ནང་ཕུང་པོ་ལ་རྩལ་སྦྱོང་བ།

གཉིས་པ་ནང་ཕུང་པོ་ལ་རྩལ་སྦྱོང་བ་ནི། ཡང་དེ་བཞིན་དུ་ཧཱུྃ་ལས་ཧཱུྃ་མཐོ་གང་བས་ལུས་ཀྱང་ཕྱི་ཐལ་ནང་ཐལ། མདུན་རྒྱབ་སྟོད་སྨད་ཀུན་ནས་ཟང་མ་ཐལ་བྱུང་དུ་ཁོལ་ཙེ་མེད་པར་ཕུག་པས་སང་སེང་ཁྲལ་ཁྲོལ་དུ་སྦྱངས་བར་བསམ་མོ། །དེ་འབྱོངས་པའི་རྟགས་སུ་ལུས་ཁྲལ་མ་ཁྲོལ་དུ་སོང་བ་སྙམ་དུ་བྱེད་ཅིང་། ལུས་ཤ་ཁོལ་བུར་འཕར་ཞིང་རྡོལ། ལུས་ཆུ་ཟླའི་གཟུགས་བརྙན་ལྟར་སྣང་ལ་རང་བཞིན་མེད་པའི་ཉམས་འཆར་རོ། །དེས་ནང་ཕུང་པོའི་ནད་གདོན་ཞི་ཞིང་འཇའ་ལུས་འོད་གསལ་ཀྱི་སྐུར་གྲོལ་བར་འགྱུར་རོ། །