གཉིས་པ་རབ་བྱུང་གི་ཡོ་བྱད་ལྷུང་བཟེད་སོགས་བཤད་པ།

གཉིས་པ་རབ་བྱུང་གི་ཡོ་བྱད་ལྷུང་བཟེད་སོགས་བཤད་པ་ལ།

རབ་བྱུང་གི་ཡོ་བྱད་རྣམས་ལས་གསུམ་ཙམ་འདིར་འཆད་ལ་ལྷག་མ་དག་གཞི་སྨད་དུ་འཆད་པར་འགྱུར་ལ། འདིར་ཉེར་མཁོ་ལྷུང་བཟེད་དང་མཁར་གསིལ་དང་ཆུ་ཚགས་བཤད་པ་དང་གསུམ་ལས། དང་པོ་ནི། རྩ་བར། ལྷུང་བཟེད་མེད་པར་རབ་ཏུ་བྱུང་བ་དང་བསྙེན་པར་རྫོགས་པར་མི་བྱའོ། །ཆུང་ངུ་དང་ཆེན་པོ་དང་སྐྱ་བས་ཀྱང་མི་བྱའོ། །ཞེས་སོགས་གསུངས་སོ། །དེའི་དོན་ལ་དགེ་སློང་གི་ལྷུང་བཟེད་ཀྱི་ཚད་གང་ཞེ་ན། ལྷུང་བཟེད་ཀྱི་ཁའི་ཆའི་མཐའ་འམ་མུ་ཁོ་ན་ནས་མཐེ་བོའི་ལྟོ་གང་མཐེ་བོའི་སོར་གཅིག་སྟེ་མཐེ་བོའི་ཞེང་ཚད་ཟས་མ་བླུག་པར་སྟོང་པར་བཞག་པའི་ནང་གི་ལྷག་མར་འབྲས་ཆན་དང་ཚོད་མའི་ཚད་འདི་ཙམ་ཞིག་ཤོང་བ་དེ་ནི་ཊཱི་ཀ་ལས་རིགས་པ་ཡིན་ཏེ་བྱིན་གྱིས་བརླབ་ཏུ་རུང་བ་ཞེས་བྱ་བའི་ཐ་ཚིག་གོ་ཞེས་གསུངས་སོ། །

དེའང་དགེ་སློང་གི་ལྷུང་བཟེད་ཆུང་ཚད་ནི།

འབྲས་ཐུག་པོ་ཆེ་ཡུལ་མ་ག་ངྷའི་བྲེའུ་ཆུང་གང་ལ་བོད་ཀྱི་བྲེའི་དྲུག་ཕུལ་དོའོ། །དེ་བཙོས་པས་འབྲས་ཆན་བྲེ་གང་སྟེ། བམ་པོ་ལྔ་བཅུ་པ་ལས། འབྲས་ཐུག་པོ་ཆེ་ཆན་དུ་བཅོས་ནས་སུམ་འགྱུར་དུ་བརྩིའོ། །ཞེས་སོ། །ཚོད་མ་འབྲས་ཆན་གྱི་སུམ་ཆ་ཡིན་ཞེས་འགྲེལ་ཆུང་ནས་བཤད་ཅེས་གསུང་བས་སྲན་ཚོད་དང་བཅས་ཚོད་མ་དང་བཅས་པ་ལ་ཕུལ་དོའོ། །མཐེ་བོའི་ལྟོ་གང་སྟོང་པར་བཞག་པ་དེར་ཕུལ་གང་ཤོང་བ། ཁད་ཆད་བཀང་ན་ནང་དུ་ཕུལ་དགུ་ཤོང་བ་དེ་ནི་རིགས་པ་ཡིན་ནོ། །ཞེས་སྦྱར་རོ། །དགེ་སློང་གི་ལྷུང་བཟེད་ཆེན་པོའི་ཚད་ནི། བྲེའུ་ཆུང་གང་ལྷག་པ་ནས་དོའི་བར་ཞེས་པས། འབྲས་ཐུག་པོ་ཆེ་མ་ག་ངྷའི་བྲེའུ་ཆུང་དོ་ལ་བོད་ཀྱི་དྲུག་ཕུལ་བཞིའོ། །དེ་བཙོས་པས་སུམ་འགྱུར་དུ་འཕེལ་བས་འབྲས་ཆན་བྲེ་དོའོ། །ཚོད་མ་འབྲས་ཆན་གྱི་སུམ་ཆ་སྟེ་ཕུལ་བཞིའོ། །མཐེ་བོའི་ལྟོ་གང་སྟོང་པར་བཞག་པ་དེར་ཕུལ་དོ་ཤོང་བ་སྟེ། ཁད་ཆད་དུ་བཀང་ན་ནང་དུ་ཕུལ་བཅོ་བརྒྱད་ཤོང་བ་དེ་ནི་རིགས་པ་ཡིན་ནོ་ཞེས་སྦྱར་རོ། །

དགེ་སློང་གི་ལྷུང་བཟེད་འབྲིང་ཚད་ནི།

བྲེའུ་ཆུང་གང་ལྷག་པ་ནས་དོའི་བར་ཞེས་པས། མ་ག་ངྷའི་བྲེའུ་ཆུང་གང་དང་དོའི་བར་ནི་བྲེའུ་ཆུང་ཕྱེད་དང་དོ་སྟེ། དེ་ལ་བོད་ཀྱི་དྲུག་ཕུལ་གསུམ་མོ། །དེ་བཙོས་པས་སུམ་འགྱུར་དུ་བརྩི་བ་དང་ཚོད་མ་འབྲས་ཆན་གྱི་སུམ་ཆར་བརྩི་བ་སྔ་མ་བཞིན་ཏེ། མཐེ་བོའི་ལྟོ་གང་སྟོང་པར་བཞག་པ་དེར་ཕུལ་ཕྱེད་དང་དོ་ཤོང་བ་སྟེ། ཁད་ཆད་དུ་བཀང་ན་ཕུལ་ཕྱེད་དང་བཅུ་བཞི་ཤོང་བ་དེ་ནི་རིགས་པ་ཡིན་ནོ་ཞེས་སྦྱར་རོ། །དེར་མ་ཟད་ཕུལ་བཅོ་ལྔའམ་བཅུ་གསུམ་ཤོང་བ་ལ་སོགས་པ་ཡང་འབྲིང་ཚད་དུ་བཟུང་སྟེ། རྣམ་འབྱེད་འགྲེལ་བ་ལས། ལྷུང་བཟེད་འབྲིང་ཚད་ནི་དེ་གཉིས་ཀྱི་བར་གང་ཡང་རུང་བ་ཤོང་བའོ་ཞེས་བཤད་དོ། །སྦོམ་དགའ་མོས་ཁྱིམ་པ་མོའི་བུ་ཆུང་གི་རོ་ལྷུང་བཟེད་ཆེན་པོར་བཅུག་སྟེ་དོར་བ་ལ་བརྟེན་ནས་དགེ་སློང་མས་ལྷུང་བཟེད་ཆུང་ཚད་ཁོ་ན་འཆང་དགོས་ཏེ། རྩ་བར། དགེ་སློང་མས་དགེ་སློང་གི་ཆུང་ལས་ལྷག་པ་མི་འཆང་ངོ། །ཞེས་གསུངས་པའི་ཕྱིར་རོ། །དེས་ན་དགེ་སློང་མའི་ལྷུང་བཟེད་ཆེན་པོའི་ཚད་དགེ་སློང་གི་ལྷུང་བཟེད་ཆུང་ངུའོ། །དེ་ལས་ཚད་ལྷག་པ་མི་བཅང་ངོ༌། །སྐབས་འདིར་ཊཱི་ཀ་ལས། དགེ་སློང་མ་རྣམས་ཀྱི་ལྷུང་བཟེད་ཆུང་ངུ་ནི་ལྟོ་འགྲངས་པ་ཙམ་ཤོང་བ་ཡིན་ནོ། །འབྲིང་ནི་དེ་གཉིས་ཀྱི་བར་ཡིན། ཞེས་སོ། །ལུང་དགེ་སློང་མའི་རྣམ་འབྱེད་ལས། ལྷུང་བཟེད་ཆེན་པོ་ནི་ཡུལ་མ་ག་ངྷའི་བྲེའུ་ཆུང་གང་ངོ༌། །ཆུང་ངུ་ནི་བྲེའུ་ཆུང་ཕྱེད་དོ། །དེའི་བར་ནི་བར་མའོ་ཞེས་བཤད་ཀྱང༌། དེ་ནི་འབྲས་སྐམ་པོའི་ཚད་བཤད་པའོ། །དགེ་སློང་གི་ལྷུང་བཟེད་ཀྱི་གཞི་ལྕགས་སྒོར་བྱར་རུང་དགེ་སློང་མ་དེས་ལྷུང་བཟེད་དེའི་འོག་གཞིར་ཞ་ཉེའི་དབྱར་འདབ་གཞག་གོ། །འདི་ལ་རང་གི་རྣམ་བཤད་དང་ཊཱི་ཀ་ལས། སའི་ཕྱོགས་གང་དུ་ལྷུང་བཟེད་བཞག་པའི་འོག་གཞི་དེར་ཞ་ཉེའི་དབྱར་འདབ་བཞག་ཅེས་བཤད་ཀྱང༌། ལུང་ཕྲན་ཚེགས་ལས། ལྷུང་བཟེད་ལ་ཞ་ཉེའི་དབྱར་འདབ་ཀྱིས་གླན་པར་བྱའོ། །ཞེས་གསུངས་ལ། སྐབས་འདིའི་འགྲེལ་ཆུང་ལས། ལྷུང་བཟེད་དང་འབྲལ་དུའང་མི་རུང་ངོ་ཞེས་པ་ནི་མི་རིགས་ཏེ། གདིང་བ་དང་བྲལ་བ་ལ་ནི་ཉེས་པ་མེད་དོ། །ཞེས་གསུངས་པ་དེ་དང་རྒྱུ་མཚན་མཚུངས་པའི་ཕྱིར་རོ། །བོད་བྲེ་གང་ལ་ཡ་འཁྱོར་ཉེར་གཅིག་ཡོད་ལ། ཡ་འཁྱོར་ཉེར་གཅིག་གི་དྲུག་ཆ་ལ་དྲུག་ཕུལ་ཞེས་བྱའོ། །དྲུག་ཕུལ་གཅིག་ལ་ཡ་འཁྱོར་གསུམ་དང་ཕྱེད་ཡིན་ནོ། །ལྷུང་བཟེད་ཆུང་ངུ་ནི་ཚད་དུ་མ་ཆོག་པས་བྱིན་རླབས་མི་ཆགས་ཀྱང་སེམས་ཀྱིས་བརྟག་པ་སྨན་ཕོར་གྱིས་ཡོངས་སུ་སྤྱད་པས་འཆང་དུ་གནང་བའོ། །མདོག་དབྱིབས་ལྷུང་བཟེད་དང་འདྲ་བ་སྟེ། རྣམ་འབྱེད་ལས། ལྷུང་བཟེད་ཆུང་ངུ་ཡང་གསལ་བ་ཟླུམ་པ་ལོངས་སྤྱད་བཟོད་པ་ཡིན་ནོ། །ཞེས་སོ། །ལྷུང་བཟེད་བཙལ་ཏེ་མ་རྙེད་ན། ཊཱི་ཀ་ལས། ལྷུང་བཟེད་མེད་ན་རབ་ཏུ་དབྱུང་བར་བྱའི་བསྙེན་པར་རྫོགས་པར་ནི་མི་བྱའོ། །ཞེས་བཤད་དེ། སྔ་མ་ཉེས་མེད་འཆགས་ལ་ཕྱི་མ་ཉེས་བཅས་འཆགས་པའོ། །རྒྱུ་རུང་བ་ས་ལྕགས་གཉིས་ཡིན་ཏེ། རྩ་བར། བྱིན་གྱིས་བརླབ་ཏུ་རུང་བ་ནི་རྣམ་པ་གཉིས་ཏེ། ལྕགས་ལས་བྱས་པ་དང་ས་ལས་བྱས་པའོ། །ཞེས་པས་སོ། །ཁ་དོག་ནག་པོ་རུང་བ་ཡིན་ཏེ། རྩ་བར། སྐྱ་བས་ཀྱང་མི་བྱའོ། །ཞེས་པས་སོ། །དབྱིབས་སྒོ་ང་ཕྱེད་བཀས་པ་ལྟར་ཟླུམ་པ་ཅིག་དགོས་ཀྱི་གྲུ་བཞི་སོགས་མི་རུང་ངོ། །ངོ་བོའི་རུང་བ་ལྷན་པ་ལྔ་ལས་ལྷག་མེད་པ་ཞིག་དང་ལོངས་སྤྱོད་དུ་བཟོད་པ་ཞིག་དགོས་ཏེ། རྩ་བར། ལྷན་རིངས་དང་ཐམ་ཕྲན་དང༌། ཞེས་སོགས་གསུངས་པས་སོ། །ཆོ་གས་བྱིན་གྱིས་བརླབ་ཏུ་རུང་བ་དགོས་ཏེ། འབྲེལ་མེད་ལྷུང་བཟེད་ལྟ་བུ་མ་ཡིན་དགོས་པའི་ཕྱིར་རོ། །