བཞི་བ་གདམས་པའི་ཚུལ་གྱིས་མཇུག་བསྡུ་བ།
བཞི་བ་གདམས་པའི་ཚུལ་གྱིས་མཇུག་བསྡུ་བ་ནི།
སྟོང་གཞི་དོན་དམ་གཞན་སྟོང་ནི་ཐར་པ་དོན་དུ་གཉེར་བའི་མཁས་པ་སྙིང་རྗེ་ཆེན་པོ་དང་ལྡན་པ་རྣམས་ཀྱིས་རྟོགས་པར་བྱས་ནས་གཞན་དག་ལ་ཡང་རབ་ཏུ་བསྟན་པར་བྱ་སྟེ། དེ་མ་རྟོགས་ན་དང་པོ་མཆོག་གི་སངས་རྒྱས་མི་རྟོགས་ཤིང༌། དེ་མ་རྟོགས་ན་དོན་དམ་པའི་མཚན་ཡང་དག་པར་བརྗོད་པ་མི་རྟོགས་ལ། དེ་མ་རྟོགས་ན་རྡོ་རྗེ་འཆང་གི་ཡེ་ཤེས་ཀྱི་སྐུ་དང་སྔགས་ཀྱི་ཐེག་པ་མི་རྟོགས་པས་སངས་རྒྱས་བཅོམ་ལྡན་འདས་ཀྱི་གོ་འཕང་བླ་ན་མེད་པ་ཐོབ་པར་མི་ནུས་པའི་ཕྱིར་རོ། །དེ་བཞིན་དུ་མཚན་ཡང་དག་པར་བརྗོད་པ་ལས། སྲིད་པ་གསུམ་གྱིས་མཆོད་པར་བྱ་བའི་འོས་སུ་གྱུར་པ་རྣལ་འབྱོར་པའི་ཡེ་ཤེས་ཀྱིས་སོ་སོ་རང་རིག་པ་མཆོག་ཏུ་མི་འགྱུར་བའི་བདེ་བ་དོན་དམ་གཞན་སྟོང་བདེ་གཤེགས་སྙིང་པོ་འདི་ཉིད་ནི་རྣལ་འབྱོར་བས་བློས་དོར་བར་མི་བྱའི་ཉམས་སུ་བླང་བར་བྱའོ། །ཞེས་པ་དེ་བཞིན་གཤེགས་པའི་ངེས་པའོ། །ཞེས་སོ། ། གཉིས་པ། རྣམ་གྲངས་ཀྱི་དགོས་པ་ནི། དོན་གཅིག་ཉིད་མིང་གི་རྣམ་གྲངས་མང་པོས་བཀའ་བསྩལ་པ་ལ་དགོས་པ་བརྒྱད་ཡོད་པར་རྣམ་བཤད་རིགས་པ་ལས་གསུངས་ཏེ༌།ཇི་སྐད་དུ། འདིར་དགོས་པ་གང་ཡིན་ཞེ་ན་དགོས་པ་དག་ནི་བརྒྱད་དེ། རྣམ་གྲངས་གསུངས་པ་ནི་འདུལ་བ་ཐ་དད་པའི་ཕྱིར་ཏེ་དེའི་ཚེ་དང་ཕྱི་མའི་ཚེ་དོན་ཁ་ཅིག་ལ་གང་ཟག་ལ་ལས་ཁོང་དུ་ཆུད་པར་བྱ་བའི་ཕྱིར་དང༌། དེའི་ཚེ་རྣམ་པར་གཡེངས་ནས་མ་ངེས་པ་རྣམས་ལ་བརྗོད་པ་དེ་ཉིད་ཀྱིས་གསུངས་ལ་ནི་གཞན་དག་གིས་སྨད་པར་འགྱུར་བས་རྣམ་གྲངས་ཀྱིས་དེའི་དོན་བསྟན་པར་བྱ་བའི་ཕྱིར་དང༌། ཡིད་མི་གཞུངས་པ་རྣམས་ལ་ཡང་དང་ཡང་དུ་དེའི་དོན་ཡང་དག་པར་མཚོན་པས་མི་བརྗེད་པར་བྱ་བའི་ཕྱིར་དང༌། དོན་གཅིག་ལ་མིང་དུ་མ་བྱུང་བས་དོན་གཞན་དུ་རྟོག་པ་བསལ་བའི་ཕྱིར་དང༌། སྐབས་གཞན་དུ་མིང་དེ་རྣམས་ཀྱིས་དེའི་དོན་ཡང་དག་པར་སྒྲུབ་པའི་ཕྱིར་སྒྲ་ངེས་པར་སྦྱོར་བ་ལྟ་བུ་དང་ཆོས་སྒྲོགས་པ་རྣམས་དོན་གྱི་བཤད་སྦྱར་དང་གོ་བར་བྱེད་པ་གཉིས་ལ་ཐབས་མཁས་པ་ཉིད་དུ་བསྒྲུབ་པའི་ཕྱིར་དང༌། སངས་རྒྱས་རང་ཉིད་ལ་ཆོས་སོ་སོ་ཡང་དག་པར་རིག་པ་མངའ་བར་བསྟན་པའི་ཕྱིར་དང༌། གདུལ་བྱ་གཞན་དག་ལ་དེའི་ས་བོན་བསྐྱེད་པའི་ཕྱིར་ཏེ། རྣམ་པར་བཤད་པ་བྱེད་པ་ཐམས་ཅད་ཀྱང་རྣམ་གྲངས་བཤད་པ་དག་གིས་སློབ་མ་རྣམས་ལ་གོ་བར་བྱེད་པས་ན་མིང་གི་རྣམ་གྲངས་མང་པོ་དེ་ལྟ་བུའི་རང་བཞིན་ཅན་ལ་ཟློས་པའི་སྐྱོན་དུ་མི་འགྱུར་རོ། །ཞེས་སོ། །