གཉིས་པ་དབྱེ་བ།

གཉིས་པ་དབྱེ་བ་ནི།

ལུང་གཞི་ལས་སློབ་དཔོན་ནི་ལྔ། མཁན་པོ་ནི་གཉིས་སོ་ཞེས་གསུངས་པས། སྐབས་འདིར་བླ་མ་བདུན་དུ་དབྱེ་སྟེ། རབ་ཏུ་འབྱིན་པར་བྱེད་པའི་མཁན་པོ་དང༌། བསྙེན་པར་རྫོགས་པར་བྱེད་པའི་མཁན་པོ་དང༌། དགེ་ཚུལ་གྱི་སློབ་དཔོན་དང༌། གསང་སྟེ་སྟོན་པ་དང༌། ལས་བྱེད་པ་དང༌། གནས་སྦྱིན་པ་དང༌། ཀློག་པའི་སློབ་དཔོན་ནོ། །གསུམ་པ་བསྡུ་བ་ནི། དེ་ཐམས་ཅད་མཁན་པོ་དང༌། སློབ་དཔོན་གཉིས་སུ་འདུས་སོ། ། བཞི་པ་མཚན་ཉིད་ལ་གཉིས་ཏེ། བླ་མ་སྤྱིའི་མཚན་ཉིད་དང༌། སོ་སོའི་མཚན་ཉིད་དོ། ། དང་པོ་ནི་རང་གི་སློབ་མ་ལ་ལྟོས་ནས་དངོས་སུ་ཆོས་འབྲེལ་གྱི་ཡུལ་ཁྱད་པར་ཅན་ཉིད་དུ་གནས་པའོ། །གཉིས་པ་ལ། བླ་མ་བྱར་རུང་བའི་མཚན་ཉིད་དང་བླ་མ་ཡིན་པའི་མཚན་ཉིད་གཉིས་ལས། དང་པོ་ནི། མཁན་པོ་བྱར་རུང་དང་གནས་ཀྱི་སློབ་དཔོན་བྱར་རུང་གི་མཚན་ཉིད་འདྲ་སྟེ། བཙུན་ཞིང་བརྟན་པའི་ཡན་ལག་དང་ལྡན་པ། མཁས་ཤིང་ཕན་འདོགས་པའི་ཡན་ལག་དང་ལྡན་པ་སྟེ་རྒྱས་པར་འོག་ཏུ་འཆད་དོ། །དགེ་སློང་ཆོས་དྲུག་ལྡན་གྱི་སྟེང་དུ་དགེ་ཚུལ་གྱི་སྡོམ་པ་འབོགས་པའི་ཆོ་ག་ལེགས་པར་ཤེས་པ་སྟེ་ཆོས་བདུན་དང་ལྡན་ན་དགེ་ཚུལ་གྱི་སློབ་དཔོན་བྱར་རུང་ངོ༌། །དགེ་སློང་ཆོས་དྲུག་ལྡན་གྱི་སྟེང་དུ་བར་ཆད་འདྲི་བའི་ཆོ་ག་ལེགས་པར་ཤེས་པ་སྟེ་ཆོས་བདུན་དང་ལྡན་ན་གསང་སྟེ་སྟོན་པའི་སློབ་དཔོན་བྱར་རུང་སྟེ། དེ་ཡང་བསྐོ་བའི་ཚེ་ན་ནི་ཆོས་བཅོ་ལྔ་ཚང་བ་དེ་དགོས་སོ། །བསྐོ་བའི་ཡུལ་ཐུན་མོང་གི་ཆོས་བཅུ་བཞི་གསོ་སྦྱོང་གི་སྤོང་བའི་ཞལ་ཏ་བ་བཤད་སྐབས་སུ་འཆད་པར་འགྱུར་ལ་དེའི་མཁན་པོ་དང་དེའི་ལས་ཀྱི་སློབ་དཔོན་ཉིད་དུ་ཕྱོགས་པ་མིན་པ་སྟེ་བཅོ་ལྔའོ། །ལས་ཀྱི་ཁ་སྐོང་བར་འོས་ཤིང་ལས་ཀྱི་ཆོ་ག་ལེགས་པར་ཤེས་པ་དང་ཆོས་དེ་གཉིས་དང་ལྡན་ན་ལས་ཀྱི་སློབ་དཔོན་བྱར་རུང་ཡིན་ནོ། །ཀློག་པའི་སློབ་དཔོན་བྱར་རུང་བ་ནི། རབ་བྱུང་སྡེ་ལྔ་རང་རང་གི་སྡོམ་པ་དག་པ་དང༌། ས་རང་བཞིན་དུ་གནས་པ་དང༌། ལྟ་བ་མཐུན་པ་དང༌། མཚན་མཐུན་པ་དང༌། རང་གི་བསླབ་བྱའི་ཆོས་དེ་ལེགས་པར་ཤེས་པ་སྟེ་ཆོས་ལྔ་དང་ལྡན་ནའོ། །གཉིས་པ་བླ་མ་ཡིན་པའི་མཚན་ཉིད་ནི། བླ་མར་གྱུར་པའི་དུས་འོག་ནས་འཆད་པར་འགྱུར་བ་དེ་ཉིད་ཡིན་ནོ་ཞེས་མཚོ་ཊཱིཀ་ལས་གསུངས་སོ། །