༢ ཐེག་ཆེན་མདོ་ལུགས་དབུ་སེམས་ཀྱི་བྱང་སྡོམ་དང་གཞུང་བཤད་ཀྱི་བརྒྱུད་པ།
ཀ རྒྱ་ཆེན་སྤྱོད་སྲོལ་གྱི་བརྒྱུད་པ།
གཉིས་པ་ཐེག་ཆེན་མདོ་ལུགས་དབུ་སེམས་ཀྱི་བྱང་ཆུབ་སེམས་སྡོམ་དང་གཞུང་བཤད་ཀྱི་བརྒྱུད་པ་བཤད་པ་ནི། ཀུན་མཁྱེན་ཆེན་པོའི་སེམས་ཉིད་ངལ་གསོའི་དོན་ཁྲིད་ལས་རྒྱ་ཆེན་སྤྱོད་པའི་བརྒྱུད་པ་དང་། ཟབ་ཅིང་རྒྱ་ཆེ་བའི་བརྒྱུད་པ། ཟབ་མོ་ལྟ་བའི་བརྒྱུད་པ་སྟེ་གསུམ་དུ་འདྲེན་པ་མཛད་པ་སྟེ།
དང་པོ་རྒྱ་ཆེན་སྤྱོད་སྲོལ་གྱི་བརྒྱུད་པ་ནི། ཐུབ་པ་ཆེན་པོ། འཇམ་དཔལ་དབྱངས། ཞི་བ་ལྷ། ཨེ་ལ་དྷ་རི། མ་ཧཱ་ཤྲཱི། རཏྣ། བྷ་ཝ་བཛྲ། དྷརྨ་ཀཱིརྟི། དཱི་པཾ་ཀ་ར། སུ་མ་ཏི། ལོ་ཙཱ་བ་བློ་ལྡན་ཤེས་རབ། ཚེ་སྤོང་པ་ཆོས་ཀྱི་བླ་མ། ཕྱྭ་བ་ཆོས་ཀྱི་སེང་གེ དན་འཕགས་པ་དར་མ་བཀྲ་ཤིས། ཤེས་རབ་བློ་གྲོས། ཤེས་རབ་དབང་ཕྱུག སངས་རྒྱས་བརྩོན་འགྲུས། དབེན་དགེ་བ་ཤཱཀྱ་སེང་གེ བླ་བྲང་ཆོས་དཔལ་རྒྱལ་མཚན། ཀུན་མཁྱེན་ཆེན་པོ་ཉིད་བཅས་སོ། །
ཁ ཟབ་ཅིང་རྒྱ་ཆེ་བའི་བརྒྱུད་པ།
གཉིས་པ་ཟབ་ཅིང་རྒྱ་ཆེ་བའི་བརྒྱུད་པ་ནི། ཐུབ་པ་ཆེན་པོ། བྱམས་པ། ཐོགས་མེད། དབྱིག་གཉེན། འཕགས་པ་རྣམ་གྲོལ་སྡེ། བཙུན་པ་རྣམ་གྲོལ་སྡེ། མཆོག་གི་སྡེ། གྲོལ་བའི་སྡེ། སློབ་དཔོན་རྣམ་སྣང་མཛད། སེང་གེ་བཟང་པོ། སངས་རྒྱས་ཡེ་ཤེས་ཞབས། བཱི་མ་མི་ཏྲ། རཏྣ་པརྠ། འབུམ་ཕྲག་གསུམ་པ། བློ་ལྡན་ཤེས་རབ། འབྲེ་ཤེས་རབ་འབར། ཨར་བྱང་ཆུབ་ཡེ་ཤེས། ཁུ་ཤེས་རབ་བརྩོན་འགྲུས། དཀར་ཆུང་རིང་མོ་པ། ཞང་གཡེ་པ། གཉལ་ཞིག རྒྱ་ཕྱིང་རུ་པ། ཆུ་མིག་སེང་གེ་དཔལ། བློ་གྲགས་པ། དེ་ལས་བཙན་དགོན་པ་དང་དབེན་དགེ་བ་གཉིས། དེ་གཉིས་ལས་བླ་བྲང་པ་དང་ཆོས་གྲགས་གཉིས་པོས། དེ་གཉིས་ལས་ཀུན་མཁྱེན་ཀློང་ཆེན་པ་བཅས་སོ། །
ག ཟབ་མོ་ལྟ་ལུགས་ཀྱི་བརྒྱུད་སྲོལ།
གསུམ་པ་ཟབ་མོ་ལྟ་བའི་བརྒྱུད་སྲོལ་ནི། ཐུབ་པ་ཆེན་པོ། འཇམ་དཔལ་དབྱངས། འཕགས་པ་ཀླུ་སྒྲུབ། ཟླ་བ་གྲགས་པ། རིག་པའི་ཁུ་བྱུག ཀུ་སཱ་ལི་པ་ཆེ་བ། ཆུང་བ། ཇོ་བོ་རྗེ། བལ་པོ་ཐང་པ་ཛ། ཨ་བྷྱ་ཀ་ར། བྱང་སེམས་ཟླ་བ་རྒྱལ་མཚན། གྲོ་ལུང་པ་ཆེན་པོ། སྤྱི་བོ་ལྷས་པ་བྱང་ཆུབ་འོད། སྨར་ཤཱཀྱ་སེང་གེ། མཆིམས་ནམ་མཁའ་གྲགས། མཁན་པོ་སྨོན་ཚུལ། སློབ་དཔོན་བྱང་ཆུབ་གྲུབ། སློབ་དཔོན་གཞོན་ནུ་རྡོ་རྗེ། དེས་ཀུན་མཁྱེན་ཆོས་རྗེ་ལ་གནང་ཞིང་། རྒྱལ་བའི་དབང་པོ་ཀློང་ཆེན་རབ་འབྱམས་ནས་བླ་བརྒྱུད་བར་མ་ཆད་པའི་རིང་བརྒྱུད་དང་ཉེ་བརྒྱུད་ཀྱི་བཀའ་སྲོལ་ཐམས་ཅད་རིག་འཛིན་འཇིགས་མེད་གླིང་པ་ལ་གཅིག་འདྲེས་སུ་བབ་ཅིང་། དེ་ལས་རྡོ་གྲུབ་འཇིགས་མེད་ཕྲིན་ལས་འོད་ཟེར་དང་། མཚམས་པ་འཇིགས་མེད་རྒྱལ་བའི་མྱུ་གུ། དགེ་རྩེ་འཇིགས་མེད་ངོ་མཚར་རྒྱ་མཚོ་གསུམ་ལ། དེ་རྣམས་ལས་མི་འགྱུར་ནམ་མཁའི་རྡོ་རྗེ་དང་། རྒྱལ་སྲས་གཞན་ཕན་མཐའ་ཡས། དཔལ་སྤྲུལ་སེམས་དཔའ་ཆེན་པོ་སོགས་ལ། དེ་དག་ལས་མཁན་ཆེན་པདྨ་བཛྲ་དང་། འཇམ་མགོན་མི་ཕམ། རྗེ་དབོན་བསྟན་འཛིན་ནོར་བུ་སོགས་ལ། དེ་རྣམས་ལས་རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེ། མཁས་མཆོག་གཞན་ཕན་སྣང་བ་དང་། མཁན་ཆེན་ཡོན་ཏན་རྒྱ་མཚོ་བཅས་ལ། དེ་དག་ལས་འཇིགས་མེད་ཡོན་ཏན་མགོན་པོ་དང་། ལྕང་མའི་མཁན་ཆེན་ཐུབ་དགའ་སོགས་དང་། མཁན་ཆེན་འཇིགས་མེད་ཡོན་ཏན་མགོན་པོ་ལས་བདག་ཅག་གི་རིགས་བདག་བླ་མ་དམ་པ་རྟོགས་ལྡན་བློ་གྲོས་རྒྱ་མཚོ་དང་ཆོས་རྗེ་པདྨ་སྐལ་བཟང་རྣམ་གཉིས་བཅས་སར་གནས་སེམས་དཔའ་མིའི་ཟོལ་ལ་ཕེབས་པ་བྱང་ཆུབ་སེམས་ཀྱི་མངའ་བདག་ཤ་སྟག་བྱོན་པ་བཅས་བརྒྱུད་པ་གཅིག་དང་། གཞན་ཡང་རང་ལུགས་ཐུན་མིན་གྱི་བཀའ་སྲོལ་གྲུབ་དབང་པདྨ་རིག་འཛིན་ནས་བརྒྱུད་པ་ཆོས་རྗེ་དཔལ་སྤྲུལ་རིན་པོ་ཆེའི་སྤྱོད་འཇུག་བརྒྱུད་པའི་གསོལ་འདེབས་ལས་གསལ་བ་ནི། སྟོན་མཆོག་ཐུབ་པའི་དབང་པོ། འཇམ་དཔལ་དབྱངས། ཞི་བ་ལྷ། ཛེ་ཏཱ་རི། ཟླ་གྲགས་ཆུང་བ། ཇོ་བོ་གུ་ཎ་ཤྲཱི། ཀཱ་ན་ཀ་ཤྲཱི། སུ་མ་ཏི་ཀིརྟི། བློ་ལྡན་ཤེས་རབ། སློབ་དཔོན་རྗེ་བཙུན་པ། མཁས་པ་བུ་སྟོན། ལོ་ཙཱ་བ་རིན་ཆེན་རྣམ་རྒྱལ། གཡག་ཕྲུག་སངས་རྒྱས་དཔལ། སངས་རྒྱས་འཕེལ། ཕྲིན་ལས་མི་བསྐྱོད། དཀོན་མཆོག་འབྱུང་གནས། མཁས་གྲུབ་ཀརྨ་ཆགས་མེད། གྲུབ་ཐོབ་པདྨ་རིག་འཛིན། དཔོན་སློབ་ནམ་མཁའ་འོད་གསལ། རྫོགས་ཆེན་གཉིས་པ་འགྱུར་མེད་ཐེག་མཆོག་བསྟན་འཛིན། འབར་བླ་བཀྲ་ཤིས་རྒྱ་མཚོ། ཉི་གྲགས་རིག་འཛིན་བཟང་པོ། སེང་ཕྲུག་པདྨ་བཀྲ་ཤིས། རྒྱལ་སྲས་གཞན་ཕན་མཐའ་ཡས། འཇིགས་མེད་ངོ་མཚར་རྒྱ་མཚོ། དཔལ་སྤྲུལ་འཇིགས་མེད་ཆོས་ཀྱི་དབང་པོ་བཅས་རིམ་པར་འདྲེན་པར་མཛད་པ་སྟེ། འདིར་ཟབ་མོ་ལྟ་སྲོལ་ལུགས་ཀྱི་ཡོངས་སུ་གྲགས་ཆེ་བའི་བླ་བརྒྱུད་རྣམ་ཐར་མདོར་བསྡུས་སུ་བཀོད་པ་ནི། བསྐལ་བ་བཟང་པོའི་རྣམ་འདྲེན་སྟོང་དང་རྩ་གཉིས་ཀྱི་དབུས་སུ་རྩོད་ལྡན་གྱི་འགྲོ་བ་ལ་རྗེས་སུ་བརྩེ་བའི་སྨོན་ལམ་ལྔ་བརྒྱའི་མཐུ་ཡོངས་སུ་གྲུབ་པ་མཉམ་མེད་ཤཱཀྱ་སེང་གེ་ཞིང་འདིར་མཆོག་གི་སྤྲུལ་སྐུའི་ཚུལ་དུ་ཇི་ལྟར་བྱོན་པའི་ཚུལ་གོང་དུ་རྒྱས་པ་བསྟན་ཟིན་པ་ལྟར་རོ། །
[༡] རྒྱལ་སྲས་ཐུ་བོ་རྗེ་བཙུན་འཇམ་དཔལ་དབྱངས་ནི།
ཇི་སྐད་དུ། འཇམ་དཔལ་གསང་བའི་རྒྱུད་ལས། ང་ནི་དུས་གསུམ་སྔོན་དུ་བྱུང་། །སངས་རྒྱས་ཀུན་གྱི་སྔོན་དུ་བྱུང་། །ང་ནི་དུས་གསུམ་ཕྱིས་ཀྱང་འབྱུང་། །ང་ནི་དུས་གསུམ་ད་ལྟར་འབྱུང་། །ཞེས་དང་། ང་ནི་དུས་གསུམ་འབྱུང་བའི་སྐུ། །བསྟན་པ་ཐམས་ཅད་ནུབ་པའི་ཚེ། །དེ་ཚེ་ང་ཡི་བསྟན་པ་འབྱུང་། །ཇི་ལྟ་བུར་ནི་ཞིར་གྱུར་ཀྱང་། །ང་ནི་ཐམས་ཅད་ཞི་བའི་སྐུ། །ཇི་ལྟ་བུར་ནི་ཁྲོས་གྱུར་ཀྱང་། །ཐམས་ཅད་ཁྲོས་པ་ང་ཡི་སྐུ། །ཞེས་གསུངས་པ་བཞིན་དུས་གསུམ་གྱི་སངས་རྒྱས་ཐམས་ཅད་ཀྱི་ཐུགས་རྣམ་པར་མི་རྟོག་པའི་ཡེ་ཤེས་ཀྱི་སྐུ་གཅིག་པུར་གྱུར་པ་བྱང་ཆུབ་སེམས་དཔའི་ཚུལ་གྱིས་ནམ་མཁའ་ཇི་སྲིད་དུ་བཞུགས་ནས། ལ་ལར་ཡོན་ཏན་མ་ལུས་པ་རྫོགས་པའི་སངས་རྒྱས་དང་། ལ་ལར་རྒྱལ་བའི་སྲས་ཀྱི་ཐུ་བོ་དང་། ལ་ལར་ཡོན་ཏན་ཡོངས་སུ་མ་རྫོགས་པ་ལམ་ལ་སློབ་པ་དང་། ལ་ལར་ཕལ་བའི་གཟུགས་ཀྱིས་མཛད་པ་ཇི་སྙེད་པ་སེམས་ཅན་གྱི་ཁམས་ལྟར་སྟོན་པའི་རྣམ་པར་ཐར་པ་བསམ་གྱིས་མི་ཁྱབ་པ་སྟེ། དཔའ་བར་འགྲོ་བའི་ཏིང་ངེ་འཛིན་གྱི་མདོ་ལས་སྔར་སངས་རྒྱས་པར་གསུངས་པ་དང་། སོར་མོའི་ཕྲེང་བར་ཕན་པའི་མདོ་ལས་ད་ལྟར་སངས་རྒྱས་ཏེ་འཚོ་ཞིང་གཞེས་པ་དང་། འཇམ་དཔལ་ཞིང་གི་ཡོན་ཏན་བཀོད་པ་ལས་མ་འོངས་པའི་བསྐལ་པ་གྲངས་མེད་པ་ན་མགོན་པོ་ཀུན་ཏུ་གཟིགས་ཞེས་པར་འཚང་རྒྱ་བར་སྟོན་པར་གསུངས་པ་སྟེ་རྒྱས་པ་འཇམ་མགོན་མི་ཕམ་ཆོས་རྗེའི་ཞལ་སྔ་ནས་མཛད་པའི་ཉེ་སྲས་བརྒྱད་ཀྱི་རྟོགས་བརྗོད་སོགས་སུ་གསལ་བ་དང་། དཔལ་མགོན་འཕགས་པ་ཀླུ་སྒྲུབ་ཀྱི་རྣམ་ཐར་གོང་དུ་སོ་ཐར་སྡོམ་རྒྱུན་གྱི་སྐབས་སུ་རྒྱས་པར་སོང་བས་དེ་དག་ཏུ་གཟིགས་པར་འཚལ། །
[༢] ཐལ་འགྱུར་ཤིང་རྟའི་སྲོལ་འབྱེད་དཔལ་ལྡན་ཟླ་བ་གྲགས་པ་ནི།
དེ་ཡང་སྔོན་འཕགས་ཡུལ་ན་དཔལ་མགོན་འཕགས་པ་ཀླུ་སྒྲུབ་སྐུ་འདས་པའི་ཚེ་གྲོང་ཁྱེར་ཀྱི་སྐྱེ་བོ་རྣམས་ཀྱིས་ད་ནི་འཇིག་རྟེན་ན་ཉི་མ་ནུབ་བོ་ཞེས་ཆོ་ངེ་ཆེན་པོ་བཏབ་པ་ན་ནམ་མཁའི་དབྱིངས་ཀྱི་མཁའ་འགྲོ་མ་རྣམས་ཀྱིས་མགྲིན་གཅིག་ཏུ། ད་ནི་འདི་ནས་ལོ་ནི་ལྔ་བརྒྱ་ན། །སོ་ན་ཞེས་བྱའི་གྲོང་ཁྱེར་ཆེན་པོ་རུ། །ཉི་མ་ནུབ་ཀྱང་ཟླ་བས་མུན་སེལ་བ། །རྣམ་དག་རིགས་ལས་འཁྲུངས་པའི་པཎྜི་ཏ། །ཟླ་བ་གྲགས་པ་ཞེས་བྱའི་མཁས་པ་འབྱུང་། །ཞེས་ཀུན་ཀྱིས་གོ་བར་ནུས་པའི་ལུང་གིས་བསྟན་པ་ལྟར་ཟླ་གྲགས་སྔ་ཕྱི་གཉིས་ལས་ཕྱི་མ་གྲུབ་ཆེན་བརྒྱད་བཅུའི་ནང་ཚན་ངོ་མཚར་བའི་རྣམ་ཐར་བཅོ་ལྔས་ཁྱད་པར་དུ་འཕགས་ཤིང་། རྗེ་བཙུན་འཇམ་དཔལ་དབྱངས་ཀྱི་རྣམ་འཕྲུལ་ཡོངས་སུ་གྲགས་པ་དེ་ཉིད་ལྷོ་ཕྱོགས་ས་མནྟ་ཞེས་བྱ་བར་བྲམ་ཟེའི་རིགས་སུ་སྐུ་འཁྲུངས། སྤྲུལ་བའི་མཚན་རྟགས་དང་ལྡན་པ་ཞིག་བྱུང་ནས་མཚན་མཁན་རྣམས་ལ་བསྟན་པས་འདི་ནི་མཚན་ཤིན་ཏུ་བཟང་སྟེ་འདིི་རྒྱལ་བའི་བསྟན་པར་ཞུགས་ནས་བསྟན་འཛིན་ཆེན་པོ་ཞིག་ཏུ་འགྱུར་རོ་ཞེས་ལུང་བསྟན། ཇི་ལྟར་ལུང་གིས་བསྟན་པ་ལྟར་ཕ་མ་གཉིས་ཀྱིས་ཀྱང་གནང་སྟེ་རབ་ཏུ་བྱུང་། དཔལ་ན་ལེནྡྲའི་མཁན་པོ་ཟླ་བ་མགོན་པོ་ཞེས་བྱ་བ་ལས་ཚིགས་སྔ་མ་དགེ་ཚུལ་གྱི་སྡོམ་པ་བཞེས་པས་མཁན་པོ་ཉིད་ཀྱི་མཚན་ལས་དྲངས་ཏེ་ཟླ་བ་གྲགས་པ་ཞེས་བཏགས། དེ་ནས་རིམ་གྱིས་བསྙེན་རྫོགས་ཀྱི་སྡོམ་པ་བཞེས་ཤིང་སྡེ་སྣོད་གསུམ་དང་རྒྱུད་སྡེ་བཞི་ལ་སྦྱངས་པས་མཁས་པའི་ཕུལ་དུ་ཕྱིན་པར་གྱུར་ཏེ་རང་དང་གཞན་གྱི་གྲུབ་པའི་མཐའ་རྒྱ་མཚོ་ལྟ་བུ་ལ་གསན་པ་མཐར་སོན། ཇི་ལྟར་གསན་པ་ལྟར་མདོ་སྔགས་གཉིས་ཀའི་ལམ་གྱི་ལུས་ཡོངས་སུ་རྫོགས་པ་ལ་སྒྲུབ་པ་རྩེ་གཅིག་ཏུ་མཛད་པས་རྟོགས་པ་མཆོག་ཏུ་ཐོབ། ཕྱི་ནང་གི་སྤྲོས་པ་ཐམས་ཅད་དོར་ནས་ཉིན་མཚན་ཁོར་ཡུག་ཏུ་དོན་དམ་པའི་བྱང་ཆུབ་ཀྱི་སེམས་སྒོོམ་བཞིན་བཞུགས་པས་མ་དག་པའི་སྐྱེ་བོ་འགའ་ཞིག་ཡི་མ་རང་ནས་གནས་ལས་དབྱུང་བར་རིགས་བྱས་པའི་ཚེ། མཁན་པོས་ཟླ་བ་གྲགས་པ་རང་ཉིད་ཐུགས་དམ་ལས་གཡོ་བ་མེད་ཀྱང་དགེ་འདུན་གྱི་ཁྲོད་ན་ཐ་མལ་པ་མང་པོ་ཞིག་ཉིད་ཀྱི་ངང་ཚུལ་ལ་མ་བཟོད་ནས་སྡིག་གསོག་པར་འདུག་པས། ཁྱོད་ཀྱིས་སྤྱི་གཉེར་ཅིག་གྱིས། ཉི་མ་གྲགས་པ་རོགས་ལ་བཏང་གི་གསུངས་པས་གཉེར་མཛད་ནས་མ་ཧེ་དང་བ་ལང་ཐམས་ཅད་རི་ལ་ཡན་དུ་བཅུག་སྟེ་རི་མོའི་བ་ལས་འོ་མ་བཞོས་ཏེ་དགེ་འདུན་ལ་ཕུལ་བས། ཉི་མ་གྲགས་པས། དཔལ་ལྡན་ཟླ་བ་གྲགས་པ་ཡིས། །རི་མོའི་བ་ལས་ཞོ་བཞོས་ནས། །དགེ་འདུན་འཚོ་བ་ལེགས་པར་བསྒྲུབས། །བྱས་པས་མཁན་པོས་སེམས་ལ་དབང་ཐོབ་པས་དེ་ལྟར་མཛད་པ་ངོ་མཚར་ཆེ་གསུངས་པ་དང་། ཡང་ལན་ཅིག་ཏུ་རུཥྐའི་དམག་བྱུང་བ་ན་ལེནྡྲར་ཟླ་བ་ཕྱེད་ན་སླེབས་ཟེར་བ་ལ་ན་ལེནྡྲའི་ཆོས་སྐྱོང་གི་ཐུགས་ཀ་ནས་བྱ་རོག་གཅིག་བྱུང་ནས་ཟླ་བ་གྲགས་པ་ལ་ཟློག་ཐབས་ཞུས་ཟེར་བ་ལྟར་ཞུས་པས། ཐབས་ཡོད་གསུངས་ནས་རྡོ་ཡི་སེངྒེ་བསྐུལ་ཏེ་དམག་ཐམས་ཅད་བསྐྲད་པས། རྒྱལ་པོ་སྟོབས་ལྡན་གཞོན་ནུས། དཔལ་ལྡན་ཟླ་བ་གྲགས་པ་ཡིས། །སྟོབས་ལྡན་རྡོ་ཡི་སེངྒེ་བསྐུལ། །ཏུ་རུཥྐའི་ཡི་དམག་ཟློག་ཀྱང་། །ཤི་རྨས་མེད་པ་ངོ་མཚར་ཆེ། །ཞེས་ཟེར་རོ། ཡང་སློབ་དཔོན་ནགས་ན་སྒོམ་གྱིན་བཞུགས་སྐབས་ཤིག་ནགས་ལ་མེ་ཤོར་བས་ཡུལ་མི་རྣམས་བལྟ་རུ་ཕྱིན་པ་ན། ཤིང་གི་ལྷ་མོ་ཞིག་གིས་རོ་སྟོད་བཏོན་ནས། བྱམས་མགོན་སྙིང་རྗེའི་བདག་ཉིད་ཅན། །མེ་ཡིས་མི་ཚིག་ཆུས་མི་འཁྱེར། །རླུང་གིས་འཐོར་བར་ག་ལ་ནུས། །ཞེས་གསུང་སློབ་དཔོན་གྱི་རྩྭའི་སྤྱིལ་བུའི་འདོམ་གང་ཚུན་ཆད་མེས་མ་ཚིག་པར་འདུག་ཅིང་། ཉིད་ཀྱི་ཞལ་ནས། ང་ཡི་བླ་མ་ཀླུ་སྒྲུབ་ཀྱིས། །སྐྱེ་བ་མེད་པའི་མེ་ཆེན་གྱིས། །དངོས་པོའི་བུད་ཤིང་བསྲེགས་པ་ཡིན། །མཁན་པོ་ཡིས་ཀྱང་བསྲེགས་པ་ཡིན། །ངས་ཀྱང་སྐྱེ་བ་མེད་པའི་མེས། དངོས་པོའི་བུད་ཤིང་བསྲེགས་པ་ཡིན། །དངོས་པོའི་མེ་ཡིས་ག་ལ་ཚུག །ཞེས་གསུངས་སོ། །མངོན་ཤེས་ཀྱང་ཐོགས་པ་མེད་པ་སྟེ་མུ་སྟེགས་ཀུ་མ་རི་ཀ་བྱ་བས། བརྒྱ་བྱིན་ད་ལྟ་ཅི་བྱེད་དྲིས་པས། དངོས་ནི་སུམ་ཅུ་རྩ་གསུམ་ན་ཡོད་ལ། སྤྲུལ་བ་གཅིག་དགའ་ལྡན་ན་བྱམས་པ་ལས་ཆོས་ཉན་གྱིན་ཡོད་གསུངས་པས། ཀུ་མ་རི་ཡིད་མ་ཆེས་པ་ལ། སློབ་དཔོན་གྱིས་ཕྱག་གཡབ་མཛད་པས་བརྒྱ་བྱིན་དངོས་འོངས་པ་ཁོས་མ་མཐོང་། ཡང་ཕྱག་གཡབ་མཛད་པས། སྤྲུལ་པ་འོངས་པ་ཁོས་མཐོང་ནས། ཁྱོད་བརྒྱ་བྱིན་ཡིན་ནམ་བྱས་པས་དངོས་མིན། དངོས་ཡིན་ན་མིག་སྟོང་ཡོད་པ་ལས་ང་ལ་རྗེས་ལས་མེད་ཟེར་བ་བལྟས་པས་རྗེས་ལས་མི་འདུག་པས་ཁོ་ཡིད་ཆེས་སོ། །དེས་ན་སློབ་དཔོན་འདི་ཉིད་པཎྜི་ཏ་རྣམས་ཀྱི་མཆོག་ཏུ་གྱུར་པ་ཡིན་ཏེ། མཁས་པ་ཙནྡྲ་གོ་མི་དང་ལོ་བདུན་བར་ལ་ཕན་ཚུན་ཆོས་ཀྱི་བརྒལ་བརྟག་འགྲན་ཞིང་འཇིགས་བྲལ་སྨྲ་བའི་སེང་གེའི་གནས་སུ་དམ་བཅའ་བ་མཛད་པ་དང་། སློབ་དཔོན་འདིས་འཕགས་པ་ཀླུ་སྒྲུབ་ཀྱི་དགོངས་པ་ལྟར་ཤེར་ཕྱིན་གྱི་མདོ་སྡེ་རིན་པོ་ཆེ་ཟབ་པ་དང་རྒྱ་ཆེ་བའི་ལམ་འབྲས་བུ་དང་བཅས་པ་སྟོན་པའི་གཞུང་དབུ་མ་ལ་འཇུག་པ་རང་འགྲེལ་དང་བཅས་པ་མཛད་ཅིང་། གནས་ལུགས་སྟོང་པ་ཉིད་རིགས་པ་བརྒྱ་ཕྲག་གི་སྒོ་ནས་གཏན་ལ་འབེབས་པ་དབུ་མ་རྩ་བའི་འགྲེལ་བ་ཚིག་གསལ་དང་། རྒྱུད་ཀྱི་རྒྱལ་པོ་དཔལ་གསང་བ་འདུས་པ་རྩ་རྒྱུད་ཀྱི་འགྲེལ་བ་སྒྲོན་མ་གསལ་བ་མཛད་པས་སྔོན་གྱི་མཁས་པ་རྣམས་ཀྱིས་མཁའ་ལ་ཉི་ཟླ་གཉིས་ས་ལ་གསལ་བ་གཉིས་ཞེས་བསྔགས་པར་གྲགས། གཞན་ཡང་བཞི་བརྒྱ་པའི་འགྲེལ་བ་དང་། རིག་པ་དྲུག་ཅུའི་འགྲེལ་བ་དང་། དབུ་མ་ཕུང་པོ་ལྔ་པ། སྟོང་ཉིད་བདུན་ཅུ་པའི་འགྲེལ་བ། སྐྱབས་འགྲོ་བདུན་ཅུ་པ། ཐུགས་རྗེ་ཆེན་པོ་ལ་སྨྲེ་སྔགས་སུ་གསོལ་བ། གསང་བ་འདུས་པའི་སྦྱོར་པ་ཡན་ལག་དྲུག་པའི་འགྲེལ་བ། གསང་བ་འདུས་པའི་མངོན་པར་རྟོགས་པའི་རྒྱན་གྱི་འགྲེལ་བ། རྡོ་རྗེ་སེམས་དཔའི་སྒྲུབ་ཐབས། ཁྲོ་བོ་བདུད་རྩི་འཁྱིལ་བའི་སྒྲུབ་ཐབས། སྒྲོལ་མའི་བསྟོད་པ་རྣམས་མཛད་དོ། །སྤྱིར་ཡང་སློབ་དཔོན་འདི་ནི་རྡོ་རྗེའི་སྐུ་བརྙེས་ནས་ད་ལྟ་འཛམ་བུའི་གླིང་ན་གདུལ་བྱའི་དོན་མཛད་བཞིན་བཞུགས་པ་སྟེ། སྔོན་པཱ་ཚབ་ལོ་ཙཱ་བས་སློབ་དཔོན་འདི་ལ་དད་ཅིང་གུས་པས་ཡུན་དུ་གསོལ་བ་བཏབ་ཏེ་ཁ་བ་ཅན་གྱི་ལྗོངས་འདིར་དབུ་མའི་ལམ་སྲོལ་བཟང་པོ་རྒྱ་ཆེར་འཕེལ་ན་ཅི་མ་རུང་སྙམ་སྟེ་རྒྱ་གར་དུ་ཕེབས་པས། སློབ་དཔོན་ཟླ་བ་གྲགས་པས་དངོས་སུ་ཞལ་བསྟན་ཏེ་གདམས་པ་དང་རྗེས་སུ་བསྟན་པ་རྒྱ་ཆེར་བསྩལ་ཅིང་བོད་དུ་དབུ་མའི་ལམ་སྲོལ་རྒྱ་ཆེར་སྤེལ་ནུས་པར་བྱིན་གྱིས་བརླབས་པ་ལྟར་རོ། །
[༣] རིག་པའི་ཁུ་བྱུག་ནི།
སྐུ་གཞོན་ནུ་ནས་རྒྱལ་བའི་བསྟན་པ་ལ་རབ་ཏུ་བྱུང་ཞིང་ནར་སོན་པ་ན་བསྙེན་པར་རྫོགས། བི་ཀྲ་མ་ལ་ཤི་ལའི་གཙུག་ལག་ཁང་དུ་སྡེ་སྣོད་གསུམ་ལ་སྦྱངས་སྟེ་མཁས་པའི་ཕུལ་དུ་ཕྱིན་པར་གྱུར། སློབ་དཔོན་ཟླ་བ་གྲགས་པ་ལས་འཕགས་པ་ཀླུ་སྒྲུབ་ནས་བརྒྱུད་པའི་མདོ་སྔགས་ཀྱི་མན་ངག་རྣམས་རྫོགས་པར་གསན། ནང་དུ་ཡང་དག་པར་འཇོག་ལ་རྩེ་གཅིག་ཏུ་བཞུགས་ཏེ་ཐེག་པ་ཆེན་པོའི་ལམ་གྱི་རིམ་པའི་ཉམས་རྟོགས་ཕུལ་དུ་ཕྱིན་པ་ཐོབ། ལྟ་བའི་དཀའ་གནད་ཕྲ་མོ་ལ་ངེས་པ་དྲངས་པའི་ཕྱིར་བླ་མ་དང་ལྷག་པའི་ལྷ་དབྱེར་མེད་པ་ལ་གསོལ་བ་ཤུགས་དྲག་རྒྱུན་རིང་བ་བཏབ། བསག་སྦྱང་རྒྱ་ཆེན་པོ་ལ་འབད་པས་དཔལ་མགོན་འཕགས་པ་ཀླུ་སྒྲུབ་ཀྱིས་དངོས་སུ་ཞལ་བསྟན་ནས་ལྟ་བའི་དཀའ་གནས་ཕྲ་མོ་རྣམས་ཞིབ་ཏུ་བསྟན་པས་མཚན་འཛིན་གྱི་འཆིང་བ་མ་ལུས་པ་དྲུང་ནས་ཕྱུང་། མངའ་རིས་ཆོས་རྒྱལ་བྱང་ཆུབ་འོད་ཀྱིས་ནག་ཚོ་ལོ་ཙཱ་བ་ཇོ་བོ་རྗེ་སྤྱན་འདྲེན་དུ་བཏང་བའི་ཚེ་ནག་ཚོ་ལོ་ཙཱ་བས་བི་ཀྲ་མ་ལ་ཤི་ལའི་ཚོགས་སུ་པཎྜི་ཏ་ཀུན་ཀྱི་གྲལ་དབུ་ལ་བཞུགས་པ་སྐུ་བགྲེས་ཤིང་བརྗིད་ཆགས་པ་འདི་མགོན་པོ་ཨ་ཏི་ཤ་ཨེ་ཡིན་ཞེས་དྲིས་པས། ཅི་ཟེར་འདི་དཔལ་ལྡན་ཟླ་བ་གྲགས་པ་ལས་ཆོས་དངོས་སུ་ཉན་པ་རིགས་པའི་ཁུ་བྱུག་བྱ་བ་ཨ་ཏི་ཤའི་ཡང་བླ་མ་ཡིན་ཟེར། ཀླུ་སྒྲུབ་ཀྱི་ཡང་དངོས་སློབ་ཡིན་ཚུལ། ཀླུ་སྒྲུབ་བྱོན་ནས་ལྟ་བའི་གནད་ཤིན་ཏུ་ཕྲ་བ་བསྟན་ནས་དངོས་འཛིན་གྱི་འཁྲུལ་བ་རྩ་བ་དྲུང་ནས་ཕྱུང་བར་མཛད་ཅིང་། ཀླུ་སྒྲུབ་ཀྱི་ཞལ་ནས། ངེད་རྒྱ་གར་གྱི་མཁས་གྲུབ་རྣམས་འཇམ་དབྱངས་ལ་བསྟེན་ནས་བྱིན་རླབས་ཐོབ་པ་ཤ་སྟག་ཡིན། དེའི་རྒྱུ་མཚན་ཡང་གསུངས་རབ་ཀྱི་དཀའ་བའི་གནད་ཤིན་ཏུ་ཕྲ་བ་བྱུང་ན་རྗེ་བཙུན་འཇམ་དབྱངས་ལ་གསོལ་བ་བཏབ་ནས་ཟབ་མོའི་དོན་ལ་དཔྱོད་པ་ཡིན། ཁྱོད་ཀྱང་རྗེ་བཙུན་འཇམ་དབྱངས་བསྟེན་པར་གྱིས་ཤིག་གསུངས། ཡང་ཀླུ་སྒྲུབ་ཀྱི་ཞལ་ནས་བདག་ཀྱང་མ་འོངས་པའི་དུས་སུ་མཐའ་འཁོབ་ཏུ་འགྲོ་བའི་དོན་བྱེད་པར་སྨོན་པ་ཡིན། ཁྱོད་ཀྱང་དེའི་དུས་སུ་འཁོར་ཀྱི་ཐོག་མར་གདུལ་བྱ་རྣམས་ཀྱི་མཆོག་ཏུ་འགྱུར་རོ་ཞེས་དང་། ཟླ་བ་གྲགས་པས་ཀྱང་རིག་པའི་ཁུ་བྱུག་ལ། མ་འོངས་པའི་དུས་སུ་རྗེ་བཙུན་འཇམ་དཔལ་དབྱངས་དགེ་སློང་གི་ཚུལ་དུ་བསམ་བཞིན་དུ་མཐའ་འཁོབ་ཏུ་སྐྱེ་བ་བཞེས་པར་འདུག་པས་ཁྱོད་ཀྱང་དེར་སྐྱེ་བ་ལོངས་ལ་བསྟན་པ་རྒྱས་པར་གྱིས་ཞེས་གསུངས་སོ། །
[༤] ཀུ་སཱ་ལུ་ཆེ་བ་ནི།
ཀུ་སཱ་ལ་ཆེ་བའམ་མཚན་དངོས་རིན་ཆེན་བཟང་པོ་ཞེས་བརྗོད་པའི་བདག་ཉིད་ཆེན་པོ་འདི་རྒྱལ་བའི་བསྟན་པ་ལ་རབ་ཏུ་བྱུང་ནས་བསྙེན་པར་རྫོགས་པ་དགེ་སློང་གི་སྡོམ་པ་བཞེས། རིག་པའི་ཁུ་བྱུག་ལ་བརྟེན་ནས་དཔལ་མགོན་འཕགས་པ་ཀླུ་སྒྲུབ་ནས་བརྒྱུད་པའི་དབུ་མའི་མན་ངག་རྣམས་དང་ཁྱད་པར་ཕ་རྒྱུད་གསང་བ་འདུས་པའི་མན་ངག་རྣམས་ཡོངས་སུ་རྫོགས་པར་གསན། སློབ་དཔོན་སེང་གེ་བཟང་པོ་ལས་བྱམས་མགོན་ནས་བརྒྱུད་པའི་ཤེར་ཕྱིན་གྱི་མན་ངག་རྣམས་ཀྱང་ཡོངས་སུ་རྫོགས་པ་དང་། སློབ་དཔོན་སངས་རྒྱས་ཞི་བ་ལས་ཡེ་ཤེས་ཞབས་ལུགས་ཀྱི་མན་ངག་མཐའ་དག་དང་། སངས་རྒྱས་ཞི་བའམ་སངས་རྒྱས་གསང་བ་ལས་རྣལ་འབྱོར་རྒྱུད་ཀྱི་མན་ངག་རྣམས་དང་། མཁས་གྲུབ་ཆེན་པོ་སངས་རྒྱས་བསྐྱང་ནས་བརྒྱུད་པའི་མན་ངག་རྣམས་ཀྱང་ཡོངས་སུ་རྫོགས་པར་གསན། སློབ་དཔོན་བློ་གྲོས་བརྟན་པ་ལས་ཐེག་པ་ཆེན་པོའི་ལམ་གྱི་རིམ་པའི་མན་ངག་རྣམས་གསན་པ་བཅས་མདོར་ན་དུས་དེའི་མཁས་ཤིང་གྲུབ་པའི་སྐྱེས་བུ་གང་དང་གང་བཞུགས་པ་ཕལ་མོ་ཆེའི་ཞབས་ལ་བཏུགས་ནས་མདོ་སྔགས་ཡོངས་རྫོགས་ལ་གསན་པ་རྒྱ་ཆེར་མཛད། ཐོས་བསམ་གྱི་མཐའ་བཅད་ནས་ཐུགས་ཉམས་སུ་བཞེས་ཏེ་མཁས་གྲུབ་གཉིས་ལྡན་དུ་གྱུར་པ་ཞིག་གོ། །
[༥] ཀུ་སཱ་ལུ་པ་ཆུང་བ་ནི།
དགེ་བ་ཅན་ནམ་ཀུ་སཱ་ལ་ཆུང་བ་མཚན་དངོས་རིན་ཆེན་སྡེའམ་རྗེས་སུ་ཐུགས་དམ་ཉམས་རྟོགས་ལས་དཔག་སྟེ་མཚན་དུ་གསོལ་བ་བླ་མ་བྱམས་པའི་རྣལ་འབྱོར་པ་ཞེས་གྲགས་པ་འདི་ནི། ལུང་དང་རྟོགས་པའི་ཡོན་ཏན་གྱིས་མངོན་པར་མཐོ་བ་ཐུབ་བསྟན་ཡོངས་རྫོགས་ཀྱི་བདག་པོར་བཞུགས་པ་ཞིག་སྟེ། སྐུ་གཞོན་ནུ་ནས་རྒྱལ་བའི་བསྟན་པ་ལ་རབ་ཏུ་བྱུང་ཞིང་བསྙེན་པར་རྫོགས་པའི་སྡོམ་པ་བཞེས་ནས་སྡེ་སྣོད་གསུམ་ལ་སྦྱངས་ཏེ་མཁས་པའི་ཕུལ་དུ་ཕྱིན་པར་གྱུར། ཀུ་སཱ་ལུ་ཆེ་བ་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ཏེ་སྡེ་སྣོད་གསུམ་དང་རྒྱུད་སྡེ་བཞིས་བསྡུས་པའི་མན་ངག་མཐའ་དག་གསན་ནས་ཡོངས་སུ་རྫོགས་པ་ཐུགས་ལ་ཆུད་པར་མཛད། གདམས་ངག་དེ་དག་ཐམས་ཅད་ཀྱང་ཐོས་པ་ཙམ་ཞིག་ཏུ་མ་ལུས་པར་མན་ངག་སོ་སོ་ལ་སྦྱངས་ཏེ་ཉམས་ལེན་སྙིང་པོར་མཛད་ནས་གྲུབ་པའི་འབྲས་བུ་ཐོན་པར་མཛད་ཅིང་། རྗེ་བཙུན་བྱམས་པ་ནས་བརྒྱུད་པའི་རྒྱ་ཆེ་བའི་ལམ་གྱི་རིམ་པ་དང་། ལྷག་པར་དཔལ་མགོན་འཕགས་པ་ཀླུ་སྒྲུབ་ནས་བརྒྱུད་པའི་ཟབ་མོའི་ལམ་གྱི་རིམ་པ་གཉིས་གཅིག་ཏུ་དྲིལ་བ་ཐེག་པ་ཆེན་པོའི་ལམ་གྱི་རིམ་པའི་ལུས་ཡོངས་སུ་རྫོགས་པ་ལ་ཆུ་བོའི་རྒྱུན་བཞིན་དུ་ཡུན་རིང་ཉམས་ལེན་མཛད་པས་རྟོགས་པ་ཡོངས་སུ་རྫོགས་པ་ཐུགས་ལ་འཁྲུངས། དེའི་ནང་ནས་ཀྱང་བྱམས་སྙིང་རྗེ་བྱང་ཆུབ་ཀྱི་སེམས་ལ་ཐུགས་དམ་གྱི་མཐིལ་དུ་མཛད་པས་བདག་ལས་གཞན་གཅེས་པའི་བྱང་ཆུབ་ཀྱི་སེམས་རིན་པོ་ཆེ་བཅོས་མ་མིན་པ་ཐུགས་ལ་འཁྲུངས། སྐབས་ཤིག་བླ་མ་འདིས་ཆོས་གསུངས་པའི་རྩ་རུ་མི་གཅིག་གིས་ཁྱི་ལ་དབྱུག་པ་བརྒྱབ་པས་བླ་མས་ཨ་ར་གསུངས་ནས་འགྱེལ་བ་ལ་གཞན་རྣམས་ཀྱིས་ཚུལ་འཆོས་རེད་སྙམ་པ་བྱུང་བས། བླ་མས་དེ་མཁྱེན་ནས་སྐུ་རྒྱབ་བསྟན་པས་ཁྱི་ལ་བརྒྱབ་པའི་ཐད་ན་སྐྲང་འདུག་པས་ཐམས་ཅད་ཡིད་ཆེས་སོ། །ཡང་དབེན་པའི་གནས་སུ་བྱམས་སྙིང་རྗེ་བྱང་ཆུབ་ཀྱི་སེམས་ལ་ཐུགས་དམ་གཙོ་བོར་མཛད་ནས། ཀྭ་ཡེ་ཕ་མར་གྱུར་པའི་འགྲོ་བ་མ་ལུས་དྲངས་པའི་ཕྱིར། །བདག་ལ་ཡོད་པའི་ཉོན་མོངས་དུག་ལྔ་གང་དག་གིས། །སེམས་ཅན་རྣམས་ཀྱི་དུག་ལྔ་མ་ལུས་འབྱིན་པར་བྱ། །འདོད་ཆགས་ལ་སོགས་མེད་པའི་དགེ་བ་གང་ཡོད་རྣམས། །འགྲོ་དྲུག་སེམས་ཅན་རྣམས་ལ་སྙོམས་པར་བྲིམ་པར་བྱ། །ན་ཚ་ལ་སོགས་འབྲས་བུར་གྱུར་པའི་སྡུག་བསྔལ་གྱིས། །དེ་དང་རིགས་མཐུན་སྡུག་བསྔལ་མ་ལུས་འབྱིན་པར་བྱ། །ན་ཚ་ལ་སོགས་མེད་པའི་ཕན་བདེ་གང་ཡིན་དེ། །འགྲོ་དྲུག་སེམས་ཅན་རྣམས་ལ་སྙོམས་པར་བྲིམ་པར་བྱ། །དེ་ལྟར་བྱས་ན་རང་ཉིད་འཁོར་བའི་རྒྱ་མཚོ་འདིར། །སྐད་ཅིག་ཙམ་ཡང་འཁྱམ་པའི་གོ་སྐབས་ག་ལ་སྲིད། །འོན་ཀྱང་ཇི་སྲིད་བྱང་ཆུབ་མ་ཐོབ་བར། །མྱོང་འགྱུར་ཉོན་མོངས་རྒྱུ་འབྲས་ཇི་སྙེད་པ། །ཐམས་ཅད་སྐྱེ་བ་འདི་ལ་ཡོངས་སུ་རྫོགས་པར་བྱ། །དེ་ཡང་ད་ལོ་ཟླ་བ་འདི་ལ་འབྱིན་པར་བྱ། །དེ་ཡང་དེ་རིང་ད་ལྟ་ཉིད་དུ་རྫོགས་པར་བྱ། །བློ་འདི་འབྱོང་བར་གྱུར་ཅིག་བྱམས་པའི་རྣལ་འབྱོར་པ། །ཞེས་བྱམས་སྙིང་རྗེ་བྱང་ཆུབ་སེམས་ཀྱི་ཉམས་མགུར་མཛད་ཅིང་ཆུ་བོ་གངྒའི་འགྲམ་དུ་སྒོམ་ཞིང་བཞུགས་པ་ན་རྗེ་བཙུན་བྱམས་པ་མགོན་པོ་མདུན་དུ་བྱོན་ནས་ཞལ་བསྟན་ཏེ། ཐོས་པ་ཙམ་གྱིས་ངན་འགྲོའི་སྡུག་བསྔལ་སེལ་བའི་གླུ། །བྱམས་པ་སྙིང་རྗེ་བྱང་ཆུབ་སེམས་ཀྱི་གླུ་འདི་མཚར། །ཉོན་མོངས་དུག་ལྔ་དགྲ་བཞིན་འཇོམ་པར་རིགས་ན་ཡང་། །ཁྱོད་ཀྱི་འདི་ལྟར་ན་ནི་རྒྱུད་ལ་བསྟེན་པར་འཚལ། །ན་ཚ་སྡུག་བསྔལ་ཀུན་ནས་བཟོད་པར་དཀའ་ན་ཡང་། །ཁྱོད་ཀྱི་འདི་ལྟར་ན་ནི་ངོ་མཚར་རྨད་དུ་བྱུང་། །རང་དོན་ཡལ་བར་དོར་ནས་གཞན་དོན་ལྷུར་མཛད་ཚེ། །རང་དབང་མེད་པར་འཁོར་བར་འཁྱམས་པ་སུ་ཡི་བཀའ། །དེས་ན་རང་དོན་བསམ་པ་སྐད་ཅིག་མ་འཁྲིས་པར། །གཞན་གྱི་མི་འདོད་བདག་གིས་ལེན་པ་དམ་པ་ཡིན། །ཐེག་པ་ཆེན་པོའི་གསུང་རབ་མཐའ་ཡས་མུ་མེད་ཀྱང་། །འདི་རུ་མ་འདུས་རྡུལ་ཙམ་གང་ཡང་ཡོད་མ་ཡིན། །དེ་ཕྱིར་རྣལ་འབྱོར་ཁྱོད་ཀྱི་རྡོ་རྗེའི་གླུ་དབྱངས་འདི། །ཐོས་སམ་བསམ་མམ་བསྒོམ་མམ་བཤད་ཀྱང་རུང་། །འཇིག་རྟེན་ལྷ་དང་བཅས་པའི་སྐྱབས་གནས་དམ་པ་སྟེ། །ཕྱོགས་བཅུའི་རྒྱལ་བ་རྣམས་ཀྱི་ཐུགས་ཀྱི་ཉིང་ཁུ་དེ། །ཁྱོད་ཀྱི་བློ་ལ་ཤར་བ་ངོ་མཚར་ཤིན་ཏུ་ཆེ། །ཞེས་ཐུགས་ཤིན་ཏུ་མཉེས་པའི་སྒོ་ནས་དབུགས་དབྱུང་བར་མཛད་པས་བྱམས་སྙིང་རྗེའི་རྟོགས་པ་རྒྱ་ཆེར་འཕེལ་ཞིང་ཐེ་ཚོམ་གྱི་མདུད་པ་གྲོལ་ནས་མཐོང་ཐོས་དྲན་རེག་ཐམས་ཅད་ལ་ཕན་པའི་ནུས་པ་ཐོབ་སྟེ། འདི་ལྟར་ཉིན་ལན་གསུམ་མཚན་ལན་གསུམ་དུས་དང་གནས་སྐབས་ཐམས་ཅད་དུ་དྲན་པ་བརྗེད་པ་མ་མཆིས་པར་ཆོས་འདི་བློ་ལ་སྦྱངས་ཤིང་ཁམས་བསོའི་རྡོ་རྗེའི་གླུ་དབྱངས་བླངས་པས། ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེའི་ཚོགས་དང་། ཤ་ཟ་དང་། སྲིན་པོ་ལ་སོགས་པ་བུ་གཅིག་གི་མ་ལྟར་བྱམས་བཞིན་དུ་གུས་པས་དབང་དུ་འདུས་པར་གྱུར་ཏོ། །གཞན་ཡང་ཡུལ་གྱི་རྒྱལ་པོ་དང་། བློན་པོ་དང་། བཙུན་མོ་དང་། བྲམ་ཟེ་དང་། ཁྱིམ་བདག་དང་། ཁྱེའུ་བུ་མོ་དམངས་རིགས་ལ་སོགས་པ་ཐམས་ཅད་དབང་དུ་འདུས་ཏེ་དགའ་བས་རྗེས་སུ་འབྲང་ཞིང་མཐོང་ཐོས་ཐམས་ཅད་བྱམས་པའི་རང་བཞིན་ཅན་དུ་གྱུར་ཏོ། གཞན་ཡང་རྟ་གླང་མ་ཧེ་སྤྲེའུ་འདབ་ཆགས་རྣམས་དང་། གཅན་གཟན་གྱི་ཚོགས་རྣམས་དང་། ཐ་ན་སྲོག་ཆགས་གྲོག་སྦུར་ཡན་ཆད་མི་འཇིགས་ཤིང་བག་ཕེབས་པར་རྣལ་འབྱོར་པའི་དྲུང་དུ་འཁོད་པར་གྱུར་ཏོ། དེ་ལྟར་རྣལ་འབྱོར་པའི་ཐུགས་ཀྱིས་དགོངས་ནས་སླར་ཡང་། ཐོག་མེད་དུས་ནས་ཉེ་བར་འབྲེལ་བ་ཡི། །ཕ་མར་གྱུར་པའི་སེམས་ཅན་མ་ལུས་པ། །བྱང་ཆུབ་མཆོག་ལ་འགོད་པའི་ཡི་དམ་བསམ། །ཆོས་འདིས་བྱམས་པ་མགོན་ལ་མཆོད་པར་བགྱི། །དེ་ཚེ་རང་དོན་སྐད་ཅིག་མ་འཁྲིས་པར་། །གཞན་དོན་འབའ་ཞིག་སྙིང་ལ་གོམ་པར་བྱ། །འདི་ནི་བྱང་ཆུབ་བསྒྲུབ་པའི་གཙོ་བོ་ཡིན། །ཆོས་འདིས་བྱམས་པ་མགོན་ལ་མཆོད་པར་བགྱི། །བདེ་སྡུག་བཏང་སྙོམས་ཚོར་བ་ཅི་བྱུང་ཡང་། །བྱང་ཆུབ་འབྱིན་པའི་གྲོགས་སུ་དང་དུ་བླངས། །བསྐལ་པ་དུ་མར་བསོད་ནམས་ཅི་གསོག་ཀྱང་། །ཉན་ཐོས་སྡར་མའི་ཕྱོགས་སུ་ཤོར་མ་གྱུར། །ཆོས་འདིས་བྱམས་པ་མགོན་ལ་མཆོད་པར་བགྱི། །དེ་ཙམ་ཞིག་ཏུ་མི་འདོད་ཅི་བྱུང་ཡང་། །བཟོད་པའི་གོ་ཆ་ཅུང་ཟད་ཤོར་མ་གྱུར། །ལྷག་པར་དྲིན་གྱིས་བསྐྱང་བའི་སྐྱེ་བོ་ཡིས། །ལོག་སྒྲུབ་བྱས་ཀྱང་འཛུམ་པའི་བཞིན་གྱིས་བསྐྱངས། །ཆོས་འདི་བྱམས་པ་མགོན་ལ་མཆོད་པར་བགྱི། །སྡང་བའི་སྐྱེ་བོས་ཕྱོགས་ནས་སྡིག་བསགས་ཀྱང་། །ངན་པའི་བསམ་པ་སྐད་ཅིག་ཤོར་མ་གྱུར། །སྣང་སྲིད་བདུད་དང་ལྷ་འདྲེ་དགྲར་ལངས་ཀྱང་། །རང་འདོད་འཁྲིས་པའི་སྲུང་སྐྱོབས་བྱེད་མ་མྱོང་། ཆོས་འདི་བྱམས་པ་མགོན་ལ་མཆོད་པར་བགྱི། །ངེས་པར་འཆི་བའི་ནད་ཀྱིས་བཏབ་གྱུར་ཀྱང་། །ཆོས་མིན་དག་ལ་ཡིད་བརྟན་འཆའ་མ་མྱོང་། །སེར་སྣ་གོམས་པས་འབྱོར་བ་ཆུང་ན་ཡང་། །ལོག་པའི་འཚོ་བས་ལྟོ་གོས་བྱེད་མ་མྱོང་། །ཆོས་འདིས་བྱམས་པ་མགོན་ལ་མཆོད་པར་བགྱི། །ངན་པའི་གྲོགས་ཀྱིས་ཀུན་ནས་བསྐོར་ན་ཡང་། །གཉེན་པོའི་རང་ཚུགས་གང་ལའང་བསྐྱུད་མ་མྱོང་། །མདོར་ན་འགྲོའམ་འདུག་གམ་ཅི་བྱེད་ཀྱང་། །མ་བརྟགས་བྱ་བ་ཅི་ཡང་བྱེད་མ་མྱོང་། །ཆོས་འདིས་བྱམས་པ་མགོན་ལ་མཆོད་པར་བགྱིས། །དེ་ལྟར་ཡིན་མོད་འོན་ཀྱང་ཆོས་རྣམས་ལ། །བདེན་པར་རྟོག་པ་རྡུལ་ཙམ་ཡོད་མ་མྱོང་། །འདི་ནི་བྱང་ཆུབ་སྒྲུབ་པའི་གཙོ་བོ་ཡིན། །ཆོས་འདི་བྱམས་པ་མགོན་ལ་མཆོད་པར་བགྱིས། །དེ་ལྟར་བསྒྲུབས་པའི་མཆོད་པ་དམ་པ་འདི། །རྣལ་འབྱོར་བདག་གི་བསམ་པ་སྦྱང་བའི་ཕྱིར། །བྱམས་པའི་དཔུང་གིས་ཡོན་འདི་བཞེས་སུ་གསོལ། །བཞེས་ལ་བློ་འདི་འབྱོང་བར་མཛད་དུ་གསོལ། །ཞེས་རྗེ་བཙུན་བྱམས་པ་མགོན་པོ་ལ་སྒྲུབ་པའི་མཆོད་པ་རྒྱ་ཆེར་ཕུལ། དེའི་ཚེ་བར་སྣང་ལ་མཆོད་པའི་ལྷ་མོ་ལྔ་དང་། སྒྲ་དང་འོད་ལ་སོགས་པ་ཡིད་དུ་འོང་བའི་མཆོད་པ་གཞན་ཡང་དཔག་ཏུ་མེད་པའི་རྣམ་པ་བྱུང་བར་གྱུར་ཏོ། །དེའི་ཚེ་བྱམས་པའི་རྣལ་འབྱོར་པ་ལ་བློ་སྦྱོང་འདི་ཞུ་བ་ཆེས་མང་དུ་བྱུང་བ་ཡིན་ནོ། །
[༦] ཇོ་བོ་ཐང་པ་ཛ་ནི།
དེ་ཡང་ཇོ་བོ་ཐང་པ་ཛའམ་ཛྙཱ་ན་ཨཱ་ཀཱ་ར་ནི་འཕགས་ཡུལ་གྱི་རྒྱལ་པོ་ར་ཐཱི་ཀ་སེ་ནའི་དུས་སུ་བྱོན། སྐུ་ན་ཆུང་ངུའི་དུས་ནས་ངེས་འབྱུང་དང་བྱང་སེམས་ཀྱིས་རྒྱུད་ཕྱུག་ཅིང་བསྟན་པ་ལ་རབ་ཏུ་བྱུང་ཞིང་བསྙེན་པར་རྫོགས། སློབ་དཔོན་རིན་ཆེན་སྡེ་ལས་དཔལ་མགོན་འཕགས་པ་ཀླུ་སྒྲུབ་ནས་བརྒྱུད་པའི་གཞུང་མན་ངག་དང་བཅས་པ་ཡོངས་སུ་རྫོགས་པ་གསན། གཞན་ཡང་དེ་དུས་གྱི་མཁས་གྲུབ་མང་པོ་ལས་མདོ་སྔགས་རིག་གནས་དང་བཅས་པ་གསན་ནས་མཁས་པ་ཆེན་པོ་ཛྙཱ་ན་ཨཱ་ཀ་ར་ཞེས་ཡོངས་སུ་གྲགས། ཐོས་བསམ་མཐར་ཕྱིན་རྗེས་སྒྲུབ་པ་ལ་རྩེ་གཅིག་ཏུ་གཞོལ་བས་རྗེ་བཙུན་བྱམས་པ་མགོན་པོས་ཞལ་དངོས་སུ་བསྟན་ནས་གྲུབ་པའི་ས་མཐོར་གཤེགས། ཇོ་བོ་རྗེ་སོགས་མཁས་གྲུབ་གཉིས་ལྡན་གྱི་སློབ་ཚོགས་གྲངས་ལས་འདས་པ་བསྐྱངས་ཤིང་བསྟན་པ་ལ་བྱ་བ་རྒྱ་ཆེན་པོ་མཛད་ཅིང་བཞུགས་པ་ན། སེམས་ཅན་སྤྱི་མཐུན་ཀྱི་ལས་ལ་ལྡོག་ཐབས་མ་བྱུང་བས་ཏུ་རུཥྐའི་རྒྱལ་ཕྲན་མང་པོ་ཕྱོགས་གཅིག་ཏུ་བསྡུས་ཏེ་མ་ག་དྷའི་ཡུལ་ཐམས་ཅད་འཇོམས་པར་བྱུང་སྟེ་བསྟན་པ་ལ་གནོད་ཆེན་པོ་བྱུང་སྐབས་མཁས་པ་ཆེན་པོ་ཛྙཱ་ན་ཨཱ་ཀ་ར་ལ་སོགས་པཎྜི་ཏ་མང་པོ་དང་། མཁས་ཆུང་བརྒྱ་ཙམ་རྒྱ་གར་ལྷོ་ནུབ་ཀྱི་ཕྱོགས་སུ་བྱོན་ནས་རྒྱལ་བསྟན་དར་བར་བྱས་པའོ། །
[༧] སློབ་དཔོན་འཇིགས་མེད་འབྱུང་གནས་ནི།
སློབ་དཔོན་ཆེན་པོ་ཨ་བྷ་ཡཱ་ཀ་རའམ་འཇིགས་མེད་འབྱུང་གནས་ནི་སྐུ་གཞོན་ནུ་ཉིད་ནས་ངེས་འབྱུང་གིས་ཀུན་ནས་སློང་བའི་སྒོ་ནས་བསྟན་པ་ལ་རབ་ཏུ་བྱུང་། ཐེག་པ་ཆེ་ཆུང་གི་སྡེ་སྣོད་ཀུན་ལ་མཁས་པར་སྦྱངས་ཤིང་སྐུ་ནར་སོན་ནས་བསྙེན་པར་རྫོགས། པཎྜི་ཏ་ཆེན་པོ་ཛྙཱ་ན་ཨཱ་ཀ་ར་ལས་ཟབ་མོ་ལྟ་བའི་སྲོལ་གྱི་གཞུང་མན་ངག་དང་བཅས་པ་གསན་ནས་བསག་སྦྱང་ལ་འབད་པས་ཉམས་རྟོགས་ཁྱད་པར་ཅན་རྒྱུད་ལ་འཁྲུངས། དེ་ཡང་ཧསྟི་སཱ་ལའི་བུ་རྒྱལ་པོ་ར་མ་སཱ་ལ་ཞེས་བྱ་བ་ཆུང་ངུ་ནས་རྒྱལ་སྲིད་དུ་བསྐོས་པས་བློ་གྲོས་ཤིན་ཏུ་ཆེ་ཞིང་མངའ་ཐང་ལྷག་པར་རྒྱས་པ་བྱུང་། དེ་རྒྱལ་སྲིད་དུ་འཁོད་ནས་མི་རིང་བ་ན་སློབ་དཔོན་ཆེན་པོ་ཨ་ཧཾ་ཨཱ་ཀ་ར་རྡོ་རྗེ་གདན་གྱི་མཁན་པོར་སྤྱན་དྲངས། དེ་ནས་ལོ་མང་ཞིག་སོང་བ་ན་བི་ཀྲ་མ་ཤཱི་ལ་དང་དཔལ་ནཱ་ལེནྡྲའི་མཁན་པོར་སྤྱན་དྲངས། དེ་སྐབས་སྔར་དང་མི་འདྲ་བར་བི་ཀྲ་མ་ཤི་ལར་པཎྜི་ཏ་བརྒྱ་དྲུག་ཅུ་ཙམ་རེ་དང་གཏན་དུ་བཞུགས་པའི་དགེ་སློང་སྟོང་རེ་ཡོད་ཅིང་། མཆོད་པ་ལ་སོགས་པ་འདུས་པ་ཆེན་པོའི་དུས་སུ་རབ་བྱུང་ལྔ་སྟོང་རེ་བྱུང་། རྡོ་རྗེ་གདན་དུ་རྒྱལ་པོས་འཚོ་བ་སྦྱར་བའི་ཐེག་ཆེན་པ་བཞི་བཅུ་རེ་དང་ཉན་ཐོས་ཀྱི་དགེ་སློང་ཉིས་བརྒྱ་རེ་རྟག་ཏུ་བཞུགས་ཤིང་དུས་དུས་སུ་ཉན་ཐོས་ཀྱི་དགེ་སློང་ཁྲི་ཕྲག་རེ་འཚོགས་པ་བྱུང་། ཨོ་ཏནྟ་པུ་རིར་ཡང་རྟག་ཏུ་དགེ་སློང་སྟོང་ཕྲག་རེ་བཞུགས། ཐེག་པ་ཆེ་ཆུང་གི་སྡེ་གཉིས་ཆར་ཡོད་ཅིང་དུས་དུས་སུ་རབ་ཏུ་བྱུང་བའི་འདུས་པ་སྟོང་ཕྲག་བཅུ་གཉིས་རེ་བྱུང་བར་གྲགས། ཐེག་ཆེན་པ་མཐའ་དག་གི་གཙུག་གི་ནོར་བུ་སློབ་དཔོན་ཨ་བྷ་ཡ་ཀ་ར་འདི་ཡིན་ལ་ཉན་ཐོས་རྣམས་ཀྱིས་ཀྱང་འདུལ་བ་འཛིན་པ་ཆེན་པོ་ཞེས་པས་རབ་ཏུ་བཏུད་དོ། །ཁྱད་པར་བསྟན་པ་ལ་དག་ཐེར་ཆེར་མཛད་ཅིང་ཉིད་ཀྱིས་མཛད་པའི་གསུང་རབ་རྣམས་རྒྱ་གར་གྱི་ཐེག་ཆེན་པ་རྣམས་ལ་ལྷག་པར་དར་བས། ཕྱིས་སུ་བྱོན་པའི་སློབ་དཔོན་རཏྣཱ་ཀ་ར་ཤཱནྟི་པ་དང་སློབ་དཔོན་འདི་གཉིས་དུས་ཀྱི་དབང་གིས་བསྟན་འགྲོ་ལ་ཕན་ཐོགས་ཆེ་ཆུང་མ་གཏོགས་སྔོན་གྱི་སློབ་དཔོན་ཆེན་པོ་བ་སུ་བནྡྷུ་སོགས་དང་ཡོན་ཏན་མཉམ་པ་ཡིན་པར་གྲགས། དེས་ན་སློབ་དཔོན་ཆེན་པོ་འཇིགས་མེད་འབྱུང་གནས་འདི་ནི་མཁྱེན་བརྩེ་ནུས་མཐུ་དང་དབང་ཕྱུག་སོགས་ཕུན་སུམ་ཚོགས་པས་བསྟན་པ་ཡོངས་སུ་རྫོགས་པར་འཛིན་པའི་སློབ་དཔོན་ཆེན་པོར་གྲགས་སོ། །
[༨] བྱང་ཆུབ་སེམས་དཔའ་ཟླ་བ་རྒྱལ་མཚན་ནི།
འཕགས་པ་སྤྱན་རས་གཟིགས་དངོས་ཡིན་པར་ཡོངས་སུ་གྲགས་ཤིང་། སློབ་དཔོན་ཆེན་པོ་འཇིགས་མེད་འབྱུང་སོགས་མཚན་ལྡན་གྱི་བཤེས་གཉེན་དུ་མར་མཉེས་པ་གསུམ་ཀྱིས་བསྟེན་ནས་མཁས་དང་གྲུབ་པའི་དབང་པོར་གྱུར། སྐབས་ཤིག་སྐྱིད་གྲོང་དུ་ལོ་ཀེ་ཤྭ་རའི་དྲུང་དུ་ཞག་བདུན་ལ་གསོལ་བ་དྲག་པོ་བཏབ་པས། ལོང་བ་བརྒྱ་ལ་མིག་བྱིན། གཙུག་ལག་ཁང་བརྒྱ་རྩ་བརྩིག ལམ་འཕྲང་བརྒྱ་སོལ། དགེ་སློང་བརྒྱའི་འཚོ་བ་དྲོངས། དེ་རྣམས་གྲུབ་ནས་མྱུར་དུ་འཚང་རྒྱ་བར་འགྱུར་རོ་ཞེས་ལུང་བསྟན་ཐོབ། དེར་དགེ་སློང་བཞི་སྡེ་རེ་ཁྲིད་ནས་བསོད་སྙོམས་མཛད་པས་སྐུ་བསོད་རྒྱས་ཏེ་ཟང་ཟིང་གི་འདུ་བ་རྒྱ་ཆེར་བྱུང་སྟེ། ལྷ་ཁང་བརྒྱ་བཞེངས། སྲོག་བསླུ་དང་མིག་བསླུ་སུམ་བརྒྱ་ལྷག་མཛད། ལམ་འཕྲང་དུ་མ་གསོས། དགེ་སློང་སྟོང་ཉིས་བརྒྱ་ཙམ་གྱི་འཚོ་བ་སྦྱར་བ་སོགས་བསྟན་འགྲོར་སྨན་པའི་མཛད་བཟང་རྒྱ་ཆེར་གནང་། ཡང་ལྷོ་རྒྱུད་ཀྱི་གྲོང་ཞིག་ཏུ་ཕེབས་པ་ན་བུད་མེད་ནད་པ་ཞིག་གིས་བྱིན་རླབས་ཞུས་པར་གཏོར་མ་དང་བསྔོ་བ་ཡང་མཛད་ནས། ན་ཚ་སྔོན་གྱི་མི་དགེ་བ་ལས་བྱུང་བ་ཡིན་པས་བཟོད་པ་དང་བྱང་ཆུབ་ཀྱི་སེམས་གྱིས་ཤིག་གསུངས་པས་མོ་དད་པ་སྐྱེས་ཏེ་མིག་ནས་མཆི་མ་བླགས་བཞིན་དུ། ཚེ་སྔོན་མ་ལྟ་ཞོག་ཚེ་འདིར་ཡང་སྡིག་པ་མང་དུ་བསགས་ནས་ཡོད་ན་ཟེར་བས། འོ་ན་སྡིག་པ་དྲན་ཚད་མཐོལ་བཤགས་གྱིས་དང་དག་པ་ཡིན་ནོ་གསུངས། དེར་མོ་ན་རེ། བདག་སྐྱིད་གྲོང་དུ་ཚོང་དཔོན་ཕྱུག་པོ་ཞིག་གི་ཆུང་མ་ལ་ཕྱིན་ནས་བུ་ཞིག་ཡོད་པ་ལོ་བདུན་ལོན་པའི་ཚེ། ཚོང་དཔོན་བལ་ཡུལ་དུ་ཚོང་ལ་ཕྱིན་པ་ལོ་གསུམ་དུ་མ་འཁོར་ཤུལ་དུ་བདག་སྐྱེ་མཆེད་ལེགས་པ་དང་། ཉོན་མོངས་དྲག་པོའི་དབང་གིས་སྐྱེས་པ་གཞན་དང་འགྲོགས་པའི་བུ་ཞིག་སྐྱེས་པ་དེ་བསད་ནས་ལོངས་སྤྱོད་རྣམས་ཀྱང་ཕྱེད་མེད་དུ་སོང་བས། བུས་ངའི་ཕ་དེ་བྱུང་དུས་ཁྱོད་ལ་ཅི་འདྲ་ཞིག་བྱེད་འོང་ངམ་ཟེར་བར། ངས་ཅི་བྱས་སྨྲས་ཏེ་རྡོག་ཐོ་ཞིག་བརྒྱབ་པས་མཆིན་ཁར་ཕོག་པས་ཁ་ནས་ཁྲག་བསྐྱུགས་ཏེ་ཤི། དེར་ངའི་བུ་གཟའ་གདོང་ཐུག་གིས་ཤི་བ་ལབ་ནས་གཡོ་ཁྲམ་མང་པོ་བྱས། བླ་མཆོད་ཞིག་ལ་དེའི་རྒྱུས་ཡོད་པས་དེའང་དུག་བླུད་ནས་བཀྲོངས་བ་དང་། ནམ་ཞིག་ན་ཚོང་དཔོན་ནོར་དཔག་མེད་བཅས་སླེབས་པ་ན་གཡོག་མོ་ཞིག་གིས་ལོ་རྒྱུས་རྣམས་ལྐོག་ཏུ་བཤད་པས། ཁོ་ན་རེ། དོ་ནུབ་མི་ཤེས་པ་ལྟར་གྱིས། ནངས་པར་མིག་འདོན་ནོ་ཟེར་བ་མོས་ཉན་རྣ་བྱས་པས་ཐོས་ཏེ་འཇིགས་དྲགས་ནས་དུག་མང་པོ་ཆང་ལ་སྦྱར་ཏེ་ཚོང་དཔོན་དཔོན་གཡོག་བརྒྱད། ཁྱིམ་མཚེས་སྐྱེས་པ་གཉིས། ཁོལ་མོ་གཉིས་བཅས་ལ་བླུད་པས་ཐོ་རངས་ནས་སྨྲ་མི་ཤེས་པར་གྱུར་ཏེ་ཞག་གཉིས་ཀྱི་ཁོངས་སུ་ཐམས་ཅད་ཤི། བདག་ལྷོ་བལ་དུ་བྲོས། དེའི་ལེ་ལན་བདས་པས་ཕ་མེས་རྣམས་ཀྱང་ཕུད་དུ་བཅུག གཞན་ཡང་གཡོ་ཟོལ་གྱིས་སྡིག་པ་སྣ་ཚོགས་བྱས་པས་ཐུགས་རྗེས་བཟུང་འཚལ་ཟེར། བུད་མེད་གཅིག་ལ་དེ་འདྲའི་སྡིག་ཆེ་བ་ལ་དགོངས་ཏེ་སྤྱན་ཆབ་མང་པོ་ཤོར། དེར་བརྩེ་བས་རྗེས་སུ་བཟུང་སྟེ་བྱང་ཆུབ་མཆོག་ཏུ་སེམས་བསྐྱེད་དུ་བཅུག་ནས་གཉེན་པོ་སྟོབས་བཞིས་བཤགས་པས་ནད་ལས་གྲོལ། སྨྱུང་གནས་ཚར་བརྒྱད་བགྱིད་པར་བསྒོས་པས་ས་ག་ཟླ་བ་ལ་སྨྱུང་གནས་བྱས་པའི་ལན་གཅིག་གི་དགོངས་མོར་ཁ་སྐོམ་ནས་ཆང་འཐུང་། ཡང་ལན་གཅིག་ལ་ལྟོག་དྲགས་ནས་ཞལ་ཟས་བཞི་ཕུལ་ཡོད་པ་ལས་གཉིས་ཟོས། དེ་ལྟར་སྙུང་གནས་ཧྲལ་པོ་ལན་གཉིས་དང་གདན་གཅིག་ལ་བརྟེན་པའི་བསྙེན་གནས་དྲུག་སྟེ་བརྒྱད་ནས་རིང་པོར་མ་ཐོགས་པར་ཤིའོ། དེར་དགེ་སློང་ཞིག་གིས་རྒན་མོ་མི་བཅོ་ལྔ་བསད་པ་དེ་ཤི་བར་ཐོས་པས་གར་སྐྱེ་ཞུས་པར་བུད་མེད་དེ་རྒྱ་གར་ཤར་ཕྱོགས་ན་བྲམ་ཟེ་འབྱོར་ལྡན་ཞིག་གི་བུར་སྐྱེས་ནས་རིན་པོ་ཆེའི་རྒྱན་མང་པོ་ཅན་དུ་གདའ། སྔོན་བྱང་ཆུབ་ཏུ་སེམས་བསྐྱེད་དེ་སྨྱུང་གནས་བྱེད་པ་དེས་མི་ལུས་ཐོབ་ཀྱང་ཁ་སྐོམ་ནས་ཆང་འཐུང་བས་ཤེས་པ་མཐོ་དམན་ཅན། ཞལ་ཟས་ཟོས་པས་གཟུགས་ངན་པ་ཞིག་ཏུ་སྣང་། སྐྱེ་བ་དེར་སྤྱན་རས་གཟིགས་ལ་ཡི་དམ་བྱེད་ཅིང་ཚེ་འཕོས་མ་ཐག་ཏུ་བདེ་བ་ཅན་དུ་སྐྱེ་བར་འདུག་གསུངས་སོ། །ཡང་ལན་གཅིག་བྱང་ཆུབ་སེམས་དཔས་གཙང་སྟོད་དུ་སེམས་བསྐྱེད་ཅིག་གསུངས་པའི་ཚེ་མི་ཐམས་ཅད་ཀྱིས་མཐོང་བར་ཙིའུ་དམར་དངོས་སུ་བྱུང་ནས་གྲུབ་རྟགས་ཞིག་སྟོན་པར་ཞུས་པས་ཕྱག་མཐིལ་དུ་སྤྱན་ཁྲ་ཧྲིག་ཧྲིག་པ་ཀུན་ཀྱིས་མཐོང་། ཁ་ཅིག་གིས་བཅུ་གཅིག་ཞལ་འགྲོ་འདུལ་ཕྱག་བཞི་པ་ཁ་སར་པ་ཎི་སོགས་དངོས་སུ་མཐོང་། ཁོ་ཡང་དད་དེ་ཆོས་འདིའི་སྲུང་མར་ཁས་བླངས་སོ། །དེའི་ཚེ་མི་རྣམས་ཤིན་ཏུ་དད་ནས་སྡིག་བཤགས་ཕུལ་བ་མང་པོ་བྱུང་ཞིང་བསྟན་འགྲོར་སྨན་པའི་མཛད་བཟང་རྒྱ་ཆེན་པོར་སྤེལ་བ་གྲགས་སོ། །
གྲོ་ལུང་པའམ་གྲོ་སྟོན་བདུད་རྩི་གྲགས་ནི།
སྣར་ཐང་པའི་གདན་ས་ལོ་ངོ་དགུའི་བར་དུ་བསྐྱངས་པ་སོགས་མཛད་རྣམ་རྒྱས་པ་སོ་ཐར་སྡོམ་རྒྱུན་སྐབས་སུ་གསལ་བ་ལྟར་རོ། །
[༩] བྱང་ཆུབ་འོད་དམ་སྤྱི་བོ་ལྷས་པ་ནི།
བོད་ཆེན་པོའི་ལྗོངས་ཀྱི་ཆར་གཏོགས་གཙང་གི་ས་ཆར་རིགས་རུས་དང་ཆོ་འབྲང་ཕུན་སུམ་ཚོགས་པའི་ཁྱིམ་རྒྱུད་ཅིག་ཏུ་མཚན་དཔེའི་པདྨོ་བཞད། སྐུ་ཆུང་ངུའི་དུས་ནས་སྙིང་རྗེས་རྒྱུད་བརླན་ཞིང་ཤེས་རབ་ཀྱི་རྩལ་རྫོགས་པ་ལྷན་སྐྱེས་སུ་མངའ། བཀའ་གདམས་བརྒྱུད་པའི་བླ་མ་ཚེ་ཀོང་སྣེ་གྱུར་པ་སོགས་མཁས་གྲུབ་གཉིས་ལྡན་གྱི་སྐྱེས་ཆེན་དུ་མར་མཉེས་པ་གསུམ་གྱི་སྒོ་ནས་ལེགས་པར་བསྟེན་ཏེ་མདོ་སྔགས་རིག་གནས་དང་བཅས་པ་ལ་གསན་བསམ་མཐར་ཕྱིན། སྒྲུབ་པ་ཉམས་སུ་བཞེས་ནས་གྲུབ་པའི་ས་མཐོར་གཤེགས། བཤད་སྒྲུབ་ལས་གསུམ་གྱི་སྒོ་ནས་བསྟན་འགྲོར་སྨན་པའི་མཛད་བཟང་རྒྱ་ཆེར་བསྐྱངས་ནས་རེ་ཞིག་གཟུགས་སྐུ་ཆོས་ཀྱི་དབྱིངས་སུ་བསྡུ་བར་མཛད་དོ། །
རྨ་བྱ་བ་ཤཱཀྱ་སེང་གེའི་རྣམ་ཐར་ཆ་ཚང་བ་སྔར་གྱི་ཆོས་འབྱུང་རྣམས་སུ་མི་བཞུགས་པས་འདིར་འགོད་ཐབས་བྲལ་ལོ། །
མཆིམས་ནམ་མཁའ་གྲགས་ཀྱི་རྣམ་ཐར་གོང་དུ་སོ་ཐར་སྡོམ་རྒྱུན་གྱི་སྐབས་སུ་གསལ་བ་ལྟར་རོ། །
[༡༠] མཁན་པོ་སྨོན་ལམ་ཚུལ་ཁྲིམས་ནི།
བསིལ་ལྡན་ཆོས་ཀྱི་ཞིང་ཁམས་སུ་སྐྱེ་བའི་མྱུ་གུ་བཟུང་། སྐུ་ཆུང་ངུ་ཉིད་ནས་ལས་འབྲས་ཡིད་ཆེས་ཀྱི་ལྟ་བས་རྒྱུད་ཕྱུག་ཅིང་བླང་དོར་གྱི་གནས་ལ་གཟོབ་པ་ལྷུར་མཛད། བསླབ་པ་གསུམ་གྱིས་རྒྱུད་ལེགས་པར་བསྡམས་ཤིང་དགེ་བའི་བཤེས་གཉེན་དུ་མར་བསྟེན་ནས་ཐུན་མོང་རིག་པའི་གནས་སྤྱི་དང་ཁྱད་པར་མདོ་སྔགས་གཉིས་ལ་སྦྱངས་པ་མཐར་ཕྱིན། མཁས་པའི་དབང་པོ་མཆིམས་ཆེན་ནམ་མཁའ་གྲགས་ལས་ཟབ་མོ་ལྟ་བའི་བརྒྱུད་སྲོལ་གྱི་སྒོ་ནས་བྱང་ཆུབ་མཆོག་ཏུ་ཐུགས་བསྐྱེད་དེ་སྨོན་འཇུག་གི་བསླབ་པ་ལ་འཇུག་པ་དྲག་པོས་བརྩོན་པ་ཆུ་བོའི་རྒྱུན་བཞིན་མཛད། ཀུན་རྫོབ་དང་དོན་དམ་བྱང་ཆུབ་ཀྱི་སེམས་རིན་པོ་ཆེ་གཉིས་ཀྱི་ཤིང་ལྟར་དབང་བསྒྱུར་ཏེ་མཁྱེན་བརྩེ་ནུས་གསུམ་གྱི་རྟོགས་པ་མཐར་ཕྱིན། གྲགས་པ་དཀར་པོའི་བ་དན་སྲིད་པ་གསུམ་ན་གཡོ་བས་འཁོར་སློབ་འདུས་པ་རྒྱ་མཚོར་བསྡུ་བའི་དངོས་པོ་བཞིས་ལེགས་པར་བསྐྱངས། ཁྱད་པར་སྣར་ཐང་གི་གཙུག་ལག་ཁང་ཆེན་མོ་དང་ལྕགས་རི་བཅས་གསར་བཞེངས་མཛད་ནས་ལོ་ངོ་བཅོ་ལྔའི་བར་དུ་གདན་ས་བསྐྱངས། བསྟན་པ་ལ་བྱ་བ་ཆེན་པོ་མཛད་པས་སྐྱོ་སྟོན་པ་སྨོན་ལམ་ཚུལ་ཁྲིམས་ཞེས་ཡོངས་སུ་གྲགས་པ་བྱུང་ནས་མཐར་ངོ་མཚར་བའི་ཆོ་འཕྲུལ་དུ་མ་དང་བཅས་གཟུགས་སྐུ་ཆོས་ཀྱི་དབྱིངས་སུ་བསྡུ་བར་མཛད་དོ། །
སློབ་དཔོན་བྱང་ཆུབ་གྲུབ་པ་དང་གཞོན་ནུ་རྡོ་རྗེ་གཉིས་ཀྱི་རྣམ་ཐར་ཡང་ཐེངས་འདིར་ལག་སོན་མ་བྱུང་ཞིང་ཕྱི་མ་ལས་རྒྱལ་བའི་དབང་པོ་ཀློང་ཆེན་རབ་འབྱམས་ལ་བརྒྱུད་པ་སྟེ། བདག་ཉིད་ཆེན་པོ་འདི་ཉིད་དང་རིག་འཛིན་འཇིགས་མེད་གླིང་པ་སོགས་ཀྱི་རྣམ་ཐར་རྒྱས་པ་འོག་ཏུ་གསང་བ་སྙིང་ཐིག་གི་བརྒྱུད་རྣམ་སོགས་སུ་གསལ་བས་དེར་གཟིགས་ཆུབ་ཞུ་བ་དང་། དེ་འབྲེལ་ཐེག་ཆེན་དབུ་ཕར་གྱི་གཞུང་བཤད་བརྒྱུད་པ་ནི། བསྟན་པ་སྔ་དར་གྱི་དུས་སུ་པཎྜི་ཏ་ཛྙཱ་ན་གརྦྷ་དང་ལོ་ཙཱ་བ་སྐ་ཅོག་ཞང་གསུམ་སོགས་སྔ་འགྱུར་པའི་ལོ་པཎ་རྣམས་ཀྱིས་དབུ་མ་རྩ་བ་ཤེས་རབ་སོགས་རིགས་ཚོགས་དང་། འགྲེལ་བ་ཤེས་རབ་སྒྲོན་མེ་དང་བུདྡྷ་པ་ལི་ཏ། བཞི་བརྒྱ་པ་དང་། འཇུག་པ་རང་འགྲེལ་དང་བཅས་པ་སོགས་དབུ་མའི་བསྟན་བཅོས་ཕལ་ཆེར་སྒྱུར་བཤད་ཀྱིས་གཏན་ལ་ཕབ་པ་དང་། མཁན་ཆེན་ཞི་བ་འཚོ་དང་ཀཱ་མ་ལ་ཤི་ལ་ཡབ་སྲས་ཀྱིས་བསམ་ཡས་སུ་དབུ་མ་རང་རྒྱུད་ལུགས་ཀྱི་བཤད་ཁྲིད་མཛད་ཅིང་བསྟན་བཅོས་བརྩམས་པ་སོགས་ཀྱིས་འཆད་ཉན་གྱི་རྒྱུན་རིམ་པར་འཕེལ་བ་དང་། དེ་བཞིན་ཕར་ཕྱིན་གྱི་སྐོར་འཕགས་ཡུལ་དུ་བཞུགས་སོ་ཅོག་ཀུན་སྔ་འགྱུར་གྱི་དུས་སུ་མ་འགྱུར་བ་མེད་པ་སྟེ། རླུང་ཁམས་པ་གོ་ཆ་འཕགས་ཡུལ་དུ་བྱོན་ཏེ་ཤེར་ཕྱིན་འབུམ་པ་ཐུགས་སུ་བཟུང་ནས་བོད་དུ་བསྒྱུར་བ་ཆོས་རྒྱལ་ཉིད་ཀྱི་མཚལ་ཁྲག་དང་ར་དཀར་པོའི་འོ་མས་བྲིས་པ་རེག་ཟིག་དམར་པོར་གྲགས་པའི་བླ་འགྱུར་ཆུང་བ་དང་། ཡང་དབས་མཉྫུ་ཤྲཱི་དང་ཉང་ཨིནྡྲ་ཝ་རོ་གཉིས་ཀྱིས་རྒྱ་གར་ནས་དཔེ་བླངས་ཏེ་བསྒྱུར་བ། བཙན་པོའི་དབུ་སྐྲའི་གཞོབ་རོམ་དང་ར་དཀར་པོའི་འོ་མས་བྲིས་པ་རེག་ཟིག་སྔོན་མོར་གྲགས་པ། དེ་ལྟར་སྔོ་དམར་གཉིས་ལ་ལོ་ཆེན་བཻ་རོ་ཙཱ་ནས་སླར་ཡང་ཞུས་ཆེན་མཛད་དེ་ཉིད་ཀྱིས་ཕྱག་བྲིས་མཛད་པ་དཔེ་སྒྲོམ་ལས་འབུམ་ཤ་སྒྲོ་ཅན་དུ་གྲགས་པ་སྟེ་བླ་འགྱུར་འབྲིང་པོ། ཡང་ཁྲི་རལ་བའི་དུས་སུ་པཎྜི་ཏ་སུ་རེནྡྲ་བོ་དྷི་སོགས་དང་ལོ་ཙཱ་བ་སྐ་ཅོག་གཉིས་ཀྱིས་ཞུས་ཆེན་མཛད་པའི་དུམ་བུ་བཅུ་དྲུག་པ་བླ་འགྱུར་ཆེན་མོ་སོགས་འགྱུར་མི་འདྲ་བ་འགའ་ཞིག་བྱུང་། གཞན་ཡང་ལི་ཡུལ་དང་རྒྱ་ནག་སོགས་ནས་དཀོན་བརྩེགས་དང་ཕལ་ཆེན་སོགས་དུ་མ་ཞིག་བསྒྱུར་བར་གྲགས་ཤིང་། དམ་ཥྚི་སེ་ནའི་འབུམ་ཊིཀ་སོགས་འགྲེལ་བའི་སྐོར་ཐམས་ཅད་ཀྱང་བསྒྱུར། ཁྱད་པར་སྦས་དོན་མངོན་རྟོགས་ཀྱི་རིམ་པ་གསལ་བར་བྱེད་པའི་གཞུང་མངོན་རྟོགས་རྒྱན་རྩ་འགྲེལ་དང་བཅས་པ་པཎྜི་ཏ་བིར་ཡ་ཀཱ་ར་སོགས་ཀྱིས་པྲ་བྷ་དང་། ཞུས་ཆེན་གྱི་ལོ་ཙཱ་བ་བནྡེ་དཔལ་བརྩེགས་རཀྵི་ཏ་སོགས་ཀྱིས་བསྒྱུར་བཤད་ཀྱིས་གཏན་ལ་ཕབས་ནས་བཤད་པ་དང་ཉམས་ལེན་གྱི་རྒྱུན་རྒྱ་ཆེར་ཁམས་སུ་འཕོས་པའི་རྒྱུན་ཕྱིས་སུ་སེ་བཙུན་དབང་གཞོན་དང་རྔོག་ལོའི་སློབ་མ་ཤེར་ཕྱིན་བཀའ་བབ་འབྲེ་ཤེས་རབ་འབར་གྱིས་གསན་པ་དང་།
དེས་ཇོ་བོ་རྗེ་དང་རིན་བཟང་རྔོག་ལོ་ཆེན་པོ་བཅས་ཕྱི་འགྱུར་གྱི་བཤད་རྒྱུན་ཐམས་ཅད་ཀྱང་གསན་པས་སྔ་འགྱུར་དང་ཕྱི་འགྱུར་གྱི་བཤད་རྒྱུན་ཐམས་ཅད་གཅིག་དྲིལ་གྱི་སྲོལ་ཆེན་པོ་བཏོད་པ་ཨར་བྱང་ཆུབ་སེང་གེས་བཟུང་། རིམ་བཞིན་བརྒྱུད་དེ་མཁས་མཆོག་བུ་སྟོན་པའི་སློབ་མ་ཐུགས་སྲས་ལོ་ཙཱ་བ་རིན་ཆེན་རྣམ་རྒྱལ་དང་། དེ་ལས་གཡག་མི་ཕམ་ཆོས་ཀྱི་བླ་མས་གསན་ཏེ་འགྲེལ་བ་ཆེ་འབྲིང་ཆུང་གསུམ་མཛད་ཅིང་འཆད་ཉན་རྩལ་དུ་བཏོན་པས་ཕར་ཕྱིན་གཡག་ལ་ཐུག་ཟེར་བ་བྱུང་། དེའི་སློབ་མ་རོང་སྟོན་ཆེན་པོ་ཤེས་བྱ་ཀུན་གཟིགས་ཀྱིས་ཤེར་ཕྱིན་གཙོས་མདོ་ཕྱོགས་ལ་རྣམ་བཤད་གཞུང་འགྲེལ་བཞི་བཅུ་ཞེ་གསུམ་ཙམ་མཛད་ནས་བརྒྱུད་པའི་ཆུ་རྒྱུན་ད་ལྟའི་བར་ཉམས་མེད་དུ་བཞུགས་པ་དང་། ཁྱད་པར་ཕྱི་མའི་དུས་འདིར་དཔལ་ལྡན་ཟླ་བ་གྲགས་པའི་རྣམ་རོལ་མཁས་མཆོག་གཞན་ཕན་སྣང་བས་རྒྱ་གཞུང་ཆེན་མོ་བཅུ་གསུམ་ལ་འཕགས་ཡུལ་མཁས་པའི་ལེགས་བཤད་རང་གིས་མཆན་འགྲེལ་དང་འགྲེལ་མཆན་གྱི་ཚུལ་དུ་བཀྲལ་བའི་བསྟན་བཅོས་ཆ་ལག་དང་བཅས་པ་མཛད་དེ། གྲུབ་དབང་རྫོགས་ཆེན་པའི་གཞུང་ཁྲིད་ཀྱི་བཀའ་སྲོལ་བཟང་པོ་སྔར་ཡོད་ལ་རང་རྐང་ཐུབ་པའི་འཆད་རྒྱུན་གསར་དུ་སྤེལ་བས་རང་ཕྱོགས་ཙམ་དུ་མ་ཟད་གྲུབ་མཐའ་གཞན་པའི་ཆོས་སྡེ་ལའང་རྒྱ་ཆེར་འཕེལ། དེ་མཚུངས་གདན་ས་ཆེན་མོ་འདི་ནས་བྱོན་པའི་མཁས་པའི་ཁྱུ་མཆོག་དཔལ་སྤྲུལ་འཇིགས་མེད་ཆོས་ཀྱི་དབང་པོ་དང་། འཇམ་མགོན་བླ་མ་མི་ཕམ་ཕྱོགས་ལས་རྣམ་རྒྱལ། མཁན་ཆེན་པདྨ་བཛྲ། བོད་སྤྲུལ་མདོ་སྔགས་བསྟན་པའི་ཉི་མ་སོགས་ཀྱིས་སྔ་འགྱུར་རང་ལུགས་ཀྱི་གྲུབ་མཐའ་རྩལ་དུ་བཏོན་པའི་གཞུང་འགྲེལ་ཆེན་མོ་ཁག་དང་། སྤྱི་དོན་སྟོང་ཐུན་བརྒལ་ལན་དང་བཅས་པའི་བསྟན་བཅོས་ས་གསུམ་ན་འགྲན་ཟླ་དང་བྲལ་བ་བརྩམས་ཤིང་འཆད་ཁྲིད་མཛད་པའི་བཀའ་སྲོལ་དེང་གི་དུས་སུའང་ཕྱོགས་བརྒྱར་འཕེལ་བཞིན་པ་ལགས་སོ། །
སྨྲས་པ།
བགྲང་བ་ལས་འདས་བསྐལ་བའི་ཡང་སྔོན་ནས། །མ་ལུས་འགྲོ་བའི་སྡུག་བསྔལ་ཁུར་ཁྱེར་བའི། །ལྷག་པའི་སྙིང་རྗེ་མི་མཉམ་དཔའ་བའི་སེམས། །ཐུགས་བསྐྱེད་ཕུལ་བྱུང་ཤཱཀྱ་སེང་གེ་རྒྱལ། །རྒྱལ་བ་སྐྱོབ་པའི་རིང་ལུགས་རྨད་བྱུང་བ། །རྒྱལ་གསུང་མདོ་སྔགས་བསྟན་པའི་སྙིང་པོའི་བཅུད། །རྒྱལ་བསྟན་སྙིང་པོ་རིན་ཆེན་བྱང་ཆུབ་སེམས། །རྒྱལ་སྲས་སེམས་དཔའི་ལམ་བཟང་གང་དེར་འདུད། །ཚད་མེད་བརྩེ་བ་ཆེན་པོའི་ཐུགས་རྗེའི་རྒྱུན། །ལུས་ཅན་གདུང་བ་སེལ་བའི་དགའ་སྟོན་དུ། །འཛད་མེད་འཇོ་བ་བྱང་ཆུབ་སེམས་མཆོག་སྟེ། །སྲིད་པ་མེ་ཡི་འོབས་འདིར་བདུད་རྩི་བཞིན། །སྙིང་རྗེས་དྲངས་པའི་བློ་སྟོབས་རྒྱ་ཆེ་བ། །གཞན་ཕྱིར་སངས་རྒྱས་ཐོབ་འདོད་དམ་བཅའི་སེམས། །ནམ་ཡང་མི་དོར་ཀུན་རྫོབ་སེམས་བསྐྱེད་དེ། །སྐྱེས་བུ་ཆེན་པོའི་འཇུག་ངོགས་བླ་ན་མེད། །ཤེས་རབ་ཟབ་མོས་དྲངས་པའི་སྟོང་ཉིད་བློ། །ཆོས་ཀུན་གནས་ལུགས་མཐོང་བའི་དེ་བཞིན་ཉིད། །འཕགས་པའི་མཉམ་བཞག་དོན་དམ་སེམས་བསྐྱེད་དེ། །མཐའ་བྲལ་སྟོང་ཉིད་ལྟ་བའི་རྒྱལ་པོར་བསྔགས། །ལེགས་ཚོགས་ཡོན་ཏན་རྒྱ་མཚོའི་གཞི་དང་རྟེན། །མཆོག་ཐུན་དངོས་གྲུབ་དཔལ་ཀུན་འབྱུང་བའི་མཛོད། །བྱང་ཆུབ་སེམས་མཆོག་ཡིད་བཞིན་དབང་རྒྱལ་ཏེ། །དོན་གཉིས་འབྲས་བུ་ངང་གིས་སྡུད་ཅིང་འཕེལ། །སྲིད་པར་མི་འཆིང་ཞི་བར་མི་ཞེན་བློ། །སྲིད་པའི་འགྲོ་བ་ཞི་བའི་མྱང་འདས་སར། །བགྲོད་པའི་ལམ་བཟང་ཐེག་ཆེན་ཆོས་ཀྱི་སྲོག །བསྟན་པའི་སྙིང་པོ་རིན་ཆེན་བྱང་ཆུབ་སེམས། །མར་གྱུར་འགྲོ་ཀུན་འཁོར་བའི་གཅོང་རོང་ལས། །སྒྲོལ་བ་སྨོན་པའི་དམ་བཅའ་རྒྱ་ཆེ་ཞིང་། །བྱ་དཀའི་སྤྱོད་པ་ཕ་རོལ་ཕྱིན་དྲུག་ལ། །འཇུག་པ་ཟླ་མེད་རིན་ཆེན་བྱང་ཆུབ་སེམས། །གང་ལ་ཞུགས་ན་རྣམ་གྲོལ་ཞི་བའི་སར། །སྐྱོད་པའི་རླབས་ཆེན་ཚོགས་གཉིས་གོམ་པའི་སྟབས། །ཉི་ཟླའི་འགྲོས་ལས་མྱུར་བའི་ཐབས་མཁས་ལམ། །བགྲོད་ཅིག་རྒྱལ་བའི་གཤེགས་ཤུལ་བྱང་ཆུབ་སེམས། །སེམས་མཆོག་རྒྱལ་ཀུན་དགྱེས་པའི་ལམ་བཟང་འདི། །བརྒྱད་ཁྲི་བཞི་སྟོང་ཆོས་ཀྱི་སྒོ་མོ་ཡི། །སྙིང་པོའི་ཡང་བཅུད་གདམས་པའི་ཉིང་ཁུ་སྟེ། །གང་གིས་འཐུང་གང་རྣམ་གྲོལ་དབུགས་ཆེན་འབྱིན། །དམིགས་མེད་བརྩེ་བའི་དཀྱིལ་འཁོར་ལྷུན་རྫོགས་པའི། །ཐུགས་རྗེའི་ཟླ་བ་བདུད་རྩིའི་འཛུམ་དཀར་ཅན། །མ་ལུས་འགྲོ་བའི་སྙིང་ལ་མངོན་འཆར་ཏེ། །བྱམས་པ་ཆེན་པོའི་གོ་འཕང་ཐོབ་གྱུར་ཅིག ། བདག་ཀྱང་དེང་ནས་བྱང་ཆུབ་སྙིང་པོའི་བར། །ཡང་དག་རྒྱལ་བ་དགྱེས་པའི་ལམ་མཆོག་ལས། །ནམ་ཡང་མི་འདའ་ཚུལ་གཉིས་བྱང་ཆུབ་སེམས། །སྨོན་འཇུག་བསླབ་པས་འགྲོ་ཀུན་སྨན་བྱེད་ཤོག །
ཅེས་པ་ནི་ཐེག་པ་ཆེན་པོའི་ལམ་གྱི་རྩ་བ་བྱང་ཆུབ་སེམས་སྡོམ་གྱི་བླ་མ་བརྒྱུད་པའི་རྣམ་ཐར་བཤད་པའི་སྐབས་ཀྱི་ངལ་གསོ་བའི་ཚིགས་སུ་བཅད་པའོ། །
སྔ་འགྱུར་གྲུབ་དབང་རྒྱལ་བ་རྫོགས་ཆེན་པའི་གདན་རབས་ཆོས་བརྒྱུད་དང་བཅས་པའི་བྱུང་བ་བརྗོད་པའི་གཏམ་ཡིད་བཞིན་དབང་གི་རྒྱལ་པོའི་ཕྲེང་བ་ལས། ཐེག་ཆེན་མདོ་ལུགས་དབུ་སེམས་ཀྱི་བྱང་སྡོམ་དང་གཞུང་བཤད་ཀྱི་བརྒྱུད་སྲོལ་སྨོས་པའི་སྐབས་ཏེ་སརྒ་བདུན་པ་རྫོགས་སོ།། །།