བསླུ་རྡོ་ངོས་འཛིན།

བསླུ་རྡོ་ངོས་འཛིན།

ཞིབ་ཏུ་བལྟ་བར་བྱ། རྗེ་བཙུན་ཏཱ་ར་ནཱ་ཐའི་ཞལ་གདམས་མགུར་འབུམ་ལས། ཉམས་རྟོགས་མཐོན་པོར་གྲགས་པ་མང་པོ་ཡང། །སྙིང་རྗེ་མེད་པས་ངན་པའི་ལམ་དུ་གོལ། །ཐེག་ཆེན་ཟེར་ཡང་ཐེག་པ་དམན་པར་ལྷུང། །རང་དོན་གཞན་ཕན་གཉིས་ཀ་ཤོར་བ་མང། །བདག་པས་གཞན་གཅེས་སྙིང་རྗེའི་བསམ་པ་ཅན། །ཐབས་ལ་མཁས་པ་ཐེག་པ་ཆེན་པོའི་ཆོས། །ཐེག་པ་ཆེ་ཆུང་ལྟ་བས་ཁྱད་མི་འབྱེད། །བྱང་ཆུབ་སེམས་དང་སྙིང་རྗེ་སྤྱོད་པའི་ཁྱད། །ཕྲག་དོག་ཆེ་ཞིང་ཁ་རྒོད་བསམ་པ་ངན། །ཆོས་རྒྱུད་བུ་རྒྱུད་བཟང་ཡང་ག་ལ་ཕན། །དཀའ་སྤྱད་འདུག་ཚུལ་བཟང་ཡང་བསླུ་རྡོ་༼འདིས་མང་པོ་བསླུ་བཞིན་འདུག༽ཡིན། །བྱ་བཏང་དམ་བཅའ་ཆེ་ཡང་ཚིག་སྐམ་ཡིན། །ཁྱོད་ནི་གནས་ལུགས་རྟོགས་པ་ཡིན་ནོ་ཞེས། །ཁ་འཇམ་ཞེ་གདུག་བླ་མ་གཡོ་ཅན་གྱིས། །བསྟོད་ར་བཏང་བས་རང་རྒྱུད་མ་ཐུལ་པའི། །བླུན་པོ་ཕལ་ཆེར་བླུན་དད་སྐྱེད་དུ་༼བསྟོད་ར་བྱེད་ན་རྨོངས་དད་བྱེད། ཕན་སེམས་ཀྱི་སྐྱོན་བརྗོད་ན་དད་པ་ལོགས་ནས་སྨོད་པ་བྱེད༽འཇུག །རྨོངས་པ་ཕལ་ཆེར་རང་ལ་བསྟོད་ན་དགའ། །དམ་པ་རྣམས་ནི་དྲང་པོར་སྨྲས་ན་མགུ། །ཕྱོགས་ཞེན་ཀོ་ལོང་དམ་ལ་བཟང་འདོད་ཅན། །རང་རྒྱུད་མ་ཐུལ་སྒྲུབ་པའི་དགོས་པ་སྟོར། །རང་ཉིད་བཟང་འདོད་གཞན་ལས་ངན་མི་འདོད། །ལྐོག་ཏུ་ཆོས་མིན་སྤྱོད་པ་སྣ་ཚོགས་བྱེད། །རི་ཁྲོད་འགྲིམས་ན་གྲགས་པ་ཆེ་རུ་རེ། །འདུ་འཛི་སྦངས་ཀྱིན་དད་ཅན་འདུ་ལ་རེ། །བྱ་བཏང་བྱས་ཀྱིན་ཟས་ནོར་ཡོང་དུ་རེ། །ཕམ་ཁ་བླང་གིན་ཕུགས་སུ་རྒྱལ་འདོད་ཅིག །གཞན་ལ་བསྟོད་ན་རང་ལ་བྱམས་སུ་རེ། །དག་སྣང་བྱས་ནས་དབང་དུ་བསྡུ་འདོད་དང། །གཞན་ཕྱོགས་ནུབ་ཅིང་རང་ཕྱོགས་དར་ཕྱིར་རམ། །གྲགས་པ་སྒྲོག་ཕྱིར་ཆོས་རྫུ་བྱེད་པ་ནི། །སེམས་ཅན་ཐམས་ཅད་བསླུ་བའི་སྡིག་པོ་ཆེ། །དེ་ཕྱིར་རྫུན་མེད་ཕྱི་ནང་མེད་པར་གཅེས། །སྙན་གྲགས་འདོད་པས་སློབ་མ་བསླུ་བ་དང། །རྙེད་བཀུར་འདོད་པས་དད་ཅན་བསླུ་བ་དང། །མ་རྟོགས་བཞིན་དུ་གནས་ལུགས་རྟོགས་སོ་ཞེས། །ང་རྒྱལ་བྱེད་པ་སྙིང་རྗེའི་འགལ་ཟླ་ཡིན། །བདེན་པའི་ངག་དང་དྲང་པོའི་བསམ་པ་དང། །ང་རྒྱལ་སྤངས་ནས་འགྲོ་ཀུན་གོང་དུ་འཁུར། །གཞན་སྐྱོན་མི་བསམ་རང་གི་སྐྱོན་ལ་རྟོག །བྱང་ཆུབ་སེམས་དང་སྙིང་རྗེ་རྒྱས་པར་འགྱུར། །དགྲ་གཉེན་ཚེ་འདིར་བློ་ཡིས་བཏགས་པ་ཡིན། །ཉེ་རིང་མེད་པར་ཕན་སེམས་སྙིང་རྗེ་སྒོམས། །ཞེས་པ་འདིའི་ཚིག་དོན་ལ་ཞིབ་དུ་བསམ་གཞིག་གནང་དང་གདམས་ངོ་མ་ཞིག་ཡོད་དོ། །རྒྱལ་ཁམས་པ་ཏཱ་ར་ནཱ་ཐས་བདག་ཉིད་ཀྱི་རྣམ་ཐར་ངེས་པར་བརྗོད་པའི་དེབ་གཏེར་ཤིན་ཏུ་ཞིབ་མོ་མ་བཅོས་ལྷུག་པའི་རྟོགས་བརྗོད་ལས། ཇི་སྐད་དུ། ཀྱེ་མ་བསོད་ནམས་ཟད་པའི་མི། །ལྷ་སྐལ་ཆད་ནས་འབྱུང་པོ་སྒྲུབ། །ཅེས་པ་ནས། སྔར་མི་བསྟེན་པ་ཅིག་གིས་འདྲེ་ཆེན་པོ་རེ་གསར་དུ་བསྟེན་དགོས་ན། ཁོ་རང་གི་དམ་ཚིག་བསྲེ་ལུགས་དང། ཁོ་དབང་དུ་བསྡུ་ལུགས་དང། རྟེན་འབྲེལ་བསྒྱུར་ཕྱོགས་མང་པོ་དང། སྔར་གྱི་ལྷ་དང་འཁོན་སེལ་དང། ཕྱི་འབྲང་གི་བགེགས་སེལ་ཚུལ་ཐབས་མང་པོ་ཅིག་བླ་མ་ནུས་པ་ཅུང་ཟད་ཡོད་པ་ཅིག་གིས་བྱེད་དགོས། དེ་མིན་འདྲེ་དྲག་ཤས་ཁོ་རང་དང་མུ་མ་འབྱོར་བའི་སྔོན་ལ། འཁོར་གདུག་པ་ཅན་རྣམས་ཀྱིས་གོང་ཁའི་སྒོ་ཉལ་གཏོང་བ་ཡིན། ལྷ་རྙིང་པ་ཡང་དང་འགྲས་འགྲོ་བ་ཡིན། དང་པོའི་གྲུབ་ཐོབ་ཡིན་ཟེར་བ་དེ་འདྲས་ཀྱང། གཙང་བཙན་སོགས་འཇིག་རྟེན་རང་རྒྱུད་པ་མིན། ཡེ་ཤེས་པའི་སྤྲུལ་པ་ཡིན་ཟེར་ཏེ། གནས་ཚུལ་ལ་འཇིག་རྟེན་འདས་པའང་ཡིན་སྲིད། སངས་རྒྱས་མིན་པ་སུས་ཤེས། འཕྲལ་འཇིག་རྟེན་པའི་ཚུལ་བསྟན་པ་རང་གིས། ཡེ་ཤེས་པའི་ཁྱུ་ནས་བུད། ལམ་སྣ་འདྲེན་མཁན་ཡིན་ན་འཇིག་རྟེན་པའི་ཚུལ་སྟེན་དོན་རང་མེད། སངས་རྒྱས་བྱང་སེམས་ཅིག་བཤན་པའི་ཚུལ་བསྟན་ཡོད་ན། ཁོང་བཤན་པ་དངོས་ཀྱི་བྱ་བ་བྱེད་ཀྱི། ལེགས་པར་རབ་ཏུ་ཉོན་ལ་ཡིད་ལ་བཟུང་ཤིག་དང་ཟེར་ཆོས་བཤད་མི་ཡོད། འོ་འཇིག་རྟེན་པའི་ཚུལ་བཟུང་བ་དེ་ཀ་ཁོ་འཇིག་རྟེན་པའི་ཚུལ་འཛིན་དགོས་ཙ་ན། གསོད་གཅོད་བརྡུང་འཕྲོག་རྫུན་གཏོང། མ་རུངས་པའི་ལས་བྱེད་ཀྱི། ཞིང་ཁམས་བདེ་བ་ཅན་དུ་འཁྲིད་རོགས་མི་བྱེད། དེ་རུ་དངོས་སུ་འཁྲིད་རོགས་བྱེད་པ་ལ། ཚུལ་ཡང་འཇིག་རྟེན་ལས་འདས་པའི་ཚུལ་ཅིག་ཀ་སྟོན་དགོས་པ་ལགས་མོད། དེས་ན་རང་རྒྱུད་པ་ཡིན་ཡང་འདྲ། སྤྲུལ་པ་ཡིན་ཡང་འདྲ། ཚུལ་དེ་འཇིག་རྟེན་པ་རང་དུ་འདུག་ན། འཇིག་རྟེན་པ་རང་གི་འགྲོགས་ལུགས་དང། བསྟེན་ལུགས་བྱེད་དགོས། དེ་ཡང་འཇམ་པོ་ལ་འཇམ་པོའི་འགྲོགས་ལུགས་དང། མ་རུངས་པ་ལ་མ་རུངས་པའི་བསྟེན་ལུགས་བྱེད་དགོས་པ་ཡིན། དེས་ན་འཇིག་རྟེན་འདས་པ་རང་དང། འཇིག་རྟེན་པ་ཡིན་ཀྱང་དབང་ཕྱུག་ཁྱབ་འཇུག་སོགས་ལྷའི་རྒྱལ་པོ་ཆེན་པོ་དང། མི་ཡུལ་ན་ཡོད་པའི་སྡེ་བརྒྱད་དྲག་རྩལ་ཅན་ཏེ། སྡེ་གསུམ་པོ་འདི་ལ་ཁྱད་ཆེན་པོ་རང་ཡོད་ལགས། བཅོམ་ལྡན་འདས་ཀྱི་ཞལ་མཐོང་མ་མཐོང་སོགས་ལའང་ཤིན་ཏུ་ཁྱད་ཆེ་བ་གོ་དགོས། ཞེས་གསུངས་པ་ལྟར་འཇིག་རྟེན་པའི་ཚུལ་བཟུང་བ་ཡིན་ན་འཇིག་རྟེན་པ་བཞིན་བསྟེན་དགོས་པ་ཤེས་དགོས་སོ། དངོས་གྲུབ་དཔལ་ནས།