དམ་ཆོས་དཀར་པོ་སོགས།
༈ དམ་ཆོས་དཀར་པོ་ཟངས་ཡག །ཆད་ཁུངས་བཀའ་བརྒྱུད་རིན་ཆེན་ཏེ། །ཚིག་དོན་བརྒྱུད་པ་མ་ཆད་པ། །རྩ་བའི་བླ་མ་བཀའ་དྲིན་ཅན། །རྗེ་བླ་མ་རྣམས་ལ་ཕྱག་འཚལ་བསྟོད། །ཕྱི་སྣང་བ་རྩ་ཁམས་རྟེན་འབྲེལ་འདི། །རླུང་སེམས་འདུས་པའི་གནད་དུ་གོ །འགྲོ་བའི་དོན་དུ་གནད་འདི་འབྲི། །མི་དང་མི་མ་ཡིན་གྱི་བདུད། །ཕུང་པོ་དང་ནི་ཉོན་མོངས་འཆི་བདག་བདུད། །ལྷ་ཡི་བུ་ལ་སོགས་པ་ཡི། །ཉི་ཁྲི་ཆིག་སྟོང་དྲུག་བརྒྱའམ། །བྱེ་བ་དུང་ཕྱུར་བདུད་ཀྱི་ཚོགས། །རླུང་ཉི་ཁྲི་ཆིག་སྟོང་དྲུག་བརྒྱ་ཡི། །རྩ་ཨ་ཝ་དྷཱུ་ཏིར་འགགས་ཙམ་ན། །ནང་གི་བདུད་རྣམས་བཅོམ་པ་དང༌། །ཕྱི་ཡི་བདུད་རྣམས་གཞོམ་པར་འགྱུར། །ནང་དུ་བདེ་གསལ་མི་རྟོག་སྐྱེས་ཙམ་ན། །ལུས་ངག་ཡིད་གསུམ་ཆོས་རྣམས་ལ། །སྲིད་གསུམ་མཐོང་སྣང་འཆར་བ་ཡིན། །སྐྱོན་དང་ཡོན་ཏན་སྐྱེས་གྱུར་ཀྱང༌། །ཐམས་ཅད་གྲོགས་སུ་འཆར་བ་ཡིན། །སྐུ་གསུམ་གྱི་རྟོགས་པ་སྐྱེས་ཙམ་ན། །དེ་ཡི་ཡོན་ཏན་རྫོགས་པ་ཡིན། །འབྲས་བུ་སྐུ་གསུམ་མངོན་དུ་བྱེད། །གཞན་དོན་ལྷུན་གྱིས་གྲུབ་པ་ཡིན། །འདི་སྒོམ་སྲན་ཅན་ལ་དགོས་པ་ཡིན། །ཉམས་མྱོང་ཅན་གྱིས་ཤེས་པ་ཡིན། །རྟོགས་ལྡན་རྣམས་ཀྱིས་གོ་བ་ཡིན། །མོས་གུས་ཅན་གྱིས་རྟོགས་པ་ཡིན། །ཚིག་མཁས་བློས་བྱས་ཅན་ལ་གསང་བ་ཡིན། །ཁ་ལྟ་ཐོ་ཅོ་ཅན་ལ་སྦས་པ་ཡིན། །མ་བསྒོམ་རྟེན་འབྲེལ་མཁན་ལ་ཅི་ཆ་ཡོད། །གྲུབ་ཐོབ་རྣམས་ཀྱིས་མཐོང་གྱུར་ན། །རྗེས་སུ་ཡི་རང་གད་མོ་འཆོར། །བླ་མ་མིར་མཐོང་མི་རྣམས་ལ། །ཡོན་ཏན་སྐྱེ་བ་དཀའ་བ་ཡིན། །དད་དང་བརྩོན་འགྲུས་ཤེས་རབ་ཆེ། །ཚུལ་ཁྲིམས་དམ་ཚིག་གཙང་ལྡན་ལ། །ཡོན་ཏན་ཐམས་ཅད་སྐྱེ་བ་ཡིན། །རིམ་སྐྱེས་པ་ལ་བརྩོན་འགྲུས་དགོས། །གཅིག་ཆར་བ་ལ་མོས་གུས་དགོས། །ཐེས་སུ་བླ་མ་བཟང་པོ་དགོས། །ཅི་ཕྱིར་ཞེ་ན་མཁས་པའི་ཡོན་ཏན་དེ་ལས་འབྱུང༌། །ལར་ཆོས་ཟབ་མོ་གསུངས་ལ་ཕན་ཅི་ཡོད། །ཐང་སྟོང་པ་ལ་གསུངས་པ་སུ་ལ་ཕན། །རི་དང་བྲག་ལ་གསུངས་པ་སུ་ཡིས་གོ །འོན་ཀྱང་གཞི་བདག་མི་མ་ཡིན་རྣམས་ཡོད། །གདུལ་བྱར་གྱུར་པའི་ལས་འབྲས་བཞག །ཐམས་ཅད་སངས་རྒྱས་ཐོབ་པའི་སྨོན་ལམ་གདབ། །ཚིགས་བཅད་ལྷུག་གཉིས་སུ་སྡེབས་པ་ཡི། །རྟེན་འབྲེལ་གནད་ཀྱི་ཟབ་ཆོས་འདི། །དགེ་མི་དགེ་ཁ་དཀར་ནག་གི་ཤན་མདངས་ཕྱེད་པ་ཡིན། །དམ་ཆོས་དཀར་པོ་ཟངས་ཡག་འདི། །ཟླ་དཀར་ནག་གཉིས་ཀྱི་ཕུ་ན་གསུངས། འཁོར་འདས་གཉིས་མེད་ཟུང་འཇུག་ཆེན་པོ་འདི། འགྲོ་ལ་ཕན་ཕྱིར་ཏི་ཤྲི་རས་པས་ཡི་གེར་བཀོད་པའོ། །རྫོགས་སོ།།