ཤངས་པ་བཀའ་བརྒྱུད།
ནི་གུ་མ་ལས་བྱུང་བའི་ཆོས་དྲུག་གི་རིམ་པ་དང་བརྒྱུད་པ་བཞི་པ་རྨོག་ལྕོག་པ་སོགས།
༈ ན་རོ་པའི་ལྕམ་མོ་ནི་གུ་མ་ལས་བྱུང་བའི་ཆོས་དྲུག་གི་རིམ་པ་ནི། ལུགས་དེའི་ལེན་པ་པོ་ནི་མཁས་གྲུབ་ཁྱུང་པོ་རྣལ་འབྱོར་ཏེ། དེ་གདུང་རུས་ཁྱུང་པོ། ཡབ་སྟག་སྐྱེས་དང་ཡུམ་བཀྲ་ཤིས་སྐྱིད་གཉིས་ཀྱི་སྲས་སུ་སྙེེ་མོ་ར་མངས་སུ་འཁྲུངས། བཙས་མ་ཐག་ཏུ་རྒྱ་གར་གྱི་གྲུབ་ཐོབ་ཨ་མོ་གྷ་བྱོན་ནས་ལུང་ལེགས་པར་བསྟན། བླ་མ་འབྱུང་གནས་སེང་གེ་ལ་རྫོགས་ཆེན་སེམས་སྡེའི་སྐོར་ཞུས་ནས་བཤད་པས་སློབ་མ་བདུན་བརྒྱ་ཙམ་བྱུང་། རྒྱ་གར་དུ་ལན་གཉིས་ཙམ་བྱོན་ནས་རྡོ་རྗེ་གདན་པ་དང་མེ་ཏྲི་པ་ལ་སོགས་ལ་ཆོས་མང་དུ་གསན། དེར་རྡོ་
རྗེ་འཆང་དངོས་ལ་ཐུག་པ་སུ་ཡོད་དྲིས་པས། ན་རོ་པའི་ལྕམ་མོ་ནི་གུ་མ་ཞེས་བྱ་བ་ཡོད་དེ། དེ་དག་པའི་ས་ན་སྐུ་འཇའ་ལུས་སུ་གྱུར་པས་སུ་རུང་རུང་གིས་མི་མཐོང་། སོ་ས་གླིང་གི་དུར་ཁྲོད་དུ་མཁའ་འགྲོ་མའི་ཚོགས་དཔོན་ལ་འབྱོན་པས་ལས་དག་ན་དེར་མཐོང་སྲིད་ཟེར། དེར་ཕྱིན་ཏེ་ན་མོ་བུདྡྷ་ཡའི་གསོལ་བ་བཏབ་པས། ཏཱ་ལ་བདུན་སྲིད་ཙམ་གྱི་ནམ་མཁའ་ལ་སྐུ་མདོག་སྨུག་ནག་རུས་པས་བརྒྱན་པ་ཕྱག་ན་ཁ་ཊཾ་དང་ཐོད་པ་བསྣམས་པ་གར་བསྒྱུར་བ་ཞིག་མཐོང་ནས། ནི་གུ་མ་ཡིན་པར་ངེས་ནས་ཕྱག་དང་བསྐོར་བ་བྱས། ཡང་དག་པའི་གདམས་པ་ཞུ་འཚལ་ཞུས་པས། ང་ནི་ཤ་ཟ་ཌཀྐི་ཡིན་གསུངས། ཡང་བཏུད་དེ་ཞུས་པས། གསང་སྔགས་ཀྱི་གདམས་པ་དགོས་ན་གསེར་དགོས་གསུང་། གསེར་སྲང་བརྒྱ་ཡོད་པ་དེ་ཕུལ་བས་ཕྱག་ཏུ་བཞེས་ནས་ནགས་སུ་གཏོར་སོང་བས། ཤ་ཟ་མཁའ་འགྲོ་མ་རང་ཡིན་ནམ་ཐེ་ཚོམ་དུ་གྱུར་པ་ན། སྤྱན་ནམ་མཁའ་ལ་གཟིགས་པས་མཁའ་འགྲོའི་ཚོགས་མང་པོ་འདུས་ནས་དཀྱིལ་འཁོར་སྤྲུལ། དེར་སྒྱུ་ལུས་རྨི་ལམ་གྱི་དབང་བསྐུར་ནས། མཁའ་འགྲོ་མས་དཔག་ཚད་གསུམ་དུ་ཁྱེར་ནས་གསེར་གྱི་རིའི་ཁར་བཞགདེར་རྨི་ལམ་དུ་རྡོ་རྗེ་བཙུན་མོས་ཆོས་དྲུག་ཚར་གཅིགདངོས་སུ་ཚར་གསུམ་རྡོ་རྗེ་ཚིག་རྐང་སྒྱུ་མ་ལམ་རིམ་གནང་། གཞན་ཡང་རྒྱུད་དང་སྒྲུབ་ཐབས་ཤིན་ཏུ་མང་པོ་གསུངས་ནས། ཆོས་དྲུག་གི་གདམས་པ་འདི་རྣམས་ཤེས་པ་ང་དང་ལྭ་བ་པ་མ་གཏོགས་མེད། བརྒྱུད་པ་བདུན་གྱི་བར་དུ་ཆིག་བརྒྱུད་གྱིས། དེ་རྣམས་ངས་བྱིན་གྱིས་རློབ་ཅིང་ལུང་ཡང་སྟོན་པ་ཡིན་གསུངས། དེ་ནས་སླར་བོད་དུ་བྱོན་པའི་མངའ་རིས་སུ་ཇོ་བོ་དང་མཇལ། གསང་འདུས་ལ་སོགས་ཆོས་མང་དུ་གསན་གླང་རི་ཐང་པ་ལ་བསྙེན་རྫོགས་ཞུས། འཕན་ཡུལ་འཇོག་པོར་འཆད་ཉན་དགོན་བཏབ། འཇོག་པོ་ནས་གདན་འདྲེན་བྱུང་བས་ཤངས་སུ་བྱོན་ལོ་གསུམ་གྱི་ནང་དུ་ཞོང་ཞོང་ལ་སོགས་དགོན་གནས་བརྒྱ་རྩ་བརྒྱད་བཏབ། འདིས་དགུང་ལོ་བརྒྱ་དང་ལྔ་བཅུ་བཞུགས་པར་གྲགས། སློབ་མའི་གཙོ་བོ་ནི། རྨེའུ་སྟོན་པ། གཡོར་པོ་རྒྱ་མོ་ཆེ། རྡུལ་སྟོན་རིན་དབང་། ལ་སྟོད་དཀོན་མཆོག་མཁར། རྨོག་ལྕོག་པ། ཞང་སྒོམ་ཆོས་སེང་རྣམས་ཡིན།
༈ བརྒྱུད་པ་བཞི་པ་རྨོག་ལྕོག་པ་ནི། ལྷ་བུ་སྤང་རྩར་འཁྲུངས། ལོ་བཅུ་བདུན་ལ་ཞོང་ཞོང་དུ་ཆོས་སྒོར་ཞུགས། བླ་མ་ཤངས་པས་སྨིན་པར་མཛད། བརྒྱུད་འཛིན་ལྔ་པ་རྨོག་ལྕོག་པའི་གསུང་གི་སྲས་གྲུབ་ཐོབ་སྐྱེར་སྒང་པ་དྷརྨ་སེང་གེ་ཡིན། བརྒྱུད་པ་དྲུག་པ་སངས་རྒྱས་གཉག་སྟོན་ཆོས་ཀྱི་ཤེས་རབ་ཅེས་བྱ་བ་སྐྱེར་སྒང་པའི་ཐུགས་ཀྱི་སྲས་སུ་འཁྲུངས་པ་དེ་ཡིན། བརྒྱུད་པ་བདུན་པ་སངས་རྒྱས་སྟོན་པ་སངས་རྒྱས་གཉག་སྟོན་གྱི་རྒྱལ་ཚབ་ཏུ་གྱུར་པ་དེ་ཡིན། དེའི་སློབ་མ་མཁས་གྲུབ་ཤངས་སྟོན། དེའི་སློབ་མ་འཇོག་པ་རྒྱལ་མཚན་འབུམ། དེའི་སློབ་མ་གྲུབ་ཐོབ་ཆོས་འབྱུང་རིན་ཆེན་ལ་སོགས་པ་རྣམས་ཀྱིས་ཤངས་པའི་ཆོས་རྣམས་དར་བར་མཛད་པ་ཡིན་ནོ། །