དགེ་བཤེས་ཇོ་སྲས་ལ་གདམས་པ།
བླ་མ་རིན་པོ་ཆེ་ལ་ཕྱག་འཚལ་ལོ། །དང་པོ་ཆོས་ལ་ཞུགས་པའི་ཚེ། །དད་པ་ཆེ་ཡང་བློ་མི་བརྟན། །འཇིག་རྟེན་ཆོས་ལ་ཡིད་འཕྲོ་འཇུག །རྐྱེན་ཁར་འགྲོ་བའི་དུས་ཚོད་དེར། །ཚད་ལྡན་བླ་མས་ཟིན་པ་གཅེས། །འཆི་དང་མི་རྟག་རྒྱུ་འབྲས་ཆོས། །སྤང་ཐོབ་གཉེན་པོའི་ཆོས་རྣམས་མཉན། །འཁོར་བའི་སྡུག་བསྔལ་ཤེས་པར་བྱ། །བློ་བརྟན་ཤེས་རབ་སྐྱེ་དུས་སུ། །བདེ་གཤེགས་བཀའ་ཡི་དགོངས་པ་དང༌། །མཚན་ཉིད་རིགས་པའི་སྒྲ་ཚད་ལ། །ཐོས་མང་སྒྲོ་འདོགས་ཆོད་པར་བྱ། །དད་པ་བརྟན་པོར་གྱུར་པའི་ཚེ། །བྱང་ཆུབ་སེམས་གཉིས་དབྱེར་མེད་ལ། །བློ་མཆོག་བསྐྱེད་པའི་ཡིད་བཞིན་ནོར། །གཞན་དོན་དགོས་འདོད་འབྱུང་བ་ཡིན། །དད་པ་མཆོག་ཏུ་གྱུར་པའི་ཚེ། །ཐེག་པ་མཆོག་གྱུར་གསང་སྔགས་ལ། །སྨིན་བྱེད་དབང་བཞི་ཐོབ་ནས་ཀྱང༌། །གྲོལ་བྱེད་བསྐྱེད་རྫོགས་བསྒོམ་པར་བྱ། །གྲོལ་བྱེད་བསྐྱེད་རིམ་སྒོམ་དུས་སུ། །ཡུལ་དང་ཕུང་པོ་འདོད་ཡོན་ལྔ། །ཁམས་དང་སྐྱེ་མཆེད་མ་ལུས་ཀུན། །དཀྱིལ་འཁོར་ལྷ་ཚོགས་རང་ལ་ཚང༌། །རྣལ་འབྱོར་བླ་མེད་རྒྱུད་ལས་ཀྱང༌། །གཟུགས་དང་སྒྲ་སོགས་རྡོ་རྗེར་གསུངས། །གསང་བ་འདུས་པའི་རྒྱུད་ལས་ཀྱང༌། །མདོར་ན་ཕུང་པོ་ལྔ་རྣམས་ནི། །སངས་རྒྱས་ལྔ་རུ་རབ་ཏུ་གྲགས། །ཞེས་པ་དང༌། ཡང་དེ་ཉིད་ལས། རྡོ་རྗེ་སྐྱེ་མཆེད་ཉིད་དག་དང༌། །ཞེས་པ་དང༌། བདེ་གཤེགས་ལས་ཀྱང༌། གཟུགས་ཀྱི་ཕུང་པོ་རྣམ་པར་སྣང་མཛད་དོ། །ཞེས་གསུངས་པས། རང་ཉིད་ལྷ་རུ་ཤེས་བྱས་ལ། །སྣང་སྲིད་ལྷ་རུ་བྱིན་གྱིས་བརླབས། །མངོན་དུ་གང་འབྱུང་གཅེར་མཐོང་ལྷ། །རང་སྣང་ལྷ་རུ་གོམས་པར་བྱ། །མཉམ་བཞག་
ལོངས་སྤྱོད་རྫོགས་སྐུ་ལ། །དམིགས་པར་ལྷ་སྐུ་སྒོམ་པ 
་དེ། །རྒྱན་དང་ཆ་ལུགས་འགྱིང་བག་ལ། །མིག་གིས་གཟུགས་མཐོང་བཞིན་དུ་བསྒོམ། །རྗེས་ཀྱི་སྤྱོད་ལམ་རྣམ་བཞི་ལ། །ཆོས་སྤྱོད་དགེ་བ་ཅི་བྱེད་དང༌། །མཛད་པ་ཕྲིན་ལས་མ་ལུས་ཀུན། །སྤྲུལ་སྐུའི་ང་རྒྱལ་བརྟན་པར་བྱ། །མཚན་བཅས་རྫོགས་རིམ་སྒོམ་པའི་ཚེ། །རྩ་དང་རླུང་དང་ཐིག་ལེ་ལ། །གནད་བཞིའི་འཁྲུལ་འཁོར་མ་འཆུགས་པས། །བརྩོན་འགྲུས་དྲག་པོས་བསྒོམ་པར་བྱ། །རྟགས་དང་ཡོན་ཏན་བྱུང་དུས་སུ། །ང་རྒྱལ་རློམ་པ་མི་བྱ་བར། །གེགས་དང་བར་ཆོད་བདུད་ལ་སོགས། །གེགས་སེལ་གནད་ཀྱིས་གདོན་པར་བྱ། །དྲོད་དང་བདེ་བ་སྐྱེ་དུས་སུ། །མི་ཉམས་སྤེལ་བར་བྱ་བའི་གནད། །གསང་སྔགས་ཟབ་མོའི་གདམས་ངག་དེ། །དུས་འདིར་དགོས་སོ་སྐྱེས་བུ་ཁྱེད། །མཚན་མེད་རྫོགས་རིམ་སྒོམ་པའི་ཚེ། །མ་བཅོས་པ་ལ་མ་བསླད་དོན། །ལྷོད་ཀྱིས་ཀློད་པའི་དུས་ཚོད་དུ། །ཆོས་སྐུ་གཅེར་གྱིས་མཐོང་བ་ཡིན། །གཞན་ཡང་སྤང་ཐོབ་ཅི་ཡང་མེད། །ལྷུན་གྱིས་གྲུབ་པའི་ཆོས་ཉིད་ལ། །གཏང་བཞག་བྱ་རྒྱུའི་དུས་དང་བྲལ། །དབྱིངས་དང་ཡེ་ཤེས་འདྲེས་པ་ལ། །ཐད་ཀར་བཀང་ནས་བསྒོམ་རྒྱུ་མེད། །དམིགས་མེད་ཐུགས་རྗེ་ཆེན་པོ་ལས། །ཆེད་དུ་བཀར་ལ་བསྒོམ་མི་དགོས། །གཉིས་མེད་ཟུང་འཇུག་ཆེན་པོ་ལ། །མཉམ་བཞག་རྗེས་ཐོབ་རིམ་པ་མེད། །སློབ་པའི་ཟུང་འཇུག་སྦྱོང་དུས་སུ། །གཉིས་སྣང་བག་ཆགས་སྤང་བར་བྱ། །མི་སློབ་ཟུང་འཇུག་སླེབས་པ་ན། །སྐུ་གསུམ་རང་ཆས་ལྷུན་གྱིས་གྲུབ། །རང་ལ་ཡོད་པ་མངོན་དུ་གྱུར། །དད་པ་ཅན་གྱིས་བསྐུལ་བ་ཡིས། །གདམས་པའི་གནད་མཆོག་བསྡེབས་པ་ལས། །དགེ་བ་ཅི་སྙེད་ཡོད་པ་ཀུན། །མཐའ་ཡས་སེམས་ཅན་རྣམས་ལ་བསྔོ། །དགེ་བཤེས་ཇོ་སྲས་ལ་གདམས་པ། ཏི་ཤྲི་རས་པས་བཀོད་པ་རྫོགས་སོ། །དགེའོ།།