ལྔ་པ་གྲངས་ངེས་པ།

ལྔ་པ་གྲངས་ངེས་པ་ནི།

ཐེག་པ་གཞན་ལ་བརྟེན་པའི་བླ་མ་གཞན་དག་ཀྱང་བཤད་མོད་ཀྱི། འདིར་འདུལ་བ་ནས་བཤད་པའི་བླ་མ་བདུན་དུ་གྲངས་ངེས་ཞེས་སྔ་མ་རྣམས་འཆད་དོ། །འོན་ཀྱང་འདུལ་བ་ནས་བཤད་པའི་མཁན་སློབ་བདུན་དུ་གྲངས་ངེས་པ་མ་ཡིན་ཏེ། ལུང་གཞི་ལས། དགེ་བསྙེན་གྱི་སྡོམ་པ་འབོགས་པའི་སློབ་དཔོན་གསུངས་པ་དང༌། རབ་ཏུ་འབྱིན་པའི་མཁན་མོ་དང༌། དགེ་སློབ་མའི་མཁན་མོ་དང༌། བསྙེན་རྫོགས་བྱེད་པའི་མཁན་མོ་སྟེ་བུད་མེད་ལ་མཁན་མོ་གསུམ་ཡོད་པའི་ཕྱིར་དང༌། དགེ་སློབ་མའི་ལས་བྱེད་པ་མོ་ལ་སོགས་པ་ཡང་སློབ་དཔོན་མ་ཉིད་ཡིན་པར་རིག་པའི་ཕྱིར་རོ། །དེས་ན་འདིར་བླ་མ་བདུན་དུ་ཕྱེ་བ་ནི། བླ་མ་རྣམས་ཀྱི་རྣམ་གཞག་བསྟན་པའི་སྐབས་འདིའི་ལུང་གཞི་ལས་བླ་མ་བདུན་དུ་གསུངས་པས།དེ་ཙམ་ཞིག་འདིར་བསྟན་པ་ཡིན་ནོ། ། དྲུག་པ་གོ་རིམ་ངེས་པ་ནི། མཁན་པོ་གཉིས་སྔོན་དུ་བསྟན་པའི་རྒྱུ་མཚན་ནི་སྔར་བཤད་ཟིན་ལ། སློབ་དཔོན་ལྔ་གོ་རིམ་འདི་ལྟར་བསྟན་པ་ནི་སློབ་མར་འགྱུར་བའི་ཡུལ་དེ་ལ་ལྟོས་ནས་བྱ་བ་ལ་འཇུག་པའི་གོ་རིམ་བསྟན་པའོ། ། བདུན་པ་འདི་རྣམས་བླ་མར་བཞག་པའི་འཐད་པ་ནི། དེ་ལྟར་བསྙེན་རྫོགས་ཀྱི་སྡོམ་པ་ནི་གཙོ་ཆེར་དད་པའི་དགེ་འདུན་ལས་འཐོབ་པ་ཡིན་ཡང་དེ་བླ་མར་མི་འགྱུར་ལ། གསང་སྟེ་སྟོན་པ་མེད་ཀྱང་སྡོམ་པ་འཐོབ་པས་སྡོམ་པ་སྐྱེ་བ་ལ་གསང་སྟེ་སྟོན་པ་ངེས་གཟུང་གི་ཡན་ལག་མ་ཡིན་ཡང་དེའི་སློབ་དཔོན་དུ་བཞག་པ་ནི་རྒྱུ་མཚན་ཅི། སྤྱིར་ན་མཁན་པོ་ལ་སོགས་པ་འདི་རྣམས་བླ་མར་གཞག་པའི་རྒྱུ་མཚན་ཅི་ཞེ་ན། རང་གི་སློབ་མ་ཉིད་དུ་ཉེ་བར་ཕྱོགས་པ་ལ་ངག་ལས་ཁྱད་པར་ཅན་གྱི་སྒོ་ནས་དམ་པ་ཆོས་ཀྱིས་དངོས་སུ་ཕན་འདོགས་ཁྱད་པར་ཅན་གྱི་བྱ་བ་བསྒྲུབ་པའི་ཕྱིར་ཏེ། གཙོ་བོར་ན་སངས་རྒྱས་ཀྱིས་དེ་ལྟར་བཅས་པའི་དབང་གིས་སོ། ། བརྒྱད་པ་བླ་མར་གྱུར་པའི་དུས་ནི་གཉིས་ལས། དང་པོ་མཁན་པོར་གྱུར་པའི་དུས་ནི། མཁན་པོར་གསོལ་བའི་སྔགས་བརྗོད་པ་གསུམ་པ་ཕལ་ཆེར་བྱས་པ་ན་དེར་གྱུར་ཏོ། །འོ་ན་ལེན་པ་པོས་རང་རང་གི་སྐབས་ཀྱི་སྡོམ་པ་མ་ཐོབ་པ་ནས་མཁན་པོར་གྱུར་པ་དེ་རྒྱུ་མཚན་ཅི་ཞེ་ན། མཁན་པོ་གཉེར་ཆེ་བས་དོག་ཏུ་བཅས་པ་སྟེ། དེ་གཉེར་ཆེ་བའི་སྒྲུབ་བྱེད་ནི། ལུང་གཞི་ལས། དགེ་སློང་དག་བཤན་པ་བྱེད་དུ་བཅུག་པ་ནི་བླའི་རབ་ཏུ་བྱུང་ཞིང་བསྙེན་པར་རྫོགས་པར་བྱས་ནས་ཡལ་བར་བོར་བ་ནི་མི་རུང་ངོ༌། །ཞེས་དང༌། ལུང་རྣམ་འབྱེད་ལས། དགེ་སློང་དག་བཤན་པའི་གནས་སུ་བཏང་བ་ནི་བླའི་རབ་ཏུ་བྱུང་ཞིང་བསྙེན་པར་རྫོགས་པར་བྱས་ནས་འདོམས་པར་མི་བྱེད་རྗེས་སུ་སྟོན་པར་མི་བྱེད་པ་ནི་མི་རུང་ངོ༌། །ཞེས་དང། ལུང་ཕྲན་ཚེགས་ལས། དགེ་སློང་དག་རབ་ཏུ་བྱུང་ཞིང་བསྙེན་པར་རྫོགས་པ་བྱས་ནས་གདམས་ངག་མི་བྱིན་ཞིང་རྗེས་སུ་མ་བསྟན་པ་བས་ནི། བཤན་པ་བྱེད་ཀྱང་བླའོ། །ཞེས་མཁན་པོ་ཚུལ་བཞིན་དུ་མི་བྱེད་པའི་ཉེས་དམིགས་གསུངས་སོ། །མཁན་པོ་ཚུལ་བཞིན་དུ་བྱེད་ན་ནི་ཕན་ཡོན་ཆེ་སྟེ། ལུང་ཕྲན་ཚེགས་ལས། གང་ལ་བརྟེན་ནས་རབ་ཏུ་བྱུང་བའི་གང་ཟག་དེས། །གང་ཟག་དེ་ལ་ཇི་སྲིད་འཚོ་བའི་བར་དུ་ཡང༌། །ཆོས་གོས་བསོད་སྙོམས་སྨན་དང་ཡོ་བྱད་གང་དག་གིས། །མཁན་པོའི་དྲིན་ལན་གླན་པར་སླ་བ་མ་ཡིན་ནོ། །ཞེས་གསུངས་པས། དེ་ཙམ་དུ་དྲིན་ཆེ་བ་ཉིད་ཀྱིས་སེམས་ཅན་ལ་ཕན་བཏགས་པ་ཡིན་པའི་ཕྱིར་ན་བསོད་ནམས་ཆེན་པོ་འཐོབ་པའོ། །མདོ་མཛངས་བླུན་ལས།དཔེར་ན་ལོང་བ་བརྒྱའི་མིག་སྨན་པ་མཁས་པས་ཕྱེ་སྟེ་མཐོང་བར་བྱས་པ་དང༌། མི་བརྒྱའི་མིག་དབྱུང་བ་ལ་ཐུག་པ་ལས་མིག་དབྱུང་བ་དེ་དག་ལས་ཐར་པར་བྱས་ན། འདི་གཉིས་ཀྱི་བསོད་ནམས་ནི་དཔག་ཏུ་མེད་མོད་ཀྱི་འོན་ཏེ་གཞན་རབ་ཏུ་བྱུང་ངམ་བདག་རབ་ཏུ་བྱུང་བའི་བསོད་ནམས་ཙམ་མི་ཕོད་དོ། །ཁ་ཅིག་གིས་རིན་ཆེན་སྣ་བདུན་ལ་བྱས་པའི་མཆོད་རྟེན་མཐོ་ཁྱད་སུམ་ཅུ་རྩ་གསུམ་གནམ་ལ་ཐུག་པར་བྱས་པའི་བསོད་ནམས་ཀྱིས་ཀྱང་རབ་ཏུ་བྱུང་བའི་བསོད་ནམས་ཙམ་མི་ཕོད་དོ། །ཞེས་གསུངས་སོ། །གཉིས་པ་སློབ་དཔོན་དུ་གྱུར་པའི་དུས་ནི། སློབ་དཔོན་ལྔ་ལས་དགེ་ཚུལ་གྱི་སློབ་དཔོན་དང་ལས་བྱེད་པའི་སློབ་དཔོན་དུ་གྱུར་པའི་དུས་ནི། རྩ་བར།དོན་གྲུབ་ན་གྱུར་པ་ཉིད་དོ། །ཞེས་གསུངས་པ་ལྟར་རང་རང་གི་སློབ་མའི་རྒྱུད་ལ་སྡོམ་པ་སྐྱེས་པ་དང་སྐད་ཅིག་དུས་མཉམ་དུ་དེར་གྱུར་ཏོ། །གནས་ཀྱི་སློབ་དཔོན་དུ་གྱུར་པའི་དུས་ནི། གནས་པར་འོས་པས་གནས་སུ་འོས་པ་ལ་གནས་སུ་བཟུང་བའི་ཆོ་ག་བྱས་ནས་དེ་དང་མཚམས་གཅིག་གི་ཁོངས་སུ་གནས་ཏེ་མཚན་མོ་མཐའི་སྐད་ཅིག་འདས་པ་ན་དེར་གྱུར་ཏོ། །ཀློག་པའི་སློབ་དཔོན་དུ་གྱུར་པའི་དུས་ནི་སངས་རྒྱས་ཀྱི་བཀའ་འམ་དེ་གཏན་ལ་འབེབས་པའི་བསྟན་བཅོས་ཡིན། ཚིགས་སུ་བཅད་པའམ་ལྷུག་པ་ཚིག་བཞི་ཡན་ཆད་དུ་ལོངས་པ་ཡིན། སྔར་ཤེས་ལས་གཞན་ཡིན་པ་དེ། ཕན་ཚུན་བསླབ་པའི་བསམ་པས་ལན་གསུམ་བཟླས་ན་དེར་གྱུར་ཏོ། །གསང་སྟེ་སྟོན་པའི་སློབ་དཔོན་དུ་གྱུར་པའི་དུས་ངོས་གཟུང་བ་འདི་ལ་གསུམ་ལས། དང་པོ་གཞན་ལུགས་དགག་པ་ནི། ཁ་ཅིག་ན་རེ་སློབ་མའི་རྒྱུད་ལ་དགེ་སློང་གི་སྡོམ་པ་སྐྱེས་པ་ན། གསང་སྟེ་སྟོན་པའི་སློབ་དཔོན་དུ་གྱུར་པ་སྟེ། སྡོམ་པ་ཐོབ་པ་ན་ལེན་པ་པོའི་དོན་གྲུབ་པ་ཉིད་ཡིན་ལ། དོན་གྲུབ་ན་གྱུར་པ་ཉིད་དོ་ཞེས་གསུངས་པས་གྲུབ་བོ་ཟེར་རོ། །དེ་ནི་གཞུང་བཞི་དང་འགལ་ཏེ། ལུང་ལྔ་ཚན་པ་ལས། གསང་སྟེ་སྟོན་པའི་སློབ་དཔོན་གང་ཞེ་ན། གང་གིས་བསྙེན་པར་རྫོགས་པར་བྱེད་པའི་ཚེ་གསང་སྟེ་སྟོན་པའོ། །ཞེས་དང༌། རང་གི་རྣམ་བཤད་ལས། བརྗོད་པ་མ་རྫོགས་པ་ཉིད་ལ་ཆ་གསུམ་པ་འདི་ལ་འཇུག་པ་ན་གྲུབ་པ་ཉིད་འབྱུང་བ་ཡིན་ཏེ། མཚམས་བཅད་པ་ལ་སོགས་པ་ཐམས་ཅད་ལ་ཆོ་ག་འདི་བལྟ་བར་བྱའོ། །དེ་ལྟར་ན་གསང་སྟེ་སྟོན་པ་ལ་གསང་སྟེ་བསྟན་པ་མ་རྫོགས་པའི་སློབ་དཔོན་ཉིད། ཅེས་དང༌། ཊཱི་ཀ་ལས། དོན་གང་གིས་སློབ་དཔོན་ཉིད་དུ་འགྱུར་བའི་དོན་དེ་ཡོངས་སུ་མཐར་ཐུག་པར་གྱུར་ན་སྟེ། དོན་དགོས་པ་དེ་གྲུབ་པ་ཡོངས་སུ་རྫོགས་ནའོ། །ཞེས་དང༌། འགྲེལ་ཆུང་ལས། བར་ཆད་འདྲི་བའི་ལས་བྱས་ཟིན་ནས་གསང་སྟེ་སྟོན་པའི་སློབ་དཔོན་དུ་འགྱུར་ཞེས་གསུངས་པ་དེ་རྣམས་དང་འགལ་ལོ། །