གཉིས་པ་མཚན་ནས་སྨོས་པའི་རིམ་པ།

གཉིས་པ་མཚན་ནས་སྨོས་པའི་རིམ་པ་ནི།

རྩ་བར། ཉེ་བར་མི་བརྗོད་དེ་ཞེས་པའི་ཊཱི་ཀ་ལས་ཉེ་བར་ཞེས་པའི་སྒྲ་ནི་ཁད་ཉེ་བའི་ཚིག་ཡིན་པའི་ཕྱིར་ཞེས་བཤད་པས་ཉེ་ཚིག་གཞན་དུ་མི་བརྗོད་དོ། །ཞེས་དང༌། འགྲེལ་ཆུང་ལས། མཁན་པོ་དང༌། སློབ་དཔོན་ལ། བཙུན་པའམ་བླ་མ་ཞེས་པ་ལ་སོགས་པ་བླ་དྭགས་གཞན་དུ་མི་འབོད་མཁན་པོ་དང་སློབ་དཔོན་ནང་ཡང་ནོར་ཏེ་མི་འབོད་ཅེས་བཤད་དོ། །རྩ་བར། གཞན་ལ་མི་བྱའོ། །ཞེས་རང་གི་མཁན་སློབ་ལས་གཞན་ལ་མཁན་སློབ་ཅེས་བརྗོད་པར་མི་བྱའོ། །རྩ་བར། དོན་གྱི་སླད་དུ་མཚན་ནས་སྨོས་ཏེ་ཞེས་བྱ་བ་དང་བཅས་པར་མ་སྨྲས་པར་མཁན་པོའི་མིང་མི་བཟུང་ངོ། །ཞེས་པ་ནི་མཁན་པོའི་མཚན་བློ་ལ་མི་བཟུང་བ་མ་ཡིན་གྱི་ཉེ་བའི་ཚིག་དང་མ་འབྲེལ་བར་ངག་ཏུ་མི་བརྗོད་པ་སྟེ། འགྲེལ་ཆུང་ལས། མཁན་པོའི་མཚན་ནས་མི་སྨོས། ཞེས་དང༌། འོད་ལྡན་ལས། ཉེ་བའི་ཚིག་བྱས་ཏེ་འདུད་པ་དང་བཅས་བཞིན་དུ་མཁན་པོའི་མིང་བརྗོད་པར་བྱའི་གཞན་དུ་མ་ཡིན་ནོ། །ཞེས་གསུངས་སོ། །རྩ་བར། དགེ་ཚུལ་ཉིད་དུ་ཉེ་བར་སྒྲུབ་པའི་ཆོ་གའོ། །ཞེས་པ་ཡན་གྱིས་དགེ་ཚུལ་དུ་སྒྲུབ་པའི་ཆོ་ག་བཤད་ཟིན་ཏོ། །

གསུམ་པ་དགེ་སློང་གི་སྡོམ་པའི་ཆོ་ག་བསྟན་པ་ལ།

དགེ་སློང་ཉིད་དུ་ཉེ་བར་སྒྲུབ་པར་བྱེད་པའི་ཆོ་ག་ནི། རྩ་བར། དགེ་འདུན་ལས་བསྙེན་པར་རྫོགས་པར་བྱའོ། །ཞེས་པ་ལ་སོགས་པས་བསྟན་ཏོ། །འདིའི་དོན་ལ་ལྔ་ལས། དང་པོ་དགོས་པའི་དོན་ནི། དགེ་སློང་གི་སྡོམ་པ་འཐོབ་ཅིང་བསྲུངས་པས་གནས་སྐབས་དང་མཐར་ཐུག་གི་ཕན་ཡོན་འཐོབ་པའོ། །

གཉིས་པ་ཡུལ་གང་ལ་ནོད་པ་ནི།

མཁན་པོ་དང༌། གསང་སྟེ་སྟོན་པ་དང་ལས་བྱེད་པའི་སློབ་དཔོན་གཉིས་དང༌། དད་པའི་དགེ་འདུན་མཚན་ཉིད་དང་ལྡན་པ་ལའོ། །ལུང་གཞི་དང་ཀརྨ་ཤ་ཏཾ་ལས། མཁན་པོས་དེའི་ལྷུང་བཟེད་དང་ཆོས་གོས་དག་བཙལ་བར་བྱ་ཞིང༌། ལས་བྱེད་པའི་དགེ་སློང་དང་གསང་སྟེ་སྟོན་པའི་དགེ་སློང་ལ་ཡང་གསོལ་བ་གདབ་པར་བྱ། གང་དག་དེའི་ལས་ཀྱི་གནས་སུ་འཇུག་པར་འགྱུར་བའི་དགེ་སློང་དག་ལ་ཡང་གསོལ་བ་གདབ་པར་བྱའོ། །དགེ་སློང་གང་དག་དེའི་ལས་ཀྱི་གནས་སུ་འཇུག་པར་འགྱུར་བ་དེ་དག་གིས་ཀྱང་དེར་འདུ་བར་འགྱུར་བའི་ཚེ་ཟླ་བ་ཕྱེད་འདས་པའི་ཉེས་པ་ཕྱིར་བཅོས་ཏེ་འདུག་པར་བྱའོ་ཞེས་དགེ་འདུན་རྣམས་ལས་ཀྱི་གནས་སུ་འཇུག་པའི་སྔ་རོལ་ཏུ་ལས་བྱེད་པ་དང་གསང་སྟེ་སྟོན་པའི་དགེ་སློང་ལ་གསོལ་བ་གདབ་པར་གསུངས་པ་དང༌། ལུང་ཕྲན་ཚེགས་ཀྱི་དགེ་སློང་མའི་སྐབས་ལས། མཁན་མོས་གསང་སྟེ་སྟོན་པ་དང་ལས་བྱེད་པའི་དགེ་སློང་མ་ལ་གསོལ་བ་གདབ་པར་བྱ། དེའི་འོག་ཏུ་དགེ་སློང་མའི་དགེ་འདུན་མ་རྣམས་འདུས་ཤིང༌། ཞེས་གསུངས་པ་དང༌། བསྙེན་པར་རྫོགས་པར་འདོད་པ་ཤིང་ལ་འཛེག་ཏུ་མི་གཞུག་གོ་ཞེས་པའི་ལུང་ཕྲན་ཚེགས་ཀྱི་བྱུང་བ་ལྟར་ཡིན་ནོ། །དེས་ན་འདི་ནི་དགེ་འདུན་རྣམས་ཚོགས་པ་ན་གསོལ་བ་གདབ་པ་མིན་གྱི་དེའི་སྔ་རོལ་ཏུ་གསོལ་བ་གདབ་པའོ་ཞེས་རྒྱ་འདུལ་འཛིན་ལ་སོགས་པ་རྣམས་གསུངས་ལ་དེ་ལེགས་སོ། །དེང་སང་ཚོགས་སུ་གསོལ་བ་འདེབས་པ་ནི་ཚེགས་ཆུང་བའི་ཕྱིར་སླ་ཆོས་བྱས་པའོ། །གསང་སྟེ་སྟོན་པའི་དགེ་སློང་ཞེས་སྨོས་ཀྱང་ལས་བྱེད་པ་ལ་དགེ་སློང་ཞེས་མ་སྨོས་པ་ནི། རང་གི་རྣམ་བཤད་དང་ཊཱི་ཀ་ལས། ལས་བྱེད་པ་ལས་ཀྱི་ཆོ་ག་ཡོངས་སུ་རྫོགས་པས་དགེ་སློང་ཉིད་ཡིན་པར་གྲུབ་པའི་ཕྱིར་རོ། །ཞེས་གསུངས་སོ། །གསང་སྟེ་སྟོན་པ་ནི་ལས་ཀྱི་ཆོ་གས་བསྐོ་བ་ཡིན་ལ་དེ་ལ་ཆོ་ག་རྗེས་སུ་བསྒྲག་པའི་སྒོ་ནས་བསྙེན་པར་མ་རྫོགས་པ་བསྐོས་པས་ཀྱང་འགྲུབ་བམ་སྙམ་དུ་དོགས་པ་བསལ་བའི་ཕྱིར་དགེ་སློང་ཞེས་སྨོས་སོ། །དགེ་ཚུལ་གྱི་མཁན་པོ་ཡིན་ཡང་བསྙེན་པར་རྫོགས་པར་བྱེད་པའི་མཁན་པོར་གསོལ་ཏེ། འགྲེལ་ཆུང་ལས། ལས་ཐ་དད་པའི་ཕྱིར་ཞེས་བཤད་དེ། བྱ་བ་ཐ་དད་པའི་ཕྱིར། ཞེས་པའོ། །མཁན་པོ་དེ་མཁན་པོ་རང་གིས་ཞེས་སྨོས་ཅི་དགོས་ཞེ་ན། ཊཱི་ཀ་ལས། རང་གིས་ཞེས་སྨོས་པ་ནི་བཅོལ་བའི་ཆོ་ག་སྤང་བའི་ཕྱིར་ཞེས་ཏེ། གཙུག་ཕུད་འདྲེག་པ་དང་མཚན་བརྟག་པ་ལ་སོགས་པ་གཞན་ལ་བཅོལ་བས་འགྲུབ་པ་ལྟར་ཆོས་གོས་བྱིན་གྱིས་བརླབ་པ་འདི་ཡང་གཞན་ལ་བཅོལ་བས་འགྲུབ་བམ་སྙམ་པའི་དོགས་པ་བསལ་བའི་ཕྱིར་རོ། ། མཁན་པོ་དང་སློབ་དཔོན་དེ་དག་མེད་ན་སྐྱེ་མི་སྐྱེ་ནི། མཁན་པོ་དང་གསང་སྟེ་སྟོན་པ་མེད་ཀྱང་རྒྱུ་གཞན་ཚང་ན་སྡོམ་པ་སྐྱེ་སྟེ། རྩ་བར། མཁན་པོ་མེད་པ་ཉིད་ལ་ཡང་ངོ༌། །ཞེས་དང༌། བར་ཆད་མ་དྲིས་པར་ཡང་ངོ༌། །ཞེས་གསུངས་པས་གྲུབ་བོ། །ལས་སློབ་དང་དགེ་འདུན་མཚན་ཉིད་དང་ལྡན་པ་མེད་ན་ལས་ཀྱི་ཆོ་ག་ལ་བརྟེན་པའི་དགེ་སློང་གི་སྡོམ་པ་མི་སྐྱེ་སྟེ། མཚོ་ཊཱིཀ་༨༩ལས། ལས་ཀྱི་སློབ་དཔོན་མེད་དམ་དགེ་འདུན་བཞི་ཡན་ཆད་དུ་ལོངས་པ་དེ་མེད་ན་ནི་ཚུར་ཤོག་ལ་སོགས་པའི་དགེ་སློང་གི་སྡོམ་པ་སྐྱེ་ཡང༌། ལས་ཀྱི་ཆོ་ག་ལ་བརྟེན་པའི་དགེ་སློང་གི་སྡོམ་པ་མི་སྐྱེ་སྟེ། ཆོ་ག་གསོལ་བཞིའི་ལས་ཀྱི་བྱེད་པ་པོ་མེད་པའི་ཕྱིར་རོ། །དགེ་འདུན་གྱི་མཚན་ཉིད་ནི་གྲངས་ཚང་བ་དང༌། ལས་ཀྱི་ཁ་སྐོང་བར་འོས་པ་དང༌། མི་མཐུན་པ་གཉིས་ཀྱིས་མི་མཐུན་པ་མེད་པ་སྟེ། ཕྱི་མ་གཉིས་ནི་རྒྱས་པར་ལས་གཞིར་སྟོན་ལ། གྲངས་ཚང་བ་ནི་ཡུལ་དབུས་སུ་དགེ་སློང་བཅུ་དང༌། མཐའ་འཁོབ་ཏུ་བཅུ་བཙལ་དུ་མེད་ན་ལས་ཀྱི་སློབ་དཔོན་དང༌། ལྔའི་གྲངས་ཚང་བའོ། །དེ་དག་མ་ཚང་ཡང་དགེ་སློང་བཞིར་ཚང་ན་ལུང་ཞུ་བ་ལས། བཙུན་པ་བཅུ་ཡང་མཆིས་ལ་མཆིས་བཞིན་དུ་འདུལ་བ་འཛིན་པ་དང་བཞིས་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པ་ལི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི་འདས་པ་དང་བཅས་པའོ། །ཞེས་དང༌། ཞུ་བ་ལས། བཙུན་པ་ལས་བགྱིད་པ་ཁྱིམ་པས་བསྙེན་པར་རྫོགས་པར་བགྱིད་ན་བསྙེན་པར་རྫོགས་པ་ཞེས་བགྱིད་འམ། །ཨུ་པ་ལི་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ཀྱང་འདས་པ་དང་བཅས་པའོ། །དེ་བཞིན་དུ་མ་ནིང་དང་དགེ་སློང་མ་སུན་ཕྱུང་བ་དང༌། ཕ་དང་མ་དང་དགྲ་བཅོམ་བསད་པ་དང༌། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང་མུ་སྟེགས་ཅན་དང་མུ་སྟེགས་ཅན་དུ་སོང་བ་དང༌། རྐུ་ཐབས་སུ་གནས་པ་དང༌། མི་གནས་པ་དང༌། སོ་སོར་གནས་པ་དང༌། སྔར་ཉེས་པ་ཕྱུང་བ་དང༌། སྔར་འཁྲུགས་པ་ལས་བསྙེན་པར་རྫོགས་པར་བགྱིད་ན་བསྙེན་པར་རྫོགས་པ་ཞེས་བགྱིའམ། ཨུ་པ་ལི་བསྙེན་པར་མ་རྫོགས་པ་ཞེས་བྱ་སྟེ། ཞེས་གསུངས་པའི་ཕྱིར་ཟེར་ན། འདོད་མི་རིགས་པར་ཐལ། ལས་སློབ་མཚན་ཉིད་པ་མེད་ཀྱང་དམིགས་བསལ་དུ་སྐྱེ་བ་ཡོད་པའི་ཕྱིར། དེར་ཐལ། མཚོ་ཊཱིཀ་༩༥༡ལས། མཁན་པོ་དང་ལས་བྱེད་པ་ལ་སོགས་པ་རྣམས་དོན་ལ་མཚན་ཉིད་དང་ལྡན་རུང་མི་ལྡན་རུང་སྟེ། མཚན་ཉིད་དང་ལྡན་པར་འདུ་ཤེས་ན་འདུ་ཤེས་ཀྱི་ཆ་ནས་ལས་འཆགས་ཏེ། མཁན་པོ་ཚུལ་ཁྲིམས་འཆལ་བ་ལ་ལྡན་པར་ཤེས་ན་བསྙེན་པར་རྫོགས་ཞེས་པ་དང༌། འོད་ལྡན་ལས། འདི་ཙམ་ཞིག་ལས་བྱེད་པ་ལ་རྗེས་སུ་སྦྱར་བར་བྱའོ། །ཞེས་གསུངས་པ་དང༌། དེ་དགེ་འདུན་ལ་ཡང་སྦྱར་ཏེ། དཔྱད་པ་ཐ་སྙད་པ་ཡིན་པར་རྒྱུ་མཚན་མཚུངས་པའི་ཕྱིར་རོ། །ཞེས་སོགས་གསུངས་པའི་ཕྱིར་ཟེར་ན་སྤྱི་བཏང་དང་དམིགས་བསལ་ཀྱི་ཁྱད་ཡོད་དམ་དཔྱད་པར་བྱའོ། །འཇམ་དབྱངས་བཞད་པས། མཁན་པོ་དང་གསང་སྟོན་མེད་པ་དང་མཁན་པོ་སྡོམ་མེད་ཁྱིམ་པས་བྱས་ཀྱང་བསྒྲུབ་བྱས་དགེ་སློང་གི་འདུ་ཤེས་ཡོད་ན་ཉེས་བཅས་ཐོབ་པ་ཡོད་ཀྱང་ལས་སློབ་དང་དགེ་འདུན་མཚན་ཉིད་པ་མེད་ན་སྡོམ་པ་ཙམ་ཡང་མི་སྐྱེ་བར་གསུངས་སོ། །ཡང་ད་ལྟར་གྱི་ཆོ་གའི་སྐབས་སུ་ཡུལ་དགེ་འདུན་ལས་བསྙེན་པར་རྫོགས་པར་བྱ་ཡི། དགེ་ཚུལ་ལྟར་གང་ཟག་ལས་བླང་བ་ནི་མ་ཡིན་ནོ། །ཊཱི་ཀ་ལས། དགེ་འདུན་ཁོ་ན་ལས་བསྙེན་པར་རྫོགས་པར་འགྱུར། ཞེས་པ་ནི་ད་ལྟར་གྱི་ཆོ་གས་བསྙེན་རྫོགས་ནོད་ན། གང་ལ་གསོལ་བ་གདབ་པ་ཡུལ་གྱི་ཆ་ནས་དགེ་འདུན་ཁོ་ན་ལས་བསྙེན་པར་རྫོགས་པར་འགྱུར་ཞེས་དགོངས་སོ། །བཀར་ནས་ཞེས་པ་ནི་དགེ་ཚུལ་དེས་གསང་སྟེ་སྟོན་པ་བསྐོ་བའི་ལས་ཐོས་ན་རྐུ་ཐབས་སུ་འགྱུར་བ་དང༌། དགེ་འདུན་རྣམས་ལ་ཉེས་བྱས་སུ་འགྱུར་བ་སྤང་བའི་ཕྱིར་རོ། །འོ་ན་གསང་སྟེ་སྟོན་པ་བསྐོ་བའི་ལས་འདི་དང་དགེ་འདུན་གྱི་ནང་དུ་བར་ཆད་འདྲི་བའི་ཕྱིར་གསོལ་བ་འབའ་ཞིག་པའི་ལས་གཉིས་ནི། དགོས་པ་དང༌། གནས་སྐབས་དང༌། ལས་ཀྱི་ངོ་བོ་འདྲ་བ་ལ། དགེ་སློང་གི་སྡོམ་པ་ལེན་པ་པོ་དེས་ཆོ་ག་འདི་ནི་ཐོས་སུ་མི་རུང་ལ། འོག་མ་ནི་ཐོས་སུ་རུང་བའི་རྒྱུ་མཚན་ཅི་ཞེ་ན། འདི་ནི་བར་ཆད་མེད་པར་ངེས་པར་བྱས་མ་ཟིན་པ་ལ་ལྟོས་ནས་ལས་ཐོས་པ་གནང་བ་མ་མཛད་པའི་ཕྱིར་དང༌། འོག་མ་ནི་གསང་སྟེ་སྟོན་པས་བར་ཆད་མེད་པར་ངེས་པར་བྱས་ཟིན་པ་ལ་ལྟོས་ནས་ལས་ཐོས་པ་གནང་བའི་ཕྱིར་རོ། །བསྙེན་པར་མ་རྫོགས་པ་ལ་ལས་ཐོས་སུ་རུང་བ་དུ་མ་ཡོད་པར་མཚོ་ཊཱིཀ་༩༦༠དུ་ལས་ཀྱི་གཞིའི་སྐབས་སུ་གསུངས་སོ། །སྤྲོ་བར་བྱས་ནས་ཞེས་པའི་ཊཱི་ཀ་ལས་ཆོ་ག་བཤད་པ་འདི་ནི་ཐམས་ཅད་དུ་ཡང་དུས་དང་པོར་བྱ་བ་ཡིན་ཞེས་པ་ནི་སྤྲོ་བ་འདྲི་བའི་ཆོ་ག་བཤད་པ་འདི་ནི་བསྐོ་བའི་ལས་ཐམས་ཅད་དུ་ཡང་དུས་དང་པོར་བྱ་བ་ཡིན་ནོ་ཞེས་པའོ། །