དབོན་རིན་པོ་ཆེའི་ཞུས་ལན་རང་སྐྱོན་རྐུན་མ་མཛུབ་ཚུགས་ཀྱི་ཀ་ཕྲེང་།
༄༅། དབོན་རིན་པོ་ཆེའི་ཞུས་ལན་རང་སྐྱོན་རྐུན་མ་མཛུབ་ཚུགས་ཀྱི་ཀ་ཕྲེང་བཞུགས་སོ།།
ཀ་དག་གནས་ལུགས་ཕྱོགས་ཙམ་མ་མཐོང་བར། །ཁ་ལྟ་སྟོང་སྐད་རྒྱུ་འབྲས་ཁྱད་གསོད་མཁན། །ག་བུར་ཡལ་ལྟས་མདོ་མེད་མི་སེམས་པར། །ང་རྒྱལ་རང་མཐོང་ཟོབ་རྒན་སྤྲུལ་མིང་པ། །ཅ་རེ་མིག་གིས་ལྟ་སྟངས་མཐོན་པོར་བྱེད། །ཆ་མེད་བར་དོའི་འགྲོ་བ་འདྲེན་ནོ་སྐད། །ཇ་དར་ནོར་རྫས་སྒྱུ་མར་མི་སེམས་པར། །ཉ་མོ་རྒྱར་ཚུད་ཟོབ་རྒན་སྤྲུལ་མིང་པ། །ཏ་ཐཱ་ག་ཏའི་བསྟན་ལ་ཞུགས་ན་ཡང་། །ཐ་མལ་ངང་དུ་མི་ལུས་ཆུད་ཟོས་མཁན། །ད་ལྟ་མགྲོན་ལམ་ཙམ་དུ་མི་སེམས་པར། །ན་ཚོད་སྟོང་ཟད་ཟོབ་རྒན་སྤྲུལ་མིང་པ། །པ་པཾ་དཀོར་རྫས་སྡུད་ཕྱིར་གཡོ་སྒྱུ་མཁན། །ཕ་རོལ་འགྲོ་ངོར་ངན་སྦས་བཟང་རྫུ་མཁན། །བ་དྭགས་སྲོག་རྩ་ནམ་འཆད་མི་ཤེས་པའི། །མ་རབ་མཐོ་འདོད་ཟོབ་རྒན་སྤྲུལ་མིང་པ། །ཙ་རི་ལ་སོགས་གནས་ཆེན་ལྟ་ཅི་སྨོས། །ཚ་ཁང་ཆེན་པོ་ཙམ་ཡང་སྐོར་མ་མྱོང་། །ཛ་ཡའི་དགོངས་དོན་ཕྱོགས་ཙམ་མ་མཐོང་བའི། །ཝ་རྒན་མདོག་སྔོན་ཟོབ་རྒན་སྤྲུལ་མིང་པ། །ཞ་གྲུམ་ནད་ཀྱིས་གདུང་ཡང་དཀོར་ཕྱིར་རྒྱུག །ཟ་ཆོག་ཆེད་དུ་ལུས་སྲོག་གཏོང་ནུས་མཁན། །འ་འོལ་འདིར་སྣང་སྒྱུ་མར་མི་ཤེས་པའི། །ཡ་བོ་ཁྲེལ་མེད་ཟོབ་རྒན་སྤྲུལ་མིང་པ། །རྭ་གྱོང་སྣོད་དུ་བླུག་བཞིན་ཀུན་དང་འཐབ། །ལ་ལུང་ཀུན་དུ་སྤྲང་ཕྱིར་དལ་མེད་ཉུལ། །ཤ་གཟུགས་ཕུང་པོ་ནམ་འཐོར་མི་ཤེས་པའི། །ས་སྟོང་སྤྱང་ཀི་ཟོབ་རྒན་སྤྲུལ་མིང་པ། །ཧ་ལ་དུག་ལྔའི་མགོ་ཙམ་མ་ནོན་པར། །ཨ་ཏིའི་རྣལ་འབྱོར་རང་གྲོལ་ཡིན་མདོག་ཁ། །ཧ་ཅང་བཤད་ན་སྐྱོན་གྱི་གོང་བུ་སྟེ། །ཨ་ཏིའི་ཞ་བོ་ཟོབ་རྒན་སྤྲུལ་མིང་པ། །ཟོབ་རྒན་བརྒྱད་ཀྱིས་རང་གི་སྐྱོན། །རྐུན་མ་མཛུབ་བཙུག་གསལ་བྱེད་ཕྲེང་། །ལྷ་མོ་ཚེ་རིང་དེས་བསྐུལ་ངོར། །རང་རྒྱུད་བརྟག་ནས་བྲིས་པའོ།།