གཉིས་པ་འཛིན་རྟོག་ལ་མཚན་ཉིད།
གཉིས་པ་འཛིན་རྟོག་ལ་མཚན་ཉིད།
དབྱེ་བ་གཉིས། དང་པོ་འཛིན་རྟོག་གི་མཚན་ཉིད། རང་ཡུལ་འཛིན་པ་ལ་དམིགས་ནས་བདེན་པར་ཞེན་པའི་རིགས་གནས་ཀྱི་རྟོག་པ་དེ་ཡིན་ཏེ། མདོ་ལུགས་མ་ལས། འཛིན་པར་འཛིན་པ་ནི་འཛིན་རྟོག་གོ ། ཞེས་གསུངས་སོ། །སྐབས་འདིའི་དངོས་བསྟན་གྱི་རྟོག་པ་མཐོང་སྤང་ལ་སྦྱར་བར་བྱའོ། །
གཉིས་པ་དབྱེ་བ་ལ། རྫས་འཛིན་རྟོག་པ་དང༌། བཏགས་འཛིན་རྟོག་པ་གཉིས། དེ་གཉིས་ཀྱི་མཚན་ཉིད་རིམ་བཞིན། རང་གི་དམིགས་ཡུལ་སེམས་ཅན་རྫས་སུ་བདེན་པར་ཞེན་པའི་རིགས་གནས་ཀྱི་རྟོག་པ་དང༌། རང་གི་དམིགས་ཡུལ་སེམས་ཅན་བཏགས་པར་བདེན་པར་ཞེན་པའི་རིགས་གནས་ཀྱི་རྟོག་པའོ། །དེ་ལྟར་འཐད་དེ། མདོ་ལུགས་མ་ལས།སེམས་ཅན་རྫས་སུ་ཡོད་པར་ཞེན་པ་རྫས་འཛིན་དང༌། སེམས་ཅན་བཏགས་པར་ཡོད་པར་ཞེན་པ་བཏགས་འཛིན་གཉིས་སོ། །གཉིས་པོ་དེ་དག་སྟོན་པ་ནི། རྫས་དང་བཏགས་པའི་རྟེན་ཅན་གྱི། །འཛིན་པའང་རྣམ་པ་གཉིས་སུ་འདོད། །ཅེས་པ་ལ་སེམས་ཅན་རྫས་སུ་ཡོད་པའི་རྟེན་གྱི་འཛིན་པ་དང༌། སེམས་ཅན་བཏགས་པར་ཡོད་པའི་རྟེན་ཅན་གྱི་འཛིན་པ་རྣམ་པ་གཉིས་སུ་འདོད་དེ་བསྟན་ཏོ། །ཞེས་གསུངས་སོ། །དེ་གཉིས་རེ་རེ་ལ་ཡུལ་གྱི་སྒོ་ནས་དབྱེ་བ་དགུ་ཡོད་དེ། མདོ་ལུགས་མ་ལས། འཛིན་རྟོག་དེ་དག་རེ་རེ་ཡང་དགུ་དགུར་དབྱེ་བ་ནི། རང་དབང་བདག་སོགས་ངོ་བོ་དང༌། །ཕུང་སོགས་རྟེན་ལས་དེ་བཞིན་ནོ། །ཞེས་པ་ལ་རང་དབང་ཅན་དང༌། བདག་དང་སོགས་པའི་སྒྲས་སེམས་ཅན་ལ་སོགས་ངོ་བོ་རྟེན་གྱི་དབྱེ་བ་དགུ་ལས་དང༌། ཕུང་པོ་དང་སོགས་པའི་སྒྲས་ཁམས་དང་སྐྱེ་མཆེད་ལ་སོགས་རྟེན་གྱི་དབྱེ་བ་དགུ་ལས། རྟེན་ཅན་འཛིན་རྟོག་གཉིས་པོ་ཡང་སོ་སོར་དགུ་དགུར་དབྱེ་བ་ནི་ཇི་ལྟར་གཟུང་རྟོག་དབྱེ་བ་དེ་བཞིན་ནོ། །ཞེས་གསུངས་སོ། །རྫས་འཛིན་རྟོག་པའི་རྟེན་ནམ་དམིགས་ཡུལ་དགུ་ཡོད་དེ། རང་དབང་བའི་བདག་དང༌། ཆ་ཤས་མེད་པའི་གཅིག་པུའི་བདག་དང༌། རྣམ་ཤེས་སོགས་ཀྱི་རྒྱུའི་བདག་དང༌། ལྟ་བ་པོའི་བདག་དང༌། ཀུན་ནས་ཉོན་མོངས་པའི་རྟེན་གྱི་བདག་དང༌། འདོད་ཆགས་དང་བྲལ་བའི་རྟེན་གྱི་བདག་དང༌། མཐོང་བའི་རྟེན་གྱི་བདག་དང༌། སྒོམ་པའི་རྟེན་གྱི་བདག་དང༌། རང་གཞན་གྱི་དོན་བྱས་པའི་རྟེན་གྱི་བདག་དང་དགུའོ། །བཏགས་འཛིན་རྟོག་པའི་རྟེན་ནམ་དམིགས་ཡུལ་དགུ་ནི། བཏགས་ཡོད་ཀྱི་ཕུང་པོ་དང༌། བཏགས་ཡོད་ཀྱི་སྐྱེ་མཆེད་དང༌། བཏགས་ཡོད་ཀྱི་ཁམས་དང༌། བཏགས་ཡོད་ཀྱི་རྟེན་ཅིང་འབྲེལ་བར་འབྱུང་བ་དང༌། བཏགས་ཡོད་ཀྱི་རྣམ་པར་བྱང་བ་དང༌། བཏགས་ཡོད་ཀྱི་མཐོང་བའི་ལམ་དང༌། བཏགས་ཡོད་ཀྱི་སྒོམ་པའི་ལམ་དང༌། བཏགས་ཡོད་ཀྱི་ཁྱད་པར་ཅན་དང༌། བཏགས་ཡོད་ཀྱི་མི་སློབ་པའི་ལམ་དང་དགུ་ཡིན་ནོ། །མདོ་ལས་ཅི་སྒྱུ་མའི་སྐྱེས་བུ་འདི་ཤེར་ཕྱིན་ལ་བསླབས་ནས་རྣམ་མཁྱེན་དུ་ངེས་པར་འབྱུང་བར་འགྱུར་རམ། ཞེས་པ་ནས། སྒྱུ་མ་ཡང་གཞན་ལ་གཟུགས་ཀྱང་གཞན་ཞིག་ཡིན་སྙམ་མམ། ཞེས་སོགས་དང༌། ཉེ་བར་ལེན་པའི་ཕུང་པོ་ལྔ་པོ་འདི་དག་ལ་འདི་ལྟ་སྟེ། བྱང་ཆུབ་སེམས་དཔའ་ཞེས་བྱ་བར་མིང་དང་བརྡས་ཐ་སྙད་དུ་གདགས་སུ་ཡོད་དམ། ཞེས་པ་ནས། བཅོམ་ལྡན་འདས་འདི་ལྟར་ཕུང་པོ་ལྔ་པོ་གང་དག་ལགས་པ་དེ་ཉིད་སྒྱུ་མའི་སྐྱེས་བུར་རིག་པར་བགྱི་བ་ལགས་པའི་སླད་དུའོ། །ཞེས་པ་ལ་སོགས་གསུངས་པའི་དོན་ནི། མདོ་ལུགས་མ་ལས། འཛིན་རྟོག་འདི་དག་གཞན་དབང་ཡིན་པའི་ཕྱིར། །སྒྱུ་མ་ལ་སོགས་དཔེ་རྣམས་ཀྱིས། །གཞན་གྱི་དབང་ནི་ཡང་དག་བསྟན། །ཞེས་པའི་དོན་ཏོ། །སྡུད་པ་ལས། གཟུང་རྟོག་གི་སྐབས་སུ། གང་ཞིག་ཡོད་པ་མ་ཡིན་དེ་ནི་མེད་ཅེས་བྱ། །བྱིས་པ་རྣམས་ཀྱིས་དེ་བཏགས་ཡོད་དང་མེད་པར་བྱེད། །ཡོད་དང་མེད་པ་འདི་གཉིས་མེད་པའི་ཆོས་ཡིན་ཏེ། །བྱང་ཆུབ་སེམས་དཔའ་གང་གིས་འདི་ཤེས་ངེས་པར་འབྱུང༌། ། ཞེས་གསུངས་པ་ནི་ཆོས་ཐམས་ཅད་གཤིས་ལ་མེད་ཀྱང་ཐ་སྙད་དུ་གཟུང་རྟོག་གིས་ཡོད་པ་དང་མེད་པའི་ཆོས་སུ་འདོགས་པར་བྱེད་པས་ཆོས་ཐམས་ཅད་བཏགས་པ་ཙམ་དུ་དྲོད་རྩེ་ལ་གནས་པའི་བྱང་སེམས་གང་གིས་ཤེས་ཤིང་ཆོས་ཉིད་གཤིས་ལ་གནས་པར་མཐོང་བས་རྣམ་མཁྱེན་དུ་ངེས་པར་འབྱུང་ཞེས་པའི་དོན་ཏེ། འཕགས་པ་ཀླུ་སྒྲུབ་ཀྱི་ཞལ་སྔ་ནས་ཀྱང༌། ཇི་ལྟར་རི་བོང་མགོ་ཡི་རྭ། །བཏགས་པ་ཉིད་དེ་མེད་པ་ལྟར། །དེ་བཞིན་ཆོས་རྣམས་ཐམས་ཅད་ཀྱང༌། །བཏགས་པ་ཉིད་དེ་ཡོད་མ་ཡིན། །ཞེས་གསུངས་པ་དེ་ཡིན་ནོ། །སྡུད་པ་ལས། འཛིན་རྟོག་གི་སྐབས་སུ་ཡང༌། གང་འདིར་ཕུང་པོ་ལྔ་དག་སྒྱུ་མ་འདྲར་ཤེས་ཤིང༌། །སྒྱུ་མ་གཞན་དང་ཕུང་པོ་གཞན་དུ་མི་བྱེད་ལ། །སྣ་ཚོགས་འདུ་ཤེས་བྲལ་ཞིང་ཉེ་བར་ཞི་སྤྱོད་པ། །དེ་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །ཞེས་གསུངས་པ་ནི་བཟོད་པ་དང༌། ཆོས་མཆོག་ལ་གནས་པའི་བྱང་ཆུབ་སེམས་དཔའ་འཛིན་རྟོག་གི་ངོ་བོ་གཞན་དབང་སྒྱུ་མ་ལྟ་བུར་ཤེས་ཤིང་དེ་གཉིས་ཐ་དད་དུ་ཡིད་ལ་མི་བྱེད་པ་ལ་རྫས་དང་བཏགས་པའི་སེམས་ཅན་སྣ་ཚོགས་པའི་འདུ་ཤེས་བྲལ་ཞིང་འཛིན་རྟོག་ཉེ་བར་ཞི་བ་སྤྱོད་པ་དེ་ཤེར་ཕྱིན་མཆོག་སྤྱོད་པ་ཡིན་ཞེས་པའི་དོན་ཏོ། །ཞེས་གསུངས་སོ། །སྐབས་འདིར་དངོས་བསྟན་གྱི་རྟོག་པ་བཞི་ཐེག་ཆེན་དྲོད་སོགས་བཞིས་རིམ་བཞིན་ཉམ་སྨོད་བྱ་དང༌། མཐོང་སྤང་ཡིན་ཏེ། མདོ་ལུགས་མ་ལས། བྱང་ཆུབ་སེམས་དཔའ་འགྲོ་བ་ཐམས་ཅད་སྐྱོབ་པའི་བསམ་པ་ཅན་དེའི་སྦྱོར་ལམ་དྲོད་དང་སོགས་པའི་སྒྲས་བསྡུས་པ་རྩེ་མོ་དང་བཟོད་པ་དང་ཆོས་མཆོག་གི་བདག་ཉིད་བཞི་པོ་གོ་རིམ་ཇི་ལྟ་བ་བཞིན་དུ་ལྡོག་པའི་གཟུང་རྟོག་དང་འཇུག་པའི་གཟུང་རྟོག་དང་རྫས་སུ་འཛིན་པའི་རྣམ་རྟོག་དང༌། བརྟགས་པར་འཛིན་པའི་རྣམ་རྟོག་བཞི་པོ་སྤང་བྱར་ལྡན་ཅིང༌། ཞེས་དང༌། ཉ་ཊཱིཀ་ལས། དེས་ན་འདིར་བཤད་རྟོག་པ་བཞི་མཐོང་སྤང་དུ་ཁས་བླང་དགོས་ཏེ་ཨཱརྱས་སོ། །ཞེས་གསུངས་པས་སོ། །