དྲིས་ལན་ཉེར་གཉིས་པ་ལ་དྲི་བ་དང་ལན་གཉིས།
དྲིས་ལན་ཉེར་གཉིས་པ་ལ་དྲི་བ་དང་ལན་གཉིས། དང་པོ་ནི།
ཚད་མ་རྣམ་འགྲེལ་གྱི་ལུས་ཡོངས་རྫོགས་རང་ལུགས་ལ་འགྲེལ་རྒྱུ་ཡོད་མེད་དང༌། མདོ་སྡེ་བའི་ལུགས་སུ་འགྲེལ་དགོས་བའི་གཞུང་ཚིག་ཡོད་དམ་ཇི་ལྟར་ཡིན་ཞེས་པའོ། །གཉིས་པ་ལན་ནི། གཞལ་བྱ་གཉིས་ཕྱིར་ཚད་མ་གཉིས། །ཞེས་པ་ནས། དོན་དམ་དོན་བྱེད་ནུས་གང༌། །དེ་འདིར་དོན་དམ་ཡོད་པ་ཡིན། །གཞན་ནི་ཀུན་རྫོབ་ཡོད་པ་སྟེ། །དེ་དག་རང་སྤྱིའི་མཚན་ཉིད་བཤད། །ཅེས་སོགས་ཚིག་འགའ་ཞིག་གི་ཚིག་ཟིན་འགའ་ཞིག་མདོ་སྡེ་བའི་ལུགས་ལ་འགྲེལ་དགོས་པ་དང༌། གཞུང་ཚིག་ཕར་ཆེར་གྱི་ཚིག་ཟིན་རང་ལུགས་ལ་འགྲེལ་དགོས་པར་སྣང་ངོ༌། །འོན་ཀྱང་ཚིག་ཡོངས་རྫོགས་བདག་གིས་ཞིབ་ཏུ་འདི་འབྲི་སྐབས་སུ་བལྟ་མ་ནུས་པས་བློ་གྲོས་དང་ལྡན་པ་རྣམས་ཀྱི་ལེགས་པར་དཔྱད་དགོས་སོ། །ཤཱཀྱ་བློའི་འགྲེལ་བཤད་ལས། རྣམ་འགྲེལ་ལུགས་བརྒྱ་ལྡན་པ་རྣམ་པར་དབྱེ་བར་བྱ། །ཞེས་གསུངས་པ་ལྟར་སྤྱིར་རྣམ་འགྲེལ་འདི་ལུགས་བརྒྱ་དང་ལྡན་པ་ཡིན་པས་རྒྱ་བོད་ཀྱི་མཁས་པ་རྣམས་ཀྱིས་ལུགས་དུ་མ་འགྲེལ་བ་ལྟར་ལུགས་དུ་མར་འགྲེལ་རྒྱུ་ཡོད་པ་ཡིན་པའོ། །༈ དྲིས་ལན་ཉེར་གསུམ་པ་ལ་གཉིས་ལས། དང་པོ་ནི། རྣམ་འགྲེལ་ལས། དོན་དམ་དོན་བྱེད་ནུས་པ་གང༌། །དེ་འདིར་དོན་དམ་ཡོད་པ་ཡིན། །གཞན་ནི་ཀུན་རྫོབ་ཡོད་པ་དེ། །དེ་ནི་རང་སྤྱིའི་མཚན་ཉིད་བཤད། །ཅེས་གསུངས་པའི་རང་སྤྱི་དང་རང་ལུགས་ཀྱི་རང་སྤྱི་འཇོག་ཚུལ་ཇི་ལྟར་ཡིན་ཞེས་པའོ། །གཉིས་པ་ལན་ནི།དོན་དམ་དོན་བྱེད་ནུས་པ་ཞེས་སོགས་ཀྱིས་སྐབས་ནས་བསྟན་པའི་རང་སྤྱི་ནི། རྣམ་འགྲེལ་གྱི་འགྲེལ་བ་རིན་ཆེན་འཕྲེང་བ་ལས་འདི་ལྟར་གསུངས་སྟེ། ཇི་སྐད་དུ། དོན་ལ་བཙོ་བསྲེག་བྱེད་བཞིན་པའི་མེ་གང་ཡིན་དེ་ཆོས་ཅན། འབྲས་བུ་དོན་གཉེར་གྱི་འཇལ་དུ་རུང་བ་ལ་དོན་དམ་དུ་བྱས་པ་ལུགས་འདིར་དོན་དམ་པར་ཡོད་པ་ཡིན་ཏེ། དེ་ཡི་ལུགས་ལ་དོན་དམ་པར་དོན་བྱེད་ནུས་པས་སོ། །འདུས་མ་བྱས་ནམ་མཁའ་ཆོས་ཅན། ཀུན་རྫོབ་ཏུ་ཡོད་དེ། དོན་བྱེད་པ་ལས་གཞན་ཏེ། དོན་མི་བྱེད་པར་བཏགས་པས་སྒོ་ནས་ཡོད་པས་སོ། །ཆོས་ཅན་སྔ་མ་དེ་ཆོས་ཅན། རང་མཚན་ཡིན་ཏེ། དོན་དམ་དུ་ཡོད་པའི་དངོས་པོ་ཡིན་པས་སོ། །ཆོས་ཅན་ཕྱི་མ་ཆོས་ཅན། སྤྱི་མཚན་ཡིན་ཏེ། ཀུན་རྫོབ་ཏུ་ཡོད་པས་སོ། །ཞེས་དང༌། ཡང་དེ་ལས། རང་མཚན་གྱི་འཇོག་བྱེད་ལ་རྩོད་པ་སྤང་བ་ནི། དབུ་མ་པ་ན་རེ། གལ་ཏེ་དོན་དམ་པར་དོན་བྱེད་ནུས་པ་རང་མཚན་གྱི་མཚན་ཉིད་དུ་མི་འགྱུར་ཏེ། དེ་རང་མཚན་ལ་མེད་པའི་ཕྱིར་རོ། །ཆོས་ཐམས་ཅད་དེ་གང་གི་ཡང་དོན་དམ་པར་འབྲས་བུ་བྱེད་པའི་ནུས་པ་མེད་པའི་ཕྱིར་ཞེ་ན། ཤེས་བྱ་ཆོས་ཅན། དོན་དམ་པར་དོན་བྱེད་ནུས་པ་མེད་པ་མ་ཡིན་པར་ཐལ། ས་བོན་རང་མཚན་སོགས་ནི་མྱུ་གུ་རང་མཚན་སོགས་ལ་ཕན་འདོགས་ནུས་པར་མཐོང་བས་སོ། །ཞེས་སོགས་གསུངས་པའི་ཕྱིར་རོ། །ཡང་ཡ་མ་རིའི་འགྲེལ་བ་ལས། ཞར་ལ་ཐེག་པ་ཐ་ཤལ་གྱི་བདེན་པ་གཉིས་ཀྱི་རྣམ་བཞག་བསྟན་པའི་ཕྱིར། ཞེས་སོགས་ལ་དཔྱད་པར་བྱའོ། །