གཉིས་པ་སྡོམ་པ་ཐོབ་དུས་བརྗོད་པ།

གཉིས་པ་སྡོམ་པ་ཐོབ་དུས་བརྗོད་པ་ནི།

རྩ་བར། དེ་མ་ཐག་ཏུ་གྲིབ་ཚོད་རིག་པར་བྱའོ་ཞེས་པ་ལ་སོགས་པས་བསྟན་ཏེ། འདིའི་དོན་ལ་དྲུག་ལས། དང་པོ་དགོས་པའི་དོན་ནི། བསླབ་པ་རྒན་གཞོན་མཉམ་གསུམ་གྱི་ཚུལ་ཁྲིམས་བདེ་བླག་ཏུ་རྟོགས་པ་དང༌། སྡོམ་པ་ཐོབ་དུས་མ་བརྗོད་པའི་ཉེས་པ་ཁེགས་པའོ། །གཉིས་པ་ཡུལ་གང་ལ་བརྗོད་པ་ནི་གསར་དུ་རབ་ཏུ་བྱུང་བའམ། སྐབས་འདིར་ནི་གསར་དུ་བསྙེན་པར་རྫོགས་པ་ལའོ། །གསུམ་པ་རྟེན་གང་གིས་བརྗོད་པ་ནི། དགེ་ཚུལ་གྱི་སྐབས་སུ་སློབ་དཔོན་ལས་གཞན་པའི་དགེ་སློང་གང་ཡང་རུང་བས་བརྗོད་དེ་ལུང་དང་ཀརྨ་ཤ་ཏཾ་ལས། སློབ་དཔོན་མ་ཡིན་པ་དགེ་སློང་གཞན་གང་ཡང་རུང་བ་གཅིག་གིས་གྲིབ་ཚོད་གཞལ་བར་བྱ་ཞིང་སྐྱེས་བུ་དང་རྩ་བ་དང་ཉིན་མཚན་གྱི་ཆ་དང་དུས་ཚོད་ཀྱང་བརྗོད་པར་བྱའོ། །ཞེས་གསུངས་སོ། །དགེ་སློང་གི་སྐབས་སུ་ལས་ཀྱི་སློབ་དཔོན་ལས་གཞན་པའི་དགེ་སློང་གང་ཡང་རུང་བས་བརྗོད་དེ། ཀརྨ་ཤ་ཏཾ་ལས། དགེ་སློང་ལས་བྱེད་པ་མ་ཡིན་པ་གཞན་གང་ཡང་རུང་བ་གཅིག་གིས་གྲིབ་ཚོད་དེ་གཞལ་བར་བྱ་ཞིང་བརྗོད་པར་བྱའོ། །ཞེས་དང༌། གཞི་འགྲེལ་ལས། གྲིབ་ཚོད་གཞལ་བ་དེ་ནི་དགེ་སློང་གང་ཡང་རུང་བ་གཞན་གྱིས་བྱའི། དགེ་སློང་ལས་བྱེད་པས་མི་བྱ་སྟེ། འདི་ལྟར་དེས་ནི་གནས་བརྗོད་པ་ལ་སོགས་པ་སྐབས་ལྷག་མ་དག་བྱ་དགོས་པས་སྟན་ལས་ལྡང་བར་མི་རིགས་པའི་ཕྱིར་རོ། །ཞེས་གསུངས་སོ། །