དམ་པའི་རྟགས་སྟོན་གྱི་ཀ་ཕྲེང་ཙན་དན་དྲི་བསུང་།
༈ དམ་པའི་རྟགས་སྟོན་གྱི་ཀ་ཕྲེང་ཙན་དན་དྲི་བསུང་བཞུགས།
ཡང་ཅིག་བཟང་པོའི་ལོ་རྒྱུས་ཤིག །འབྲི་དགོས་ཟེར་བས་རང་བསྟོད་ངག །ཙན་དན་བསུང་ཞིམ་ཞེས་བྱ་བའི། །ཀ་ཕྲེང་འདི་ཡིན་ལྟོས་ཤིག་ཀྱེ། །ཀ་དག་ཆོས་སྐུ་དྲུག་པ་རྡོ་རྗེ་འཆང་། །ཁ་བ་ཅན་གྱི་སྐྱབས་མགོན་རྫོགས་ཆེན་པས། །ག་དར་སྨིན་གྲོལ་གདམས་པས་དབུགས་དབྱུང་མཛད། །ང་རང་དམ་པའི་སྐྱེས་བུར་བཏགས་ཀྱང་ཆོག །ཅ་ཅོ་བྱིས་པའི་དུས་ནས་ཆོས་ལ་ཞུགས། །ཆ་ཙམ་ཆོས་ལ་ཐོས་བསམ་བྱེད་ལོ་བྱས། །ཇ་ཧོང་གོས་འཆང་ཁྱིམ་པའི་གྲལ་ནས་བུད། །ཉ་ཟླ་ལྟར་གསལ་བཙུན་པར་བཏགས་ཀྱང་ཆོག །ཏ་ཐཱ་ག་ཏའི་བསྟན་ལ་ཞུགས་ནས་བཟུང་། །ཐ་ཆད་འདི་ཕྱི་བརྗེ་བའི་ལས་མ་བྱས། །ད་ལྟ་མཆོག་གསུམ་བླ་མར་འབྲལ་མེད་ངང་། །ན་རྒ་ཤི་སྐྱིད་རྣལ་འབྱོར་བཏགས་ཀྱང་ཆོག །པ་པཾ་སྡིག་ཟས་དཀོར་ནག་སྡུད་ཆེ་ཡང་། །ཕ་རོལ་འགའ་ཞིག་ཆུད་ཟོས་ཆེར་མ་བྱས། །བ་ལྟར་བླུན་པོ་མུན་ནག་མདའ་འཕེན་མིན། །མ་ནོར་ལམ་སྟོན་བླ་མར་བཏགས་ཀྱང་ཆོག །ཙ་རི་ལ་སོགས་གནས་ལ་མ་བསྐོར་ཞིང་། །ཚ་གྲང་དཀའ་སྤྱད་སྡུག་རྒུར་མ་བྱས་ཀྱང་། །ཛ་ཡ་རྒྱལ་དབང་པདྨས་རྗེས་བཟུང་མཐུས། །ཝ་ལེར་ཐུགས་གཏེར་མཛོད་འཛིན་བཏགས་ཀྱང་ཆོག །ཞྭ་ལྷམ་གདན་ཆས་དྲིལ་སོགས་རང་ཚོད་ཙམ། །ཟ་ཚོགས་རྙེད་ཕྱིར་བསྒྲིགས་ན་འགྲུབ་སྲིད་ཀྱང་། །འ་འོལ་འདིར་སྣང་བདེན་མེད་མཚང་རིག་ཕྱིར། །ཡ་མཚན་གང་བྱུང་བྱ་བཏང་བཏགས་ཀྱང་ཆོག །རྭ་ལྟར་གྱོང་པོའི་ཚུལ་དུ་བསྟན་ནའང་། །ལ་ལུང་གཉེན་དང་དགྲ་སོགས་ངོ་མཉམ་ཕྱིར། །ཤ་ཟ་ལྟ་བུའི་གནོད་སེམས་འཆང་སྙམ་མེད།།ས་ཐོབ་སེམས་དཔའི་སྤྲུལ ་བར་བཏགས་ཀྱང་ཆོག །ཧ་ཅང་ཁ་ལྟ་མཐོན་པོ་མ་ཡིན་ཀྱང་། །ཧ་ལམ་རང་རྒྱུད་བརྟག་པའི་གཏམ་འདི་ཉིད། །ཨ་ཧོ་ཁྱེད་རང་དགའ་ཕྱིར་སྨྲས་པ་སྟེ། །ཨ་མཚར་རྩེད་མོའི་ཚུལ་དུ་བཏགས་ཀྱང་ཆོག །བཏགས་ཀྱང་ཆོག་པ་བརྒྱད་ཀྱི་ཀ །དམ་པའི་རྟགས་སྟོན་ཙན་དན་དྲིའི། །བསུང་ཞིམ་ཞེས་འདི་གྱི་ན་བ། །རྒྱ་སྤྲུལ་ཞེས་བྱས་བྲིས་པ་དགེ།།