གཉིས་པ་མཐོ་རིས་ཀྱི་སྡུག་བསྔལ་བསམ་པ།

གཉིས་པ་མཐོ་རིས་ཀྱི་སྡུག་བསྔལ་བསམ་པ་ལ།

མིའི་སྡུག་བསྔལ་དང༌། ལྷ་མིན་གྱི་སྡུག་བསྔལ་དང༌། ལྷའི་སྡུག་བསྔལ་བསམ་པ་དང་གསུམ་ལས། དང་པོ་ནི། བདག་ལས་ཀྱི་དབང་གིས་འགྲོ་བ་རིགས་དྲུག་ཏུ་སྐྱེ་བ་ལེན་པར་འགྱུར་པ་ལས་ངན་སོང་གསུམ་དུ་སྐྱེས་ན་སྡུག་བསྔལ་ནི་དེ་འདྲ། བླང་དོར་རབ་གསལ་ལས། མངལ་ནས་སྐྱེ་བ་དོག་པའི་སྡུག་བསྔལ་དང༌། །ན་ཚོད་འགྱུར་བ་རྒས་པའི་སྡུག་བསྔལ་དང༌། །ཁམས་འགྱུར་བ་ལས་ན་བའི་སྡུག་བསྔལ་དང༌། །སྲོག་འགྱུར་བ་ལས་འཆི་བའི་སྡུག་བསྔལ་དང༌། །ཞེས་གསུངས་པ་ལྟར་མིར་སྐྱེས་ན་སྐྱིད་དོ་སྙམ་ན་དེར་ཡང་མི་སྐྱིད་དེ་མི་ལ་སྡུག་བསྔལ་གྱི་གཙོ་བོ་སྐྱེ་རྒ་ན་འཆིའི་སྡུག་བསྔལ་བཞི་ཡོད་པ་ལས།