གསུམ་པ་ཡིད་ཆེས་རྗེས་དཔག།
གསུམ་པ་ཡིད་ཆེས་རྗེས་དཔག་ནི།
རང་གི་རྟེན་ཡིད་ཆེས་ཀྱི་རྟགས་ཡང་དག་ལ་དངོས་སུ་བརྟེན་ནས་རང་གི་གཞལ་བྱ་ཤིན་ཏུ་ལྐོག་གྱུར་ལ་མི་བསླུ་བའི་ཞེན་རིག་དེ། ཡིད་ཆེས་རྗེས་དཔག་གི་མཚན་ཉིད། མཚན་གཞི་ནི། དཔྱད་གསུམ་གྱིས་དག་པའི་ལུང་ལ་བརྟེན་ནས་སྙིང་པོའི་མདོའི་བསྟན་བྱའི་དོན་མི་བསླུ་བར་རྟོགས་པའི་རྗེས་དཔག་ལྟ་བུའོ། །ཡིད་ཆེས་ཀྱི་རྟགས་ནི་དངོས་སྟོབས་ཀྱི་རྟགས་དང་གྲགས་རྟགས་ཙམ་མ་ཡིན་པར་གཞལ་བྱ་དཔོག་པ་པོས་ཡིད་ཆེས་ལེགས་པར་རྙེད་པའི་རྟགས་ཞིག་དགོས་སོ། །ཤིན་ལྐོག་ནི་མངོན་སུམ་མ་ཟད་དངོས་སྟོབས་ཀྱི་རྟགས་ཀྱིས་ངེས་མི་ནུས་པར་ཡིད་ཆེས་ཀྱི་ལུང་སོགས་ལ་བརྟེན་ནས་ངེས་དགོས་སོ། །རྗེས་དཔག་ལ་སྒྲའི་བརྗོད་རིགས་ཀྱིས་དབྱེ་ན། གཞན་དོན་རྗེས་དཔག་དང༌། རང་དོན་རྗེས་དཔག་གཉིས་ཡོད། དང་པོ་དང་སྒྲུབ་ངག་ཡང་དག་དོན་གཅིག གཉིས་པ་དང་རྗེས་དཔག་དོན་གཅིག་གོ །