ཧེ་རྩམ་པ་ནི་སངས་རྒྱས་སྣང་བ་མཐའ་ཡས་ཀྱི་ཐུགས་ཀྱི་སྤྲུལ་བ་འཕགས་མཆོག་སྤྱན་རས་གཟིགས་དབང་གིས་སྤྲེའུའི་རྒྱལ་པོ་ཧ་ལུ་མནྡྷཱ་དང་། སྒྲོལ་མ་ཁྲོ་གཉེར་ཅན་གཉིས་ལ་ཁྱིམ་ཐབ་ཀྱི་ཟས་ལ་འབྲུ་སྣ་ལྔ་བསྐུར་བ་ནི་ནས་དང་གྲོ་དང་སྲན་མ་འབྲས་དང་ཏིལ་དང་ལྔ་བྱིན་པས་ཡར་ཀླུང་ཟོ་ཐང་ལ་བཏབ་ནས་སྤྲེལ་ཙ་རྣམས་ཀྱི་མུ་གེ་གནམ་ལ་ཡར་བས་ཡར་ལུང་ཞེས་ཡུལ་ལ་ཡང་མཚན་སྙན་དུ་གྲགས། དེ་ནི་རང་གར་བཟའ་བ་བསོད་ནམས་ཆེ་སྟེ། འབྲུ་ལྔའི་ཡོན་ཏན་བུམ་རྫས་ཉེར་ལྔ་ནས་གསལ་བ་སྨོས་ཅི་དགོས་དང་། ཡང་མཁས་རློམས་ཁ་ཅིག་གིས་རང་ཡང་ངན་སོང་དུ་འགྲོ་བར་མ་ཟད། གཞན་ཐར་བར་ཕྱོགས་པའི་སོ་སོའི་སྐྱེ་བོ་ཕོ་མོ་རྣམས་ལ། དུག་གི་ལོ་མ་འདི་མདོ་ན་གནང་མེད་དེ། སྔགས་ན་གནང་ཡོད་པ་འདྲ་ཤ་དང་ཆང་གཉིས་བརྟེན་རུང་སྟེ། འདི་ཡང་བརྟེན་རུང་གི་ཟེར། གཞན་ན་མེད་པའི་ཁྱད་ཆོས་སུ་འདོན་པ། ཁོ་རེ་ཚོ་ཅེ་རེ་ལོང་སོང་བ་མིན་ན། སྔོན་ཆོས་རྒྱལ་ཚངས་པ་ལྷའི་མེ་ཏོག་གི་ཆོས་ཁྲིམས་དར་གྱི་མདུད་པ་དེ་བསྡམ་པའི་སྐབས་ན། སྔགས་པ་བླ་མའི་དམ་ཚིག་བསྒྲགས་པ་བཞིན། །རྒྱུད་ནས་ཇི་ལྟར་བཤད་པ་བཞིན་དུ་གྱིས། །སྐོམ་དུ་ཆང་གསོལ་དགེ་འདུན་དཀོར་མ་འབགས། །ཟས་སུ་ཅི་དགའ་ལོངས་སྤྱོད་དུག་མ་ཟ། །གསུང་བ་དེ་བོད་ཀྱི་སྔགས་པ་རྣམས་བརྒྱ་བླུན་ན་ཡང་། སྒ་ཚགས་ཕྱེ་མ་ལེབ་དང་། སྟག་ཕྱེ་རྣམས་མི་ཟ་རྒྱུ་ལོས་ཤེས། སྤྲུལ་སྐུ་སངས་རྒྱས་གླིང་བའི་ཟབ་ཆོས་ལས། སྙིགས་མའི་དུས་ཀྱི་སྤྱོད་ངན་སྣ་ཚོགས་བྱེད། །ཁྱད་པར་ཁ་ཟས་རོ་ལྡན་མི་བརྟེན་པར། །མཐའ་ཟས་དྲི་ངན་དུག་ཅན་ཟས་སུ་སྤྱོད། །ནམ་ཡང་ངོམས་མེད་སྲེད་པ་ཆེས་ཆེར་འཕེལ། །བྱ་བའི་འཕྲོ་བསྐྱུར་དུག་ལ་དམར་འཇུས་བྱེད། །ཁ་ཆུ་སྣ་ཆུ་མི་ཐུབ་བཀྲག་མདངས་ཉམས། །ཞེས་དང་། ཡང་སྤྲུལ་པའི་གཏེར་ཆེན་རཏྣ་གླིང་བའི་ཟབ་གཏེར་ལས། ཁ་རླངས་ཕོག་ཚད་དྲི་ཡི་ཚོར་ཚད་ཀྱང་། །སྐྱེ་བོ་འབུམ་ཕྲག་དྲུག་ཅུའི་སྙིང་འབྱིན་མཚུངས། །དཀྱིལ་འཁོར་མདུན་དུ་འཐེན་ན་ཡང་། །ཡེ་ཤེས་ལྷ་ཡང་མི་བྱོན་པས། །དམ་སྲི་ཉུལ་ལེ་བདུད་བགེགས་རྣམས། །རྫས་ངན་དྲི་དེ་ཚོར་ཙམ་གྱི། །ཤ་རུལ་སྦྲང་མ་བཞིན་དུ་འདུ། །ཕར་ལ་བསྐྲད་ཐབས་མ་མཆིས་པས། །དངོས་གྲུབ་མི་ཐོབ་བར་ཆད་འབྱུང་། །ཞེས་དང་། ཡང་རིག་འཛིན་ཆེན་པོ་རྒོད་ཀྱི་ལྡེམ་འཕྲུ་ཅན་གྱི་གཏེར་ལུང་ལས། དུས་ངན་ཐ་མལ་དྲི་ཟའི་ཟས། །ཧ་སྐྱུག་ངན་པ་ཟས་སུ་ཟ། །དྲི་ཚོར་ཙམ་གྱིས་མནར་མེད་འགྲོ །དེ་ཕྱིར་ད་ལྟ་སྤང་བ་གཅེས། །ཞེས་དང་། རིག་འཛིན་ཀློང་གསལ་སྙིང་པོའི་ཟབ་གཏེར་ལས། །ཟས་ཀྱི་དུ་རུ་ཥ་ལ་སྤྱོད་པའི་དུས། །བློ་གཏད་གྲོགས་པོའི་ཟས་ཀྱི་འགུམ་པ་འབྱུང་། ཞེས་དང་། ཡང་རིག་འཛིན་ཆེན་པོ་བདུད་འདུལ་རྡོ་རྗེའི་ཟབ་གཏེར་ལས། །སྔོན་དེའི་དུ་བ་ཁ་ལ་སོང་། །ཕྱེ་མ་རྣ་རུ་བླུགས་པ་ཡིས། །བན་བཙུན་ཕོ་མོ་དེ་ལ་འདུས། །དམ་ཉམས་ཚོགས་ནི་ལུང་བ་ཁེངས། །བདུད་ཀྱིས་བསླུས་པའི་རྟགས་སུ་ནི། །འདོད་པའི་ཆགས་སེམས་ཡང་ཡང་སྐྱེ། །བསོད་ནམས་འཛད་པའི་རྟགས་སུ་ནི། །དེ་ལ་ཐལ་བའི་སྡེབ་སྦྱོར་བྱེད། །བཀྲ་མི་ཤིས་པའི་རྟགས་སུ་ནི། །མིག་ནས་མཆི་མ་དབང་མེད་འཆོར། །ཞེས་གསུངས་བས། །དེ་འདྲ་བརྒྱ་དགོས་ན་སྟོང་གི་ཡང་མི་ཚད། འདིར་ཡི་གེ་མང་དོགས་ནས་མ་བཀོད། དེ་དག་རྣམས་སྔགས་པ་མིན་པའི་སྒྲུབ་བྱེད་སྨྲ་རྒྱུ་ཅི་ཡོད། ཡང་ཁ་ཅིག་ན་རེ། ཁོང་ཚོས་བླ་མ་འགའ་རེས་མདུན་ནས་ཁས་ལེན་བྱས་མ་ཆོད་ཕྱི་ནས་འཐེན་དགོས་བྱུང་ཏེ། ད་དྲག་ས་ཡོད་དུང་ཕྱུར་མང་བོ་བཏོན་ཡོད། དེ་ཡིས་མི་འདག་ན་སངས་རྒྱས་ཀྱི་གསུང་ལ་བདེན་པ་མེད་རྟགས་རེད་ཟེར་བའི་ཐར་བ་འདོད་པ་ལ་རེ་བ་ཁོ་རེ་ཚོ། དཔལ་ལྡན་ཨ་ཏི་ཤའི་སྤྲུལ་བ་རྗེ་བློ་བཟང་གྲགས་པའི་ཞལ་ནས། ཟས་ངན་བརྟེན་པའི་གང་ཟག་རྣམས་ལ་ཐར་པའི་ས་བོན་གཏན་ནས་མི་སྲིད། དཔེར་ན་ཡོས་ཚིག་གི་ཞིང་བཏབ་པ་དང་འདྲ་སྟེ། དེ་བརྟེན་པའི་གང་ཟག་གི་དགེ་སྦྱོར་གང་བྱས་པ་ཐམས་ཅད་མེ་འབར་བ་ལ་ཤིང་སྣོན་པ་ཁོ་ན་ལས་གང་ཡང་མེད། དེ་ཕྱིན་ཆད་འཆི་བ་ཐུག་ཀྱང་ཟས་ངན་བརྟེན་རེ་ན་ར་ཀན་བསམ་པའི་སྡོམ་སེམས་དང་ལྡན་པའི་ངང་ནས་བཤགས་པ་བྱས་ན་མི་འདག་མི་སྲིད་གསུང་པ་ཐུགས་བཞག་མཛོད་དང་། ཡང་ཨོ་རྒྱན་གཉིས་པ་ཀརྨ་བ་རང་བྱུང་རྡོ་རྗེ་མཚུར་ཕུའི་དགོན་པ་ན་བཞུགས་པའི་ཚེ་ཕར་ཕྱིན་དྲུག་གི་ཆོས་ལ་མངའ་བརྙེས་པ་ཀརྨ་བསམ་འགྲུབ་ཚེ་དུས་བྱས་པ་ལ། འཕོ་བ་ལན་གསུམ་གྱིས་མ་ཐེབས་ཏེ་ཐུགས་དམ་གྱིས་གཟིགས་ཚེ་དུ་བ་འཐེན་པའི་རྣམ་སྨིན་ལས་བྱུང་བ་འདུག་གསུངས། ཡང་པོད་ཆུང་ཁ་ཤས་རེ་ཙམ་གཟིགས་པའི་ཐོས་བསམ་གྱིས་མིག་རྒྱང་ཐུང་བ་འགའ་ཞིག་གིས་འདི་སངས་རྒྱས་ཀྱི་གསུང་ན་མི་སྣང་། འདི་བོད་ཀྱི་སྔགས་ནག་ཁྱིམ་པའི་ཆ་བྱད་ཅན་རྣམས་ལ་ཉི་མ་རིང་ནས་ཇོ་མོའི་ཆང་རེ་བླུད་ནས་ཨ་ཕའི་སྣ་དུད་འདི་ཡི་ཉེས་དམིགས་འདི་འདྲ་བ་ཞིག་བརྩམ་ཆོས་ཡིན་ཟེར་ནས་ཧ་བགད་བྱེད་པ་ཚོ། བཅོམ་ལྡན་འདས་ཀྱི་འདུལ་བ་གསེར་མདོག་ལས། ཡིད་འོང་ལས་ལ་སྙིགས་མའི་དུས་ཀྱི་རྫས། །དུ་རུ་ཥ་ནི་བཅོ་བརྒྱད་འབྱུང་བར་འགྱུར། །གང་གིས་རིག་ཚད་དམྱལ་བར་འགྲོ་བར་འགྱུར། །ཕྱི་མ་ཡིད་འོང་གནས་སུ་སྐྱེ་མི་སྲིད། ཅེས་དང་། ཡང་འདུལ་བ་འོད་ལྡན་ལས། །སྙིགས་མའི་དུས་ན་དུ་རུ་ཥ། །ཁ་སྣའི་མྱོང་བའི་སྡིག་ཅན་རྣམས་། །ཚེ་འདིར་དབུལ་ཕུང་པྲེ་ཏ་ལྟར། །ཕྱི་མ་དམྱལ་བར་འོ་དོད་འབོད། །བསྐལ་བ་བརྒྱ་ཕྲག་གནས་པར་འགྱུར། །ཅེས་གསུངས་སོ། །དེ་དག་སངས་རྒྱས་ཀྱི་བཀའ་མིན་པའི་སྒྲུབ་བྱེད་སྨྲ་རྒྱུ་ཅི་ཡོད། སྔོན་བསམ་ཡས་ཀྱི་རྒྱ་དཔེ་རྙིང་བ་ན་ཟས་ངན་གྱི་ཉེས་དམིགས་ལོ་རྒྱུས་དང་བཅས་པ་སངས་རྒྱས་ཀྱི་བཀའ་དྲི་མ་མེད་པ་འབུམ་གྱི་པོ་ཏི་ཙམ་ཞིག་ཡོད་པ་དེ། ཕྱིས་རྒྱལ་པོ་གླང་དར་གྱིས་བསྟན་པ་བསྣུབ་ཚེ་མེད་པར་བྱས་ནས་བོད་ཀྱི་ལོ་ཙ་བ་རྣམས་ཀྱི་འགྱུར་བྱང་ཆེན་མོ་ན་གསལ་བ་སྨོས་ཅི་དགོས། འདི་ལྟར་ཟས་ངན་གྱི་ལོ་རྒྱུས་ཉེས་དམིགས་རྣམས་བཤད་ན་སྐྱེ་བོ་ཕལ་བ་རྣམས་ཀྱི་བློ་ཁ་ཅུང་ཟད་འགྱུར་བར་སླ་སྟེ། བླ་རྒན་ཁ་སེ་ཚོ་དང་། གཅོད་སྔགས་མགོ་མདོང་ང་ཚོ་དང་། གྲྭ་གཞོན་སྲང་རྡོ་མགོ་རྣམས་ཀྱིས་གཏན་ནས་མི་ཉན། དེ་ཡི་རྒྱུ་མཚན་ཅི་ཞིག་ཡིན་ན། ཤེས་བྱའི་གཤིས་ལ་བདུད་ཀྱི་བྱིན་རླབས་ཞུགས་པའི་རྟགས་ཡིན་ལ། འོ་ན་ལུང་ལས། དགེ་བའི་ཕན་ཡོན་སྡིག་པའི་ཉེས་དམིགས་དང་། །དམྱལ་པའི་སྡུག་བསྔལ་ཚེ་ཚད་ལ་སོགས་པ། །ཐོས་ཀྱང་མི་བདེན་བཤད་ཚོད་ཡིན་བསམ་པའི། །མཚམས་མེད་ལྔ་བས་ཐུ་བའི་ལས་ངན་པ། །ཐར་མེད་ལས་ངན་བསགས་པ་མཐོལ་ལོ་བཤགས། ཞེས་པའི་དོན་ཐོག་རྒྱུ་བབ་པ་ཡིན་མོད། བློ་འགྱུར་བ་ཕར་ཞོག །དང་པོ་ཉན་ཉན་འདྲ་བ་མང་པོ་བྱེད་ཁས་བླང་ནས། ཕར་སླེབས་པ་དང་མཉམ་དུ་སྔར་བཞིན་ཟས་ངན་ལ་བག་མེད་དུ་སྤྱོད་ནས། ཕུ་མདའ་ལ་ཤོད་ནས་དད་ཟས་དང་གཤིན་ཟས་མང་པོ་བསྡུས་ནས་དུ་རུ་ཥའི་ཆ་རྐྱེན་བྱས་ནས་ཆོས་སྐད་འཆལ་འཆོལ་སྨྲ་བ་རྣམས་ནི་དམ་ཉམས་ཕལ་བ་སྟོང་གི་ཆར་ཡང་མི་ཉེ། དེ་དང་ཡུལ་ལུང་བ་གཅིག་དུ་འདུག་ནས་གསོན་པ་བས་ས་གཞན་ཞིག་ཏུ་རང་ཁར་ཤི་བས་དགའ། ས་གཞན་ཞིག་ཏུ་ཤི་ན་དགེ་བ་མེད་ནའང་། སྡིག་ཚབ་ཆེན་དེ་འདྲ་དང་གང་ནས་འབག །ཁོ་རེ་ཚོ་ཆོས་འཆད་དབང་བསྐུར་བྱེད་པའི་བླ་མ་རྣམས་ཐུགས་བཞག་མཛོད། དུ་རུ་ཥ་ལ་བརྟེན་པའི་གང་ཟག་རྣམ་ལ་དབང་དང་གདམས་ངག་བྱིན་ན། ལྷ་འདྲེ་མི་གསུམ་འཁྲུགས། ཡུལ་ལྷ་ཟོ་དོར་འཁྲུགས་པ་དང་། སྟེང་ལྷ་བར་གཉན་འོག་ཀླུ་དྲེགས་པའི་སྡེ་བརྒྱད་རྣམས་འཁྲུགས་པ་དང་། དེའི་ཚེ་ནད་དང་མུ་གེ་དང་མཚོན་ཁ་དར་བ་དང་། ས་གཡོ་བ་དང་། རླུང་ནག་དང་། འཚུབ་མ་དང་། བུ་ཡུག་དང་། མི་བདེ་བ་སྣ་ཚོགས་འོང་ངོ་། ན་རཀ་ཆེན་པོ་ཡོངས་སུ་འཕེལ་བར་འོང་ངོ་། །སློབ་མ་ལ་ཡང་ཚེ་ཐུང་ལ་ནད་མང་བར་འོང་ངོ་། སློབ་དཔོན་ལ་ཡང་ཕུང་བ་དང་སྡུག་བསྔལ་བ་དང་། གྲི་རུ་འཆི་བ་ལ་སོགས་འོང་ངོ་། ཆོས་ལ་ཡང་མཐུ་ཆུང་བ་དང་། བོན་དང་མུ་སྟེགས་པ་དང་། སྔགས་པ་དང་སྲིན་པོ་ལ་སོགས་པ་བདུད་ལང་བའི་དུས་འོང་ངོ་། །དེ་རྣམས་མི་ཡོངས་ནའང་སློབ་དཔོན་རང་ཡང་ཟས་ངན་འཐེན་པ་བདུད་ཀྱི་རིགས་ཡིན་པའི་རྟགས་ཡིན་ལ། འོ་ན་དམ་པར་ཁས་བླང་འཆེ་ཡང་། དམ་པའི་ཚུལ་དང་མཐུན་པ་སྡོམ་གསུམ་ཀྱི་ཉམས་ལེན་དང་། འཆད་རྩོད་རྩོམ་གསུམ་གྱི་ཡོན་ཏན་ཅི་ཡང་མེད་པར་དུ་རུ་ཥའི་དགའ་སྟོན་ལ་རོལ་བའི་ཆགས་སྡང་གཡོ་རྒྱུའི་འཁོར་ལོ་བསྐོར་ཏེ་རྙེད་བཀུར་འདུ་འཛི་འབའ་ཞིག་དོན་དུ་གཉེར་ནས་དགེ་བའི་བཤེས་གཉེན་དུ་བཏགས་པ་དུ་མས། རིགས་མཐུན་གྱི་གྲྭ་སློབ་རང་གི་རྗེས་སུ་ཞུགས་པ་ཐམས་ཅད་ལ་རྒྱལ་བའི་དགོངས་པ་དང་མཐུན་པའི་གདམས་པ་སྣ་རེ་སྟོན་རྒྱུ་མེད་པར་དུ་རུ་ཥའི་ཡོན་ཏན། དགྲ་འདུལ་གཉེན་སྐྱོང་ཚེ་འདིའི་སྣང་ཤེས་བསྒྲུབ་པའི་ཐབས་ཁོ་ན་བསྟན་ཏེ་བློ་སྣ་ཐུར་དུ་ཁྲིད་པའི་ཆོས་པ་མང་ལ། ཡང་དག་པའི་དགེ་བའི་བཤེས་གཉེན་དང་དེའི་རྗེས་སུ་ཚུལ་བཞིན་དུ་སློབ་པ་ཉུང་བའི་དུས་ངན་སྙིགས་མའི་ཚུལ་འདི་ལྟ་བུ་ལ་བསམ་ཀྱིན་སྐྱོ་བའི་གནས་ཡིན་ནོ། །ད་ཁྱེད་རྣམས་ལ་བླ་མས་ཅི་ཙམ་ཞིག་གསུངས། གྲོགས་བཟང་པོ་འགའ་རེས་ཀྱང་ཅི་ཙམ་ཞིག་བཤད་དེ་རྣམས་ཀྱི་ཚིག་ལ་བརྩི་འཇོག་མེད་པ། ལྐོག་ཏུ་ཟས་ངན་བག་མེད་དུ་སྤྱོད་པ་ཁྱེད་ཀྱིས་བླ་མའི་ཞབས་འདྲེན། གྲོགས་ཀྱི་གྲྭལ་རྫད། ཆོས་པའི་བླ་བཙོངས། བསྟན་པའི་མིག་རྐྱེན་ལ་གནོད་པ་འདི་བྱེད་པའི་རྒྱུ་མཚན་ཅི་ཡོད་ཤོད། ཁྱོད་ཤི་ན་རྡོ་རྗེའི་དམྱལ་བར་སྐྱེ་བ་དང་། དེ་དང་ལྷན་དུ་ལུང་བ་གཅིག་གི་ཆུ་འཐུང་ཚད་ཀྱང་ཉམས་གྲིབ་ཀྱིས་ནོན་པས་དམྱལ་པར་འགྲོ་ཞེས་རྡོ་རྗེ་འཆང་སོགས་ཀྱིས་གསུང་བཞིན་དུ། ད་རུང་དམ་ཚིག་དང་སྡོམ་པ་མི་བསྲུང་བར་ཟས་ངན་འཐེན་ན་ཁྱོད་ཀྱིས་རྡོ་རྗེ་འཆང་གི་གསུང་བ་དེ་མི་བདེན་སྙམ་པ་ཡིན་ནམ། བདེན་ཀྱང་དགོས་པ་མེད་སྙམ་པ་ཡིན་ནམ། ཡང་ན་ཁྱོད་རྡོ་རྗེ་འཆང་ལས་ས་ཚོད་མཐོ་བ་ཞིག་ཡིན་ནམ་ཡང་ན་ཕོ་ཚོད་ཆེ་བ་ཞིག་ཡིན་ནམ། ཡང་ན་གདོན་གྱིས་ཟིན་ནས་སྙིང་ཁོག་ན་མེད་པ་ཞིག་ཡིན་ནམ། དེ་རྣམས་གང་རུང་ཞིག་ལས་མ་འདས། ད་ཁྱོད་དམྱལ་བར་འགྲོ་ན་ཡང་འགྲོ་ཞོར་ལ་ལུང་བ་གཅིག་གི་ཆུ་འཐུང་ཚད་སོགས་དམྱལ་བར་ཁྲིད་མ་འགྲོ་བར་འཇོག་རོག་གྱིས། ཡུལ་ཁམས་ཐམས་ཅད་མ་བརླགས་ཅིག །དེ་རྣམས་ལ་གོ་རྒྱུ་ཨི་བྱུང་། ད་དུང་མི་གོ་རྣ་བར་མི་འགྲོ། སེམས་ལ་མི་འཐད་པར་འདུག་ན་ཁོག་པར་བདུད་ཀྱི་རྒྱལ་པོ་དགའ་རབ་དབང་ཕྱུག་འཁོར་དང་བཅས་པ་ཞུགས་ནས་འདིར་ཐོན་ཡོད་པས་ཨ་ཙ་འཇིགས་པ་ཅི་དྲག་ཁྱོད་འཇིག་རྟེན་མི་ཡི་ཁྱུ་ན་སྔར་ནས་ཐོན་ཚར་འདུག །ཆོས་པའི་གྲྭལ་ནས་རོ་ལྟར་བུད་འདུག་ཕྱིན་ཆད་སླར་རོ་འཚང་བརྒྱབ་ནས་ཡང་བསྟན་པ་ནང་ནས་བཤིག་གིན་མ་སྡོད་པར་ཕྱི་རོལ་མུ་སྟེགས་པའི་རྗེས་སུ་སོང་ཞིག །སྨྲས་པ། ལགས་སྐར་སྤྲུལ་བ་དམ་སྲི་སྤུན་དགུ་སོགས། །བཀའ་ལ་འགལ་ཞིང་བཀའ་བརྒྱུད་བསྟན་པ་བསྣུབ། །དམ་སྲི་ཁུང་ཞུགས་དུག་གི་ལོ་མ་འཐེན། །དྲི་ཡིས་གར་ཁྱབ་ལྷ་སྲུང་གཞི་བདག་བརྒྱལ། །ལུས་ཀྱི་ལྷ་རྣམས་བྱ་ནག་རྡོ་ཕོག་འདྲ། །དེ་རྣམས་དམ་སྲི་དྲི་ཟའི་བསྟན་པ་དར། །ཁྱད་པར་བླ་མ་རྣམས་ཀྱིས་འདི་སྤྱོད་ན། །འབྲེལ་ཐོག་གང་ཡོད་རྡོ་རྗེ་དམྱལ་པར་འགྲོ། །གོང་གི་རྒྱལ་པོ་རྣམས་ཀྱིས་འདི་སྤྱོད་ན། །འོག་སྡེ་གང་ཡོད་རྡོ་རྗེའི་དམྱལ་བར་འགྲོ། །བཙོངས་ནས་རིན་ལེན་བྱེད་པ་གང་ཡོད་རྣམས། །ཡི་དྭགས་དུག་ཟན་སྐྱེ་བ་ལྔ་བརྒྱ་ལེན། །དེ་འཕོས་རྡོ་རྗེའི་དམྱལ་བར་སྐྱེ་བར་འགྱུར། །དེ་ཕྱིར་དོན་ཆུང་ཉེས་ཆེས་བག་ཡོད་བརྟེན། །དུག་ཟས་འཆང་རྣམས་ཡོད་ན་རོ་ལྟར་བུད། །སེམས་ཡོད་སྐལ་ལྡན་ཡོད་ན་ཐར་ལམ་སྙེགས། །བསྙེགས་ནས་སྐྱེ་དང་ཚེ་རབས་ཐམས་ཅད་དུ། །ཟས་ངན་དང་དུ་ལེན་པའི་བསམ་པ་ནི། །དངོས་སུ་ལྟ་ཞོག་རྨི་ལམ་སྐབས་སུ་ཡང་། །ཡིད་ལ་ནམ་ཡང་མི་སྐྱེས་སྨོན་ལམ་ཐོབ། །སྐྱེས་ན་དམ་ཅན་རྒྱ་མཚོའི་སྙིང་ཁྲག་འཐུང་། །ཞེས་དུག་འདོན་ལུང་དང་རིག་པའི་མདའ་མོ་ཞེས་བྱ་བ་འདི་ནི་སྐལ་ལྡན་གྱི་སློབ་བུ་མང་པོས་ཡང་ཡང་བསྐུལ་བ་ལ་བརྟེན་ནས་བཀའ་གཏེར་སོགས་ནས་གསུང་པའི་དུ་རུ་ཥའི་ཉེས་དམིགས་མང་པོ་ལ་གཞི་བྱས་ནས། བྱ་བཏང་ཚོགས་དྲུག་རང་གྲོལ་གྱིས་བྲག་དཀར་སྤྲེལ་རྫོང་ནས་སྦྱར་བའོ། །འདིས་ཀྱང་བསྟན་པ་དང་སེམས་ཅན་ལ་ཕན་ཐོག་པར་གྱུར་ཅིགསརྦ་མངྒ་ལམ། དགེའོ། །