དགུ་པ་སློབ་དཔོན་དུ་གྱུར་བའི་དུས་དང་མཚན་ནས་སྨོས་པའི་རིམ་པ་གཉིས་ལས་དང་པོ།

དགུ་པ་སློབ་དཔོན་དུ་གྱུར་བའི་དུས་དང་མཚན་ནས་སྨོས་པའི་རིམ་པ་གཉིས་ལས་དང་པོ་ནི།

རྩ་བར། བརྗོད་པ་ཐ་མ་གང་ཡིན་པའི་ཆ་གཉིས་རྫོགས་པ་ན་གྲུབ་པ་ཉིད་དོ། །ཆ་གསུམ་པ་ལ་འཇུག་པ་ན་གྲུབ་ཟིན་པ་ཉིད་ཡིན་ཏེ། ཊཱི་ཀ་ལས། བརྗོད་པ་ཐ་མ་ཡོངས་སུ་མ་རྫོགས་མོད་ཀྱི་འོན་ཀྱང་ཆ་གསུམ་པའི་དོན་ལས་མ་ལུས་པས་གྲུབ་པ་ཉིད་དེ། ཕལ་ཆེར་བྱས་པ་ཡིན་པའི་ཕྱིར། ཞེས་གསུངས་པའི་ཕྱིར་རོ། །འདིར་དགེ་ཚུལ་གྱི་སྡོམ་པ་དངོས་གཞིའི་ཆོ་ག་ལ་ཆ་གསུམ་ལས། སྐྱབས་འགྲོའི་ཆ་སྟེ་སྐྱབས་སུ་མཆི། ཞེས་པ་དང༌། བདག་བརྗོད་ཀྱི་ཆ་སྟེ་བདག་ཇི་སྲིད་འཚོའི་བར་དུ་དགེ་ཚུལ་དུ། ཞེས་པ་དང༌། གཞན་བརྗོད་ཀྱི་ཆ་སྟེ་བཙུན་པའམ་སློབ་དཔོན་གྱིས་གཟུང་དུ་གསོལ་ཞེས་པའོ། །དེ་ལྟར་ཆ་གསུམ་ལས། དཔེར་ན་གཞན་བརྗོད་པ་སྟེ་སྔར་བཙུན་པས་ཞེས་བརྗོད་པ་ལས་གཞན། སློབ་དཔོན་གྱིས་ཞེས་བརྗོད་པའི་དུས་ན་དགེ་ཚུལ་གྱི་སྡོམ་པ་སྐྱེས་པ་ཉིད་དང་དགེ་ཚུལ་གྱི་སློབ་དཔོན་དུ་གྱུར་པ་ཉིད་དོ། །གནས་སྦྱིན་པ་ནི། ཞག་གཅིག་ཅེས་པ་ཊཱི་ཀ་ལས་ཞག་གཅིག་ཅེས་བྱ་བ་ནི་ཉིན་མཚན་གཅིག་གོ་ཞེས་གསུངས་ཀྱང༌། ཉིན་མོའི་ཆ་ནི་མཚོན་པ་ཙམ་ཡིན་གྱི་ངེས་གཟུང་དུ་དགོས་པ་ནི་མ་ཡིན་ཏེ། རང་གི་རྣམ་བཤད་ལས། གནས་ཀྱི་སློབ་དཔོན་ནི་གང་ཡིན་ཞེ་ན། གང་ཞིག་གང་དང་ཉེ་བར་མཚན་མོ་གཅིག་ཀྱང་གནས་པས་གནས་སུ་འགྱུར་ཞེས་བཤད་དོ། །མཐར་ཐུག་ནའོ་ཞེས་མཚན་མོ་མཐའི་སྐད་ཅིག་གམ་སྐྱ་རེངས་ཤར་བ་ལ་ལྟོས་སྙམ་ན་འདིའི་མཐར་ཐུག་ནི་ཞག་གཅིག་གི་མཐར་ཐུག་མཚན་མོ་མཐའི་སྐད་ཅིག་ཉིད་ཡིན་ལ། སྐྱ་རེངས་ཤར་ན་ནི་སློབ་དཔོན་དུ་གྱུར་པ་ཉིད་དོ་ཞེས་རིགས་ཏེ། འཆང་འབྲལ་ལ་སོགས་པ་ཞག་འདས་པ་ཡན་ལག་ཏུ་དགོས་པ་རྣམས་དང་ཚུལ་འདྲའོ་ཞེས་རིགས་སོ། །འོ་ན་ཊཱི་ཀ་ལས། གནས་སྦྱིན་པའི་སློབ་དཔོན་ཉིད་ནི་སྐྱ་རེངས་འཆར་བའི་དུས་ན་སློབ་དཔོན་ཉིད་དུ་གྱུར་པ་ཡིན་ནོ། །ཞེས་བཤད་ཅིང༌། འགྲེལ་ཆུང་ལས་ནི། གནས་བཅས་པའི་སྔགས་བྱས་ནས་དེའི་ནུབ་མོ་ཉིད་མཚམས་གཅིག་གི་ནང་དུ་ལྷན་ཅིག་ཏུ་གནས་ལ་ཞག་ལོན་ཏེ་སྐྱ་རེངས་བྱུང་ན་སློབ་དཔོན་དུ་འགྱུར་ཞེས་བཤད་པས་གཞུང་དེ་གཉིས་དང་འགལ་ལོ་ཞེ་ན། སྔ་མ་ནི་སྐྱ་རེངས་ཤར་བ་ལ་སྐྱ་རེངས་འཆར་བའི་སྒྲས་བརྗོད་པ་དང༌། ཕྱི་མ་ནི་སློབ་དཔོན་དུ་གྱུར་པ་ལ་སློབ་དཔོན་དུ་འགྱུར་བའི་སྒྲས་བརྗོད་པ་ཡིན་ནོ་ཞེས་མཚོ་ཊཱིཀ་ལས་སོ། །ཀློག་པ་ནི། རྩ་བར། ཚིགས་སུ་བཅད་པ་གཅིག་ཅེས་མཚོན་པ་ཙམ་སྟེ། གཞི་འགྲེལ་ལས། ཚིག་བཞི་པའི་ཚིགས་སུ་བཅད་པ་དང་དེ་ཙམ་གྱི་གཞུང་ལྷུག་པ་རྐྱང་པ་ཡན་ཆད། ཅེས་གསུངས་སོ། །རྩ་བར། ལན་གསུམ་བཟླས་ནའོ་ཞེས་པ་ལ་འགྲེལ་ཆུང་ལས། ཀློག་པའི་སློབ་དཔོན་ནི། གཉིས་ཀས་སློབ་དཔོན་དང་སློབ་མར་འདུ་ཤེས་བཞག་ལ་ཞལ་ནས་གསུངས་པའི་ཚིགས་སུ་བཅད་པ་གཅིག་ལོབས་པར་མཁན་པོས་སྨྲས་པ་ལ་སློབ་མས་བསླབས་ཏེ་ཙོག་པུར་འདུག་ལ། ལན་གསུམ་དུ་བཟླས་ན་སློབ་དཔོན་དུ་འགྱུར། ཞེས་དང༌། ཊཱི་ཀ་ལས་ཀྱང༌། ཀློག་པའི་སློབ་དཔོན་གྱིས་སྨྲས་ལ་ཟློས་པར་བྱེད་པས་རྗེས་སུ་ཟློས་པ་ནི་གཟུང་བ་ཡིན་ནོ། །ཞེས་གསུངས་སོ། ། ལན་གསུམ་བཟླས་ནའོ་ཞེས་པ་ལ། འོ་ན་ལུང་ལས། ཀློག་པའི་སློབ་དཔོན་གང་ཞེ་ན། གང་ལས་ཚིག་བཞི་པའི་ཚིགས་སུ་བཅད་པ་ཙམ་ཡང་གཟུང་བའོ། །ཞེས་གསུངས་ཀྱི་ལན་གསུམ་བཟླས་ན་ཞེས་མ་གསུངས་པ་ལ་ལན་གསུམ་བཟླས་ནའོ་ཞེས་སྨོས་པ་འགལ་ལོ་ཞེ་ན། མ་ཡིན་ཏེ་ཊཱི་ཀ་ལས། སློབ་དཔོན་གྱིས་ཇི་སྐད་མདོར་བྲིས་པའི་ཚིག་འདི་ནི་བཅོམ་བརླག་པའི་གཞུང་ལས་བྱུང་ངོ། །ཞེས་གསུངས་སོ། །གཞུང་དེ་ནི་བྱེ་བྲག་བཤད་མཚོ་ཡིན་ནོ་ཞེས་སྔ་རབས་པ་རྣམས་འཆད་ཀྱང༌། དེ་མ་ཡིན་ཏེ། ཞུ་འགྲེལ་ལས། ཀློག་པ་ནི་ཚིགས་སུ་བཅད་པ་གཅིག་ལན་གསུམ་བཟླས་པས་སོ་ཞེས་བྱ་བ་བཅོམ་བརླག་པ་ལས་བྱུང་བའི་ལུང་རྙེད་པ་བཞིན་ནོ། །ཞེས་བཤད་ཅིང༌། དེ་ལྟར་གཞི་འགྲེལ་ལས་ཀྱང་བཤད་དོ། ། དེང་སང་གི་ལུང་གཞི་ལས། ཀློག་པའི་སློབ་དཔོན་གང་ཞེ་ན། གང་ལས་ཚིག་བཞི་པའི་ཚིགས་སུ་བཅད་པ་ཙམ་ཡང་ལན་གསུམ་བཟླས་ཏེ་གཟུང་བ་ཡིན་ནོ། །ཞེས་གསུངས་སོ། །གྱི་ན་ལན་གསུམ་བཟླས་ན་ཡང་སློབ་དཔོན་དུ་འགྱུར་རམ་ཞེ་ན་ཀློག་པའི་བསམ་པ་མེད་པས་ཚིགས་སུ་བཅད་པ་ལན་གསུམ་བཟླས་པའམ་ལན་སྟོང་བརྗོད་པ་དེས་ནི་ཆོས་ཅན། ཀློག་པའི་སློབ་དཔོན་ཉིད་དུ་མི་འགྱུར་ཏེ། ཁྱད་པར་གྱི་གཞི་ཀློག་པ་ཉིད་མ་ཡིན་པའི་ཕྱིར་རོ། །འགྲེལ་ཆུང་ལས། ཀློག་པའི་སློབ་དཔོན་བྱ་བར་འདུ་ཤེས་མ་བཞག་པར་བསླབ་པ་དང་བཟླས་པ་ནི་ཇི་སྙེད་ལོབས་ཀྱང་སློབ་དཔོན་དུ་མི་འགྱུར། ཞེས་སོ། །དཔེར་ན་ཁ་ཏོན་འདོན་པ་བཞིན་ནོ། །འོ་ན་ཀློག་པ་དང་ཁ་ཏོན་དེ་གཉིས་ཀྱི་ཁྱད་པར་ཅི་ཞེ་ན། ཊཱི་ཀ་ལས། ཁ་ཏོན་ནི་བཟུང་ཟིན་པ་གོམས་པར་བྱ་བའི་བསམ་པས་ཡིན་པའི་ཕྱིར་དང༌། ཀློག་པ་ནི་མ་བཟུང་བ་འཛིན་པའི་ཚུལ་ཡིན་པའི་ཕྱིར་རོ། །ཞེས་སོ། །