དྲིས་ལན་ཉེར་བཞི་བ་ལ་གཉིས་ལས།
དྲིས་ལན་ཉེར་བཞི་བ་ལ་གཉིས་ལས།
དང་པོ་དྲི་བ་ནི། རྣམ་འགྲེལ་ལས།དྲན་པ་ལས་ཀྱང་རང་རིག་གྲུབ། །ཅེས་སོགས་ཀྱི་སྐབས་ནས་བསྟན་པའི་རང་རིག་སྒྲུབ་བྱེད་ཀྱི་རིགས་པ་གྲགས་ཆེ་བ་རྣམས་གང་ཡིན་ཞེས་པའོ། །གཉིས་པ་ལན་ནི། རང་རིག་སྒྲུབ་བྱེད་ཀྱི་རིགས་པ་རྣམ་འགྲེལ་ལས་བཤད་པ་གྲགས་ཆེ་བ་གསུམ་ཡོད་དེ། དམིགས་མྱོང་སོ་སོར་འབྱེད་པའི་རིགས་པ་དང༌། གསལ་བའི་རང་བཞིན་གྱི་རིགས་པ་དང༌། དུས་ཕྱིས་དྲན་པའི་རིགས་པ་དང་གསུམ་ཡོད་པའི་ཕྱིར་རོ། །དང་པོ་ནི་རྣམ་འགྲེལ་ལས།དེས་ན་ཤེས་པ་ཐམས་ཅད་ཀྱི། །དམིགས་མྱོང་དག་ནི་ཐ་དད་ཡིན། །དོན་དང་འདྲ་བ་དམིགས་པ་སྟེ། །རང་ཉིད་གསལ་བ་བདག་མྱོང་ཡིན། །ཞེས་དང༌། རྣམ་འགྲེལ་གྱི་འགྲེལ་བཤད་རིན་ཆེན་ཕྲེང་བ་ལས། གཞན་གྱི་བདེ་སྡུག་དམིགས་པའི་འཕགས་ཆེན་ཆོས་ཅན། གཞན་གྱི་སྡུག་བསྔལ་དང་བདེ་བས་གདུང་དང་ཕན་འདོགས་པའི་རྒྱུ་མིན་ཏེ། གཞན་གྱི་སྡུག་བསྔལ་སོགས་མྱོང་བ་མ་ཡིན་པའི་ཕྱིར། དེས་ན། དེ་ཆོས་ཅན། གཞན་གྱི་སྡུག་བསྔལ་ལ་སོགས་མྱོང་བ་དེ་ལྟར་ཐལ་བར་མི་འགྱུར་ཏེ། དེ་དམིགས་པ་ཙམ་གྱིས་ཤེས་པ་ཡིན་གྱི་སྡུག་བསྔལ་བྱའི་ངོ་བོར་མ་སྐྱེས་པའི་ཕྱིར། དེས་ན། ཤེས་བྱ་ཆོས་ཅན།ཡང་ན་ཤེས་པ་ཐམས་ཅད་ཀྱི་དམིགས་མྱོང་དག་ནི་ཐ་དད་ཡིན་ཏེ། དོན་དང་འདྲ་བ་དམིགས་པ་ཡིན་ལ་ཆོས་དེ་མྱོང་ན་ཆོས་དེ་ཡི་ངོ་བོ་གསལ་དགོས་པས་སོ། །ཞེས་གསུངས་ལ། དེའི་དོན་སྦྱོར་ནི། སྔོ་འཛིན་མིག་ཤེས་ཆོས་ཅན། ཁྱོད་ཀྱི་དམིགས་པ་དང་མྱོང་བ་ཐ་དད་པ་ཡིན་ཏེ། དམིགས་བྱ་སྔོན་པོའི་ངོ་བོར་མ་སྐྱེས་ཀྱང་དེ་དང་འདྲ་བ་དེ་ལ་དམིགས་པ་དང༌།མྱོང་བྱེད་རང་ཉིད་མྱོང་བྱའི་ངོ་བོར་གསལ་བར་སྐྱེས་པས་མྱོང་བྱ་དེ་མྱོང་བར་འཇོག་དགོས་པའི་ཕྱིར། དཔེར་ན་རྣལ་འབྱོར་བའི་རྒྱུད་ཀྱི་གཞན་རྒྱུད་ཀྱི་སྡུག་བསྔལ་ལ་དམིགས་པའི་ཤེས་པ་དེས་སྡུག་བསྔལ་དམིགས་ཀྱང་དེ་མ་མྱོང་བ་བཞིན་ནོ། །གཉིས་པ་གསལ་བའི་རང་བཞིན་གྱི་རིགས་པ་ནི། རྣམ་འགྲེལ་ལས། དེའི་ཕྱིར་ངེད་ཀྱི་བློ་རང་ཉིད། །གསལ་བའི་ངོ་བོར་རབ་གསལ་ཞིང༌། །གཞན་དེར་ངོ་བོ་འཕོ་བ་ཡིས། །གསལ་བ་ན་ནི་རབ་གསལ་ཉིད། །ཅེས་སོ། །རྣམ་འགྲེལ་འགྲེལ་བཤད་རིན་ཆེན་ཕྲེང་བ་ལས། དེ་འདྲའི་སྐྱོན་ཡོད་པ་དེ་ཡི་ཕྱིར་ངེད་ཀྱི་ལུགས་ལ་བློ་ཆོས་ཅན། རང་ཉིད་རབ་ཏུ་གསལ་བ་ཡིན་ཏེ། གཟུགས་གསལ་བའི་ངོ་བོ་སྟེ་རིག་པ་ཡིན་པས་སོ། །གཞན་གཟུགས་སོགས་ཆོས་ཅན། གསལ་བ་ཡིན་ཞེས་ཐ་སྙད་གདགས་སུ་རུང་བ་ཡིན་ཏེ། དབང་ཤེས་དེར་ངོ་བོས་ཏེ་རྣམ་པ་འཕོ་བའི་སྒོ་ནས་གསལ་བོ་ཞེས་བཞག་པའི་ཕྱིར། །བློ་གཞན་སྔ་མ་ཆོས་ཅན། ཕྱི་བློ་དང་འདྲ་བ་ཡིན་ཡང་ཕྱི་བློ་དེ་ཡིས་ནི། ཁྱོད་གསལ་བར་མི་འདོད་དེ། རང་ཉིད་རབ་ཏུ་གསལ་བའི་ཕྱིར་རོ། །འོ་ན་དོན་དང་འདྲ་བས་དོན་ཇི་ལྟར་གསལ་ཞེ་ན། མིག་ཤེས་སོགས་ཆོས་ཅན། གཟུགས་སོགས་དངོས་སུ་མྱོང་ནས་རིག་པ་མ་ཡིན་ཏེ། དེ་ཡི་ངོ་བོ་རབ་གསལ་ཏེ་གཟུགས་སོགས་ཀྱི་རྣམ་པར་སྣང་བ་དེ་མྱོང་བ་ཡིན་པས་སོ། །རང་གསལ་ན་གཞན་གྱི་གསལ་མི་དགོས་པ་སྒྲོན་མེ་གཉིས་བཞིན་ནོ། །ཤེས་བྱ་ཆོས་ཅན། རང་མི་གསལ་བར་གཞན་གྱི་གསལ་དགོས་ན་གསལ་བྱ་གསལ་བྱེད་འཐད་དེ། དཔེར་ན་མར་མེ་ནས་རྒྱས་པར་བྱེད་པའི་བར་བཞིན་ནོ། །ཞེས་གསུངས་ལ། དེའི་དོན་སྦྱོར་ནི། དཔལ་ཆོས་ཀྱི་གྲགས་པ་ངེད་ཀྱི་ལུགས་ལ་སྔོ་འཛིན་ཆོས་ཅན། གསལ་བའི་བདག་ཉིད་དུ་འཇོག་པའི་ཚུལ་རྣམ་པ་གཉིས་ཡོད་དེ། རང་ཉིད་གསལ་བའི་ངོ་བོར་རབ་ཏུ་སྐྱེས་པས་རང་ཉིད་གསལ་ཞིང་སྔོ་སོགས་ཤེས་པ་དེ་ཡིས་རྣམ་པའི་ངོ་བོར་འཕོ་བ་ཡིས་ཡུལ་རབ་ཏུ་བྱེད་པའི་ཕྱིར། གཏན་ཚིགས་དེའི་གནད་ནི། ཀུན་རྫོབ་ཀྱི་ཤེས་པ་རང་ཉིད་གསལ་བའི་ངོ་བོར་གྲུབ་པ་ལ་གསལ་བྱ་གསལ་བྱེད་གཉིས་དགོས་པས་ན་གསལ་བྱེད་རང་གི་བདག་ཉིད་ལས་འོས་མེད་པས་རང་རིག་ངེས་པར་འཇོག་དགོས་པར་བཞེད་པ་འདྲའོ། །གསུམ་པ་ནི།ཚད་མ་ཀུན་བཏུས་ལས། དུས་ཕྱིས་དྲན་པ་ལས་ཀྱང་སྟེ། །ཚུལ་གཉིས་དང་ནི་རང་རིག་གྲུབ། །མ་མྱོང་བས་འདི་མེད་ཕྱིར་རོ། །ཞེས་དང༌། རྣམ་འགྲེལ་ལས། དྲན་པ་ལས་ཀྱང་བདག་རིག་གྲུབ། །ཅེས་དང༌། རྣམ་འགྲེལ་འགྲེལ་བཤད་རིན་ཆེན་ཕྲེང་བ་ལས།དབང་ཤེས་ལྔ་ཆོས་ཅན། བདག་རིག་སྟེ། སྒྲ་སོགས་རྟོགས་པའི་དོན་རྟོགས་སོ་སོར་དྲན་པས་སོ། །ཞེས་པ་ལས་ཀྱང་བདག་རིག་གྲུབ་བོ། །ཞེས་གསུངས་ལ། །དེའི་དོན་སྦྱོར་ནི།སྔོ་འཛིན་ཆོས་ཅན། མྱོང་བྱེད་ཡོད་དེ། དུས་ཕྱིས་དྲན་པ་ཡོད་པའི་ཕྱིར་ཞེས་པའོ། །གཞན་ཡང་རྣམ་འགྲེལ་ལས། ཚུལ་གཉིས་སྒྲུབ་པར་བྱེད་པས་ཀྱང༌། །རང་རིག་ཕལ་ཆེར་གྲུབ་པ་ཡིན། །ཞེས་སོགས་རང་རིག་སྒྲུབ་བྱེད་དུ་མ་ཡོད་དོ། །ཐེག་ཊཱིཀ་ལས། ཡུལ་ཡུལ་ཅན་གྱི་དབྱེ་བ་ཡོད་ཕྱིན་ཆད་རང་རིག་ཏུ་མི་འགྲུབ་སྟེ། ཞེས་དང༌། གཙུག་ན་རིན་པོ་ཆེས་ཞུས་པའི་མདོ་ལས། དེ་སེམས་ཀུན་ཏུ་ཚོལ་བ་ན། ཞེས་པ་ནས། ཅི་དམིགས་པ་དེ་ཡང་གཞན་ལ་སེམས་དེ་ཡང་གཞན་ནམ། འོན་ཏེ་དམིགས་པ་གང་ཡིན་པ་དེ་ཉིད་སེམས་ཡིན།གལ་ཏེ་དམིགས་པ་ཡང་གཞན་ལ་སེམས་ཀྱང་གཞན་ན་སེམས་དེ་གཉིས་སུ་འགྱུར་རོ། །འོན་ཏེ་དམིགས་པ་གང་ཡིན་པ་དེ་སེམས་ཡིན་ན་སེམས་ཀྱིས་སེམས་ཇི་ལྟར་མཐོང་བར་འགྱུར་ཏེ། འདི་ལྟ་སྟེ། དཔེར་ན་རལ་གྲིའི་སོ་དེ་ཉིད་ཀྱིས་རལ་གྲིའི་སོ་དེ་ཉིད་གཅོད་པར་མི་ནུས་པ་དང༌། སོར་མོའི་རྩེ་མོ་དེ་ཉིད་ཀྱིས་སོར་མོའི་རྩེ་མོ་དེ་ཉིད་ལ་རེག་པར་མི་ནུས། ཞེས་སོགས་དང༌། སྤྱོད་འཇུག་ལས། འཇིག་རྟེན་གྱི་ནི་མགོན་པོས་ཀྱང༌། །སེམས་ཀྱིས་སེམས་མི་མཐོང༌། ཞེས་དང༌། རལ་གྲིའི་སོ་ནི་རང་ལ་རང༌། །ཇི་ལྟར་མི་གཅོད་དེ་བཞིན་ཡིད། །ཞེས་སོགས་ཀྱི་དོན་ལ་དཔྱད་པར་བྱའོ། །སྨྲས་པ། ངེས་དོན་མདོ་དང་ཚད་མའི་གཞུང་བརྒྱ་ཡི། །དགོངས་དོན་ཇི་བཞིན་བཤད་པའི་དྲི༷ས་ལ༷ན་ཀུན། །མ་ནོར་ར༷བ་ཏུ་གས༷ལ་བའི་སྒྲོ༷ན་མེ༷་འདི། །འདོ༷ད་འཇོ༷འི་དཔ༷ག་བས༷མ་ལྗོན་འདི་སྲིད་འདིར་མཛེས། །བློ་གྲོས་ཡངས་པའི་ཀུན་གསལ་ལས་འོངས་པའི། །ལེགས་བཤད་ཉིན་བྱེད་གསལ་བའི་འོད་ཟེར་གྱིས། །བློ་ལྡན་དོན་གཉེར་མི་ཤེས་མུན་བསལ་ནས། །དཔལ་ཡོན་པདྨའི་དགའ་ཚལ་རྒྱས་གྱུར་ཅིག ། གལ་ཏེ་ལོག་བཤད་འཁྲུལ་པའི་ཆ་མཆིས་ན། །ཆོས་ཀུན་གཟིགས་པ་རྣམས་ཀྱིས་བཟོད་མཛད་དེ། །ལེགས་ཆ་མཆིས་ན་ལེགས་བཤད་གཟིགས་པ་རྣམས། །དགའ་བས་ལེགས་བཤད་འཕེལ་བར་མཛད་དུ་གསོལ། །རྒྱལ་བ་ཀུན་གྱི་ཐུགས་རྗེའི་བྱིན་བརླབས་དང༌། །རྒྱལ་བའི་དམ་ཆོས་བསླུ་མེད་བདེན་པ་དང༌། །རྒྱལ་བའི་ཐུགས་སྲས་ཀུན་གྱི་ཐུགས་རྗེ་ཡིས། །རྒྱལ་བའི་ལུང་རྟོགས་བསྟན་པ་རྒྱས་གྱུར་ཅིག ། བདག་ཀྱང་འཁོར་ཚེ་ཚེ་རབས་ཐམས་ཅད་དུ། །ཚུལ་གནས་ཐོས་བསམ་སྒོམ་གསུམ་རབ་བརྩོན་ཏེ། །འཆད་རྩོད་རྩོམ་པས་རྒྱལ་བསྟན་གསལ་བྱེད་ཅིང༌། །ལེགས་བཤད་ཆར་གྱིས་འགྲོ་ཀུན་ཚིམ་པར་ཤོག །ཅེས་ཇོ་ནང་ཤམྦྷ་ལའི་ངེས་གསང་གཞན་སྟོང་དབུ་མ་ཆེན་པོའི་བགྲོ་གླེང་ཐེངས་བཞི་པའི་དྲིས་ལན་འདོད་འཇོའི་དཔག་བསམ་ཞེས་བྱ་བ་འདི་ནི་ངག་དབང་དངོས་གྲུབ་དཔལ་ལམ་དབྱངས་ཅན་ངག་གི་རོལ་མཚོས་བྲིས་པའོ། །རྒྱལ་བསྟན་ཕྱོགས་དུས་ཀུན་ཏུ་དར་ཞིང་རྒྱས་པར་གྱུར་ཅིག །ཛ་ཡནྟུ།