གསུམ་པ་ཀུན་སྤྱོད་སྤྱི་ལ་ང་རྒྱལ་སྤང་བར་བསྟན་པ།

གསུམ་པ་ཀུན་སྤྱོད་སྤྱི་ལ་ང་རྒྱལ་སྤང་བར་བསྟན་པ་ནི།

བསྙེན་བཀུར་སྤྱོད་པ་ཐམ་ཅད་ལ། །ཡིད་ནི་ང་རྒྱལ་མེད་པར་བྱ། །ངོ་ཚ་འཇིགས་ཤིང་བསྡམས་པ་ཡིས། །བག་མ་གསར་པའི་ཚུལ་གནས་བྱ། །སྒེག་པ་ལ་སོགས་བྱ་བ་ཀུན། །སྟོན་པའི་མདུན་དུ་སྤང་བར་བྱ། ། གཞན་ཡང་དེ་འདྲའི་བྱ་བ་ནི། །རང་གིས་བརྟགས་ལ་དོར་བར་བྱ། །ཞེས་བསྙེ༷ན་བཀུ༷ར་སོགས་སྤྱོ༷ད་པ༷་ཐ༷མས་ཅ༷ད་བྱེད་པ་ལ༷་ཡི༷ད་ནི༷་ང༷་རྒྱ༷ལ་མེ༷ད་པ༷ར་གུས་པའི་སྒོ་ནས་བྱ་དགོས་སོ། །རྣམ་པ་ཀུན་ཏུ་ངོ༷་ཚ༷་ཞིང་བག་འཛེམ་དང་ལྡན་པས།ཚུལ་དང་མི་མཐུན་པ་ལ་ནི་འཇི༷གས་ཤི༷ང་སྒོ་གསུམ་ལེགས་པར་བསྡ༷མས་པ༷་ཡི༷ས་དཔེ་ནི་བ༷ག་མ༷་གས༷ར་པ༷འི་སྤྱོད་ལམ་མ་ཉམས་པའི་ཚུ༷ལ་བསྲུང་བ་བཞིན་དུ་གན༷ས་པར་བྱ༷་ཞིང་ཆས་འཆོར་པོ་སྣང་ཤས་ཅན་གྱིས་སྒེ༷ག་པ༷་ལྷུར་ལེན་པ་ལ༷་སོ༷གས་པའི་བྱ༷་བ༷་ཧ་ཅང་ངོ་སོ་མཐོ་བ་ཀུ༷ན་རང་ལ་ལམ་སྟོ༷ན་པར་གྱུར་པ༷འི་བླ་མའི་སྐུ་མདུ༷ན་དུ༷་སྤ༷ང་པ༷ར་བྱ༷་ཞིང་དེ་ལས་གཞ༷ན་ཡ༷ང་ང་རྒྱལ་དང་སྒེག་ཆོས་སུ་གྱུར་བ་དང་དེ༷་དང་འདྲ༷་བའི་ཀུན་སྤྱོད་མི་རིགས་པའི་བྱ༷་བ༷་ནི༷་ར༷ང་གི༷་བློ༷ས་བརྟ༷གས་ལ༷་མི་རུང་བ་ཐམས་ཅད་དོ༷ར་བ༷ར་བྱ༷་ཞེས་པའི་དོན་ཏོ། །