མཆོད་བརྗོད་དང་རྩོམ་པར་དམ་བཅའ་བ།
དི བཱ རེ ནྡྲ སྱ དྱཱ ནུ ནཱ མོ ག ཎ ཀི རྣ ཀྵ ཏྲེ བྷི ཤྩཱི ནཱ དཱ ར མྦྷ རྣཱཾ བྲ ཤྣོ ཏྟ རོ བི ཧ ར ཏི སྨ། བ ནྡྷི ཏྱོ ཥྞཱི ཥ ཨ གྲཱ ཏི ཤ ཙ སུ ཁ མ ཧཱ ཙ པྲ པུ ཥྚི ར ཡུ བ ནྱཱ ཨཱི བཱ ཤུ ཀླ ཀུ མུ ངྻ ཤྴརཝ ན ཀ ར མ ཎཽ ཀུ ཎྜ ལི༔ པ ཏྲ ཤུ ཀྲ། ཕུལ་བྱུང་བདེ་ཆེན་ལང་ཚོ་རབ་རྒྱས་ཀུན་ད་ལྟར་དཀར་བྱང་ཆུབ་སེམས། །ནམ་ཡང་འཕོ་མེད་གཙུག་ཏོར་རྩེར་བཅིངས་ནོར་བུའི་ཡོལ་གོར་ལེགས་འཁྱིལ་བས། །(༢ན)
།བྱོ ཏྟ རྱི རྣཱ ཤ ཡཱ པ དྦྷ ར ཛ མ ཀ ན མཿ ཀཱ ལ ཙ ཀྲོ ནི མི ཏྟཱ ནུ བྱ ཉྫ རྱཱ དི བུ དྡྷ ཤྴི བ ཙ བྷ ཝ ཨ ཧོ མཱ ཡ ཙཱ ཤུ ནྱ རཱུ པ ། སྟོང་གཟུགས་མཚན་དཔེའི་ངོ་མཚར་སྒྱུ་འཕྲུལ་སྲིད་ཞིའི་རྒུད་པའི་ཚོགས་བཅིལ་བ། །རྣམ་ཀུན་མཆོག་ལྡན་དང་པོའི་སངས་རྒྱས་ཟུང་འཇུག་དུས་ཀྱི་འཁོར་ལོར་འདུད། །ལེགས་པའི་ཆ་བསགས་གྲོང་ཁྱེར་ཤམྦྷ་ལར། །ས་དབང་ཚུལ་བཟུང་ཁྱབ་བདག་འཁོར་ལོའི་མགོན། །ཆོས་རྒྱལ་བདུད་དང་རིགས་ལྡན་ཉེར་ལྔ་ཡི། །ཞབས་སེན་བུང་བ་སྤྱི་བོའི་པད་མཚོར་བསྟེན། །(༢བ)
མཁྱེན་དཔྱོད་རླུང་གིས་གཞུང་ལུགས་ཉིན་མོར་བྱེད། །གངས་ཅན་ལྷ་ཡི་ལམ་དུ་འདྲེན་མཛད་པས། །ལོ་པཎ་མཁས་པའི་རྣམ་པར་ཐར་པ་ལ། །བསམ་ཀྱིན་བརྗོད་དུ་མེད་པའི་བཀའ་དྲིན་དྲན། །རྒྱལ་ཀུན་མཁྱེན་བརྩེའི་སིནྡྷུ་ཝ་རའི་མདངས། །འཇམ་དཔལ་རྡོ་རྗེ་རྣོན་པོར་ཤར་བའི་གར། །བཤེས་གཉེན་ཚུལ་གྱིས་རྣམ་རོལ་བཙོང་ཁ་པ། །མཁས་གྲུབ་ཡོངས་ཀྱི་འཁོར་ལོས་སྒྱུར་པའི་དཔལ། །གསུང་རབ་ཕྱོགས་རེར་སྦྱངས་པའི་གོམ་སྟབས་ཅན། །མཁས་རློམ་གླང་པོའི་ལྷ་ཆེན་མཐོང་བའི་ཚེ། །གྲགས་པ་དོན་ལྡན་ལོ་ཆེན་སྟག་ཚང་པ། གནས་ལྔའི་བསྟན་པ་རྒྱས་མཛད་ཁྱོད་མིན་སུ། །རྒྱ་ཆེན་ཤེས་བྱ་ཀུན་རིག་ཆོས་ཀྱི་གྲགས། །ཟུང་འཇུག་སྒྱུ་མའི་གར་མཁན་ནོར་བུ་བཟང་། །ཕུག་ལུགས་ཤིང་རྟ་ཆེན་པོ་ལྷུན་རྒྱམ་པ། །དཔལ་མགོན་འཕྲིན་ལས་སྙན་པའི་གྲགས་པ་འབར། །གཙུག་ལག་སྨྲ་བའི་དབང་ཕྱུག་ཟུར་རིགས་རྗེ། །རིག་གནས་རྒྱ་མཚོའི་འཕྲེང་འཛིན་སྨོན་འགྲོ་བ། །མདོར་ན་བདག་བློ་ཆེས་ཕྲའི་ཟ་མ་ཏོག །ལེགས་བཤད་བདུད་རྩིས་གང་བར་མཛད་རྣམས་རྒྱལ། །དཀའ་གནས་དྲི་བའི་ཚིག་གི་པདྨ་དཀར། །ཟབ་ཅིང་བརླིང་པའི་འདབ་མ་སྟོང་ལྡན་པ། །བླུན་རྨོངས་ཚོགས་པའི་ཐུན་གསུམ་ཟུམ་པའི་ཁ། །དྲིས་ལན་ཉི་མའི་གཟེར་གྱིས་རྣམ་པར་འབྱེད། །རི་མོར་བྲིས་མཚུངས་མཚུངས་མེད་བླ་གྲལ་དུ། །ཆུད་མིན་འཇམ་དབྱངས་དབྱངས་ཅན་ངག་གི་ལྷས། །སྨྲ་བའི་རྣམ་དཔྱོད་དཔྱོད་ལྡན་མགུ་ནུས་མཆོག །བྱིན་པས་ལེགས་བཤད་བཤད་པའི་སྤོབས་པ་ཐོབ། །མཛེས་མཛེས་གཞན་མགོ་སྐོར་བའི་ཚུལ་འཆོས་དང་། །ཟོབ་ཟོབ་ཚེ་འདིའི་འབྱིད་ཐབས་མི་ཤེས་ཀྱང་། །འགྲིག་འགྲིག་མགྲིན་པའི་ལམ་ནས་ལེགས་དྲངས་པའི། །སྙན་སྙན་དྲི་ཟའི་རྒྱུད་ཀྱི་(༣ན)
དབྱངས་འདི་ཉོན། །ཞེས་སྙན་ཚིག་གི་ལམ་ནས་སྔུན་བསུས་ཏེ།