གཉིས་པ་ཐོས་པའི་ཉེ་འཁོར་གྱི་བསླབ་བྱ།
གཉིས་པ་ཐོས་པའི་ཉེ་འཁོར་གྱི་བསླབ་བྱ་ནི།
གཏན་གྱི་སྦྱོར་བ་མང་པོ་རྣམས། །ཐོས་པའི་ཉེ་འཁོར་དུ་མི་བྱ། །ཞེས་བྲེ་མོའི་གཏ༷མ་གྱི༷་སྦྱོ༷ར་བ༷་མ༷ང་པོ༷་རྣ༷མས་བླ་མས་ཐོ༷ས་པ༷འི་ཉེ༷་འཁོ༷ར་དུ༷་མི༷་བྱ༷་བར་བྱེད་དགོས་སོ། །གཉིས་པ་རིགས་པའི་ཀུན་སྤྱོད་བསྟེན་པ་ནི། བཏུད་དེ་སྟན་ལས་ལྡང་བ་དང༌། །གུས་པ་ཡིས་ནི་འདུག་པར་བྱ། །མཚན་ཆུ་འཇིགས་བཅས་ལམ་དུ་ནི། །བསྒོ་བ་ཐོབ་ན་མདུན་འགྲོ་བྱ། །ཞེས་བླ་མ་བཞེངས་པའི་ཚེ་གུས་པས་བཏུ༷ད་དེ༷་སྟ༷ན་ལ༷ས་ལྡ༷ང་བ༷་ད༷ང༌། བླ་མ་བཞུགས་པའི་ཚེ་གུ༷ས་པ༷་ཡི༷ས་ནི༷་འདུ༷ག་པ༷ར་བྱ༷འོ། །དམིགས་བསལ་ལ་མཚ༷ན་མོའི་དུས་དང༌། ཆུ༷་བརྒལ་བ་དང། ཆོམ་རྐུན་ལྟ་བུའི་འཇི༷གས་པ་དང་བཅ༷ས། ལ༷མ་དུ་འགྲོ་ཚེ་ལམ་སེལ་གྱིས་ཚུལ་དུ༷་ནི༷་སྔོན་ལ་འགྲོ་བའི་གནང་བ་ཞུས་ཏེ། སོང་ཞེས་པའི་བསྒོ༷་བ༷་ཐོ༷བ་ན༷ས་མདུ༷ན་དུ་སྔོན་ལ་འགྲོ༷་བར་བྱ༷་བ་ཡིན་ནོ། །