འཕགས་མ་སྒྲོལ་མའི་དཀྱིལ་འཁོར་གྱི་སྒྲུབ་ཐབས་ཆོ་ག་ཞེས་བྱ་བ།
ལྷན་ཅིག་སྐྱེས་པའི་རོལ་པ།
༄། །རྒྱ་གར་སྐད་དུ། ཨཱཪྻཱ་ཏཱ་རེ་མཎྜལ་བི་དྷི་ནཱ་མ་སཱ་དྷ་ནཱཾ། བོད་སྐད་དུ། འཕགས་མ་སྒྲོལ་མའི་དཀྱིལ་འཁོར་གྱི་སྒྲུབ་ཐབས་ཆོ་ག་ཞེས་བྱ་བ། དཔལ་དགྱེས་པའི་རྡོ་རྗེ་ལ་ཕྱག་འཚལ་ལོ། །བླ་མ་དམ་པའི་ཞབས་ཀྱི་ནི། །པདྨ་ལ་གུས་ཕྱག་བྱས་ཏེ། །འཕགས་མ་སྒྲོལ་མའི་སྒྲུབ་པའི་ཐབས། །མན་ངག་རྒྱུད་ལ་བརྟེན་པ་བྲི། །བླ་མ་ལ་གུས་དད་པ་ཆེ། །བྱང་ཆུབ་སེམས་དཔའ་སྙིང་རྗེ་ཆེ། །རྟོག་པ་ལེགས་པར་འཇོམས་པ་དེས། །རྗེ་བཙུན་མཉེས་བྱས་མན་ངག་མནོས། །དང་པོར་དབེན་ཞིང་ཉམས་དགའ་བར། །ཉེར་སྤྱོད་ཡོ་བྱད་རྫོགས་པར་བྱ། །དེ་ནས་བྱང་ཆུབ་སེམས་བསྐྱེད་ལ། །ཕྱག་དང་མཆོད་དང་གསོལ་བ་གདབ། །རྗེས་སུ་ཡི་རང་བསྔོ་བ་སོགས། །བྱས་ཏེ་ཚངས་པའི་གནས་བཞི་བསྒོམ། །དེ་ནས་གཟུང་འཛིན་བརྟན་གཡོ་ཀུན། །སྟོང་པར་བྱས་ཏེ་སྔགས་བཟླས་བྱ། །ཨོཾ་སྭཱ་བྷཱ་བ་ཤུདྡྷཿ་སརྦ་དྷརྨཱཿ་སྭཱ་བྷཱ་ཝ་ཤུདྡྷོཉཧཾ། ཞེས་པས་སྟོང་པར་བྱའོ། །དེ་ཡི་ངང་ལས་ཧཱུཾ་བསམས་ཏེ། །ར་བ་གུར་དང་ཕྱོགས་མཚམས་བཅིང༌། །ཁྲོ་བོ་བཅུ་ཡི་སྲུང་འཁོར་བསྒོམ། །དེ་སྟེང་ཨེ་ལས་ཆོས་འབྱུང་བསམ། །ལཾ་བཾ་རཾ་ཡཾ་རྣམས་ལས་ནི། །ས་ཆུ་མེ་རླུང་དཀྱིལ་འཁོར་བསམ། །དེ་སྟེང་དུ་བྲུཾ་ལས་འཁོར་ལོའོ། །དེར་ནི་ནཱ་ད་བབས་པ་ལས། །བསྒྱུར་ཏེ་གཞལ་ཡས་ཁང་བསམ་བྱ། །གྲུ་བཞི་པ་ལ་སྒོ་བཞི་པ། །ཀ་བ་བརྒྱད་མཛེས་རྒྱན་ལྡན་བསམ། །ཨོཾ་སརྦ་ཏ་ཐཱ་ག་ཏ་ཨ་ཏ་ལ་བཛྲ་སྭཱ་བྷཱ་ཝ་ཨཱཏྨ་ཀོཉཧཾ། ཞེས་བརྗོད་པར་བྱའོ། །དེ་ནང་པཾ་ལས་པདྨ་ནི། །འདབ་མ་བརྒྱད་པ་འཕར་མ་གཉིས། །དབུས་སུ་ཨཱ་ལི་ཀཱ་ལི་ལས། །ཉི་ཟླ་ག་འུར་བསམ་པར་བྱ། །དབུས་སུ་ཡི་གེ་ཏཱཾ་སེར་བསམ། །དེ་ལྟར་ཀཱ་ལི་ཨར་གྱུར་པས། །མཉམ་སྦྱར་
༄། །དེ་གཉིས་གྱུར་པར་བསམ། །ཨོཾ་སརྦ་ཏ་ཐཱ་ག་ཏ་ཨ་ནུ་རཀྟོ་བཛྲ་སྭཱ་བྷཱ་ཝ་ཨཱཏྨ་ཀོཉཧཾ། ཞེས་བརྗོད་པར་བྱའོ། །དེ་ལྟར་དབུས་ཀྱི་ཏཱ་ལས་ནི། །ཤར་གྱི་ཉི་མའི་བར་དུ་ནི། །ཡི་གེ་ཨོཾ་གྱི་རྣམ་པར་སྤྲོས། །ལྷོར་ནི་ཏཱ་དང་ནུབ་ཏུ་རེ། །བྱང་དུ་རྒྱུ་ཡི་ཡི་གེ་སྤྲོ། །དེ་ནས་སྒོ་ཡི་ཕྱོགས་དག་ཏུ། །ཏཱ་རེ་ཏུ་དང་རེ་བཞི་སྤྲོ། །སྟེང་དུ་ཏཱ་དང་རེ་གཉིས་སྤྲོ། །འོད་ཟེར་འཕྲོས་པས་སེམས་ཅན་སྦྱངས། །ལྷར་བྱས་ས་བོན་ཐིམ་པ་ལས། །རང་རང་ས་བོན་གྱིས་མཚན་པའི། །རྡོ་རྗེ་མེ་ཏོག་ཕྲེང་བ་ཡིས། །མར་མེ་ཀོང་བུ་དུང་ཆོས་དང༌། །ལྕགས་ཀྱུ་ཞགས་པ་ལྕགས་སྒྲོག་དང༌། །
དྲིལ་བུ 
་རྣམས་སུ་གྱུར་པར་བསམ། །དེ་ལས་འོད་འཕྲོས་སྦྱང་བསྡུས་ལ། །ལྷ་མོ་རྣམས་སུ་བསམ་པར་བྱའོ། །དེ་ལས་དབུས་སུ་ལྷ་མོ་སྒྲོལ་མ་ནི། །ཕྱག་བརྒྱད་ཞལ་བཞི་ཁ་དོག་སེར། །རྒྱན་ལྡན་མ་མདངས་སྡུག་ལང་ཚོར་ལྡན། །མཚན་དང་དཔེ་བྱད་བཟང་པོས་བརྒྱན། །གཡོ་ཞིང་པདྨའི་གདན་ལ་བཞུགས། །རྡོ་རྗེ་དེ་བཞིན་ཞགས་པ་དང༌། །མདུང་དང་མདའ་ནི་གཡས་ན་བསྣམས། །རྡོ་རྗེ་ལྕགས་ཀྱུ་ཨུཏྤལ། །གཞུ་དང་སྡིགས་མཛུབ་གཡོན་བ་ན། །སྐྱིལ་ཀྲུང་ཕྱེད་པའི་གར་གྱིས་བཞུགས། །ས་གསུམ་དབང་དུ་སྡུད་པ་བསམ།། དེ་ཡི་ཤར་དུ་མེ་ཏོག་གི །སྒྲོལ་མ་དཀར་མོ་ཞལ་གཅིག་མ། །ཕྱག་གཉིས་མེ་ཏོག་ཕྲེང་བ་འཛིན། །རྒྱན་རྣམས་ཀུན་གྱིས་སྤྲས་པར་བསམ། །ལྷོར་ནི་སྤོས་ཀྱི་སྒྲོལ་མ་སྟེ། །ཁ་དོག་ནག་མོ་སྤོས་འཛིན་མ། །ནུབ་ཏུ་མར་མེའི་སྒྲོལ་མ་སྟེ། །སེར་ཞིང་མར་མེའི་སྣོད་འཛིན་མ། །བྱང་དུ་དྲི་ཡི་སྒྲོལ་མ་སྟེ། །ལྗང་གུ་དྲི་ཡི་དུད་ཆོས་བསྣམས། །དཀྱིལ་འཁོར་དབུས་སུ་བསྒོམ་པར་བྱའོ། །དེ་ནས་ཤར་སྒོར་སྒོ་སྐྱོང་དཀར། །ལྕགས་ཀྱུ་འཛིན་པ་བསམ་པར་བྱ། །ལྷོར་སེར་ཞགས་པ་བསམ་པར་བྱ། །ནུབ་དམར་ལྕགས་ཀྱི་སྒྲོག་འཛིན་མ། །བྱང་དུ་ལྗང་གུ་དྲིལ་བུའོ། །དེ་རྣམས་ཞལ་གཅིག་ཕྱག་གཉིས་མ། །རིན་ཆེན་རྒྱན་གྱིས་ལེགས་སྤྲས་ཤིང༌། །གཡོ་བཅས་གསེར་གྱི་རྣ་ཆས་བརྒྱན། །སྤྱན་གཉིས་ལང་ཚོ་ཕུན་སུམ་ཚོགས། །སྟེང་དུ་རྣམ་པར་སྒྲོལ་མ་སྟེ། །འོག་ཏུ་གནོད་མཛེས་སྒྲོལ་མའོ། །འཁོར་ལོ་སྤྲུལ་ཞགས་བསྣམས་པ་བྲི། །དེ་ལྟར་ཐམས་ཅད་
༄། །མཚན་ཉིད་མཚུངས། །དེ་ནས་སྐྱེ་མཆེད་དག་ལ་ནི། །མིག་གཉིས་རྣ་བ་གཉིས་དང་སྣ། །ལྕེ་དང་ལུས་དང་ཡིད་རྣམས་སུ། །མཾ་དཾ་ཨི་དང་རཾ་སཾ་ནཾ། །གཏི་མུག་ཞེ་སྡང་སེར་སྣ་ལ། །འདོད་ཆགས་ཕྲག་དོག་བདག་མེད་ལ། །གང་དང་དམར་དང་སེར་མོ་སྔོ། །ལྗང་ཁུ་དཀར་མོ་རྣམས་བསམས་ཏེ། །ཞལ་གཅིག་ཕྱག་གཉིས་ལྡན་པའོ། །སྐུ་ལ་ཨོཾ་ལས་མཁའ་སྤྱོད་མ། །ས་སྤྱོད་བདག་མེད་མ་གསུམ་ལས། །རྡོ་རྗེ་གསུམ་པོ་བསམ་པར་བྱ། །དེ་ནས་འོད་ཟེར་རབ་འཕྲོས་པས། །རང་བཞིན་གྱི་ནི་ཞིང་ཁམས་ནས། །ཡེ་ཤེས་སེམས་དཔའ་སྤྱན་དྲངས་ཏེ། །ཛཿ་ཧཱུཾ་བཾ་ཧོཿ་ས་ལྷ་མོ་རྣམས། །འགུགས་པས་དགུག་གཞུག་བཅིངས་མཉེས་བྱ། །དེ་ནས་སེམས་དཔའ་གསལ་བར་ལྟ། །སླར་ཡང་འོད་ཟེར་འཕྲོས་པ་ལས། །སངས་རྒྱས་རིགས་ལྔ་སྤྱན་དྲངས་ལ། །མཆོད་བསྟོད་གསོལ་བ་གདབ་པར་བྱ། །དེ་ནས་དབང་བསྐུར་རྒྱས་བཏབ་སྟེ། །རྩེ་མོ་རིགས་ལྔ་རྣམ་པར་མཚན། །གཞན་རྣམས་རང་གི་རིགས་ཀྱིས་གདབ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་བཛྲ་སྭཱ་བྷཱ་ཝ་ཨཱཏྨ་ཀོཉཧཾ། ཞེས་བརྗོད་པར་བྱའོ། །དེ་ནས་ས་བོན་ལས་སྤྲོས་པའི། །ལྷ་མོ་རྣམས་ཀྱིས་མཆོད་པར་བྱ། །ཨོཾ་སརྦ་ཏ་ཐཱ་ག་ཏ་པཱུ་ཛ་མ་གྷ་བཛྲ་སྭཱ་བྷཱ་ཝ་ཨཱཏྨ་ཀོཉཧཾ། ཞེས་བརྗོད་པར་བྱའོ། །དེ་ནས་རིགས་ཀྱི་ས་བོན་ལས། །བདུད་རྩི་ལྕེ་ལ་བླངས་བྱས་ཏེ། །ཨོཾ་སརྦ་ཏ་ཐཱ་ག་ཏ་ཨ་མྲྀ་ཏ་བཛྲ་སྭཱ་བྷཱ་ཝ་ཨཱཏྨ་ཀོཉཧཾ། ཞེས་བརྗོད་པར་བྱའོ། །དེ་ནས་བསྟོད་པས་ལེགས་བསྟོད་དེ། །ཨོཾ་སརྦ་ཏ་ཐཱ་ག་ཏ་སྟུ་ཏི་བཛྲ་སྭཱ་བྷཱ་བ་ཨཱཏྨ་ཀོཉཧཾ། ཞེས་བརྗོད་པར་བྱའོ། །གསལ་ལ་ཡང་དང་ཡང་དུ་བལྟའོ། །དེ་ནས་སྔགས་བཟླས་པ་ནི། ན་མཿ་ཨཱཪྻ་ཝ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་ཏཱ་རེ་ཏུཏྵ་རེ་ཏུ་རེ། སརྦ་དུཥྚཱ་ན། པྲ་དུཥྚཱ་ན། མ་མ་ཀྲྀ་ཏེ། ཛཾ་བྷ་ཡ། སྟཾ་བྷ་ཡ། མོ་ཧ་ཡ། བནྡྷ་ཡ། ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ། སརྦ་དུཥྚཱན་སྟཾ་བྷ་ནི་ཏཱ་རེ་སྭཱ་ཧཱ། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཕར་ཕྱིན་བཅུ་ཡི་ལྷ་མོ་ལ། །ཡི་གེ་བཅུ་པས་འགྲུབ་པར་འགྱུར། །བསྙེན་པ་བྱེ་བས་འགྲུབ་འགྱུར་ཞིང༌། །ལས་ལ་རང་སྔགས་ཁྲི་བཟླས་
༄། །སོ། །དེ་ནས་སྐྱོ་ན་རྣམ་དག་བསྒོམ། །གཏོར་མ་བྱས་ཏེ་ལྷ་གཤེགས་ལ། །ཅི་བདེ་བ་ཡི་སྤྱོད་པས་གནས། །དེ་ལྟར་ཡང་དང་ཡང་གོམས་པས། །གཅན་གཟན་བསྲུང་བ་དང་དབང་དུ་བྱ། །བསྐྲད་དང་བུད་མེད་དགུག་པ་དང༌། །བཅིངས་བ་གྲོལ་དང་ཚར་བཅད་དང༌། །བསྲེག་དང་མནན་པ་བསྲུང་བ་སོགས། །རྒྱུད་ཐོས་མན་ངག་ལྡན་པས་བསྒྲུབ། །བླ་མ་མཉེས་པ་མཆོག་ཡིན་པས། །དེ་ཡིས་རྗེ་བཙུན་ཡུན་རིང་བསྟེན། །སྒྲུབ་ཐབས་བཀོད་པའི་ཚོགས་དེ་ཡིས། །དེ་ཉིད་མཐོང་བས་ཕྱག་བྱས་ཏེ། །བླ་མ་དམ་པ་ལྷན་ཅིག་སྐྱེས། །མཉེས་པར་བྱས་ཏེ་དེ་མཐོང་ཤོག་རྗེ་བཙུན་མ་འཕགས་མ་སྒྲོལ་མའི་ལྷ་བཅུའི་སྒྲུབ་པའི་ཐབས། སློབ་དཔོན་ཆེན་པོ་ལྷན་ཅིག་སྐྱེས་བའི་རོལ་བས་མཛད་པ་རྫོགས་སོ།། །།འབྲོག་མི་ལོ་ཙཱ་བས་བསྒྱུར་བའོ།།