གཉིས་པ་ཚད་མིན་བཤད་པ།
གཉིས་པ་ཚད་མིན་བཤད་པ་ལ།
མཚན་ཉིད། དབྱེ་བ་གཉིས། གསར་དུ་མི་བསླུ་བ་མ་ཡིན་པའི་རིག་པ། ཚད་མིན་གྱི་ཤེས་པའི་མཚད་ཉིད། མཚན་གཞི་ནི། སྒྲ་མི་རྟག་པར་རྟོགས་པའི་དཔྱད་ཤེས་དང༌། སྒྲ་རྟག་འཛིན་རྟོག་པ་ལྟ་བུའོ། །ཚད་མིན་གྱི་ཤེས་པ་ནི་དཔྱད་ཤེས་ལྟ་བུ་ཡུལ་ལེགས་པར་ངེས་པས་ཡུལ་དང་འཛིན་སྟངས་མི་བསླུ་བ་ཡིན་ཡང་རང་ཡུལ་གསར་དུ་རྟོགས་པ་མ་ཡིན་པས་གསར་དུ་མི་བསླུ་བ་མ་ཡིན་པ་དང༌། ཡིད་དཔྱོད་ལྟ་བུ་རང་ཡུལ་གསར་དུ་རྟོགས་པར་བྱེད་བཞིན་པ་ཡིན་ཡང་འཛིན་སྟངས་མི་བསླུ་བ་མ་ཡིན་པ་ལྟ་བུ་གསར་དུ་མི་བསླུ་བ་མ་ཡིན་པའི་རིག་པ་སྟེ། མདོར་ན་རང་ཡུལ་གསར་དུ་རྟོགས་པ་དང་མི་བསླུ་བ་དང་ཁྱད་པར་གཉིས་ཀ་དང་མི་ལྡན་པའི་རིག་པ་དེ་ཡིན་ཞེས་པའོ། །
གཉིས་པ་དབྱེ་བ་ལ།
བཅད་ཤེས་དང༌། ཡིད་དཔྱོད་དང༌། སྣང་ལ་མ་ངེས་པའི་བློ་དང༌། ཐེ་ཚོམ་དང༌། ལོག་ཤེས་དང་ལྔ་ཡོད་ལ། དེ་དག་གི་ངོ་བོ་སོགས་གོང་དུ་བཤད་ཟིན་ཏོ། །དེ་དག་ཆོས་ཅན། ཚད་མིན་གྱི་ཤེས་པ་ཡིན་ཏེ། དཔྱད་ཤེས་མི་བསླུ་བའི་ཤེས་པ་ཡིན་ཡང་གསར་རྟོགས་ཀྱི་ཤེས་པ་མ་ཡིན། ཡིད་དཔྱོད་གསར་དུ་རང་ཡུལ་ཡོད་པ་ཞིག་འཛིན་པའི་བློ་ཡིན་ཡང་ཡུལ་ལ་སྒྲོ་འདོགས་མ་ཆོད་པས་འཛིན་སྟངས་འགྱུར་བའི་བསླུ་བའི་ཤེས་པ་ཡིན་ལ། སྣང་ལ་མ་ངེས་པ་ནི། ཡུལ་མི་བསླུ་བ་གསལ་བར་སྣང་བའི་བློ་ཡིན་ཡང་ཡུལ་མ་རྟོགས་པས་འཛིན་སྟངས་འགྱུར་བའི་བསླུ་བའི་ཤེས་པ་ཡིན་ལ། ཐེ་ཚོམ་ནི་ཡུལ་མ་རྟོགས་པས་འཛིན་སྟངས་ལ་བསླུ་བ་དང༌། ལོག་ཤེས་ནི་ཡུལ་ཕྱིན་ཅི་ལོག་ཏུ་བཟུང་ཕྱིར་དེ་དང་འཛིན་སྟངས་འགལ་བའི་གཉེན་པོས་དེའི་འཛིན་སྟངས་འདོར་བར་འགྱུར་བས་ན་བསླུ་བའི་ཤེས་པ་ཡིན་པའི་ཕྱིར་རོ། །