དགེ་བཤེས་གྲྭ་པ་མངོན་ཤེས།
༈ དགེ་བཤེས་གྲྭ་པ་མངོན་ཤེས་ནི། ཁྲི་སྲོང་ལྡེའུ་བཙན་གྱི་བློན་པོ་མཆིམས་རྡོ་རྗེ་སྤྲེ་ཆུང་ཞེས་བྱ་བ་ཤེས་རབ་ཆེ་ཞིང་སྨྲ་མཁས་པས་རྒྱལ་པོ་དགྱེས་པ་ཞིག་བྱུང་། དེས་བསམ་ཡས་མཆོད་རྟེན་སྔོན་པོ་དང་བྱང་ཆུབ་གླིང་གོང་བཞེངས། དེ་ལ་བུ་གསུམ་ལས་འབྲིང་པོ་ལྷ་རྗེས་གྲྭའི་སྐྱིད་རུ་བཟུང་། དེ་ནས་བརྒྱུད་པ་ལྔའི་བར་མཆིམས་སུ་འབོད། ལྔ་པ་ཞང་སེ་ཚ་ལོགས་བརྟན་ནས་ཞང་དུ་འབོད། དེ་ལ་བུ་བཞི་བྱུང་བ་འབྲིང་པོ་ཞང་སྟག་དཀར་ལ་བུ་བཞི་བྱུང་བའི་ཆེ་བ་ཞང་སྟག་ཚབ་ཆུ་ཕོ་བྱི་བ་ལ་འཁྲུངས། རྗེ་མར་པ་དང་ལོ་མཉམ་ཡིན། རིགས་སད་དེ་མཁན་པོ་ཡམ་ཤུད་ལས་རབ་ཏུ་བྱུང་བའི་མཚན་ཤེས་རབ་རྒྱལ་བར་བཏགས། ཁུ་བོ་ཞང་སྟོན་ཆོས་འབར་ལ་ཆོས་མང་དུ་གསན། ཞང་འོན་གྱི་སྒྲུབ་ཐབས་བླངས་པ་ཙམ་གྱིས་ཞལ་གཟིགས། ཆོས་ཐམས་ཅད་ཅུང་ཟད་རེ་ཉན་པས་ཤེས་ཏེ་མཁྱེན་པའི་ཕུལ་དུ་བྱུང་། གཡོ་ནས་བརྩམས་ཏེ་ཕྱོགས་ཐམས་ཅད་དུ་གཙུག་ལག་ཁང་བརྒྱ་རྩ་བརྒྱད་བརྩིགས། ཁུ་བོ་གཤེགས་ནས་དགོན་པ་རེ་ཕུག་གི་གདན་སར་བཞུགས་མ་འདོད་ནས་གླག་གི་གནས་མོ་ཆེའི་གཟའ་མི་བྱས། རྒྱུད་འགྲེལ་མང་པོ་གསུངས། སློབ་མ་གཅིག་གིས་ཡར་ཀླུང་དུ་སྤྱན་དྲངས། སྐུ་བསོད་སྐྱེས་དེས་༼དགེ་བཤེས་༽གྲྭ་པ་ཞེས་པའི་མཚན་ཐོགས། དམ་པ་སངས་རྒྱས་ལ་ཞི་བྱེད་ཀྱང་གསན། དགུང་ལོ་བདུན་ཅུ་བཞེས་པ་ལྕགས་མོ་བྱ་ལ་གྲ་ཐང་གི་རྨང་བཏིང་། རང་ལོ་བདུན་ཅུ་རྩ་དགུ་པར་མཁན་བུ་གཅིག་གིས་སྙིང་ཐུར་བརྒྱབ་པ་ཐལ་ཆེས་པས་ཞི་བར་གཤེགས་ཚེ་ཕལ་ཆེར་གྲུབ་པ་ལ། ལྷག་མ་ཅུང་ཟད་དགོས་པ་རྣམས་དབོན་འབྱུང་ཤེས་དང་འབྱུང་ཚུལ་གཉིས་ཀྱིས་ལེགས་པར་ཚར་བར་བྱས་སོ། །གྲྭ་པ་གཤེགས་ནས་གྲ་ཐང་གི་གདན་ས་ཆོས་སྐྱབས་དོན་སྟེངས་པར་གྲགས་པ་དེས་མཛད། དེ་རྗེས་དེས་གྲྭ་པས་བཏབ་པའི་སྤྱན་གཡས་ཀྱི་མཁན་པོའང་མཛད་ནས་གནས་བརྟན་དར་མ་བཀྲ་ཤིས་སོགས་མཁན་རབས་མང་དུ་བྱུང་བར་གྲགས་སོ། །