གཉིས་པ་རྒྱས་པར་བཤད་པ།
གཉིས་པ་རྒྱས་པར་བཤད་པ་ནི།
དམིགས་རྣམ་རྒྱུ་གསུམ་དང༌། ཆུང་འབྲིང་ཆེ་གསུམ་དང༌། རྣམ་རྟོག་བཞི་དང༌། ཡོངས་འཛིན་བཤད་པ་དང་བཞི། དང་པོ་ལ་དམིགས་པ་དང་རྣམ་པ་དང་རྒྱུ་བཤད་པ་གསུམ། དང་པོ་ནི། རྩ་བར། དམིགས་པ་མི་རྟག་ལ་སོགས་པ། །བདེན་པའི་རྟེན་ཅན། ཞེས་གསུངས་ལ། འདིས་ངེས་འབྱེད་ཡན་ལག་རྣམ་བཞི་པོ་ཐམས་ཅད་ཀྱི་དམིགས་པ་བསྟན་ཏོ། །དམིགས་པའི་ངོ་བོ་གང་ཞེ་ན། དྲོད་སོགས་བཞི་པོའི་དམིགས་པ་གཟུགས་སོགས་མི་རྟག་པ་དང་སྡུག་བསྔལ་བ་དང༌། བདག་མེད་པ་དང༌། མི་སྡུག་པ་དང༌། ཞི་བ་དང༌། སྟོང་པ་དང༌། མཚན་མ་མེད་པ་དང༌། སྨོན་པ་མེད་པ་སྟེ། འཕགས་པའི་བདེན་པ་བཞིའི་རྟེན་ཅན་གྱི་ཆོས་རྣམས་སོ། །ཐེག་ཆེན་སྦྱོར་ལམ་བདེན་མེད་སྒྱུ་མ་ལྟར་རྟོགས་པའི་སྒོ་ནས་སམ་བདེན་མེད་ཀྱིས་ཁྱད་པར་དུ་བྱས་ནས་བདེན་པ་བཞིའི་དངོས་པོ་ལ་དམིགས་པ་ཡིན་ནོ། །
གཉིས་པ་རྣམ་པ་ནི།
རྩ་བར། དེ་ཡིས་ནི། །རྣམ་པ་མངོན་ཞེན་ལ་སོགས་འགོག །ཅེས་པ་འདིས་ངེས་འབྱེད་ཡན་ལག་རྣམ་བཞི་པོ་ཐམས་ཅད་ཀྱི་རྣམ་པ་བསྟན་ཏོ། །རྣམ་པའི་ངོ་བོ་གང་ཞེ་ན་བདེན་པའི་ཆོས་མི་རྟག་པ་ལ་སོགས་པ་དེ་དག་བདེན་པར་མེད་པའི་ཆོས་ཉིད་ནི་དོན་རྣམ་ཡིན་ལ། དེ་རྟོགས་པའི་ཐེག་ཆེན་སྦྱོར་ལམ་ནི་ཤེས་རྣམ་ཡིན་ལ། དེས་ནི་རྣམ་པ་མི་རྟག་ལ་སོགས་ལ་མངོན་པར་ཞེན་པ་འགོག་པར་བྱེད་པའོ། ། གསུམ་པ་རྒྱུ་ནི། ཐེག་པ་གསུམ་ཆར་འཐོབ་པའི་རྒྱུ། ཞེས་པ་འདིས་ངེས་འབྱེད་ཡན་ལག་རྣམ་བཞི་པོ་ཐམས་ཅད་ཐེག་པ་གསུམ་ཆར་གྱི་སྤངས་རྟོགས་ཀྱི་རིགས་རྫོགས་པར་འཐོབ་བྱེད་ཀྱི་རྒྱུ་ཡིན་པར་བསྟན་ཏོ། །མདོ་ལས་ཀྱང༌། བྱང་ཆུབ་སེམས་དཔའ་ཉན་ཐོས་ཀྱི་ས་དང༌། རང་སངས་རྒྱས་ཀྱི་ས་དང༌། བྱང་ཆུབ་སེམས་དཔའི་ས་ལ་སློབ་པར་འདོད་པས་ཤེར་ཕྱིན་ལ་བསླབ་པར་བྱའོ། །དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་དཔའ་ཉན་ཐོས་དང༌། རང་སངས་རྒྱས་དང༌། བྱང་ཆུབ་སེམས་དཔའ་དང༌། སངས་རྒྱས་ཀྱི་ས་གང་ལ་བསླབ་པར་བྱ་བའི་ཐེག་པ་གསུམ་པོ་དག་ཤེར་ཕྱིན་འདི་ལས་རྒྱ་ཆེར་བསྟན་པའི་ཕྱིར་རོ། །ཞེས་གསུངས་སོ། །མདོ་དེ་མདོ་ལུགས་མར་དེའི་ཤེས་བྱེད་དུ་གསུངས་སོ། །