༨༧

དེ་ཡང་ཆོས་གང་ཟག་ཐམས་ཅད་མཆོག་ཏུ་མ་མཐོང་བར་སྒྲོ་སྐུར་སྣ་ཚོགས་ཀྱི་སྡིག་ལས་སོག་པ་ནི། ཡུལ་དེ་དག་དཀོན་མཆོག་མཆོད་བསྟོད་ཀྱི་སྐྱབས་གནས་དམ་པ་ཡིན་པ་ལ། སྔོན་གྱི་ལས་སམ་འཕྲལ་གྱི་རྐྱེན་གྱིས་སྣང་བ་ལ་ལོག་ནས་ཡིད་དུ་མི་འོང་བར་མཐོང་ནས་དེ་ལ་ཞེ་སྡང་དྲག་ཏུ་སྐྱེས་ནས་གཤེ་སྐུར་སོགས་ཀྱི་སྡིག་མི་བཟད་པ་བྱེད་པ་བྱུང་བ་ཡིན་ཏེ། ལས་ངན་དེའི་རྩ་བའང་ཞེ་སྡང་གི་ཉོན་མོངས་པའི་དུག་དྲག་པོས་མི་བཟོད་པར་གཟིར་བར་གྱུར་པ་ལ་ཐུག་པའི་ཕྱིར། དེས་ན་ཡིད་དུ་མི་འོང་བའི་ཡུལ་ལ་ཞེ་སྡང་སྐྱེ་བ་དང༌། ཞེ་སྡང་གི་དབང་གིས་གནོད་སེམས་ཅན་མཐོང་བ་ཙམ་གྱིས་སྔངས་སྐྲག་སྐྱེ་བ་དང༌། དེས་གནོད་པ་སོགས་མི་རིགས་པའི་ལས་བགྱི་བས་ཐམས་ཅད་དགྲར་སྡང་བ་དང༌། རང་གཞན་སྡུག་བསྔལ་བར་བྱེད་པའི་རྒྱུ་རྐྱེན་གང་དུ་ཡོད་སར་དེ་ལ་མི་སྡུག་པའི་བློ་སྐྱེ་བ་དང༌། རང་གཞན་ལ་གནོད་པའི་སྡུག་བསྔལ་བ་དེ་ཉམས་སུ་མྱོང་ན་དེ་ལ་ཆགས་པ་སྐྱེ་བའི་སྐབས་མེད་པས་མྱ་ངན་དང་ཡིད་མི་བདེ་བ་སྐྱེ་བ་ནི་རྒྱུ་འབྲས་མི་བསླུ་བའི་རྟེན་འབྲེལ་ཡིན་པས། རང་ཉིད་ཀྱི་ཕྱོགས་འཛིན་གྱི་ཆོས་གང་ཟག་དེ་ལས་ཆོས་གང་ཟག་ཐམས་ཅད་ལ་ལེགས་པར་མ་མཐོང་ནས་མི་བཟོད་པའི་ཡིད་འཁྲུག་པའི་སྡང་སེམས་ཅན་ནི་ཕྱི་ནང་སོགས་རང་གཞན་དང་གྲུབ་མཐས་བློ་ཁ་བསྒྱུར་མ་བསྒྱུར་དང་མི་དང་མི་མིན་སོགས་ཀྱི་སུའི་ཁྲོད་དུ་ཡོད་ཀྱང་དེ་དག་དང་ལྷན་ཅིག་གནས་པར་མི་བྱ་སྟེ། བྱས་ན་མངོན་མཐོ་དང་ངེས་ལེགས་ཀྱི་ལམ་ལ་གེགས་བྱེད་པའི་ཕྱིར། ཡང་གང་ཟག་ཁ་ཅིག རང་གཞན་གྱི་ཚེ་འདི་ཕྱིའི་བདེ་འབྱོར་གང་སྒྲུབ་ཀྱང་རང་རེ་ལ་དེ་ལྟར་སྒྲུབ་ནུས་པའི་སྟོབས་འབྱོར་དགོས། སྟོབས་སྒྲུབ་པ་ལ་ཁ་དྲག་དབང་བཙན་གྱི་གཉེན་བྱམས་པས་སྐྱོང་བའི་སྡེ་ཚོ་རིས་འཕན་དར་སྒོ་ཧྲགས་ཀྱི་དགྲ་སྡང་བ་འཇོམས་ནུས་པ་དཔུང་དུ་ཁུར་རྒྱུ་ཡོད་པ་ཞིག་དགོས། སྟོབས་དེ་འདྲ་སྒྲུབ་པ་ལ་དེ་ལྟའི་གཉེན་བྱམས་པའི་སྡེ་རིས་ཀྱིས་རང་ལ་སྐྱོང་བ་ལ་འབྱོར་བ་དགོས། འབྱོར་པ་དེ་ལའང་གང་ལ་གང་འོས་དང་གང་དགོས་ནོར་རྫས། ཡ་ཀི་རྒྱལ་པོ་ནས་མ་གི་སྤྲང་པོའི་བར་གྱི་མཁོ་བའི་ཡོ་བྱད་སྣ་མ་ཐོགས་པ་རྡོ་བུག་པ་ཅན་ཤིང་ཉ་ག་ཅན་ཡན་ཆད་བསགས་ནས་ཆོས་དང་འཇིག་རྟེན་གྱི་བྱ་བ་རླབས་རྒྱ་མ་ཆུང་བ་སྒྲུབ་ཟེར་བ་དེ་ནི་སྡུག་བསྔལ་གྱི་ཡུལ་ལ་བདེ་བར་འཁྲུལ་ནས་འདོད་ཆགས་ཀྱི་ཉོན་མོངས་པའི་གདོན་ཆེན་པོས་ཟིན་ནས་སྨྱོན་པ་ལས་ཆེར་སྨྱོ་བ་ཡིན་ཏེ། ཟས་ནོར་སོགས་ཀྱི་རྙེད་བཀུར་ནི་རྣམ་ཐོས་ཀྱི་བུ་ལྟར་འབྱོར་ནའང༌། དེ་དག་ལ་སྐྱེ་བོ་ཆགས་ཅན་གྱི་སྨྱོན་པ་རྣམས་དེ་ཡིད་འོང་གི་དངོས་པོར་མཐོང་ནས་སྲོག་དང་བསྡོས་ཏེ་མ་ཐོབ་པ་ཐོབ་ཏུ་རེ་བས་ཕྲོག་པར་བྱེད་ཅིང་རང་ཉིད་ཀྱང་དགྲ་ཟླ་དང་བཅས་པའི་ལས་སྔོན་སོང་ཡིན་པས་དེ་དག་གིས་དེ་འཕྲོག་པར་ཡང་ནུས་པས་ཡོད་པ་སྲུང་གི་མི་ཐུབ་པའི་སྡུག་བསྔལ། དེ་ལྟའི་འབྱོར་རྫས་ཀྱི་འབྱོར་པ་མེད་ན་དེ་ཐོབ་ཆེད་དུ་རང་སྲོག་དང་བསྡོས་ནས་སྡིག་སྡུག་གཏམ་ངན་གྱི་ཁྲེལ་དང་ངོ་ཚ་གང་ལའང་མི་འཛེམ་པར་ཆོས་དང་འཇིག་རྟེན་ལས་ཀྱི་མཐའ་ངན་པ་གང་ལའང་ཡ་མི་ང་བར་འཇུག་ནས་མེད་པ་འཚོལ་མི་ཐུབ་པའི་སྡུག་བསྔལ་དང༌། དེ་ལྟའི་འབྱོར་པ་མནོག་ཆུང་ཅུང་ཟད་བྱ་མཆུའི་ཤ་ཐོབ་པ་ལྟར་རེས་ག་བར་ཐོབ་པ་ནའང༌། དེ་ལྟའི་འབྱོར་པས་གཉེན་བྱམས་པ་ངོ་འཛིན་དཀའ་ཞིང་བསྲུང་བར་མི་ནུས་པ་དང༌། ཅུང་ཟད་ཙམ་གྱིས་བསྲུང་བར་ནུས་ཀྱང་གཉེན་ཕྱོགས་བྱམས་པས་སྐྱོང་བའི་གང་ཟག་གི་ཚེ་འབྱོར་རྩ་རྩེའི་ཟིལ་པ་ལྟར་མི་རྟག་པས། གཉེན་བྱམས་དང་བྲལ་གྱི་དོགས་པའི་སྡུག་བསྔལ་དང༌། སྟོབས་འབྱོར་སོགས་ཅུང་ཟད་ཀྱིས་ཕྱུག་པ་ན་རང་ཉིད་དམན་པའི་གནས་ལ་ང་རྒྱལ་ནས་གཞན་རྣམས་ཟིལ་གྱིས་མནན་ཏེ་ཡིད་མི་བདེ་བར་སུན་ཕྱུང་བར་བྱས་པས་གློ་བུར་དུ་གཞན་ཐམས་ཅད་ཀྱང་སྔོན་ལས་སམ་འཕྲལ་རྐྱེན་གྱིས་དགྲར་གྱུར་ནས་རང་གི་སྟོབས་འབྱོར་ཐམས་ཅད་སྐད་ཅིག་ཙམ་ལ་བརླག་པར་འགྱུར་བས་དགྲ་སྡང་བ་དང་ཕྲད་ཀྱི་དོགས་པའམ་ཕྲད་པའི་སྡུག་བསྔལ་ཉ་བྱེ་ཚན་ལ་བསྒྲེ་བ་ལྟ་བུའི་སྡུག་བསྔལ་འབྱུང་བས། ནོར་རྫས་སོགས་ཚེ་འདིའི་བདེ་སྐྱིད་ཀྱི་གཞིར་ཞེན་པ་ནི་སྨྱོན་པ་ལས་ཀྱང་ཆེར་སྨྱོ་བ་ཡིན་ཏེ། ཚེ་ཕྱི་མར་མ་ཟད་ཚེ་འདི་ཉིད་དུའང་སྡུག་བསྔལ་གྱི་རྟེན་ནམ་གཞིའམ་ས་བོན་ནམ་རྒྱུའམ་འབྱུང་ཁུངས་བླ་ན་མེད་པ་ཡིན་པས་དེ་བདག་ཏུ་བཟུང་ན་སྡུག་བསྔལ་དེ་མི་འབྱུང་མི་སྲིད་པའི་ཕྱིར། དེར་མ་ཟད་སྟོབས་འབྱོར་ཇི་ཙམ་ཡོད་ཀྱང་རང་རེས་གདེང་ཁེལ་བར་ཞག་གཅིག་ཏུ་ལོངས་སྤྱོད་བྱར་འོང་བའི་བློ་གདེང་མི་ཁེལ་ཏེ། སང་ཙམ་ཡང་མི་འཆི་བར་སྡོད་པར་ངེས་པའི་བློ་གདེང་མེད་པའི་ཕྱིར། དེས་ན་སང་ཙམ་སྡོད་པའི་བློ་གདེང་མེད་ངེས་ན་ཚེ་ཕྱི་མའི་བདེ་སྐྱིད་ཀྱི་བསམ་སྦྱོར་ལས་ཚེ་འདིའི་བདེ་སྐྱིད་ཀྱི་བསམ་སྦྱོར་སྐད་ཅིག་ཙམ་ཡང་བཏང་ག་ལ་ཕོད། དེ་ལྟར་བཏང་ནས་ཚེ་འདིའི་བདེ་སྐྱིད་ཀྱི་ཆེད་དུ་ཆགས་སྡང་གི་བསམ་སྦྱོར་སྐད་ཅིག་རེས། ངན་སོང་གི་གནས་སུ་བསྐལ་པ་དུ་མར་ལན་གྲངས་དུ་མར་སྐྱེ་ན་སྡུག་བསྔལ་དེ་སུ་ཞིག་བཟོད་པར་ནུས་པའི་ཕྱིར། དེས་ན་འཆི་བ་མི་རྟག་པ་གཤའ་མ་ཞིག་རྒྱུད་ལ་སྐྱེས་ན། ཞག་གཅིག་ཕན་གྱི་ལྟོ་གོས་ཙམ་ཡང་སྒྲུབ་ལོང་མེད་པར་དམ་པའི་ཆོས་ཁོ་ན་སྒྲུབ་པ་ཞིག་འབྱུང་བས། དེ་ཙ་ན་ལྟོ་བསོད་སྙོམས། གོས་ཕྱགས་དར་ཁྲོད་པ། གནས་མལ་བཞི་ཇི་བཞིན་པ། གནས་ཤིང་དྲུང་བས་མཐའ་པ། སྨན་བཀྲུས་ཏེ་བོར་བ་ལ་བརྟེན་པའི་ཁྱིམ་ནས་ཁྱིམ་མེད་པའི་རབ་བྱུང་དང་འཇིག་རྟེན་ཚེ་འདིའི་བྱ་བ་ཐམས་ཅད་བཏང་བའི་བྱ་བཏང་ཆེན་པོ་ཆག་ཁྲི་མཆོག་དང་ཁམ་པ་ལུང་དང་ཞུ་ཡས་དངོས་གྲུབ་ལྟ་བུ་ཞིག་འབྱུང་བ་ཡིན། དེ་ལྟར་མིན་པའི་འདི་ཕྱིའི་གཏན་བདེ་ནོར་རྫས་སྡེ་རིས་ཀྱི་དཔུང་ལ་རེ་བ་དེ་ནི་གཏན་གྱི་བདེ་བ་ཆགས་སྡང་གི་ལས་ངན་བསགས་པས་བདེ་བ་ཐོབ་ཅིང་སྡུག་བསྔལ་སྤོང་བ་ལ་རེ་ས་དང་སྐྱབས་མགོན་ཞུས་པ་ཉིད་དང་ལས་ངན་གྱིས་འབྲེལ་ཚད་ཚེ་འདི་དང་ཕྱི་མ་ཐམས་ཅད་དུ་སྡུག་བསྔལ་དར་དྲག་ཅིང་རྒྱུན་རིང་བ་ཉམས་སུ་མྱོང་བར་འགྱུར་བའི་ཕྱིར། དེ་ལྟའི་གྲོགས་ནི་གཡང་ས་ལྟར་ཡང་དགོས་པས། དེའི་ཕྱིར་ཚེ་འདིའི་སྟོབས་འབྱོར་སྙིང་ལ་འདོད་པའི་འདོད་ཆགས་ཆུ་ལྟར་ཁོལ་བའི་བླ་མ་སློབ་མ་གྲོགས་འཁོར་སྦྱིན་བདག་སོགས་གང་ན་འདུག་ཀྱང་ཐར་འདོད་དག་འགོ་ནད་འབུམ་འགྱུར་ལས་ཀྱང་ཆེར་སྔངས་པ་ཉིད་ཀྱིས་འབྲོས་པར་བྱའོ། །