གཉིས་པ་གཟུང་རྟོག་ལ་དབྱེ་ན།

གཉིས་པ་གཟུང་རྟོག་ལ་དབྱེ་ན་གཉིས།

ལྡོག་པ་གཟུང་རྟོག་དང་འཇུག་པ་གཟུང་རྟོག་གཉིས་ཡོད་དེ། མདོ་ལུགས་མ་ལས། རྩ་བར། གཞི་དང་དེ་ཡི་གཉེན་པོ་ཡིས། །གཟུང་བར་རྟོག་པ་རྣམ་པ་གཉིས། །ཞེས་པ་ལ་གཞི་ཀུན་ནས་ཉོན་མོངས་པ་སྐྱོན་ཅན་དུ་འཛིན་པ་དང༌། ཀུན་ནས་ཉོན་མོངས་པ་དེའི་གཉེན་པོ་རྣམ་བྱང་ཡོན་ཏན་ཅན་དུ་འཛིན་པའི་ཁྱད་པར་དེ་ཡིས་རིམ་པ་ལྟར་ལྡོག་པའི་གཟུང་བར་རྟོག་པར་དང༌། འཇུག་པའི་གཟུང་བར་རྟོག་པ་རྣམ་པ་གཉིས་བསྟན་ཏོ། །ཞེས་གསུངས་སོ། །དེ་གཉིས་ཀྱི་མཚན་ཉིད་རིམ་བཞིན། གང་གཟུང་བྱའི་ཡུལ་སྐྱོན་ཅན་དུ་བདེན་པར་ཞེན་པའི་རིགས་སུ་གནས་པའི་རྟོག་པ་དང༌། གང་གཟུང་བྱའི་ཡུལ་ཡོན་ཏན་ཅན་དུ་བདེན་པར་ཞེན་པའི་རིགས་སུ་གནས་པའི་རྟོག་པའོ། །དེ་ལྟར་འཐད་དེ། མདོ་ལུགས་མ་ལས། གཟུང་རྟོག་ལ་ཡང་ལྡོག་པའི་གཟུང་རྟོག་དང༌། འཇུག་པའི་གཟུང་རྟོག་གཉིས་སོ། །དེ་ལ་གང་གཟུང་བྱའི་ཡུལ་སྐྱོན་ཅན་དུ་མཐོང་ཞིང་དེར་ཞེན་པའི་བློ་ནི་ལྡོག་པའི་གཟུང་རྟོག་དང༌། གང་གཟུང་བྱའི་ཡུལ་ཡོན་ཏན་ཅན་དུ་མཐོང་ཞིང་དེར་ཞེན་པའི་བློ་ནི་འཇུག་པའི་གཟུང་རྟོག་གོ །ཞེས་གསུངས་སོ། །གཟུང་རྟོག་དེ་གཉིས་ལ་དབྱེ་ན་དམིགས་ཡུལ་དགུའི་སྒོ་ནས་དབྱེ་བ་དགུ་རེ་དགུ་རེ་ཡོད་དེ། མདོ་ལུགས་མ་ལས། དེ་དག་རེ་རེ་ཡང་དགུ་དགུར་དབྱེ་བ་ནི། རྨོངས་དང་ཕུང་སོགས་བྱེ་བྲག་གིས། །དེ་ནི་སོ་སོར་རྣམ་པ་དགུ །ཞེས་པ་ལ་རྨོངས་པ་སྟེ་མ་རིག་པ་དང༌། ཕུང་པོ་དང་སོགས་པའི་སྒྲས་ཁམས་དང་སྐྱེ་མཆེད་ལ་སོགས་པའི་བྱེ་བྲག་གིས་གཟུང་རྟོག་གཉིས་པོ་དེ་ནི་སོ་སོར་དབྱེ་བ་རྣམ་པ་དགུ་དགུ་ཡིན་ནོ། །མདོ་ལས། ཤཱ་རིའི་བུ། ཆོས་འདི་དག་ནི་ཇི་ལྟར་བྱིས་པ་སོ་སོའི་སྐྱེ་བོ་རྣམས་མངོན་པར་ཞེན་པ་དེ་ལྟ་བུར་ཡོད་པ་མ་ཡིན་པའི་ཕྱིར་རོ། །གསོལ་པ། ཆོས་འདི་དག་ཇི་ལྟ་བུར་ཡོད་པ་ལགས། བཀའ་སྩལ་པ། ཇི་ལྟར་མེད་པ་དེ་ལྟར་ཡོད་ལ་དེ་ལྟར་ཡོད་པ་མ་ཡིན་པས་དེའི་ཕྱིར་མ་རིག་པ་ཞེས་བྱའོ། །ཞེས་སོགས་དང་དེ་ལ་བྱིས་པ་གང་དག་མ་རིག་པ་དང་སྲེད་པ་དག་གི་མངོན་པར་ཞེན་པ་དེ་དག་གིས་ཡོད་པ་མ་ཡིན་པ་ལ་བཏགས་ཏེ། ཡོད་པ་མ་ཡིན་པ་ལ་མངོན་པར་ཞེན་ནམ། འདི་ལྟ་སྟེ། རྟག་པ་དང་ཆད་པའི་མཐའ་གཉིས་ལ་ཆགས་པ་ནས། དེ་དག་ནི་མི་ཤེས་མི་མཐོང་བ་སྟེ། དེ་དག་གིས་ཆོས་གང་དག་ཡོད་པ་མ་ཡིན་པའི་ཆོས་དེ་དག་ཡོངས་སུ་བཏགས་པ་མིང་དང་གཟུགས་ལ་མངོན་པར་ཞེན་ཅིང༌། ཞེས་པ་ནས། མ་འདྲེས་པ་བཅོ་བརྒྱད་ཀྱི་བར་དག་ལ་ཡང་མངོན་པར་ཞེན་ཏོ། །ཞེས་སོགས་གསུངས་སོ། ། འདིར་ཡང༌། རྟོག་པ་འདི་དག་མ་རིག་པ་དང༌། སྲེད་པ་མཐའ་གཉིས་ལ་ཞེན་པ་དང༌། ཡོད་པ་མ་ཡིན་པ་ལ་ཡོད་པར་ཞེན་པའི་ངོ་བོ་ཡིན་པར་གསུངས་པ། འདིས་ཀྱང་ངེས་འབྱེད་ཡན་ལག་བཞི་པོ་རྟོག་པ་འདི་དག་ཡིན་པ་དང༌། དགག་རྟོག་ཡིན་པ་བསལ་བ་ཡིན་ནོ། །ཞེས་གསུངས་སོ། །ལྡོག་པ་གཟུང་རྟོག་གི་དམིགས་ཡུལ་དགུ་ནི། རྨོངས་པ་མ་རིག་པ་དང༌། ཀུན་ཉོན་གྱིས་བསྡུས་པའི་ཕུང་པོ་དང༌། མིང་གཟུགས་ལ་མངོན་ཞེན་གྱི་བློ་དང༌། རྟག་ཆད་ཀྱི་མཐའ་གཉིས་ལ་ཆགས་པ་དང༌། ཀུན་བྱང་མི་ཤེས་པ་དང༌། འཕགས་པའི་ལམ་ལ་མི་གནས་པ་དང༌། ཕྱིན་ཅི་ལོག་ཏུ་དམིགས་ནས་ཞེན་པ་དང༌། བདག་ལ་སོགས་པ་ལ་ཞེན་པ་དང༌།གདོད་ནས་དག་པའི་ཉོན་མོངས་པའི་འབྲས་བུ་བསྐྱེད་པ་དང་དགུའོ། །འཇུག་པ་གཟུང་རྟོག་གི་དམིགས་ཡུལ་དགུ་ནི། རྣམ་བྱང་གི་ཕུང་བོ་དང༌། རྣམ་བྱང་གི་སྐྱེ་མཆེད་དང༌། རྣམ་བྱང་གི་རིགས་དང༌། སྐྱེ་བ་རྣམ་བྱང་གི་རྟེན་འབྲེལ་དང༌། སྟོང་བ་ཉིད་དང༌། ཕ་རོལ་ཏུ་ཕྱིན་པའི་དོན་དང༌། མཐོང་ལམ་དང༌། སྒོམ་ལམ་དང༌། མི་སློབ་ལམ་དང་དགུའོ། །