གཉིས་པ་རང་ལུགས་བཞག་པ།
གཉིས་པ་རང་ལུགས་བཞག་པ་ནི།
ལྐོག་ཏུ་བར་ཆད་རྣམས་དྲིས་པ་ན་གསང་སྟེ་སྟོན་པའི་སློབ་དཔོན་དུ་གྱུར་པ་ཡིན་ཏེ། སྔར་གྱི་གཞུང་བཞི་པོ་དེ་དག་གིས་གྲུབ་ལ། གསང་སྟེ་སྟོན་པའི་སློབ་དཔོན་དུ་འགྱུར་བའི་བྱ་བ་བྱས་པའི་དོན་གྲུབ་པ་ཉིད་ཡིན་པའི་ཕྱིར་རོ། །གསང་སྟེ་སྟོན་པས་འོང་བ་ཞུ་བའི་བྱ་བ་མ་བྱས་ཀྱང་ལྐོག་ཏུ་བར་ཆད་དྲིས་ཟིན་པའི་ཚེ་ན། གསང་སྟེ་སྟོན་པའི་བྱ་བ་བྱས་པའི་དོན་གྲུབ་པ་ཉིད་ཡིན་ཏེ། གསང་སྟེ་སྟོན་པའི་བྱ་བ་ཕལ་ཆེར་བྱས་ན་བྱས་པ་ཉིད་ཡིན་པའི་ཕྱིར་རོ། ། གསུམ་པ་རྩོད་པ་སྤང་བ་ནི། གསང་སྟེ་སྟོན་པས་ལྐོག་ཏུ་བར་ཆད་དྲིས་མ་ཐག་པའི་དུས་ཉིད་ན་ཆོས་ཅན། དོན་གྲུབ་པ་ཡིན་པར་ཐལ། སློབ་དཔོན་དུ་གྱུར་པ་ཡིན་པའི་ཕྱིར་རོ། །རྟགས་ཁས་བླངས། ཁྱབ་པ་གཞུང་གིས་གྲུབ་སྟེ། དོན་གྲུབ་ན་གྱུར་པ་ཉིད་དོ། །ཞེས་པས་སོ། །འདོད་ན། དེའི་ཚེ་ན་ལེན་པ་པོས་སྡོམ་པ་མ་ཐོབ་པས་ལེན་པ་པོའི་དོན་མ་གྲུབ་པར་འདུག་པས་བསལ་ལོ་ཞེ་ན། སློབ་དཔོན་དུ་འགྱུར་བའི་བྱ་བ་བྱས་པའི་དོན་གྲུབ་པར་ཐལ་ཟེར་རམ། སློབ་མའི་རྒྱུད་ལ་སྡོམ་པ་སྐྱེས་པའི་དོན་གྲུབ་པར་ཐལ། དང་པོ་ལྟར་ན་འདོད་ཅིང༌། གཉིས་པ་ལྟར་ན་ཁྱབ་པ་མེད་དོ། །གཞན་ཡང་གསང་སྟེ་སྟོན་པ་ཆོས་ཅན། སྡོམ་པ་མ་ཐོབ་པ་ཐོབ་པར་བྱེད་པའི་སློབ་དཔོན་མ་ཡིན་པར་ཐལ། ལེན་པ་པོས་སྐབས་དོན་གྱི་སྡོམ་པ་མ་ཐོབ་ཀྱང་སློབ་དཔོན་དུ་གྱུར་པ་ཡིན་པའི་ཕྱིར་ཞེ་ན། ཁྱབ་པ་མེད་དེ། མཁན་པོ་ཆོས་ཅན། སྡོམ་པ་མ་ཐོབ་པ་ཐོབ་པར་བྱེད་པའི་མཁན་པོ་མ་ཡིན་པར་ཐལ། ལེན་པ་པོས་སྡོམ་པ་མ་ཐོབ་ཀྱང་མཁན་པོར་གྱུར་པ་ཡིན་པས་མཚུངས་པའི་ཕྱིར་རོ། །གཞན་ཡང་གསང་སྟེ་སྟོན་པས་བར་ཆད་འདྲི་བ་དེ་ཆོས་ཅན། གསང་སྟེ་སྟོན་པའི་སློབ་དཔོན་གྱིས་བར་ཆད་འདྲི་བ་མ་ཡིན་པར་ཐལ། བར་ཆད་འདྲི་བའི་ཚེ་ན་གསང་སྟེ་སྟོན་པའི་སློབ་དཔོན་དུ་གྱུར་པ་མ་ཡིན་པའི་ཕྱིར་རོ། །རྟགས་མ་གྲུབ་ན། གསང་སྟེ་སྟོན་པའི་སློབ་དཔོན་དུ་གྱུར་པ་དེ་བར་ཆད་དྲིས་པ་ལ་ལྟོས་པ་ཉམས་སོ། །འདོད་ན། ཀརྨ་ཤ་ཏཾ་དང་ཊཱི་ཀ་ལས། གསང་སྟེ་སྟོན་པའི་སློབ་དཔོན་གྱིས་བར་ཆད་ཀྱི་ཆོས་རྣམས་གསང་སྟེ་དྲི་ཞེས་བཤད་དོ་ཞེ་ན། དེ་ནི་རྒྱུ་ལ་འབྲས་བུའི་མིང་བཏགས་པ་སྟེ། ཀརྨ་ཤ་ཏཾ་དང་ཊཱི་ཀ་ལས། ལས་བྱེད་པའི་སློབ་དཔོན་གྱིས་བར་ཆད་ཀྱི་ཆོས་རྣམས་དགེ་འདུན་གྱི་ནང་དུ་དྲི། ཞེས་གསུངས་པ་བཞིན་ནོ། །