གསུམ་པ་རྟེན་གང་གིས་ནོད་པ།

གསུམ་པ་རྟེན་གང་གིས་ནོད་པ་ལ་བཞི་ལས།

དང་པོ་ལུས་ཕུན་སུམ་ཚོགས་པ་ནི།དངོས་པོའམ་བསམ་པའི་སྒོ་ནས་ནར་སོན་པ་དང༌། ལུས་ལ་བརྟེན་པའི་མ་ནིང་ལ་སོགས་པའི་བར་ཆད་མཐའ་དག་དང་བྲལ་བའོ། །དེ་ལ་དངོས་པོ་ནར་སོན་པ་ནི་མངལ་དང་བཤོལ་གྱི་ཟླ་བ་དང་བཅས་ནས་ལོ་ཉི་ཤུ་ལོན་པ་སྟེ། རྣམ་པ་ཐམས་ཅད་དུ་ལོ་ཉི་ཤུ་ལོན་པ་ལ་ནི་བསྙེན་པར་རྫོགས་པ་ཆགས་སོ། །ཞེས་སོ། །བསམ་པ་ནར་སོན་པ་ནི་ལོ་ཉི་ཤུ་མ་ལོན་ཡང་ལོན་པར་འདུ་ཤེས་པ་སྟེ། ཅིག་ཤོས་ལ་ནི་ལོན་པར་འདུ་ཤེས་པ་ཉིད་ནའོ་ཞེས་སོ། །ལེན་པ་པོས་ལོ་ཉི་ཤུ་མ་ལོན་པ་ལ་མ་ལོན་པར་ཤེས་ན་ནི། དེ་ལ་དགེ་སློང་ཕའི་སྡོམ་པ་མི་སྐྱེ་སྟེ། སོ་སོར་ཐར་པ་ལས།གང་ཟག་དེ་ཡང་བསྙེན་པར་རྫོགས་པར་མི་འགྱུར་ལ། ཞེས་སོ། །མཚོ་ཊཱིཀ་༨༩ལས། དམིགས་བསལ་ནི་ལོ་ཉི་ཤུ་མ་ལོན་པ་ལ་མ་ལོན་པ་ཉིད་དུ་ཤེས་པ་ལ་ཡང་དགེ་སློང་ཕའི་སྡོམ་པ་སྐྱེ་བ་ཡོད་དེ། ལས་དང་པོ་པ་དང་བུད་མེད་ཁྱིམ་སོ་བཟུང་བ་ལོ་བཅུ་གཉིས་ལོན་པ་དགེ་སློང་མའི་སྡོམ་པ་ལེན་པ་ན་སྡོམ་པ་སྐྱེ་བ་ལ་མངོན་དུ་གྱུར་པ་སྐྱེ་བའི་ཚེ་ཉིད་ན་སྡོམ་ལེན་མཚན་གྱུར་ན་དགེ་སློང་ཕའི་སྡོམ་པ་སྐྱེ་བར་རིགས་སོ། །ཞེས་འོག་ཏུ་༢༠༨དེ་ལ་དགེ་སློང་གི་སྡོམ་པ་སྐྱེ་བ་མེད་པ་ལྟ་བུར་གསུངས་པས་སླར་དཔྱད་པར་འགྱུར་རོ། །དེ་ལྟར་མཚན་གྱུར་པ་དེ་ལ་དགེ་སློང་ཕའི་སྡོམ་པ་སྐྱེ་བ་ལ་མངོན་དུ་གྱུར་པ་མི་རིགས་ཏེ། མཚོ་ཊཱིཀ་༨༩ལས། འོ་ན་དེང་སང་ནི་དགེ་སློང་གི་སྡོམ་པ་ལེན་པ་ན་མངལ་དང་བཤོལ་གྱི་ཟླ་བ་བརྩིས་ཏེ་ལོ་བཅུ་དགུ་ལ་དགེ་སློང་བྱེད་པར་སྣང་ན་དེ་ལ་སྡོམ་པ་སྐྱེའམ་མི་སྐྱེ་སྙམ་ན། རང་གི་རྣམ་བཤད་ལས། བསྙེན་པར་རྫོགས་པ་ནི་མ་ཆགས་པ་ཡིན་ཏེ། ལོ་བཅུ་དགུ་ལོན་པ་ལ་སོགས་པའི་སྐྱོན་གྱིས་སོ། །ཞེས་དང༌། འགྲེལ་ཆུང་ལས། ཐོག་མ་ཁྲིམས་འབོགས་པའི་ཚེ་ནི་ལོ་ཉི་ཤུར་མ་ཚང་བར་ཤེས་ནས་མངལ་གྱི་ཟླ་བ་བསྣན་ཀྱང་ཁྲིམས་མི་ཆགས་སོ། །ཞེས་སོ། །འོན་ཀྱང་གཞུང་དེ་གཉིས་ཀྱི་དགོངས་པ་བཙལ་བར་བྱ་ཞིང༌། ཊཱི་ཀ་ལས། བསྙེན་པར་རྫོགས་པར་འདོད་པའི་གནས་སྐབས་སུ་ནི་བརྩི་བར་མི་བྱ་སྟེ། གལ་ཏེ་བརྩི་བར་བྱེད་ན་བསྙེན་པར་རྫོགས་པ་ནི་ཆགས་ལ། བསྙེན་པར་རྫོགས་པར་བྱེད་པ་དག་ལ་ནི་འགལ་ཚབས་ཅན་དུ་འགྱུར་རོ། །ཞེས་གསུངས་པ་དེ་ངེས་པར་གཟུང་སྟེ། མི་ལུས་ཐོབ་ནས་ལོ་ཉི་ཤུ་ལོན་པ་ཉིད་ཡིན་པའི་ཕྱིར་རོ། །ཞེས་མཚོ་ཊཱིཀ་ལས་གསུངས་སོ། །འོན་ཀྱང་བོད་ཀྱི་ལོ་རྩི་ཚུལ་གྱི་དབང་དུ་བྱས་ན་སྐྱེས་མ་ཐག་དུ་ལོ་གཅིག་བྱས་ནས་བརྩི་བཞིན་ཡོད་པས་མངལ་ཀྱི་ཟླ་བ་བསྣན་པ་མི་འཐད་ལ། རྒྱ་གར་བ་སོགས་མི་རིགས་གཞན་དུ་མས་སྐྱེས་ནས་ལོ་རིལ་བོ་ལོན་ཚེ་ལོ་གཅིག་ཅེས་བརྩི་ཚུལ་ལྟར་ན་མངལ་ཟླ་བསྣན་ཡང་འཐད་པར་སྣང་ངོ༌། ། གཉིས་པ་བསམ་པ་ཕུན་སུམ་ཚོགས་པ་ནི། རྒྱུའི་ཀུན་སློང་དང་དུས་ཀྱི་ཀུན་སློང་སྟེ་སྔར་བཤད་ཟིན་ཏོ། ། གསུམ་པ་ཆ་ལུགས་ཕུན་སུམ་ཚོགས་པ་བཤད་པ་ལ་དངོས་དང༌། རབ་བྱུང་གི་ཡོ་བྱད་ལྷུང་བཟེད་སོགས་བཤད་པ་དང་གཉིས་ལས། དང་པོ་ནི། སྔར་ནས་སྐྲ་དང་ཁ་སྤུ་བྲེགས་པ་དང༌། འདིར་ཆོས་གོས་གསུམ་དང་ལྷུང་བཟེད་རུང་ཞིང་ཚད་དང་ལྡན་པ་མཁན་པོས་བྱིན་གྱིས་བརླབས་པ་དང་ལྡན་པ་དང༌། གདིང་བ་དང་ཆུ་ཚགས་ནི་ཚིག་གིས་བྱིན་ཡང་རུང་ངོ༌། །ལག་ལེན་བྱེད་ཚོད་ཀྱི་དབང་དུ་བྱས་པ་ནི། ལུང་གཞི་དང་ཀརྨ་ཤ་ཏཾ་ལས་དེ་ལྟ་བུ་ཉིད་མ་ཡིན་ན་རེ་རེ་ནས་ལྷུང་བཟེད་བཟང་ངོ་ཞེས་བརྗོད་པར་བྱའོ་ཞེས་གསུངས་ལ། ཊཱི་ཀ་ལས་ཀྱང་ཡོན་ཏན་ནང་ལྡན་པ་ཡིན་ན་བཟང་ངོ་ཞེས་བརྗོད་པར་བཤད་དོ། །སྐབས་འདིར་ལྷུང་བཟེད་དགེ་འདུན་ལ་བསྟན་དགོས་ཀྱང༌། ཆོས་གོས་ནི་བསྟན་མི་དགོས་སོ། །མཚོ་ཊཱིཀ་༩༣ལས། བསྡུས་པ་ལས། ཆོས་གོས་རྣམས་དང་ལྷུང་བཟེད་དགེ་འདུན་ལ་བསྟན་ཏེ་བྱིན་གྱིས་བརླབ་པར་བྱའོ་ཞེས་བཤད་པ་ལ་བརྟེན་ནས། ཁ་ཅིག་ནི་ཆོས་གོས་ཀྱང་དགེ་འདུན་ལ་བསྟན་ནས་བྱིན་གྱིས་རློབ་ཅེས་ཐོས་མོད་ཀྱི། ཆོས་གོས་ནི་དགེ་འདུན་ལ་བསྟན་དགོས་པར་ལུང་ལས་དངོས་སུ་མ་གསུངས་ལ། ལྷུང་བཟེད་ཀྱི་མདོར་བསྡུས་སྦྱོར་ན་ཡང་མི་འཐད་དེ། གོས་དང་ལྷུང་བཟེད་ཡངས་དོག་མི་མཚུངས་པའི་ཕྱིར་ཏེ། གོས་ལ་རྒྱུ་རུང་བ་བདུན་དང༌། ཁ་དོག་རུང་བ་གསུམ་གསུངས་ཀྱང་ལྷུང་བཟེད་ལ་རྒྱུ་རུང་བ་ས་ལྕགས་གཉིས་ལས་མེད་ཅིང༌། ཁ་དོག་རུང་བ་ནག་པོ་ལས་གཞན་མེད་པའི་ཕྱིར་རོ། །ཞེས་གསུངས་སོ། །སྐབས་འདིར་ཆོས་གོས་ལ་རྒྱུའི་བྱིན་རླབས་གསུངས་ལ་ལྷུང་བཟེད་ལ་རྒྱུའི་བྱིན་རླབས་མ་གསུངས་པའི་རྒྱུ་མཚན་ཅི་ཞེ་ན། ཆོས་གོས་ཀྱི་རྒྱུ་རས་ཡུག་ལྟ་བུ་ལ་གོས་ཀྱི་བློ་སྐྱེ་བའི་ཕྱིར་དང༌། ལྷུང་བཟེད་ཀྱི་རྒྱུ་ལྕགས་གོང་ལྟ་བུ་ལ་སྣོད་སྤྱད་ཀྱི་བློ་མི་སྐྱེ་བའི་ཕྱིར་ཞེས་གསུངས་སོ། །ལྷུང་བཟེད་སོགས་མེད་ན་སྐྱེའམ་མི་སྐྱེ་ཞེ་ན། དེ་དག་ཐམས་ཅད་མ་ཚང་སྟེ་སྒྲེན་མོའམ་ཁྱིམ་པ་ལ་སོགས་པའི་ཆ་ལུགས་རྫོགས་ན་མི་སྐྱེ་སྟེ། སྒྲེན་མོ་དང་ཞེས་བཤད་ཅིང༌། རྩ་བར། ཁྱིམ་པ་དང་མུ་སྟེགས་ཅན་གྱི་རྒྱལ་མཚན་ཅན་ལ་ཡང་མི་སྐྱེའོ། །ཞེས་སོ། །དེ་ལ་དགོངས་ནས་ལུང་མ་མོ་ལས་ལྷུང་བཟེད་དང་ཆོས་གོས་མེད་པ་དང་མི་མ་ཡིན་པ་ཐམས་ཅད་དེ། འདི་དག་ནི་བསྙེན་པར་རྫོགས་པར་བྱས་ན་ཡང་བསྙེན་པར་རྫོགས་པ་མ་ཡིན། ཞེས་གསུངས་སོ། །ཁྱིམ་པའི་རྒྱལ་མཚན་ཅན་ལ་མི་སྐྱེ་བར་གསུངས་པ་ལ་མཆོད་སྦྱིན་མ་འཕྲིན་གྱིས་བསྙེན་པར་རྫོགས་ཚེ་ཁྱིམ་པའི་ཆ་ལུགས་ཅན་ཡིན་པར་གླེང་འབུམ་དུ་གསུངས་པས་དཔྱད་པར་བྱའོ། །ལྷུང་བཟེད་དང་ཆོས་གོས་འགའ་རེ་མ་ཚང་ཡང་མི་སྐྱེ་བའི་སྐྱོན་མེད་དེ། ལུང་ཕྲན་ཚེགས་ལས། ལྷུང་བཟེད་མེད་པ་ཞིག་བསྙེན་པར་རྫོགས་པར་བགྱིད་ན་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི་འགལ་ཚབས་ཅན་དུ་འགྱུར་རོ། །ཞེས་གསུངས་ཤིང༌། ལུང་ཞུ་བ་ལས། བཙུན་པ་ལྷུང་བཟེད་མ་མཆིས་ཆོས་གོས་མ་མཆིས་པར་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པ་ལི་བསྙེན་པར་རྫོགས་པ་ཞེས་བྱ་སྟེ་བསྙེན་པར་རྫོགས་པར་བྱེད་པ་ནི་འདས་པ་དང་བཅས་པའོ། །ཞེས་གསུངས་སོ། །