འཁོར་བའི་སྡུག་བསྔལ་བསམ་པ།
འཁོར་བའི་སྡུག་བསྔལ་བསམ་པ།
གསུམ་པ་འཁོར་བའི་སྡུག་བསྔལ་བསམ་པ་ལ། ངན་སོང་གི་སྡུག་བསྔལ་བསམ་པ་དང༌། མཐོ་རིས་ཀྱི་སྡུག་བསྔལ་བསམ་པ་དང༌། འཁོར་བ་སྤྱིའི་སྡུག་བསྔལ་བསམ་པ་དང་གསུམ་ལས།དང་པོ་ནི། འཁོར་བ་འདི་མཐོ་དམན་གང་དུ་སྐྱེས་ཀྱང་སྡུག་བསྔལ་གྱི་རང་བཞིན་མ་ཡིན་པ་ཅུང་ཟད་ཀྱང་མེད་ལ། དེའི་ནང་ནས་ངན་སོང་གསུམ་གྱི་སྡུག་བསྔལ་ནི་བཟོད་དཀའ་བ་ཡིན་པ་དང་སྐྱེས་བུ་ཆུང་ངུས་ཀྱང་ཤེས་དགོས་པས་ཐོག་མར་ངན་སོང་གི་སྡུག་བསྔལ་བསམ་པ་ལ། དམྱལ་བའི་སྡུག་བསྔལ་བསམ་པ། ཡི་དྭགས་ཀྱི་སྡུག་བསྔལ་བསམ་པ། དུད་འགྲོའི་སྡུག་བསྔལ་བསམ་པ་གསུམ་ལས། དང་པོ་ནི། ཚ་བའི་དམྱལ་བ་བརྒྱད་ཀྱི་སྡོམ། ཡང་སོས་ཐིག་ནག་བསྡུས་འཇོམས་དང༌། །ངུ་འབོད་ངུ་འབོད་ཆེན་པོ་དང༌། །ཚ་བ་རབ་ཚ་མནར་མེད་པའོ། །ཞེས་གསུངས་པ་ལྟར་ཚ་དམྱལ་བརྒྱད་ནི་འཛམ་བུ་གླིང་གི་ལྷོ་ངོས་ཀྱི་ས་འོག་ཏུ་སྟེང་འོག་རིམ་པ་བརྒྱད་དུ་ཆགས་ཏེ་ས་གཞི་དང་རི་ཐང་ཐམས་ཅད་ལྕགས་སྲེག་ལས་གྲུབ་པ་མེ་ལྕེ་ཁྲུ་གང་བ་དུས་རྟག་པར་འབར་བས་ལུས་ཀྱི་ཕྱི་ནང་ཐམས་ཅད་བསྲེག་པ་སྐད་ཅིག་ཀྱང་རྒྱུན་ཆད་དུ་མེད་པ་དང༌། དམྱལ་སྲུང་རྣམས་ཀྱིས་ལྕགས་ཞུན་དང་ཟངས་ཞུན་ཁོལ་མ་ཁར་བླུགས་པས་ནང་ཁྲོལ་ཐམས་ཅད་ཚིག་ཅིང་མེ་འབར་བ་དང༌། ཟངས་ཞུན་ཁོལ་མའི་ནང་དུ་འཚེད་པ་དང༌། ལྕགས་ཀྱི་ཐོ་བ་ཆེན་པོའི་གཏུན་དུ་བརྡུངས་ནས་ཕྱེ་མར་འཐག་པ་དང༌། སྟྭ་རེ་དང་སྟྭེའུ་ལ་སོགས་པས་ཀྱང་རྒྱུན་མི་ཆད་པར་གཤག་ཅིང་གཏུབ་པ་དང༌། དེ་ལ་སོགས་པའི་སྟེང་དུ་ནད་རིགས་བཞི་བརྒྱ་རྩ་བཞིས་དུས་གཅིག་ཏུ་གཟིར་པ་ལ་སོགས་པ་སྡུག་བསྔལ་དཔག་ཏུ་མེད་པ་དུས་གཅིག་ཏུ་མྱོང་དགོས་པ་སོགས་མི་བཟད་པའི་སྡུག་བསྔལ་ལ་གྲངས་ཀྱི་མཐའ་མེད། དམྱལ་བའི་སེམས་ཅན་ནི་ལས་ཀྱི་དབང་གི་སྡུག་བསྔལ་ཅི་ཙམ་ཆེ་བ་བཞིན་སྡུག་བསྔལ་མྱོང་བའི་རིག་པ་ཇེ་གསལ་དུ་འགྲོ་ཞིང༌། བཟོད་སྲན་ཤིན་ཏུ་ཆུང་བ་ཡིན་པས་སྡུག་བསྔལ་ཤིན་ཏུ་ཆེ་ཞིང་ཅུང་ཟད་ཀྱང་བཟོད་མི་ཐུབ་བཞིན་དུ་དམྱལ་བ་ཡང་སོས་པ་རྣམས། མི་ལོ་ལྔ་བཅུ་ལ་རྒྱལ་ཆེན་རིགས་བཞི་པའི་ཞག་གཅིག་ཏུ་བརྩིས་པའི་དེའི་རང་ལོ་ལྔ་བརྒྱ་ཡང་སོས་པའི་ཞག་གཅིག་ཏུ་བྱས་པའི་རང་ལོ་ལྔ་བརྒྱའི་བར་དུ་གནས་པ་དང༌། ཐིག་ནག་དང༌། བསྡུས་འཇོམས། ངུ་འབོད། དུ་འབོད་ཆེན་པོ། ཚ་བ་དང་ལྔ་ནི་རང་རང་གི་སྔ་མ་སྔ་མའི་ལོ་གྲངས་བརྒྱད་འགྱུར་བརྒྱད་འགྱུར་དང༌། རབ་ཏུ་ཚ་བ་དང་མནར་མེད་པ་གཉིས་ནི་ལོ་གྲངས་ཀྱིས་གཞལ་དུ་མེད་པས་ཚ་བ་བར་བསྐལ་ཕྱེད་དང༌། མནར་མེད་པ་བར་བསྐལ་གཅིག་ཏུ་གནས་དགོས་ཏེ། མངོན་པ་མཛོད་ལས། མི་རྣམས་ཀྱི་ལོ་ལྔ་བཅུ་ལ། །འདོད་པ་དག་གི་ལྷ་རྣམས་ལས། །འོག་མ་དག་གི་ཉིན་ཞག་གཅིག །དེས་ན་ཚེ་ལོ་ལྔ་བརྒྱའོ། །གོང་མ་གཉིས་ཀ་ཉིས་འགྱུར་རོ། །ཞེས་དང༌། ཡང་སོས་ལ་སོགས་དྲུག་རིམ་བཞིན། །འདོད་ལྷའི་ཚེ་དང་ཉིན་ཞག་མཉམ། །ཞེས་གསུངས་སོ། །འཇུག་སྡོམ་སྟེ་བསམ་པ་ནི། དེ་ལྟར་སྡུག་བསྔལ་དོས་ནི་དྲག་ཡུན་ནི་རིང༌། ད་ལྟ་མེ་ཕྲ་མོ་གཅིག་ལ་སོར་མོའི་རྩེ་མོ་ཙམ་ཡང་ཡུད་ཙམ་རེ་ཡང་འཇོག་ཏུ་མི་བཏུབ་ན་ནམ་ཞིག་དེ་ལྟ་བུ་རང་གི་ཐོག་ཏུ་བབས་ན། བཟོད་པའི་གོ་སྐབས་ཅུང་ཟད་ཀྱང་མི་འདུག་སྟེ། ལན་གཅིག་དེར་སྐྱེས་ཟིན་ནས་ཟློག་པའི་ཐབས་མེད། ད་ལྟ་ཟློག་པའི་ཐབས་ཡོད་དེ་དེར་སྐྱེ་བའི་རྒྱུ་ལས་ངན་སྡིག་པ་དག་སྦྱངས་ན་ཟློག་པའི་ཐབས་དེ་ཁོ་ན་ཡིན། དེར་མི་སྐྱེ་བའི་ཕྱིར་ཆོས་ལ་འབད་དགོས་སྙམ་དུ་བསམ་མོ། །གྲང་དམྱལ་གྱི་སྡུག་བསྔལ་བསམ་པར་བྱ་སྟེ། གྲང་དམྱལ་བརྒྱད་ཀྱི་སྡོམ་ནི། ཆུ་བུར་ཆུ་བུར་རྡོལ་བ་ཅན། །ཨ་ཆུ་ཀྱི་ཧུད་སོ་ཐམ་པ། །ཨུཏྤལ་པདྨ་པད་ཆེར་གས། །ཞེས་སོ། །གྲང་དམྱལ་བརྒྱད་ནི། འཛམ་བུའི་གླིང་གི་བྱང་ངོས་ཀྱི་ས་འོག་ཏུ་སྟེང་འོག་རིམ་པ་བརྒྱད་དུ་ཆགས་ཏེ། །ཐམས་ཅད་འདྲ་བར་ས་གཞི་དང་རི་ཐང་ཐམས་ཅད་ཆེས་གྲང་བའི་ཆབ་རོམ་ཤིན་ཏུ་གཏིང་འཐུགས་པ་ལས་གྲུབ་པ། ཤ་རུས་ཀྱི་གཏིང་དུ་ཞེན་པའི་རླུང་རྒྱུ་བ་དང་ཁ་བ་བུ་ཡུག་འཚུབ་པ་རྒྱུན་མི་ཆད་པ། ཉི་ཟླའི་འོད་མེད་ཅིང་མུན་ནག་འཐིབ་པའྀ་གནས། ལྷག་སྐྱོབ་སྤོས་མེ་ཙམ་དང་གོས་ལྷན་པ་ཙམ་ཡང་མེད་པའི་གནས་སུ་དམྱལ་བའི་སེམས་ཅན་རྣམས་ལུས་གཅེར་བུར་སྐྱེས་ཏེ། གྲང་བས་ཤིན་ཏུ་གདུང་བས་ལུས་ཐམས་ཅད་ཆུ་བུར་གྱིས་ཁྱབ་པ་དང༌། གྲང་ཆེས་པས་སོ་འཐམ་པ་དང༌། ལུས་ཐམས་ཅད་གྲང་བས་གདུང་བས་ཚལ་པ་མང་དུ་གས་པ་དང༌། ནང་རོལ་ཐམས་ཅད་ཆབ་རོམ་དུ་གྱུར་ཏེ། ལུས་གས་པའི་ནང་ནས་ཕྱིར་ཏོན་པ་དང༌། ལུས་ཐམས་ཅད་གས་པའི་རྨ་ནང་ནས་སྲིན་བུ་མཆུ་རྣོན་པོ་མང་དུ་བྱུང་བས་ཟ་བ་དང༌། ནད་ཀྱི་རིགས་སྣ་ཚོགས་ཀྱིས་དུས་གཅིག་ཏུ་བཏབ་པ་སོགས་སྡུག་བསྔལ་དཔག་ཏུ་མེད་པ་མྱོང་ཞིང་སྐད་ཅིག་ཀྱང་བཟོད་མི་ཐུབ་བཞིན་དུ། ཆུ་བུར་ཅན་ཁལ་བརྒྱད་ཅུ་ཤོང་བའི་སྣོད་ནི་ཏིལ་སྦྱངས་གཅིག་སྟེ། ཏིལ་སྦྱངས་གཅིག་ཏིལ་གྱིས་ཕྱུར་བུར་བཀང་ནས་ལོ་བརྒྱ་རེ་ན་ཏིལ་རེ་བྱུང་ནས་ཏིལ་ཐམས་ཅད་ཟད་པའི་བར་དང༌། དམྱལ་བ་ཆུ་བུར་རྡོལ་བ་དང༌། སོ་འཐམ་པ་དང༌། ཨ་ཅུ་ཟེར་བ་དང༌། ཀྱེ་ཧུད་ཟེར་བར་དང༌། ཨུཏྤལ་ལྟར་གས་པ་དང༌། པདྨ་ལྟར་གས་པ་དང༌། པདྨ་ལྟར་ཆེར་གས་པ་རྣམས་ནི་རིམ་པ་བཞིན་དུ་རང་རང་གི་དམྱལ་བ་སྔ་མ་སྔ་མ་ལས་ཚེ་ཚད་ཉི་ཤུ་ཉི་ཤུའི་འགྱུར་གྱི་བར་དུ་གནས་དགོས་ཏེ། བླང་དོར་རབ་གསལ་ལས། །ཏིལ་ཁལ་བརྒྱད་བཅུས་གང་བའི་བང་བ་ན། །ལོ་བརྒྱ་རེ་ན་ཏིལ་རེ་བྱུང་བ་ཡིས། །ཟད་པར་གྱུར་པ་ཆུ་བུར་ཅན་གྱི་ཚེ། །འོག་མ་འོག་མ་ཉི་ཤུ་འགྱུར་དུ་གསུངས། །ཞེས་གསུངས་པས་སོ། །ཉེ་འཁོར་གྱི་དམྱལ་བའི་སྡུག་བསྔལ་བསམ་པ་འདི་ནི་མངོན་པ་ལས། བརྒྱད་པོ་ཀུན་ལས་ལྷག་བཅུ་དྲུག །དེ་དག་གི་ནི་ངོས་བཞི་ན། །མེ་མ་མུར་དང་རོ་མྱགས་དང༌། །སྤུ་གྲི་ལམ་སོགས་ཆུ་བོ་ཡིན། །ཞེས་བྱུང༌། དེ་ཡང་དམྱལ་བའི་དངོས་གཞི་ཚ་དམྱལ་བརྒྱད་པོ་རེ་རེ་ལ་ཡང་སོ་སོའི་ཕྱོགས་བཞི་པོ་རྣམས་སུ་ཉེ་འཁོར་བ་བཞི་པོ་འདི་རྣམས་ཆ་ཚང་བ་རེ་རེ་ཡོད་པ་ཡིན། ཚ་དམྱལ་གྱི་ཉེ་འཁོར་ན་མེ་མ་མུར་གྱི་འོབས་ཞེས་པ་འོབས་ཆེན་པོ་མདག་མེ་རབ་ཏུ་ཚ་བས་ནང་ཐམས་ཅད་ཁྱབ་པའི་ནང་དུ་ལུས་ཀྱི་ཤ་རུས་ཐམས་ཅད་བསྲེག་པ་དང༌། རོ་མྱགས་ཀྱི་འདམ་ཞེས་པ་རོ་རུལ་བ་སོགས་མི་གཙང་བ་རྩོག་དགུས་གང་བའི་འོབས་ཆེན་པོའི་ནང་དུ་ཚུད་ནས་མི་གཙང་བའི་དྲི་ངས་སྙིང་དང་མགོ་འགས་པ་དང༌། དེའི་ནང་ནས་སྲིན་བུ་ལྕགས་ཀྱི་མཆུ་ཅན་མང་དུ་བྱུང་བས་ལུས་འབིག་ཅིང་ནང་རོལ་ཐམས་ཅད་འབྱིན་པ་དང༌། སྤུ་གྲིའི་ཐང་ཞེས་པ་ས་གཞི་ཐམས་ཅད་རལ་གྲི་རྣོན་པོ་སོར་བཞི་པས་བར་མཚམས་མེད་པར་གཏམས་པས་རྐང་པ་གཡས་བཏེགས་ན་གཡོན་པ་གཅོད། གཡོན་པ་བཏེགས་ན་གཡོན་པ་སོས་ཤིང་གཡས་པ་གཅོད། རེས་འགྱེལ་ནས་ལུས་ཐམས་ཅད་གཅོད་པ་དང༌། རལ་གྲི་ལོ་མའི་ནགས་ཚལ་ཞེས་པ་ཡལ་ག་ཐམས་ཅད་རལ་གྲི་རྣོན་པོ་ཅན་གྱི་ནགས་ཚལ་རྒྱ་ཆེན་པོས་ཁྱབ་པའི་གནས་སུ་ནགས་ཚལ་རླུང་གིས་བསྐྱོད་པའི་རལ་གྲིའི་ཡལ་ག་རྣམས་ཆད་པའི་རལ་གྲི་རྣོན་པོའི་ཆར་བབ་པས་ལུས་ཐམས་ཅད་དུམ་བུ་སྟོང་དུ་གཏུབ་པ་དང༌། ཤལ་མ་ལིའི་སྡོང་པོ་ཞེས་པ་ངོས་ཐམས་ཅད་ལྕགས་ཀྱི་ཚེར་མ་ཤིན་ཏུ་རྣོན་པོ་དུ་མས་གང་བའི་སྡོང་པོ་མང་དུ་སྐྱེས་པའི་གནས་སུ་དམྱལ་བའི་སེམས་ཅན་རྣམས་ཁྱི་སྲེ་བོ་འཇིགས་སུ་རུང་བ་ལ་སོགས་པས་བདས་ཏེ་ཤིང་ལ་འཛེགས་པ་ན་ཚེར་མ་ཐམས་ཅད་ཁ་ཐུར་དུ་བལྟས་པས་ཕུགས་ཤིང་གཤག་བཞིན། ཤིང་གི་རྩེར་སླེབ་ཚེ། ཁྭ་ཏ་སོགས་བྱ་གདུག་པ་ཅན་རྣམས་ཀྱིས་མིག་འབྲིད་ཅིང་ཀླད་པ་ཟ་བར་བྱེད། ཡང་མར་འབྲོས་པ་ན་ཚེར་མ་རྣམས་ཁ་གྱེན་དུ་བལྟས་པས་སྔར་ལྟར་ལུས་ཐམས་ཅད་འབིག་བཞིན་ཤིང་གི་རྩ་བར་ཕྱིན་པ་དང༌། ཡང་ཤིང་ལ་འཛེགས་པ་སོགས་འཁོར་མོར་བྱེད་པའོ། །གསུམ་པོ་དེ་མཚོན་ཆའི་གནོད་པ་ཡིན་པས་གཅིག་ཏུ་སྡོམས་སོ། །ཐལ་ཚན་གྱི་ཆུ་བོ་ཞེས་པ་ནང་ཐམས་ཅད་ཐལ་ཚན་གྱིས་གང་བའི་ཆུ་བོའི་ནང་དུ་བྱིང་ནས་ལུས་ཀྱི་ཤ་ལྤགས་ཐམས་ཅད་ཚིག་ནས་རུས་གོང་དཀར་པོར་གྱུར་པ་ན་སྟེང་དུ་ཕྱིན། དེ་མ་ཐག་ཤ་ལྤགས་ཐམས་ཅད་སླར་འཚོ་བ། ཡང་ནུབ་ནས་ཚིག་པ་སོགས་སྡུག་བསྔལ་དཔག་ཏུ་མེད་པ་ཡོད་དོ། །དམྱལ་པ་ཉི་ཚེ་བ་ནི། ཚ་དམྱལ་དང་གྲང་དམྱལ་གྱི་མཐའ་བསྐོར་དང༌། རྒྱ་མཚོའི་འགྲམ་དང་རི་བྲག་ས་སྟེང་ཁང་ཁྱིམ་སོགས་གནས་ངེས་མེད་དུ་གནས་ཏེ། མཚན་མོར་ལྷའི་བདེ་བ་ལྟ་བུ་མྱོང་ནས་ཉིན་མོ་ཁྲོ་ཆུ་ཁོལ་མ་འཐུང་བའི་སྡུག་བསྔལ་དང༌། དེ་ལས་ལྡོག་པ་དང༌། ཀ་བའི་ནང་དུ་ཀ་བ་ལྟ་བུའི་ལུས་བླངས་ནས་ཁང་བའི་འགེབ་ཐམས་ཅད་རང་གི་ལུས་ཀྱིས་མི་ཐེག་པའི་སྡུག་བསྔལ་དང༌། དེ་བཞིན་དུ་ཕྱག་མ་དང༌། ཐག་པ་དང༌། གྲལ་གདན་དང༌། གཏུན་དང༌།མེ་ཐབ་ལྟ་བུ་ལ་སོགས་པ་འདི་མེད་བསམ་པ་མེད་པར་གསུངས་སོ། །