རྫོགས་ཆེན་མཁན་རིན་པོ་ཆེ་པདྨ་བཛྲ་ལ་བསྟོད་པ་བློ་གསལ་རྨ་བྱ་དགའ་བའི་སྤྲིན་གྱི་གླུ་དབྱངས།
༈ རྫོགས་ཆེན་མཁན་རིན་པོ་ཆེ་པདྨ་བཛྲ་ལ་བསྟོད་པ་བློ་གསལ་རྨ་བྱ་དགའ་བའི་སྤྲིན་གྱི་གླུ་དབྱངས་ཞེས་བྱ་བ་བཞུགས།
ཀ་དག་ཆོས་སྐུའི་དགོངས་པ་མངོན་གྱུར་བའི། །ཁ་བ་ཅན་གྱི་སྐྱབས་མགོན་རྫོགས་ཆེན་པས། །ག་དར་བསྟན་པའི་བདག་པོར་མངའ་གསོལ་བ། །ང་ཡི་བླ་མ་མཁན་ཆེན་བསྔགས་པའི་ཡུལ། །ཅ་ཅོ་མ་ཡིན་ལེགས་བཤད་ཆོས་མཐུན་གསུང་། །ཆ་ལུགས་རབ་བྱུང་འཁོར་བའི་སྐྱོན་ལས་གྲོལ། །ཇ་དར་རྙེད་པ་ཚོགས་གཉིས་གོང་དུ་སྤེལ། །ཉ་ཟླ་སྤྲིན་བྲལ་མཁན་ཆེན་བསྔགས་པའི་ཡུལ། །ཏ་ཐཱ་ག་ཏའི་རྣམ་འཕྲུལ་འགྲོ་བའི་མགོན། །ཐ་མལ་བདུད་བཞིའི་གཡུལ་ལས་རྣམ་པར་རྒྱལ། །ད་ལྟའི་དུས་ཀྱི་སྟོན་པ་གཉིས་པར་གྲགས། །ནཱ་གཱརྫུ་ནའི་རྒྱལ་ཚབ་བསྔགས་པའི་ཡུལ། །པ་ར་མི་ཏའི་དགོངས་དོན་མཐའ་རུ་ཕྱིན། །ཕ་མའི་དོན་དུ་བསྙེན་སྒྲུབ་དགེ་བཅུར་བརྩོན། །བ་ལིང་ཚོགས་རྗེ་པདྨའི་བསྟན་པ་འཛིན། །མ་བཅོས་རྫོགས་ཆེན་རྣལ་འབྱོར་བསྔགས་པའི་ཡུལ། །ཙ་རི་ལ་སོགས་གནས་ཡུལ་བྱིན་ལྡན་དུ། །ཚ་གྲང་དཀའ་སྤྱད་སྒོ་གསུམ་ལྕགས་ཁམས་ལ། །ཛ་ཡའི་གསང་གསུམ་གསེར་འགྱུར་རྩི་ཡིས་ཐེབས། །ཝ་ལེར་རིག་སྟོང་མངོན་གྱུར་བསྔགས་པའི་ཡུལ། །ཞྭ་བཞིན་ཀུན་གྱིས་བཀུར་ཡང་དྲེགས་དང་བྲལ། །ཟ་ཧོར་མཁན་པོའི་རྗེས་འགྲོ་ཐུབ་པའི་བསྟན། །
འ་འུར 
་གྲགས་པ་དོན་ལྡན་བཤད་སྒྲུབ་ཀྱིས། །ཡ་མཚན་སྲིད་རྩེར་བསྒྲེངས་མཛད་བསྔགས་པའི་ཡུལ། །ར་བ་ཇི་བཞིན་ཉེས་པའི་སྤྱོད་ཀུན་སྡོམ། །ལ་ལ་མ་ཡིན་དགེ་ཆོས་མཐའ་དག་སྡུད། །ཤ་ཟ་ལྟ་བུའི་གདུལ་དཀའ་ཐབས་ཀྱིས་འདུལ། །ས་ཐོབ་སེམས་དཔའ་མཁན་ཆེན་བསྔགས་པའི་ཡུལ། །ཧ་ལ་དུག་ལྔ་སྤང་བསྒྱུར་ལམ་དུ་འཁྱེར། །ཨ་ཏིའི་དགོངས་པ་རྟོགས་ཀྱང་རྒྱུ་འབྲས་ཞིབ། །ཧ་ཧེ་བཞད་པ་ཆོས་གླུས་གཞན་སྣང་བསྒྱུར། །ཨ་ཧོ་གྲུབ་པའི་དབང་ཕྱུག་བསྔགས་པའི་ཡུལ།། སྤྲུལ་པའི་སྐུ་གཏེར་སྟོན་ལུང་རིག་གླིང་པས་སོ།།