སྐྱབས་རྗེ་རིག་འཛིན་རྒྱ་མཚོར་བསྔགས་པའི་ཀ་ཕྲེང་།
༈ སྐྱབས་རྗེ་རིག་འཛིན་རྒྱ་མཚོར་བསྔགས་པའི་ཀ་ཕྲེང་བཞུགས།
ཀ་ནི་ཀ་ལྟར་ལྷ་མིས་མཆོད་པའི་ཡུལ། །ཁ་བཤད་ཙམ་མིན་རང་རྒྱུད་ལེགས་བཏུལ་ནས། །ག་དར་ངེས་འབྱུང་ཁྲིམས་ཀྱིས་ཀུན་སྤྱོད་གཙང་། །ང་ཡི་སྐྱབས་རྗེ་རིག་འཛིན་རྒྱ་མཚོར་བསྔགས། །ཅ་ཅོ་སྡིག་པ་གཏན་སྤངས་ཆོས་མཐུན་གསུང་། །ཆ་ལུགས་རང་གར་མི་མཛད་བསྟན་པའི་སྲོལ། །ཇ་ཧོང་ངུར་སྨྲིག་རྒྱལ་མཚན་རྒྱུན་ལྡན་འཆང་། །ཉ་ཟླ་སྤྲིན་བྲལ་ལྟ་བུའི་བླ་མ་བསྔགས། །ཏ་ཐཱ་ག་ཏའི་བཀའ་བསྟན་དཔང་བཞག་ནས། །ཐ་མ་ཁ་སོགས་ཉེས་པའི་རྒྱུ་ཀུན་དོར། །ད་ལྟ་སྙིགས་མའི་སྨག་ལ་སྒྲོན་མེ་ལྟར། །ནཱ་གཱརྫུ་ནའི་གཞུང་དོན་སྟོན་མཁས་བསྔགས། །པ་སངས་ལྟར་དཀར་ཀུན་སྤྱོད་གཙང་བ་དང་། །ཕ་རོལ་ཕྱིན་དྲུག་ཉམས་ལེན་མཛོད་ཅིག་ཅེས། །བ་ལྟར་བླུན་པའི་འཁོར་རྣམས་ཐབས་ཀྱིས་འདུལ། །མ་ནོར་ལམ་སྟོན་ཐར་པའི་དེད་དཔོན་བསྔགས། །ཙ་རི་ཏྲ་སོགས་གནས་ཡུལ་ལུས་ལ་ཚང་། །ཚ་ཐུབ་གྲང་ཐུབ་བསྐྱེད་རྫོགས་བཟླས་བརྗོད་ལ། །ཛ་ཡའི་དགོངས་པ་དང་མཐུན་སྒྲུབ་དགོས་ཞེས། །ཝ་ཆུའི་རྒྱུན་བཞིན་ཉིན་མཚན་བརྩོན་ལ་བསྔགས། །ཞྭ་དམར་བསྟན་པའི་རྒྱལ་མཚན་བླར་བཏེགས་པས། །ཟ་ཆོག་གྲུབ་མཐར་ཞེན་རྣམས་སྤ་བཀོང་ཞིང་། །
འ་འུར 
་གྲགས་པ་དོན་ལྡན་སྨྲ་བའི་དབང་། །ཡ་མཚན་མི་ཡི་སེང་གེ་གང་དེར་བསྔགས། །ར་ཡིག་གཉིས་པས་སྦྲང་རྩིའི་བཅུད་འཐུང་ལྟར། །ལ་ལུང་མཁས་མང་གསུང་གི་བདུད་རྩི་མྱང་། །ཤ་བ་རི་སོགས་གྲུབ་བརྒྱའི་བྱིན་ནུས་ཐོབ། །ས་བཅུའི་དབང་ཕྱུག་འཇམ་དབྱངས་འཕྲུལ་དེར་བསྔགས། །ཧ་ལ་དུག་ལྔ་སྤང་བསྒྱུར་ལམ་ཁྱེར་གནད། །ཨ་ཏིའི་དགོངས་པ་རྟོགས་ཀྱང་རྒྱུ་འབྲས་ཞིབ། །ཨ་ཧོ་ལྟ་སྤྱོད་ཟུང་འབྲེལ་རྒྱལ་བའི་སྲས། །མཁས་མཆོག་པདྨ་དགེ་འདུན་གྲགས་པར་འདུད།།