གཉིས་པ་རང་ལུགས་བཤད་པ།
གཉིས་པ་རང་ལུགས་བཤད་པ་ལ།
མཚན་ཉིད། དབྱེ་བ་གཉིས། སྒྲ་དོན་སྣང་ཡུལ་དུ་བྱེད་པའི་ཞེན་རིག རྟོག་པའི་མཚན་ཉིད། མཚན་གཞི་ནི། བུམ་པ་འཛིན་པའི་ཞེན་རིག་ལྟ་བུའོ། །མཚན་ཉིད་དེའི་ཟུར་གྱི་སྒྲ་དོན་ཞེས་པ་ནི་རྟོག་པའི་སྣང་ཡུལ་བྱེད་པ་ལས་སྒྲ་སྤྱི་དོན་སྤྱི་སོ་སོར་བྱེད་པ་མ་ཡིན་ལ། དེ་ཡང༌། སྒྲ་དོན་ཆོས་ནི་རྣམ་པ་གསུམ། །ཞེས་པའི་སྒྲ་དོན་དང་འདྲ་བའོ། །སྒྲ་དོན་འདྲེས་རུང་ཞེས་པ་ནི་སྒྲ་སྤྱི་དང་དོན་སྤྱི་སོ་སོར་བྱེད་པ་ཡིན་པར་ཤེས་དགོས་སོ། །ཡང་ན་རྟོག་པའི་མཚན་ཉིད་ཡོད་དེ། གཏན་ཚིགས་རིགས་པའི་དོན་བསྡུས་ལས། བརྗོད་བྱ་རྗོད་བྱེད་འདྲེས་རུང་སྣང་བའི་བློ། ཞེས་གསུངས་ལ། དེ་ལྟར་རྣམ་ངེས་ལས་གསུངས་ཏེ། ཇི་སྐད་དུ། རྟོག་པ་ནི་རྗོད་པ་དང་འདྲེས་རུང་བར་སྣང་བའི་ཤེས་པ་སྟེ། ཞེས་གསུངས་པའི་ཕྱིར་རོ། །
གཉིས་པ་ལ་དབྱེ་ན།
རྟོག་པ་དོན་མཐུན་དང༌། དོན་མི་མཐུན་གཉིས་ཡོད། རང་གི་འཛིན་སྟངས་ལ་མ་འཁྲུལ་བའི་ཞེན་རིག རྟོག་པ་དོན་མཐུན་གྱི་མཚན་ཉིད། མཚན་གཞི་ནི། འཆི་བ་མི་རྟག་པ་རྟོགས་པའི་ཞེན་རིག་ལྟ་བུའོ། །རང་གི་འཛིན་སྟངས་ལ་འཁྲུལ་བའི་རིག་པ། རྟོག་པ་དོན་མི་མཐུན་གྱི་མཚན་ཉིད། མཚན་གཞི་ནི། ཚེ་འདི་རྟག་པར་འཛིན་པའི་ཞེན་རིག་ལྟ་བུའོ། །ཐབས་ཁྱད་པར་ཅན་གྱི་རྟོག་པ་རྣམས་ཀྱི་འཛིན་སྟངས་ཀྱི་ཡུལ་ཡོད་མེད་དཔྱད་པར་བྱའོ། །
ཡང་རྟོག་པ་ལ་དབྱེ་ན། ཐོས་བྱུང་དང༌། བསམ་བྱུང་དང༌། སྒོམ་བྱུང་དུ་གྱུར་བའི་རྟོག་པ་གསུམ་ཡོད། སྒྲ་སྤྱི་ཙམ་གྱི་སྒོ་ནས་ངེས་པ་རྙེད་པའི་ཞེན་རིག་དེ། ཐོས་བྱུང་དུ་གྱུར་བའི་རྟོག་པའི་མཚན་ཉིད། མཚན་གཞི་ནི། སྒྲ་མི་རྟག་པ་འཛིན་པའི་ཡིད་དཔྱོད་ལྟ་བུའོ། །དོན་ལ་བསམ་ནས་ཚད་མས་ངེས་པ་རྙེད་པའི་ཞེན་རིག བསམ་བྱུང་དུ་གྱུར་བའི་རྟོག་པའི་མཚན་ཉིད། མཚན་གཞི་ནི། སྡུག་བདེན་མི་རྟག་པ་རྟོགས་པའི་རྗེས་དཔག་ལྟ་བུའོ། །བསམ་བྱུང་གི་དོན་ལ་ཡང་ཡང་འདྲིས་པར་བྱས་པའི་ཤིན་སྦྱངས་ཁྱད་པར་ཅན་གྱིས་ཟིན་པའི་ཞེན་རིག་དེ། སྒོམ་བྱུང་དུ་གྱུར་བའི་རྟོག་པའི་མཚན་ཉིད། མཚན་གཞི། བསམ་གཏན་གྱི་དངོས་གཞི་གྱུར་བའི་ཞེན་རིག་ལྟ་བུའོ། །གཞན་ཡང་རྟོག་པ་ལ་དབྱེ་ན། མིང་སྦྱོར་རྟོག་པ་དང༌། དོན་སྦྱོར་རྟོག་པ་གཉིས། བརྡ་དུས་ཀྱི་དོན་དང༌། ཐ་སྙད་དུས་ཀྱི་མིང་སྦྱར་ནས་འཛིན་པའི་ཞེན་རིག་དེ། མིང་སྦྱོར་རྟོག་པའི་མཚན་ཉིད། མཚན་གཞི་ནི། ལྟོ་ལྡིར་བ་ལ་བུམ་པའོ་སྙམ་དུ་འཛིན་པའི་རྟོག་པ་ལྟ་བུའོ། །དོན་ལ་མིང་གི་ཐ་སྙད་མ་སྦྱར་བར་འཛིན་པའི་རྟོག་པ་དེ། དོན་སྦྱོར་རྟོག་པའི་མཚན་ཉིད། མཚན་གཞི་ནི་སྐྱེས་བུ་རྟ་ཞོན་པ་འདི་སུ་ཡིན་སྙམ་དུ་འཛིན་པའི་རྟོག་པ་ལྟ་བུ་དང༌། སྒོམ་བྱུང་གི་རྟོག་པ་ལྟ་བུའོ། །